_____རྣམ་གྲོལ་གླིང་། དགའ་དགའ།
འཛམ་གླིང་ཞེས་པའི་མིང་ཚིག་རྣ་ལ་མ་ཐོས།།
མི་རིགས་ཟེར་བའི་བདེ་སྡུག་སེམས་ན་མེད་དུས།།
གླེན་ཕྲུག་ཁྱུ་ཡིས་ལྷས་རར་བཀང་ས་དེ་ནས།།
ང་རང་ལང་ཚོའི་མེ་ཏོག་དལ་གྱིས་འབུས་བྱུང་།།
སྤྲིན་དཀར་དུམ་བུ་འཐོར་བའི་ཨ་སྔོན་དབྱིངས་ནས།།
ཉི་མས་འཛུམ་མདངས་དགོད་ལ་སྣང་བ་མ་བྱུང་།།
ཤོག་བྱ་རླུང་གིས་བསྐུར་ལ་སྤྲོ་བ་བརྟས་འདི།།
ཆུང་ཆུང་བྱིས་པའི་དུས་ཀྱི་སེམས་པ་ཡིན་སོང་།།
མ་ལོའི་བྱམས་བརྩེ་འོག་ནས་འཚར་ལོོངས་བྱུང་ཞིང་།།
ཀ་ཁའི་དགེ་རྒན་བཙན་པོས་ངར་ས་དེ་ནས།།
གྲོང་ཚོ་སྟོད་སྨད་ག་སར་འདུར་བའི་དུས་སུ།།
བསྟན་བཤིག་བསྟན་པའི་ཐོ་བ་ང་རང་རང་ཡིན།།
གཟན་ཤམ་དམར་སྨུག་འདི་ཡང་མ་གྱོན་སྔོན་དུ།།
གཡོ་སྒྱུ་རྫུན་གསུམ་ཉུང་བའི་སེམས་པ་ལྷད་མེད།།
རི་མགོ་ལུང་ཁུག་ཀུན་ལ་མཆོང་བགྲོད་བྱས་པའི།།
སྨྱོ་བའི་ཉམས་རྟོགས་མང་པོ་སྔར་ནས་བསྟན་ཡོད།།
ཚན་རིག་འཕྲུལ་ཆས་དེ་ཙམ་མ་རྒྱས་གོང་དུ།།
སུ་ཞིག་དགྲ་བོ་ཡིན་པའི་ཞེ་འཁོན་མེད་ཀྱང་།།
ཚོགས་དྲུག་ཡུལ་དུ་རྒྱས་ས་རང་ཡུལ་དེ་ལ།།
བརྩེ་སེམས་ཞེན་ཆགས་སྐྱེ་བ་ཉུང་ཉུང་མིན་ནོ།།
དེང་སང་སྤྲང་རྒན་ང་རང་རྒས་ཤིང་རྒུད་རུང་།།
སེམས་ལ་སྦ་རྒྱུ་གསང་རྒྱུ་གཏན་ནས་མེད་ཅིང་།།
དགུན་གྱི་ལྷགས་རླུང་ནང་ནས་ཟུར་གསུམ་སེམས་པ།།
འཁྱག་ཅིང་གས་གྲབས་བྱས་ཀྱང་སྡུག་རུས་བྱེད་ཡོད།།