(དྲ་ཐོག་ནས་རིག་གནས་སྤེལ་སྟངས་ཀྱི་བསམ་བྱ་ཐོར་བུ།)
འགར་ཚེ་རྒྱལ་གྱིས།
ནམ་རྒྱུན་གྱི་གོམས་གཤིས་ལྟ་བུ་ཆགས་ཤིག་ཏེ་ཁོམ་པ་རེ་ཡོད་དུས་དྲ་ངོས་སུ་བོད་ཡིག་ཟིན་བྲིས་ཁག་ཏུ་ཉུལ་བལྟ་བྱེད་རྒྱུ་ནི་ཁོ་བོར་མཚོན་ན་ཉིན་རེའི་སྐབས་བབ་ལས་དོན་གྱི་ཞོར་ལས་ལྟ་བུར་གྱུར་ཡོད། ལོ་གསར་གྱི་ཉི་མ་འདི་ཚོར་ཡང་ཕ་ཡུལ་ནས་གྲོང་པ་ཁྱིམ་མཚེས་དང་ཕུ་ནུ་ཉེ་རིང་བཟང་ས་རྒྱན་ས་ཚོར་ལོ་གསར་ལག་སྐྱེས་རེ་ཁྱེར་ནས་ཕན་ཚུན་ལོ་གསར་རུ་ཉུལ་ལ་འགྲོ་སྲོལ་ཡོད་པ་དེ་བཞིན། ཁོ་བོས་ཡོད་ཚད་རེ་སྒུག་དང་སུན་སྣང་གིས་བསྐྱལ་དགོས་པའི་ས་མཐའ་འདི་ནས་ལོ་གསར་རུ་ཉུལ་གྱི་ཚབ་ཏུ་དྲ་གྲོགས་ཚོའི་ཟིན་བྲིས་རེ་རེ་བཞིན་ཞིབ་ཏུ་སྐོར་བལྟ་ཞིག་བྱས་པ་ཡིན།
རང་གི་ཕ་ས་ཕ་ཡུལ་དང༌། ཕ་མ་སྤུན་སྲིང་གཉེན་ཉེ་སོགས་མེད་པའི་ཕྱི་ཡུལ་གྱི་ནམ་ཟླ་དང་ལོ་གསར་ནི་ང་ལ་མཚོན་ན་ཡུལ་གྱར་བའི་འཚོ་བ་བསྐྱལ་བ་ནས་ནམ་རྒྱུན་སྤྲོ་སྣང་མེད་ལ། ལྷག་པར་དུ་རང་རེའི་མི་རིགས་འདི་ཐབས་ཟད་འུ་ཐུག་གི་གནས་སུ་གྱུར་ཅིང༌། མི་རིགས་འདིའི་ཆེད་དོན་དུ་གཅེས་པའི་ཚེ་སྲོག་གི་ལག་སྐྱེས་ཕངས་མེད་དུ་ཕུལ་བའི་ཞིང་གཤེགས་དམ་པ་རྣམས་དང༌། རང་ལུས་འདོམ་གང་བོ་བཙོན་དུ་ཚུད་པའི་རྒྱལ་གཅེས་དཔའ་བོ་དེ་དག་བསམ་ན་དེ་བས་ཀྱང་ལོ་གསར་ལ་སྤྲོ་སྣང་ཁབ་རྩེ་ཙམ་ཡང་མེད། ལོ་གསར་གྱི་ཉིན་དེ་ཚོའི་ནང་ཁོ་བོས་དྲ་ཉུལ་བྱས་པ་ནི་བོས་མ་བོས་ཀྱི་མགྲོན་པ་གང་རུང་ཞིག་གི་ཚུལ་གྱིས་ཇ་ཆང་གི་ཟས་ལ་རོལ་བཞིན་པའི་ངང་ཚུལ་ལྟ་བུ་ཞིག་མིན་ནའང༌། དྲ་གྲོགས་ཚོའི་སེམས་ཀྱི་ཟབ་ས་ནས་བྱོ་ཡོད་པའི་ཟིན་བྲིས་དག་ཀློག་རྒྱུ་ནི་ཁོ་བོར་མཚོན་ན་ཞིམ་མངར་ཟས་དང་ཇ་ཆང་གི་དཔལ་ལ་རོལ་བའི་ལོ་གསར་རྒྱས་སྤྲོ་ཞིག་ལས་ཧ་ཅང་གི་སྤྲོ་བ་ཆེ་ཤོས་དེ་ཡིན་ཟེར་ཆོག
ཁོ་བོས་དྲ་གྲོགས་ཚོའི་ཟིན་བྲིས་སུ་ཉུལ་ནས་ཁོ་ཚོ་ལ་བཟང་གི་ཡག་གི་ལྟ་བུའི་ཁ་ཡག་ངོ་བསྟོད་ཀྱི་སྦྱར་ལན་རེ་ཕུལ་ནས་བུད་འགྲོ་རྒྱུ་དེ་ལས་སླ་བོ་ཞིག་ཡིན་ནའང༌། དེ་ཙམ་ཞིག་གིས་ནི་ད་ལྟའི་འུ་ཚོའི་དྲ་ཐོག་ནས་སྙན་ངག་དང༌། དཔྱད་བརྗོད་སོགས་རིག་གནས་སྤེལ་ཕྱོགས་ལ་སྒུལ་ནུས་ཅི་ཡང་ཐོན་གྱི་མེད་པ་ཞིག་ཏུ་དུས་རྒྱུན་ནས་མཐོང་གིན་ཡོད་མོད། འོན་ཀྱང་ཁོ་བོ་རང་ཉིད་ཀྱང་གཞན་གྱི་རྗེས་འབྲང་ལད་ཟློས་ལ་གོམས་པ་དེ་ལས་འདའ་མ་ཐུབ་པར་རྟོག་ནུས་དང་དཔྱོད་ཁུལ་གྱི་སྐད་ཆ་ཕྱི་ལ་མ་བུད་པར་ད་ལྟའི་བར་དུ་ལྷག་སོང་ནི་རང་ཉིད་ལ་སྒྱུད་ལུག་ཆེ་བའི་རྟགས་མཚན་ཞིག་རེད།
ལོ་གསར་གྱི་ཉིན་དེ་ཚོར་ཁོ་བོས་ཟིན་བྲིས་ཁག་ལ་ཞིབ་གསལ་གྱིས་བལྟས་ན་ད་ལྟའི་བར་གཞན་གྱིས་ཁོ་བོར་བཞག་པའི་དཔྱད་ལན་དང༌། ཡང་ན་གཞན་གྱིས་གཞན་ལ་བཞག་ཡོད་པའི་དཔྱད་འཇོག་གི་གནས་བབ་ལས་འུ་ཚོས་བསམ་བློ་བརྗེ་རེས་ཟེར་ནའང་ཆོག རིག་པ་སྐོར་བསྡུར་གྱི་ཐབས་ལམ་ཡག་པོ་ཞིག་བཀོལ་སྤྱོད་མ་ཤེས་པར་རི་ཁ་ཆང་ཁ་ན་ཡོད་པའི་ཀུ་རེ་རྩེད་མཚར་ལྟ་བུ་ཞིག་གི་ངང་དོན་མེད་སྣང་མེད་དུ་འདའ་ནས་ཡོད་པའི་སྣང་ཚུལ་ཞིག་གིས་དྲངས་ཏེ། ད་རེས་ཁོ་བོས་བློ་རྒྱ་ཆེར་བསྐྱེད་ཀྱིས་དྲ་ཐོག་ནས་རིག་གནས་སྤེལ་ཕྱོགས་སྐོར་གྱི་རང་སྣང་བསམ་ཚུལ་ཞིག་བརྗོད་ན་འདོད་སོང་བས། དྲ་གྲོགས་ཚོས་གཏམ་གླེང་འདི་ལོ་གསར་པའི་ནང་གི་ལག་སྐྱེས་ཆུང་ཆུང་ཞིག་གི་ཚབ་མཚོན་དུ་གཙང་རོལ་བྱེད་རོགས།
དང་པོ། སྔོན་ཆད་ཀྱི་ཤོག་ཐོག་རྩོམ་ཡིག་དང་ད་ལྟའི་དྲ་ཐོག་རྩོམ་ཡིག་སྤེལ་ཕྱོགས་ཀྱི་བར་ཁྱད།
སྔོན་ཆད་ཡིན་ན་རྩོམ་རིག་ལ་དུང་བ་ཡོད་མཁན་ཞིག་ཡིན་ནའང༌། རང་གིས་ཅི་ཞིག་འབྲི་འདོད་པ་དེ་རང་གི་འབྲི་དེབ་ངོས་ལ་ཆུ་ཚོད་གང་འཚམ་ཞིག་བེད་སྤྱོད་ཀྱིས་ལག་བྲིས་བྱས་ཏེ། ཟླ་བ་གཅིག་གམ། ཟླ་ཤས། ཡང་ན་ལོ་གཅིག་གི་རྗེས་ཙམ་ནས་འདོན་སྤེལ་བྱེད་པའི་དུས་དེབ་དང་ཚགས་པར་གང་ཞིག་གི་སྟེང་བཀོད་ཐུབ་ན་བསམ་ནས་སྦྲགས་ལམ་བརྒྱུད་བསྐུར་དགོས་པ་དང༌། བསྐུར་བའི་རྩོམ་ཡིག་དེ་ཡང་ཚད་ཐུབ་འཐུས་མིན་ནི་དེ་བས་ཐེ་ཚོམ་གྱི་གནས་ཤིག་ཡིན། གལ་སྲིད་རྩོམ་ཡིག་དེ་དུས་དེབ་དང་ཚགས་པར་གང་དེར་ཐེ་བའི་དབང་དུ་བཏང་ནའང༌། ཀློག་མཁན་གྱི་ངོས་ནས་དེ་འདྲའི་མགྱོགས་མྱུར་གྱིས་རོལ་མྱོང་བྱེད་ཐུབ་ཀྱི་མེད་ལ། ཀློག་འཇུག་གི་སྐབས་མཚམས་རྩོམ་ཡིག་གི་ངོ་གདོང་ནས་མཛེས་དཔྱོད་ཀྱི་ལྟ་བའི་ཚོར་ནུས་དང༌། རྩོམ་པ་པོའི་བསམ་བློའི་གོ་རྟོགས། བློས་བསླང་གི་སྒུལ་ཤུགས་སོགས་ཀྱི་ངོས་ནས་བསམ་ཚུལ་བརྗེ་རེས་བྱེད་པའི་ལེགས་ཉེས་དཔྱད་འཇོག་དང༌། ཡང་ན་རྟོགས་ཚོར་གྱི་འདུ་ཤེས་སྨྲ་བརྗོད་བྱེད་པའི་བསྐལ་བ་ཧ་ཅང་གིས་དབེན། དེ་ནི་དེང་སྐབས་ལྟར་གྱི་དྲ་ཐོག་ནས་རིག་གནས་སྤེལ་བའི་ཆ་འཕྲིན་དུས་རབས་སུ་མ་སླེབས་པར་ཕྱོགས་ངོས་མང་པོ་ཞིག་ནས་ཆ་རྐྱེན་གྱིས་ལག་ཐོགས་ཏེ། རྩོམ་པ་པོ་དང་ཀློག་པ་པོ་ཕྱོགས་གཉིས་རྒྱང་བཀྱེད་ཀྱི་ཚུལ་དུ་ཡོད་པའི་རྐྱེན་རེད།
སྐབས་དེའི་རྩོམ་པ་པོ་ཚད་ལྡན་ཞིག་ཡིན་ཡང་ཆོག གསར་རྩོམ་གྱི་ལས་ལ་ཞུགས་མཁན་ཞིག་ཡིན་ནའང་ཆོག གང་ལྟར་རྩོམ་ཡིག་ཅིག་བྲིས་པ་ཡིན་ན་དེའི་ངོས་ཐད་ནས་ཕ་རོལ་ཀློག་པ་པོའི་ཡིད་འཇོག་གི་ཚོར་རྟོག་བརྡ་ལན་རང་ཉིད་ཀྱིས་ནམ་ཡང་གོ་མེད་ཚོར་མེད་ཀྱི་ངང་གནས་ཡོད་ལ། སྔོན་ཆད་ཀྱི་རྩོམ་པ་པོའི་ཞིག་ལ་མཚོན་ནའང་ཀློག་མཁན་གྱི་ངོས་ནས་དེང་སྐབས་ལྟར་མྱུར་ཚད་ལྡན་པའི་ཀློག་འཇུག་རོལ་མྱོང་གི་ཡར་བསྐྱེད་སྒུལ་ནུས་མེད་པའི་གནད་དོན་དག་ནི་སྔོན་ཆད་སྨྱུ་གུ་བཟུང་ནས་ཤོག་ཐོག་ཏུ་རྩོམ་ཡིག་སྤེལ་ཕྱོགས་དང༌། དེང་སྐབས་གློག་ཀླད་ལ་འཇུས་ནས་དྲ་ཐོག་ནས་རྩོམ་ཡིག་སྤེལ་སྟངས་གཉིས་ཀྱི་བར་ཁྱད་ཆེན་པོ་ཞིག་རེད་ཟེར་ཆོག
གཉིས་པ། དྲ་ཐོག་ནས་རྩོམ་པར་འཇུག་པའི་འཐུས་ཤོར་གྱི་ཕྱོགས་ཆ།
དེང་སྐབས་ཆ་འཕྲིན་དུས་རབས་དང་དྲ་ཐོག་རིག་གནས་ཀྱི་དུས་རབས་འདིར་སྔོན་ཆད་དང་བསྡུར་ན་རིག་གནས་སྤེལ་བར་ཕྱོགས་གང་ཐད་ནས་མྱུར་ཚད་ལྡན་ཞིང་ཆ་རྐྱེན་གྱིས་ལག་མི་ཐོགས་པའི་དུས་རབས་ཤིག་ཏུ་སླེབས་ཡོད། ཡིན་ནའང་དུས་རབས་འདི་བསྟུན་གྱིས་འུ་ཚོའི་མི་རབས་འདིའི་རིག་གནས་སྤེལ་ཕྱོགས་ཀྱི་ཐད་ནས་འཐུས་ཤོར་དང་རྒྱ་ཡན་དུ་བཏང་བའི་ཆ་མང་པོ་ཞིག་མངོན་ཅན་ཡོད་པས། དེ་ནི་དུས་རབས་དང་བསྟུན་པའི་འུ་ཚོ་རྗེས་རབས་དག་གི་མི་གཤིས་ཀྱི་ངོས་ནས་རེད་ཟེར་ན། ང་ཚོ་ནི་གསར་གཏོད་རང་བཞིན་ཅན་གྱི་མི་རབས་གསར་པ་ཡིན་པས། སྔོན་རབས་པ་རྣམས་དང་བསྡུར་ན་བསམ་བློའི་ཆ་དང༌། ཀུན་གཤིས་ཀྱི་ཆ། རིག་སྟབས་ཀྱི་ཆ་སོགས་ཡར་བསྐྱེད་ཡར་ཐོན་ཅན་དུ་ཡོད་ཟེར་སྲིད། འོན་ཀྱང་སེམས་རྣལ་དུ་ཕབ་ནས་དཔྱོད་ཤེས་བྱས་ན་འུ་ཚོའི་ངོས་ནས་འཐུས་ཤོར་དང་རྒྱ་ཡན་དུ་བཏང་དང་གཏོང་བཞིན་པའི་ཕྱོགས་ཆ་མང་པོ་ཞིག་དོན་དམ་མངོན་གསལ་ཡོད་པས། དེ་ནི་ཁོ་བོས་བལྟས་ན་དུས་རབས་འདིའི་གནས་བབ་དང་བསྟུན་འུ་ཚོའི་མི་གཤིས་ཀྱི་གོ་རྟོགས་ལ་ཏག་ཏག་རག་ལས་པ་ཞིག་རེད་སྙམ།
འུ་ཚོའི་བོད་ལ་མཚོན་ན་དྲ་ཐོག་ནས་རིག་གནས་སྤེལ་བའི་ལམ་སྲོལ་འདི་བྱུང་སྟེ་དུས་ཡུན་ཐུང་ངུ་ཙམ་ཞིག་ལས་འགོར་མེད་ནའང༌། རྒན་གཞོན་བར་གསུམ་དྲ་ཐོག་ཏུ་ཞུགས་ཏེ་དུས་ཚོད་གང་མང་ཞིག་ཕར་བསྐྱལ་བའི་གོམས་གཤིས་ཤིག་ངང་གིས་འཇགས་ཀྱིན་ཡོད། དེར་བརྟེན་དྲ་ངོས་དང་ཟིན་བྲིས་སུ་ཞུགས་སྤྲོ་བའི་སྣང་ཚུལ་དེ་ལ་རྒྱུས་ལོན་བསམ་ཞིབ་ཅིག་བྱས་ཏེ། ཚུལ་དེ་ནི་བོད་མི་རིགས་རང་གི་རིག་གནས་ཀྱི་ཕྱོགས་ཆ་གང་མང་ཞིག་དྲ་ཐོག་ནས་འཛམ་གླིང་གང་སར་སྤེལ་ཁྱབ་ཐུབ་པའི་དབང་གིས་རེད་དམ། ཡང་ན་གནས་ཚུལ་གཞན་ཞིག་གི་དབང་གིས་རེད་དམ་ཟེར་ནས་རྟོག་པ་སྔོན་སོང་གི་དྲི་བ་ཞིག་དྲིས་པ་ཡིན་ན། དེ་ནི་བརྒྱ་ལ་ཆ་བགོས་ཀྱིས་བརྗོད་ན་དྲ་བ་ནི་རོལ་རྩེད་བྱེད་ས་ཞིག་གི་རྣམ་པར་བཟུང་སྟེ། དྲ་ཐོག་ནས་ཀུ་རེ་རྩེད་མཚར་སོགས་ཀྱིས་མཚོན་གཏམ་ཉོག་སྨྲ་བརྗོད་ལ་ཞུགས་རྒྱུའི་སྤྲོ་བས་དྲངས་པ་མང་ཤོས་ལྟ་བུ་ཆགས་ཡོད་པ་དང༌། དྲ་ཐོག་ནས་རིག་གནས་སྤེལ་མཁན་དང་རིག་གནས་ལ་རོལ་མྱོང་བྱེད་མཁན་གྱི་གྲངས་ནི་ཆེས་ཉུང་ཤོས་ཆགས་ཡོད། ཉུང་ཤོས་ཀྱི་རིག་གནས་སྤེལ་མཁན་དང་རོལ་མྱོང་བྱེད་མཁན་གྱི་གྲས་དེས་ཀྱང་རང་རེ་བོད་མི་རིགས་ཀྱི་རྒྱུན་སྲོལ་རིག་གནས་བཟང་པོ་དར་སྤེལ་ཀྱི་ཕྱོགས་ཆར་འཇུ་ཐུབ་ཀྱི་མེད་པ་དང༌། རིག་གནས་ཙམ་པོ་དར་སྤེལ་དང་རོལ་མྱོང་བྱེད་པར་དཔག་པའི་རིག་པ་དང་བསམ་བློ་བརྗེ་རེས་བྱེད་པའི་རྩོལ་བ་ལའང་སྤུས་གཙང་གིས་ཞུགས་ཐུབ་ཀྱི་མེད་པར། དུས་རྒྱུན་འཐུས་ཤོར་དང་རྒྱ་ཡན་གྱི་ངང་གནས་ཡོད་པ་མངོན་སུམ་ལྟ་བུ་ཡིན་པས། དེ་ནི་དྲ་ཐོག་ནས་རིག་གནས་སྤེལ་ཕྱོགས་ཀྱི་གནད་དོན་ཚབས་ཆེན་ཞིག་ཆགས་ཡོད།
སྤྱིར་དྲ་ཐོག་གི་རྩོམ་པ་པོ་ཞིག་ཡིན་ན་རང་ཉིད་ཀྱིས་གང་ཞིག་བྲིས་ཏེ་སྤེལ་བའི་རང་དབང་རང་ཉིད་ལ་ལྡན་ཞིང༌། དྲ་ཐོག་ཏུ་སྤེལ་བའི་རྩོག་ཡིག་དེའི་རྩོམ་པ་པོ་དང་རྩོམ་སྒྲིག་པ་ནི་རང་སྟེང་ན་ཐ་མི་དད་པའི་ཚུལ་དུ་མངོན་སྟབས། གང་འདོད་ཅི་འདོད་དུ་སྤེལ་བའི་རྩོམ་ཡིག་དག་གི་ཁྲོད་དུ་སྙིང་པོ་དང་བཅུད་ལྟ་བུའི་རྩོམ་ཡིག་ཡོད་སྲིད་ལ། སྙིགས་དང་རོ་མ་ལྟ་བུའི་རྩོམ་ཡིག་ཀྱང་འདུས་ཡོད། དེར་མཚུངས་དྲ་ཐོག་རྩོམ་ཡིག་ཀློག་པ་པོའི་ནང་དུའང་སྙིགས་དོར་བཅུད་ལེན་ལ་མཁས་པའི་དཔྱོད་ཤེས་བསམ་བློ་པ་དང༌། ཧོལ་རྒྱུག་ཟེར་སྒྲོས་སུ་འབྲེངས་པའི་གླེན་པ། ཕྱོགས་གཏོགས་རིས་ཆད་ཀྱི་ལྟ་བ་འཛིན་པའི་སྒེར་བདག་པ་སོགས་རིགས་མང་པོ་ཞིག་ཡོད་སྟབས། དྲ་ཐོག་ནས་རྩོམ་པ་པོ་ཚད་ལྡན་ཞིག་ཡིན་ཡང་དམའ་རུ་ཕབ་ནས་ས་ལ་བརྡབས་སྲིད་ལ། ཚིག་གི་སྡེབ་ཙམ་ཤེས་པའི་རྩོམ་པའི་ལས་དང་པོ་པ་ཞིག་ཡིན་ཡང་ཆེ་རུ་བསྟོད་ནས་དགུང་ལ་འདེགས་སྲིད། དེའི་ཕྱིར་དྲ་ཐོག་ནས་ཚད་ཐུབ་ཀྱི་རྩོམ་པ་པོ་ཞིག་གི་ངོས་ནས་སུན་སྣང་དང་སེམས་ཤུགས་ཉམས་ཞན་གྱིས་རྩོམ་པའི་བྱ་བ་ལས་ཡོལ་བའི་འགོག་རྐྱེན་ཐེབས་པའི་གནད་དོན་འབྱུང་གིན་ཡོད་ལ། ཅི་ཡང་གང་ཡང་འཁྱོངས་མེད་ནའང་གཞན་ཀྱི་ཚིག་ཙམ་པོའི་ངོ་བསྟོད་དེས་རྩོམ་པའི་ཁེངས་སེམས་ཀྱིས་ཉི་ཚེ་བའི་ཚུལ་ལས་མ་འདས་པར་གང་སར་འུར་འདྲོགས་ཀྱིས་ལྷག་ནས་ཡོད་པའི་རིགས་ཀྱང་འབྱུང་གིན་ཡོད། དེ་ནི་དྲ་ཐོག་ནས་རིག་གནས་སྤེལ་ཕྱོགས་སམ་རྩོམ་ཡིག་སྤེལ་བའི་འཐུས་ཤོར་དང་རྒྱ་ཡན་གྱི་ངོས་ཤིག་ཡིན་པས། དྲ་ཐོག་གི་རྩོམ་པ་པོ་རྣམས་ཀྱིས་ངེས་པར་ཡིད་འཇོག་ཡིད་གཟབ་བྱ་དགོས་པའི་དོན་གནད་ཅིག་ཏུ་སེམས་སོ།།
གསུམ་པ། དྲ་ཐོག་ནས་རྩོམ་ཡིག་རོལ་མྱོང་དཔྱད་གླེང་སྤེལ་ཕྱོགས།
སྤྱིར་སྔོན་ཆད་ཡིན་ན་རྩོམ་ཡིག་ཅིག་བཀློགས་ཟིན་པའི་དཔྱད་ལན་བརྗོད་འདོད་ཀྱི་སྐད་ཆ་རྩོམ་པ་པོ་དང་གདོང་ཐུག་ནས་མ་གཏོགས་སྨྲ་བརྗོད་མི་ཐུབ་པ་དང༌། རྩོམ་པ་པོ་དང་ཀློག་པ་པོ་ཕན་ཚུན་གདོང་ཐུག་རྒྱུ་ནི་གནས་སྡོད་ཁོར་ཡུག་གི་བར་ཐག་སོགས་ཀྱི་རྐྱེན་དབང་གིས་དཀའ་བའི་གནས་སུ་གྱུར་ཡོད་པའི་གནད་དང་བསྡུར་ན། དེང་སྐབས་དྲ་ཐོག་ནས་གློག་རྡུལ་མྱུར་ཚད་ནུས་པས་གོ་ལ་ཧྲིལ་པོ་འདིའི་ཁྱོན་ཡོངས་ཀྱི་མི་རྣམས་སྐུད་ལམ་འབྲེལ་ཐག་གཅིག་གི་གཞི་སྣེ་ནས་འབྲེལ་འདྲིས་ཐུབ་སྟེ། དྲ་ཐོག་ཏུ་རྒྱང་ཐག་རིང་དུ་ཆོད་པའི་གནས་ཤིག་ནས་ཕན་ཚུན་ལ་སྙིང་གཏམ་དང༌། བསམ་བློ་བརྗེ་རེས། དཔྱད་བསྡུར་གྱི་རིག་པ་སྤེལ་རེས་བྱེད་ཆོག་པ་ནི་དོན་བྱ་རླབས་ཆེན་ཞིག་ཡིན་པས། འུ་ཚོས་དུས་རབས་ཀྱིས་བསྐྲུན་པའི་མཐུན་རྐྱེན་དེ་རིགས་སྤྱོད་ཤེས་བཀོལ་ཤེས་ཀྱི་གཞི་ལ་འཇུག་རྒྱུ་ནི་གལ་ཆེན་རེད།
དེང་སྐབས་རྩོམ་པ་པོ་ཞིག་གིས་དྲ་ཐོག་ཏུ་རྩོམ་ཡིག་ཅིག་སྤེལ་བའི་མྱུར་ཚད་དེ་བཞིན་ཀློག་པ་པོ་དག་གིས་དྲ་ཐོག་ནས་རྩོམ་ཡིག་དེ་ཀློག་འཇུག་རོལ་མྱོང་གི་མྱུར་ཚད་དང༌། རྩོམ་ཡིག་ལ་དཔྱད་གླེང་སྤེལ་བའི་མྱུར་ཚད་བཅས་མིག་བརྡེབ་ཙམ་ཞིག་གི་ཡུན་ལས་འགོར་གྱི་མེད་ནའང༌། དྲ་ཐོག་ནས་རྩོམ་ཡིག་ཀློག་འཇུག་གི་བརྒྱུད་རིམ་ཁྲོད་རྒྱ་ཡན་དང་འཐུས་ཤོར་དུ་བཏང་བའི་ཆ་ཞིག་དུས་རྒྱུན་ནས་མངོན་གྱིན་ཡོད། སྤྱིར་རྩོམ་ཡིག་ཅིག་བཀླགས་པའི་མྱོང་ཚོར་དང༌། རྩོམ་ཡིག་གང་དེར་མཛེས་དཔྱོད་ཀྱི་ལེགས་པའི་ཕྱོགས་ཆ་ཅི་ཡོད། ཡང་ན་བློ་འདས་ཀྱི་ཉེས་པའི་ཕྱོགས་ཆ་ཅི་མཆིས་སོགས་རྩོམ་པ་པོར་བསམ་བློ་བརྗེ་རེས་དང་དྲན་ཚོར་གླེང་རེས་ཀྱི་ཚུལ་གྱིས་ཕན་ཚུན་ལ་དཔྱད་ལན་སྤེལ་རེས་བྱེད་རྒྱུ་དེ་དྲ་ཐོག་ནས་རྩོམ་ཡིག་སྤེལ་བའི་ལེགས་ཆ་རྨད་དུ་བྱུང་བ་ཞིག་ཡིན་ནའང༌། འུ་ཚོས་དེ་ཕྱོགས་ནས་སྟངས་འཛིན་དོ་སྣང་དེ་ཙམ་མི་བྱེད་པར་དྲ་ཐོག་གི་ཀློག་པ་པོ་མང་ཆེ་བས་སྔོན་ཆད་ནས་ངོ་ཤེས་པ་ཞིག་གམ། ཡང་ན་དྲ་ཐོག་འཕྲིན་ལམ་ནས་འདྲིས་པའི་དྲ་གྲོགས་ཤིག་གི་ངོས་ཐད་བཅས་ནས་ཕན་ཚུན་ལ་རྩེད་མཚར་དང་ཀུ་རེ་ལྟ་བུའི་ཚིག་གི་རིམ་པ་དུས་རྒྱུན་བརྩེགས་ནས་འདུག་པ་དང༌། དེ་མིན་རྩོམ་ཡིག་དེ་མགོ་ནས་མཇུག་བར་ཀློག་ལ་ཞུགས་ཡོད་མེད་གང་ལྟར་རྩོམ་མཁན་ལ་དཔྱད་ལན་འཇོག་སྟངས་ནི་ཋབཀླགས་ཟིན་ཋདང༌། ཡང་ན། ཋཡག་པོ་བྲིས་འདུགཋ ཋམུ་མཐུད་དུ་སྤེལ་རྒྱུའི་རེ་བ་ཡོད་ཋལྟ་བུའི་བརྡ་ལན་སོགས་ལས་འདའ་མ་ཐུབ་པར་ཡོད་པ་དེ་རེད།
སྤྱིར་རྩོམ་པ་པོ་ཞིག་ལ་མཚོན་ན་རང་གི་རྩོམ་ཡིག་དེར་ཀློག་མཁན་མང་པོ་ཞིག་ཀློག་ལ་ཞུགས་རྒྱུ་ནི་གལ་ཆེན་རེད་ལ། རྩོམ་ཡིག་དེ་བཀླགས་རྗེས་ཀྱི་མྱོང་ཚོར་དཔྱད་ལན་སྤེལ་རྒྱུ་ནི་དེ་བས་གལ་ཆེན་ཞིག་རེད། དྲ་ཐོག་ཏུ་རྩོམ་ཡིག་གང་ཞིག་སྤེལ་བར་ཀློག་མཁན་གྱིས་བཀླགས་པའི་མྱོང་ཚོར་དཔྱད་ལན་སོགས་སྐབས་ཐོག་དུས་ཐོག་ཏུ་སྤེལ་ཐུབ་པའི་ནུས་ཤུགས་ཀྱིས། རྩོམ་པ་པོ་རང་ཉིད་ལ་ཀློག་མཁན་གྱི་ངོས་ནས་རང་གི་རྩོམ་ཡིག་དེར་ལེགས་ཉེས་གསལ་འདོན་གྱིས་གདེང་འཇོག་གང་འདྲ་བྱེད་ཀྱིན་ཡོད་པ་ཚོར་རྟོགས་ཐུབ་ཀྱི་ཡོད། དེ་མིན་ཀློག་མཁན་གྱིས་རྩོམ་ཡིག་དེ་བཀླགས་ཟིན་པའི་བརྡ་ལན་ཙམ་བསྟན་པས་རྩོམ་པ་པོར་སྒུལ་ཤུགས་གང་ཡང་མི་ཐོན་པའང་མ་ཡིན་ཏེ། བརྡ་ལན་གཏམ་བརྗོད་སྤེལ་ཙམ་གྱིས་ཀྱང་རྩོམ་པ་པོར་གསར་རྩོམ་གྱི་ལས་ལ་འཇུག་པའི་སྤྲོ་སྣང་ཡིད་འགུལ་གྱི་ནུས་པ་བསྐྱེད་ཐུབ་ཀྱི་ཡོད། དེར་བརྟེན་དྲ་ཐོག་ནས་རྩོམ་ཡིག་རོལ་མྱོང་གིས་དཔྱད་འཇོག་གཏམ་བརྗོད་སོགས་སྤེལ་བ་དེར་སྔོན་ཆད་ཀྱི་རྩོམ་པ་པོ་དང༌། ཀློག་པ་པོ། རྩོམ་ཡིག་བཅས་ཀྱི་བར་འབྲེལ་ལ་མེད་པའི་ཁྱད་ཡོན་མི་དམན་པ་ཞིག་མངོན་ཡོད་པས། ང་ཚོས་དྲ་ཐོག་ནས་རིག་གནས་སྤེལ་བའི་ཁྱད་ཆོས་དེ་དག་བཀོལ་སྤྱོད་ཀྱི་ནུས་པའི་ཁྱད་ཡོན་གྲུབ་དོན་ལ་སྟངས་འཛིན་དང་དོ་སྣང་གིས་འཇུག་རྒྱུ་ནི་གལ་ཆེན་ནང་གི་དོན་ཆེན་ཞིག་རེད་བསམ།
ཉེ་སྔོན་ཞིག་ཏུ་བོད་ནང་གི་སྙན་ངག་པ་གཅན་མེ་སྟག་ལགས་དང་ཁོ་བོ་གཉིས་ཀྱིས་དྲ་ཐོག་སྙན་ངག་གི་སྐོར་ནས་གླེང་བསླངས་པར་ཁོང་གིས་ཟེར་ན། ཋཋདྲ་ཐོག་སྙན་ངག་གི་དུས་ཐོག་ལྟར་བསམ་འཆར་སྤེལ་བའི་རང་བཞིན་ནི་སྲོལ་རྒྱུན་གྱི་སྙན་ངག་ལུགས་ལ་ཡོང་ཐབས་མེད་པའི་ཁྱད་ཆོས་ཤིག་རེད། སྙན་ངག་ཅིག་དྲ་ཐོག་ཏུ་སྤེལ་བ་དང་མཉམ་པོར་དེར་མཐུད་ཀྱིས་དཔྱད་བརྗོད་དང་སྦྱར་བྱང་ཐོན་གྱིན་ཡོད་ལ། སྦྱར་བྱང་དེ་ནི་ལྡོག་ཕྱོགས་ཀྱི་གཏམ་བརྗོད་ཅིག་ཡིན་ནའང་སྙན་ངག་པས་དུས་ཡུན་ཐུང་ངུའི་ནང་རང་གི་བརྩམས་ཆོས་འདི་མི་གཞན་གྱི་མིག་ལམ་དུ་ཇི་བཞིན་ཡིན་པ་དང་ཚོར་སྣང་ག་འདྲ་སྐྱེད་ཀྱིན་པ་ཤེས་ཐུབ།
རྐྱེན་དེས་དམིགས་གཏད་རང་བཞིན་ཡོད་པའི་སྒོ་ནས་རང་གིས་སྤེལ་ཟིན་པའི་བརྩམས་ཆོས་དག་ལེགས་བཟོས་དང་དག་སྒྲིག་བྱས་ཆོག་ཅིང༌། མྱུར་མགྱོགས་ཀྱི་ཀློག་ཚད་དང་དཔྱད་འཇོག་དེས་ཕྱོགས་ངོས་གཞན་ཞིག་ནས་སྙན་ངག་པར་གསར་རྩོམ་བྱེད་འདོད་ཀྱི་དུངས་ཚོར་དང་བློ་མོས་ཤུགས་དྲག་ཅིག་ཀྱང་བསྐྱེད་སྲིང་བྱེད་ཐུབ་སྙམ་ཋཋཞེས་བཤད་སོང༌། ཁོ་བོས་སྐད་ཆ་དེ་ནི་དྲ་ཐོག་ནས་རིག་གནས་སྤེལ་བའི་བརྒྱུད་རིམ་དུ་ངེས་ཤེས་ཡིད་གཟབ་བྱ་དགོས་པའི་སྐད་ཆ་ཞིག་རེད་བསམ་ཡོད།
བཞི་པ། མཇུག་བསྡུ་བའི་གནད་གཏམ།
དེས་ན་ནམ་རྒྱུན་དྲ་ངོས་ནས་ཉི་མ་བསྐྱལ་བའི་འུ་ཚོ་ཟིན་བྲིས་པ་དག་གིས་ད་སྔ་གཅིག་གཅིག་ལ་རི་ཁ་ཆང་ན་ཡོད་པ་ལྟ་བུའི་རྩེད་མཚར་ཀྱི་དགོད་གཏམ་དང༌། བཟང་ས་རྒྱན་སའི་ངོས་ནས་ཁ་ཡག་ངོ་བསྟོད་ཀྱི་དཔྱད་ལན་རེ་བརྗོད་ནས་འདུག་སྲོལ་ཡོད་པ་དེ་ལས་ཕར་བརྒལ་གྱི་ལས་སུ་ཞུགས་ཏེ། གཞན་གྱིས་རང་གི་ཟིན་བྲིས་ལ་དཔྱད་འཇོག་བསམ་འཆར་སྤེལ་བ་དེ་རང་ཉིད་ཀྱི་ཤེས་འདོད་ཡར་བསྐྱེད་དང༌། བསམ་བློ་མདུན་སྤོས་ཀྱི་སྒུལ་ནུས་རོགས་འདེགས་ཤིག་ཏུ་བསམ་ནས་གཞན་གྱི་དཔྱད་གླེང་དེ་གལ་ཆེན་ཞིག་ཏུ་འཛིན་དགོས་ལ། རང་གིས་གཞན་སྤེལ་ཟིན་བྲིས་དག་ལ་དཔྱད་ལན་འཇོག་སྐབས་ཀྱང་རྩོམ་ཡིག་གང་དེར་དོ་སྣང་ཡོད་པའི་སྒོ་ནས་ཞིབ་ཚགས་ཀྱིས་ཀློག་ལ་ཞུགས་ཏེ། ཕྱོགས་གཏོགས་རིས་ཆད་ཀྱི་བསམ་བློ་གང་ཡང་མ་བཟུང་བར་རྩོམ་ཡིག་དེའི་ངོ་གདོང་གི་མཛེས་དཔྱོད་ལྟ་བའི་རིན་ཐང་དང༌། བློ་འདས་ཀྱི་ཉེས་པའི་ཕྱོགས་ཆ་བཅས་བརྗོད་འདོད་པའི་སྐད་ཆ་ཅི་ཡོད་སྦ་གསང་མེད་པར། རྩོམ་མཁན་དེ་རང་ཉིད་ཀྱི་དགྲ་གཉེན་ཕྱོགས་གཏོགས་གང་ཡིན་ཡང༌། ཕན་ཚུན་འཐབ་ཕྱོགས་གཅིག་གྱུར་དང་མཐུན་ལམ་གཅིག་སྒྲིལ་གྱི་བསམ་པ་ཡར་སེམས་ཤིག་གིས་ཀུན་ནས་བསླགས་ཏེ་བསམ་བློ་བརྗེ་རེས་ཀྱི་ཚུལ་དུ་སྨྲ་བརྗོད་བྱ་དགོས་སོ།།
ང་ཁྱོད་ཀྱི་བསམ་ཚུལ་འདིར་ཧ་ཅང་འཐད་པ་ཡིན། གནད་ལ་ཁེལ་བའི་དཔྱད་བརྗོད་སྤེལ་འདུག ངའི་སྣང་བ་ཞིག་ལ་ཁྱེད་ཀྱིས་ངའི་ཚབས་བྱས་ནས་རྩོམ་འདི་སྤེལ་འདུག་སྙམ་པ་འདྲ་ཞིག་ཤར་སོང་། ད་ངས་གློག་ཀླད་ངོས་སུ་ཅེར་དེ་དུས་ཚོད་མང་བོ་ཞིག་གཏོང་མ་དགོས་པ་རེད། བཀའ་དྲིན་ཆེ།
རྩོམ་ཡིག་འདི་ཡག་པོ་འདུག འདིས་བཤད་འདོད་པའི་གཏམ་ལ་ལྗིད་ཁོག་ཅུང་ཟད་འདུག་པར་འདོད། ཁོའི་བསམ་བློའི་སྐོར་ཕྱོགས་ལ་གཟས་ས་ཞིག་དང་འབབ་ས་ཞིག་ཡོད་པར་མཐོང་སོང་། མུ་མཐུད་དུ་འདིའི་རིགས་ཀྱི་བསམ་ཚུལ་སྤེལ་བའི་རེ་བ་ཡོད།
དངོས་གནས་གནད་ལ་འཁེལ་བའི་རྩོམ་ཡིག་ཅིག་སྤེལ་འདུག་སྟབས། ཁ་ཞེ་གཉིས་མེད་ཀྱི་སྒོ་ནས་རྗེས་སུ་ཡི་རངས་ཞུ་རྒྱུ་ཡིན། གང་ལྟར། བསམ་བློ་དང་ལག་ལེན་བར་གྱི་སྟོང་ཆ། དཔྱད་ཞིབ་དང་གྲུབ་འབྲས་བར་གྱི་སྟོང་ཆ། ངོས་འཛིན་དང་ཐབས་བྱུས་བར་གྱི་སྟོང་ཆ་སོགས་ངེས་པར་ཤེས་དགོས་པ་ཞིག་དང་གསབ་དགོས་པའི་གནད་དོན་ཆེན་པོ་ཞིག་རེད། དེ་བས་ན། ང་ཚོའི་གཟབ་ནན་བྱེད་སྟངས་དང་ཐབས་ལམ་འདོན་སྟངས་ལ་བསམ་བློའི་རྒྱབ་ལྗོངས་ཤིག་དང་ལག་ལེན་གྱི་གྲུབ་དོན་ཞིག་དགོས་པ་དུས་བབ་ཀྱི་འགན་འཁུར་ཞིག་ཏུ་འཁུམས།