བཙན་ཁུ་ཚུར་གྱིས།
ནམ་མཁའ་མིན་པའི་ནམ་མཁའི་ངོས་ལ།།
ཟླ་བ་མིན་པའི་ཟླ་བ་དཀར་པོ།།
མཚན་མོ་མིན་པའི་མཚན་མོ་ཞིག་ལ།།
ཡར་ཚེས་དུང་འདྲ་དུང་མདོག་གངས་ཡིན།།
པཎ་ཆེན་སྙིང་སྟོབས་གངས་ཀྱི་གངས་ཡིན།།
གངས་ཀྱི་རང་བཞིན་ཚ་བས་བཞུས་ན།།
ཁྱེད་ཉིད་ཚ་བ་གཞོམ་པའི་སྨན་ཡིན།།
གངས་ལ་གས་ཆག་ཉམས་གུད་བྱུང་ན།།
ཁྱེད་ཉིད་གངས་ཀྱི་ཕ་དང་མ་ཡིན།།
ཁྱེད་ཉིད་བོད་ཡིན་བོད་ཀྱི་མིག་ཡིན།།
རིགས་ཀྱི་ལས་དོན་ལེགས་པའི་ཆེད་དུ།།
རང་ཉིད་བཙན་གྱིས་བཙོན་ལ་བཟུང་མྱོང་།།
རིགས་ཞེན་ལ་རྒྱའི་བདེན་དོན་བསམ་ནས།།
དབུ་ཡི་སྐྲ་ལ་སེ་མདའ་ལྷུང་མྱོང་།།
པཎ་ཆེན་བླ་མ་གསེར་གྱི་ཏོག་ཡིན།།
རུས་པ་དཀར་དཀར་གངས་རི་མཐོན་པོ།།
སྙིང་སྟོབས་སྲ་སྲ་རྡོ་ཡི་སེང་གེ།
ལ་རྒྱའི་རྒྱལ་མཚན་མཐོ་བའི་དཔའ་བོ།།
དུས་རབས་ཤིག་གི་ལམ་ཡིག་སེར་པོ།།
མི་རིགས་ཤིག་གི་གཡུ་ཡི་བུམ་པ།།
ཁྱེད་ཉིད་བཞུད་པའི་ཉིན་དང་ཞག་ནི།།
མིག་ཟུང་ཞར་བའི་ལོ་དང་ཟླ་ནི།།
ཉི་མ་མེད་པའི་དགུན་ཁ་དེ་ནི།།
ཟླ་བ་ངུ་བའི་མཚན་མོ་དེ་ནི།།
ཁྱེད་ཀྱིས་གདུང་ཡས་འཇོག་སྟངས་ཤིག་ཡིན།།
ད་ནི་ཁྱེད་ཀྱི་སྙིང་སྟོབས་དྲན་ན།།
ཁྲི་བདུན་ཡིག་འབྲུའི་ལས་དབང་བསམ་ན།།
མགོ་ཐོག་ནམ་མཁའ་སྡུག་གིས་ནག་འདུག།
བྱང་ཁོག་སེམས་པུ་མིག་ཆུས་བརླན་འདུག།
འདིའང་ཁྱེད་ཉིད་དྲན་སྟངས་ཤིག་ཡིན།།
2015/1/11 བོད་ཟླ 11/21 ཉིན་ཕྱི་དྲོར།
༸པཎ་ཆེན་བཅུ་པ།
ལོ་བདུན་བཙོན་འཇུག
ཁྲི་བདུན་བྲིས་མཁན།
ཞེ་དགུར་ཡལ་སོང་།
བཅུ་གཅིག་མྱངས་སྟངས།
བཅུ་པའི་གྲོང་སྟངས།
རྒྱ་གཞུང་ངན་སྟངས།
བོད་མང་མྱངས་སྟངས།
ག་དུས་བསམས་ཀྱང་།
བློ་བདེ་མེད་དུས།
དིང་གི་རྒྱ་གཞུང་།
བསམ་བློ་གཏོང་རན།
པཎ་ཆེན་རིན་པོ་ཆེ་དྲན་ན་སྙན་ངག་བྲིས་ནས་མ་བསྡོད་།
ལས་འགུལ་སྤེལ་ནས་པཎ་ཆེན་འཚོལ་ན་དགའ་།
ཐབས་ལམ་རྩལ་ནས་པན་ཆེན་འཚོལ་ན་དགའ་།
རིག་པ་བཏང་ནས་པཎ་ཆེན་འཚོལ་ན་དགའ་།
མོ་ལུང་རྩིས་གསུམ་བརྒྱུད་ནས་པཎ་ཆེན་འཚོལ་ན་དགའ་།
རྒྱལ་སྤྱིའི་གནོན་ཤུགས་འོག་ནས་པཎ་ཆེན་འཚོལ་ན་དགའ་།
ཆོལ་གསུམ་གཅིག་བསྒྲིལ་འོག་ནས་པཎ་ཆེན་འཚོལ་ན་དགའ་།
གཞིས་བྱེས་མཉམ་རུབ་བྱས་ནས་པཎ་ཆེན་འཚོལ་ན་དགའ་།
པཎ་ཅིང་པཎ་ཆེན།
བསྟན་འཛིན་དགེ་འདུན།
པཎ་ཆེན་འཚོལ་ཁར།
པེ་ཅིང་འགྲོ་དོ།
ངོ་རྒོལ་བྱེད་ཁར།
པེ་ཅིང་རྒྱུགས་དང་།
བསམ་འཆར་ཤོད་ཁར།
པེ་ཅིང་ཤོག་དང་།
དབུས་ལམ་བཤད་ས།
པེ་ཅིང་རེད་གདའ།
ཞི་འགྲིགས་བྱ་ས།
པེ་ཅིང་རེད་དོ།།