ཟམ་གདོང་རིན་པོ་ཆེ་མཆོག་གི་ངོ་དེབ་ལས་དྲངས།
བདག་ཉིད་ཆེན་པོ་སློབ་དཔོན་ཟམ་གདོང་རིན་པོ་ཆེ་མཆོག་གིས་”སྐྱོན་བརྗོད་བྱ་ཡུལ་ངོས་འཛིན་དགོས་པ་དང༌། སྐྱོན་བརྗོད་ལ་གདོང་ལེན་ཇི་ལྟར་གནང་ཕྱོགས།” སྐོར་གལ་ཆེའི་བཀའ་སློབ་གནང་བ།
“མང་གཙོའི་ལམ་སྲོལ་ནང་ཇི་ཙམ་འགལ་ཟླ་ཤུགས་ཆེ་བ་ཡོད་ན་དེ་ཙམ་དུ་གཞུང་གི་གཟི་བརྗིད་ཡོད། འགལ་ཟླ་བྱུང་དུས་སྤམ་ཤོར་ན་མང་གཙོའི་ལམ་ལ་འགྲོ་གི་མེད་པ་རེད། གཞུང་འཛིན་ལ་སྐྱོན་བརྗོད་བྱས་པ་དེ་ལ་ལན་དང་གསལ་བཤད་མཐིལ་ཕྱིན་པ་གནང་དགོས་པ་རེད། སྐྱོན་བརྗོད་དེ་ལས་དོན་ཞིབ་ཚགས་བྱུང་མིན་དང་བྱེད་ཕྱོགས་འགྲིག་མིན་ལ་བྱེད་དགོས་ཀྱི་ཡོད་པ་རེད།
མིའི་ལྷག་བསམ་དང་རྒྱལ་གཅེས་ལ་སྐྱོན་བརྗོད་བྱེད་ཀྱི་ཡོད་པ་མ་རེད། ལྷག་བསམ་ལ་སྐྱོན་བརྗོད་བྱས་ན་ནོར་བ་རེད། གལ་ཏེ་ལྷག་བསམ་ལ་སྐྱོན་ཡོད་པ་ཞིག་སྐྱོན་བརྗོད་བྱས་ནས་བཞག་ན་ནོར་བ་རེད། ལྷག་བསམ་ལ་སྐྱོན་ཡོད་ན་ལས་དོན་ནས་ཕུད་དགོས་པ་རེད། ཇི་སྲིད་ཡིད་ཆེས་ཡོད་པའི་བར་དགག་པ་དང་སྐྱོན་བརྗོད་བྱེད་དགོས་པ་རེད། སྐྱོན་བརྗོད་བྱེད་མཁན་དང་བྱ་ཡུལ་གཉིས་ཀར་དེ་འདྲ་དགོངས་རྒྱུ་མེད་པ་དགོངས་པར་གཞག་དགོས།”
ལྷག་བསམ་སྐྱོན་ལ་འཛིན་པའི་ནོར་འཕྲལ་དང་།
ནོར་འཕྲུལ་དགེ་ལ་འཛིན་པའི་ལྷག་བསམ་གཉིས་།
གཅིག་གི་གཅིག་ལ་བདེན་ངོ་སྤྲོད་ཆེ་བས་།
བདེན་རྫུན་ངོ་སྤྲོད་ཐུབ་པའི་ཁྲིམས་དཔོན་་དཀོན་།
དྲང་གཏམ་གཅེར་བུའི་གཞུང་སྐྱོན་གླེང་བ་དང་།
ཕྱོགས་གཏོགས་རིག་པས་གཞུང་སྐྱོན་བསྐབ་པ་གཉིས་།
གཅིག་གི་གཅིག་ལ་བདེན་ངོ་སྤྲོད་ཆེ་བས་།
བདེན་རྫུན་ངོ་སྤྲོད་ཐུབ་པའི་་ཁྲིམས་དཔོན་དཀོན་།
བདེན་པའི་ཁྲིམས་དེ་ལས་ཀྱི་མེ་ལོང་རེད་།
རྫུན་པའི་ཁྲིམས་དེ་མི་གི་བཟོས་ཁྲིམས་རེད་།
དེ་གཉིས་ཤེས་ན་རང་ཁྲིམས་རང་གི་འཁུར་།
དེ་གཉིས་མ་ཤེས་ས་སྟེང་ཁྲིམས་འགལ་མང་།