ཀོ་ལི་གྷ་གཞིས་ཆགས་གཞུང་པ་ཚེ་དབང་བསོད་ནམས།
ཀ་ཡེ་གསོན་དང་གྲོས་ཚོགས་འཐུས་མི་ཚོ།།
ཁ་རྩོད་ཉུང་ལ་ཁྲིམས་བཟོའི་འགན་ཁུར་བཞེས།།
ག་བཏང་གོ་ཆོད་མི་མང་འཐུས་མི་ཚོ།།
ང་ཚོ་མི་མང་རེ་ས་རྒྱང་བལྟ་མྱུལ།།
ཅ་ཅོ་མང་བའི་གྲོས་ཚོགས་ལས་རིམ་ལ།།
ཆ་ཚང་བལྟ་རྒྱུའི་དུས་ཚོད་མ་ཁོམ་ཡང་།།
ཇ་འཐུང་ཟས་ལས་ཞོར་གྱི་མཐོང་ཐོས་བརྒྱུད།།
ཉ་ཉོག་མང་བའི་གྲོས་ཚོགས་ལས་རིམ་དེ།།
རྟ་གསར་བྱང་ཐང་རི་བསྐོར་ལུང་བསྐོར་འདྲ།།
ཐ་དད་མ་བསམ་མི་མང་ལས་དོན་རེད།།
ད་ནས་བཟུང་ཏེ་ལེགས་ཆ་སྤེལ་རེས་མཛོད།།
ན་གཞོན་འཐུས་མིའི་ཐུགས་ལ་དེ་ལྟར་ཞོག །
པ་ཕ་འདྲ་བའི་གྲོས་ཚོགས་འཐུས་མི་དང་།།
ཕ་མ་འདྲ་བའི་འཛིན་སྐྱོང་སྡེ་ཚན་གཉིས།།
བ་ཚྭ་ཅན་གྱི་ས་ལ་མ་བཞུགས་པར།།
མ་ཚང་མ་འཐུས་ཡོད་སར་ཁྲིམས་སྒྲིག་བཟོས།།
རྩ་བ་མང་གཙོ་ཁྲིམས་ཀྱི་ལམ་སྟོན་ཟབ།།
ཚ་བའི་ཡུལ་དུ་མང་གཙོ་སྲ་བརྟན་བཙུགས།།
ཛ་བརྩེ་ལྡན་པའི་གཞིས་བྱེས་མཉམ་འཛོམས་སྐབས།།
ཝ་ལེར་བློ་ལ་འཇགས་ནས་གཞུང་སྲིད་སྐྱོང་།།
དགོད་བྲོ་ཆེ་བའི་གྲལ་རིམ་དམངས་གཙོ་དེ།།
ཟ་འཐུང་ལོངས་སྤྱོད་མེད་ཀྱང་བོད་ལ་མིན།།
འ་འུབ་མི་འདུས་རྒྱ་ནག་དམངས་གཙོ་དང་།།
ཡ་རབས་ཅན་གྱི་ནུབ་གླིང་མང་གཙོ་གཉིས།།
ར་ལུག་འདྲ་བའི་གནམ་སའི་ཁྱད་པར་ཡོད།།
ལ་ལའི་མང་གཙོ་ལ་ལའི་དམངས་གཙོ་འབོད།།
ཤ་ཚ་ཡོད་ན་མི་མང་མང་གཙོ་རེད།།
ས་ཆ་འདི་རུ་དམངས་གཙོའི་དགོོས་པ་མེད།།
ཧ་ཧ་མང་གཙོ་དམངས་གཙོ་དོན་གཅིག་བསམ།།
ཨ་ཁ་རང་བཙན་རང་དབང་གང་བསམ་བརྗོད།།
མི་ལོ་ལྔ་བཅུ་མི་ཡི་ཡུལ་ནས་རྫོགས།།
ཆབ་སྲིད་རིག་པའི་གོ་རྟོགས་མ་ཐུབ་ནས།།
ཐ་སྙད་ཚད་སྒྲུབ་ཡིན་པར་བློ་མ་བདེ།།
བཀའ་ཤག་གོང་གི་སྤྱི་འཐུས་དེ། །
ཁ་རྩོད་ལམ་སྟོན་རང་དོན་དང་། །
གར་འགྲོ་གོ་ཆོད་མེད་པས་ན། །
ང་ནི་ཁོདང་་མཉམ་སྡེབ་འགྲོ །