འབའ་སྲས།
ཡོན་ཏན་ཀུན་གྱི་གཞིར་གྱུར་སྙན་ངག་མཆོག །
ཤེས་བྱའི་ལམ་དུ་འཇུག་ལ་རྩ་བ་རུ།།
ལེགས་པར་མཐོང་ནས་འབད་པ་དུ་མ་ཡིས།།
རྟག་ཏུ་བརྩོན་པ་མི་ལྷོད་བྱིན་གྱིས་རློབས།།
ལན་ཅིག་སྦྱངས་པས་མི་ཤེས་སྙན་ངག་མཆོག །
ཚུལ་བཞིན་ཤེས་ལ་མང་དུ་ཐོས་པ་དང་།།
རང་གིས་སྦྱོར་བ་མི་དམན་དགོས་པའི་ཕྱིར།།
རྣམ་གཡེང་ལེ་ལོ་སྤང་བར་བྱིན་གྱིས་རློབས།།
ཐེངས་གཅིག་ཐོབ་པའི་སྙན་ངག་པ་ཡི་མིང་།།
འཇིག་རྟེན་གྲག་པའི་རྗེས་སུ་མི་སྤྱོད་པར།།
དོན་ལྡན་སྙན་ངག་འབྲི་དང་སྦྱོང་བའི་བློ།།
རྟག་ཏུ་བག་དང་ལྡན་པར་བྱིན་གྱིས་རློབས།།
སྤྱད་པས་མི་ངོམས་ཤེས་བྱ་ཡངས་པའི་མཚོ།།
བགྲོད་པའི་གྲུ་གཟེངས་མཆོག་ལ་སྙན་ངག་ནི།།
ཚུལ་བཞིན་ཤེས་ནས་འབད་པ་ཆེན་པོ་ཡིས།།
མི་ཚེ་མཐའ་རུ་འཁྱོལ་བའི་བྱིན་གྱིས་རློབས།།
རང་ཉིད་སྙན་ངག་དགའ་བ་ཇི་བཞིན་དུ།།
ཀུན་ཀྱང་སྙན་ངག་དགའ་བ་དེ་འདྲ་བར།།
རང་གིས་ཅུང་ཙམ་ཤེས་པ་གཞན་དག་ལ།།
འཆད་པའི་སེམས་མཆོག་སྐྱེ་བར་བྱིན་གྱིས་རློབས།།
དགའ་བ་ཙམ་གྱིས་སྙན་ངག་མི་ཤེས་ཤིང་།།
གོམས་པ་མེད་ཚེ་ཚིག་སྦྱོར་མི་མཁས་ལ།།
བློ་སྦྱོང་བྲལ་བས་བརྗོད་ཐབས་མི་རྙེད་པས།།
བརྩོན་པ་དྲག་པོས་སློབ་པར་བྱིན་གྱིས་རློབས།།
སྙན་ངག་སྦྱང་བྱ་མིན་པའི་ལོག་རྟོགས་དང་།།
སྙན་ངག་ཚོར་བ་ཡིན་པའི་འཁྲུལ་ཤེས་སོགས།།
ལྟ་ཚུལ་འདི་དག་ནོར་བའི་བློ་སྐྱེས་ནས།།
མ་ནོར་གནད་རྣམས་རྟོགས་པའི་བྱིན་གྱིས་རློབས།།
ཚིག་འགྲོས་འགའ་ཞིག་ཡི་གེར་བསྡེབས་ཤེས་ཀྱིས།།
སྙན་ངག་སྨྲ་བའི་གྲས་སུ་འཚང་བ་དག །
སྙན་ངག་གཞིར་གྱུར་མ་ཡི་བྱིན་རླབས་ཀྱིས།།
ཚིག་དོན་ཀུན་ལ་བྱང་བའི་བྱིན་གྱིས་རློབས།།
མདོར་ན་སྙན་ངག་དགའ་བའི་སྐྱེ་བོ་ཀུན།།
དབྱངས་ཅན་དགའ་མས་རྗེས་སུ་བཟུང་གྱུར་ནས།།
སྙན་ངག་རྟོགས་ཤིང་སྙན་ངག་འབྲི་བ་ཡི།།
སྙན་ངག་མཁན་གྱི་གོ་འཕང་འཐོབ་པར་ཤོག །
རྗེ་ཙོང་ཁ་བའི་ཡོན་ཏན་གཞིར་གྱུར་མ།།
ཆབ་བྲག་ཕོ་ཉའི་རྩོམ་ཡིག་གཞིར་གྱུར་མ།།
འབའ་སྲས་བདག་གི་སྙན་ངག་གཞི་གྱུར་མ།།
ཆུང་བས་ཆེ་བར་དཔེ་ལ་བལྟས་ཏེ་བྲིས།།
རྗེ་ཙོང་ཁ་བའི་གསུང་ཚིག་བྱིན་རླབས་ཅན།།
འདི་རུ་དྲངས་པར་དགེ་བ་མ་ཆུང་སྟེ།།
ཆེན་པོ་སྙན་ངག་ས་འཛིན་རྩེ་མོ་རུ།།
ངལ་མེད་སླ་བས་བགྲོད་པའི་ཆེད་དུ་ཡིན།།
༡༢/༡༢/༡༤ ཉིན་གུང་།
ལན་(ཐེངས)གཅིག་ཐོབ་པའི་སྙན་ངག་པ་ཡི་མིང་།། ཞེས་པའིལན་དེ། ཐེངས་ལ་བསྒྱུར་དགོས་དོན་གང་ཡིན་ནམ། ལགས།
རྗེ་ཙོང་ཁ་་བའི་མཛད་པའི་ཡོན་ཏན་གཞིར་གྱུར་རེད་དམ་་ལྟོ་གོས་འཚོལ་རྒྱའི་་
སྙན་ངག་རེད་།
འབའ་རྒན་འདི་འདི་མོའི་རྐུན་མ་ངར་བ་ཞིག་ཡིན་བསམ་བསམ་མ་བྱུང་། ཁོ་རང་གིས་རྐུས་བས་མ་ཚད་མི་མིང་ཡང་བཙོང་གི། སྤྱིར་དུས་རབས་འདིའི་རྐུན་མ་ཚོ་ལ་བྱ་ཞིག་མེད་ཡ། ཨ་བྱ་དི། ཧ་ཧ་ཧ།