གཞུང་པ་ཚེ་དབང་བསོད་ནམས།
མི་མངོན་དབྱིངས་ནས་ཆོས་སྐུ་དྲི་མེད་རང་གི་སེམས་ཀྱི་ངོ་བོར་བལྟམས།།
དད་པའི་མེ་ལོང་གཡོ་བ་མེད་པ་གཟུགས་ཀྱི་འཇའ་ཚོན་ནམ་མཁར་ཡལ།།
ལྷན་དུ་བགྲོད་པས་མཁའ་དབྱིངས་ཡངས་པོར་འཇའ་ཚོན་སོ་སོ་རང་སར་འཐིམ།།
མ་དད་ལོག་རྟོག་སེམས་ཀྱི་རང་བཞིན་འཆར་བ་ཙམ་གྱིས་བློ་ལ་ངེས།།
རྟ་བདུན་དབང་པོ་མཁའ་ལ་རྒྱུགས་ནས་སྦྲང་ཆར་སིལ་མ་ས་ལ་འཕེན།།
ས་གཞི་ཡོངས་རྫོགས་ལོ་ཏོག་རྒྱས་ནས་རྐང་གཉིས་མི་རྣམས་ཟས་ཀྱིས་ངོམ།།
བདེ་སྐྱིད་འཚོ་བ་ཕུན་སུམ་ཚོགས་ཀྱང་འཇིག་རྟེན་སྐྱེ་འགྲོ་འདོད་པས་ཕུང་།།
དུས་ཀྱི་འཕོ་འགྱུར་མི་ཡི་བསོད་ནམས་ངོས་འཛིན་ཐུབ་པ་མཁས་པའི་བློ།།
རང་བདེན་གཞན་རྫུན་སྨྲ་བའི་སྒོམ་ཤིས་འཇིག་རྟེན་གོ་ལ་གཅིག་བརྒྱུར་དར།།
དེང་དུས་མི་ཡི་བསོད་ནམས་སྙན་གྲགས་ཟད་ལ་ཁད་པའི་མཐའ་རུ་གཏུགས།།
ལས་དང་སྨོན་ལམ་དད་པའི་མེ་ལོང་ཟུབ་རྒྱུ་མེད་པ་ཆོས་ཀྱི་སྐུ།།
ཇི་སྲིད་བསྐལ་པ་མ་འཇིག་བར་དུ་དད་པའི་མེ་ལོང་བསྒྲིབ་མི་སྲིད།།
དེ་ལྟར་གསལ་བའི་མེ་ལོང་ནང་གི་གཟུགས་བརྙན་འཆར་བ་བློ་ལ་འཇུག །
རྒྱུ་དང་འབྲས་བུ་བློ་ལ་ངེས་ནས་མ་ནོར་ལམ་ལ་འཇུག་པར་འཚལ།།
བསྐལ་ཆེན་གྲངས་མེད་ཚོགས་ལ་འབད་ནས་ཤཱཀྱ་ཐུབ་པ་མངོན་སངས་རྒྱས།།
མྱུར་ལམ་གསང་སྔགས་ཐེག་པའི་བསྟན་པ་དམ་ཚིག་གཙང་མ་སྲུང་ནས་སྒྲུབ།།
འགལ་རྐྱེན་ཕྲ་མོ་བློ་ལ་ཤར་བ་རྣམ་རྟོག་ཟེར་བའི་ཚིག་གིས་བསླུས།།
བདེན་འཛིན་མ་ཐུབ་བློ་ཡི་རྣམ་རྟོག་རང་བློ་རང་ལ་མ་འཁེལ་སྐྱོན།།
འཇིག་རྟེན་མི་ཡི་བསམ་བློའི་ནུས་པས་ཁམས་གསུམ་དངོས་པོ་མིག་ནང་འཛུལ།།
ལྷ་ཡིའི་བདེ་སྐྱིད་མི་ཡི་སྡུག་བསྔལ་རྫོགས་མཐའ་མེད་པ་ལས་ཀྱིས་སྦྱིན།།
ལས་དང་འབྲས་བུའི་རྣམ་བཞག་ཕྲ་རགས་གསལ་པོར་སྟོན་པའི་ནུས་པ་དཀོན།།
མ་ཚང་བློ་ཡིས་བདེན་པའི་གནས་ལུགས་ངོ་སྤྲོད་ཐུབ་པའི་ནུས་པ་མེད།།
བདེན་བཞིའི་རྣམ་བཞག་བདེན་པར་སྟོན་པའི་ཟས་གཙང་སྲས་དེ་ངོ་མཚར་ཆེ།།
དད་པ་བརྟན་པོ་འགྱུར་པ་མེད་པར་མེ་ལོང་ནང་གི་གཟུགས་བརྙན་མཇལ།།
བློ་ལ་ཤར་ཚད་བདེན་པར་འཛིན་པ་བསམ་མེད་བྱིས་པའི་རིག་པ་འདྲ།།
བདེན་པའི་གནས་ལུགས་ཚད་མས་སྒྲུབ་པ་སྔོན་གྱི་མཁས་པ་རྣམས་ཀྱིས་བསྟན།།
བདེན་འཛིན་རྟོགས་པའི་རིག་པའི་རྣམ་ཤེས་ཀླད་རྩ་རྣོ་བའི་ཚན་རིག་ཚོ།།
འཇིག་རྟེན་ཧྲིལ་པོ་ཉེན་ཁར་བཅུག་ནས་རང་མིང་གྲགས་པ་ཚན་རིག་ལས།།
སྡུག་བསྔལ་མཚོ་ལ་ཆུ་ཁྱེར་རྐྱལ་རྒྱག་ནུས་མེད་འགྲོ་བ་གྲངས་མཐའ་བརྒལ།།
འཇིག་རྟེན་འདི་ནི་སྒྱུ་མ་ཇི་བཞིན་བློ་ཡི་ཡུལ་དུ་རྟོགས་པར་དཀའ།།
ནུས་མེད་སེམས་ཅན་དབང་ལྡན་མི་ཡི་བྲན་གཡོག་ཉིན་མཚན་འཁྱོལ་ལ་དཀའ།།
ལས་ཀྱིས་སྦྱིན་པའི་འཁོར་བའི་ཉེས་དམིགས་རྒྱུ་དང་འབྲས་བུའི་མཐུ་ཡིས་སྦྱིན།།