ཨེ་མ་ཧོ།
དེ་རིང་སྔ་མོ་ཡར་ལངས་ནས་ནམ་རྒྱུན་བཞིན་དུ་སྙིང་ཐིག་སྔོན་འགྲོ་དང་བསྟན་བུ་དང་བཟང་སྤྱོད་སོགས་ཁ་ཏོན་བྱས། སྟབས་བདེའི་གློག་ཐབ་ལས་འོ་ཇ་བཀོལ་ཞིང་ཨ་མ་ལ་གསོལ་ཇ་དང་རྩམ་པ་དང་ཤིང་ཐོག་རིགས་རྣམས་ཕུལ་ཞིང་། ཁྱད་པར་དེ་རིང་ནི་བོད་ཟླ་༡༢པའི་ཚེས་༡༨སྟེ། སྔ་འགྱུར་པ་སྡེ་གསུམ་ཀློང་དགུའི་བསྟན་པའི་ཤིང་རྟ་ཆེན་པོ་ཀུན་མཁྱེན་རྒྱལ་བ་ཀློང་ཆེན་རབ་འབྱམས་དཔལ་བཟང་པོ་མཆོག་ཉིད་གཟུགས་སྐུའི་དགོངས་པ་ཆོས་དབྱིངས་སུ་གཟིམས་པའི་དུས་ཚེས་ཁྱད་པར་ཅན་ཡིན་པའི་ཕྱིར། དབྱིན་ཡུལ་བོད་བརྒྱུད་རྣལ་འབྱོར་ཆོས་ཚོགས་ཀྱི་བཀོད་བསྒྲིག་བཞིན་ཚོགས་གྲལ་དུ་ཞུགས། བླ་སྒྲུབ་དང་ཚོགས་མཆོད་དུ་ཆོས་མཆེད་དམ་པ་གསེར་མདོག་ལྕང་ལོ་འཛིན་པའི་རྣལ་འབྱོར་དང་རྣལ་འབྱོར་མས་བོད་རང་གི་སྐད་ཐོག་ནས་ཀུན་མཁྱེན་བླ་མའི་སྒྲུབ་ཐབས་ཀྱི་དབུ་མཛོད་བྱས། བསྙེན་སྒྲུབ་ཡན་ལག་བཞི་པའི་ཚོགས་སྒྲུབ་མཛད། ཐུན་མཚམས་རྣམས་སུ་ཚང་མས་ཀུན་མཁྱེན་ཀློང་ཆེན་རབ་འབྱམས་ཀྱི་གསོལ་འདེབས་དཔལ་སྤྲུལ་རིན་པོ་ཆེས་གསུངས་པའི་ཚིགས་བཅད།
ཆོས་ཟད་ཀློང་དུ་ཆོས་སྐུའི་དགོངས་པ་བརྙེས།།
འོད་གསལ་དབྱིངས་སུ་ལོངས་སྐུའི་ཞིང་སྣང་གཟིགས།།
གདུལ་བྱའི་སྣང་ངོར་སྤྲུལ་སྐུའི་འགྲོ་དོན་མཛད།།
ཀུན་མཁྱེན་ཆོས་ཀྱི་རྒྱལ་པོར་གསོལ་བ་འདེབས།། ཞེས་དང་།
ཆོས་ཀུན་མཉམ་པ་ཉིད་ཀྱི་གཞི་དབྱིངས་སུ།།
རང་སྣང་སྐུ་གསུམ་རོལ་པའི་རྩལ་རྫོགས་པས།།
སྒྲིབ་བྲལ་གདོད་མའི་མགོན་པོ་ཀློང་ཆེན་པ།།
དྲི་མེད་འོད་ཟེར་ཞབས་ལ་གསོལ་བ་འདེབས།།
འཛམ་གླིང་མཛེས་པའི་རྒྱན་དྲུག་མཆོག་གཉིས་དང་།།
ཐུགས་རྗེ་ལུང་རྟོགས་མཉམ་པའི་མཐུ་མངའ་ཡང་།།
ནགས་ཁྲོད་དམ་པར་སྦས་པའི་བརྟུལ་ཞུགས་ཀྱིས།།
འཁོར་འདས་ཆོས་སྐུར་རྟོགས་པའི་ཀློང་ཆེན་པ།།
དྲི་མེད་འོད་ཟེར་ཞབས་ལ་གསོལ་བ་འདེབས།། ཞེས་པ་སོགས་སྨིན་གྲོལ་གླིང་གི་འདོན་སྟངས་ལྟར་ཚོགས་དབྱངས་སུ་གདུང་བས་གྱེར་ཞིང་སྙིང་ནས་གསོལ་བ་འདེབས་ཞིང་ཀུན་མཁྱེན་བླ་མའི་ཐུགས་དང་རང་སེམས་དབྱེར་མེད་དུ་སྒོམ། མཚམས་སུ་བདག་གིས་ཀུན་མཁྱེན་བརྒྱུད་པའི་ཆོས་རྒྱུད་ལ་འཕྲད་པའི་ཕན་ཡོན་དང་སྐལ་བ་བཟང་ཚུལ་བཤད། དབྱིན་རིགས་ཀྱི་དྲི་བ་ཐུང་ཐུང་དག་ལ་ལན་ཅི་ནུས་རེ་བཏབས། དེ་ཡོད་ཀུན་ཀྱིས་དགེ་སྒྲུབ་སྡིག་སྤོང་དང་མོས་གུས་གསོལ་འདེབས་ལ་བརྩོན་ནས་ཚོགས་འཁོར་ལེགས་གྲུབ་བྱུང་། སླར་ཡང་རང་ཤག་ཏུ་འོང་སྟེ་གློག་ཀླད་ཀྱི་དྲ་ཐག་འཐུད་ནས་གནམ་ཀླད་སྒོ་ཕྱེས་པ་དང་བོད་ནང་གི་ཁ་པར་རྒྱུད་ནས་གྲོགས་པོ་རྙིང་བ་ཨ་རིག་རྫ་བའི་བློ་གྲོས་རབ་གསལ་དང་མཁན་པོ་འོད་གསལ་མཐའ་ཡས་ལ་རྨ་ཡུལ་གངས་རིའི་གནས་སྐོར་མཛད་པའི་རྣམ་གླེང་ཙམ་བྱེད་སྐབས་སུ་གློ་བུར་དུ་རྒྱ་ནག་ཏུ་དྲ་ཐག་ཆད་སོང་། བལ་ཡུལ་ནས་གནམ་ཀླད་རྒྱུད་ནས་ཞལ་པར་གནང་སོང་། དེ་ནི་སྒྲུབ་བརྒྱུད་རྒྱལ་བ་འབྲི་གུང་པའི་བསྟན་ལ་བཀའ་དྲིན་འགྲན་ཟླ་དང་བྲལ་བའི་དཔལ་འབྲི་གུང་དཔལ་རིའི་མཁན་ཆེན་དམ་པ་ལ་དྭགས་བསོད་ནམས་དོན་གྲུབ་རེད། ཁོང་ནི་བདག་གི་གྲོགས་པོ་རྙིང་པ་ཡིན་པས་དགའ་དད་དམ་ཚིག་གཙང་མ་ཡིན་པས་བཀའ་མོས་ཞུས།ཁོང་ནི་མདོ་སྔགས་རིག་གནས་བཅས་པར་མཁས་ཤིང་འབྲི་གུང་བཀའ་བརྒྱུད་ཀྱི་མཁན་ཆེན་དང་དཔལ་རིའི་བཤད་གྲྭ་དང་། དཔལ་འབྲི་གུང་དྷརྨྰ་ར་ཛ་སོགས་ཀྱི་སློབ་སྤྱི་ཆེན་མོ་ཡིན་ནའང་སྤྱིར་སྟངས་གྲྭ་རྐྱང་དཀྱུས་མ་ཞིག་གིས་རྣམ་པས་གཞན་ཕན་ཁོ་ན་གཉེར་བ་ལས་ཁ་བཏགས་དང་སྒྲོ་ལོས་བཟོས་པའི་མཁན་སྤྲུལ་དག་དང་གཏན་ནས་མི་འདྲའོ།། ཁྱད་པར་ཤིན་ཏུ་བཙུན་པ་ཆེན་པོ་མཐོ་ལ་སྤྲེལ་ལད་དང་དམའ་ལ་མཐོང་ཆུང་གཏན་ནས་མེད་པར་བཤད་སྒྲུབ་ཁོ་ན་ཐུགས་ལ་འཛིན་ཅིང་གཞན་ལ་སྤེལ་བ་དང་ཁྱད་པར་རྒྱ་གར་ལྷོ་ཕྱོགས་རྣམ་གྲོལ་གླིང་ནས་སློབ་དཔོན་ཆེན་པོ་གདན་འདྲེན་ནས་སློབ་ཁྲིད་འོག་སློབ་གླིང་དེ་ཡང་དཔེ་མི་སྲིད་པའི་ཡག་པོ་ཆགས་འདུག རྒྱ་མཚོ་ཆུ་ཡིས་མི་ངོམས། ཆོས་པ་སྦྱོང་པས་མི་ངོམས། ཞེས་པ་བཞིན། བདག་གིས་བྲིས་པའི་ཤེས་རབ་སྙིང་པོའི་འགྲེལ་བ་དང་།ཐེག་ཆེན་བསྟན་པའི་སྙིང་པོ་དང་།དགོངས་གཅིག་རྩ་བའི་ཐོག་འགྲེལ་བཤད་དགོས་ཚུལ་གསུངས་པ་དེ་རེད་འདུགདམིགས་བསལ་དུ་སྒྲུབ་དཔོན་བསོད་ནམས་འབྱོར་འཕེལ་རིན་པོ་ཆེས་བདག་ལ་ཐུགས་དགྱེས་བརྩེ་ཆེན་པོས་ཕྱག་དཔེ་ཁྲིད་དགོས་ཚུལ་གསུངས་འདུག ལགས་སོ་ངས་ང་འོང་ཆོག་ཞུས། བདག་ལ་མཚོན་ན་སྒྲུབ་དཔོན་བསོད་ནམས་འབྱོར་འཕེལ་དང་བསམ་གཏན་གཉིས་ནི་འབྲི་གུང་༧གྲུབ་དབང་དཔལ་ཆུང་རྣམ་གཉིས་ལས་བརྒྱུད་པའི་བླ་མ་མཚན་ཉིད་དང་ལྡན་པ་ཆོས་པ་ཡང་དག་རེད།རྒྱས་པ་ནི་སྒྲུབ་དཔོན་རིན་པོ་ཆེའི་རྣམ་ཐར་བདག་གིས་བྲིས་པ་དང་དེ་དབྱིན་ཡིག་ཐོག་ལ་ཡོད་པ་དེ་ལ་གཟིགས་རོགས།། ངས་ཟིན་བྲིས་འདི་འབྲི་མཚམས་འདི་ནས་བཞག་གི་ཡིན། ཕྲན་གྱིས་འདིར་འགོད་དགོས་དོན་ནི་ དྲ་ཐོག་ནས་དད་གུས་མེད་པ། གནས་ལུགས་མེད་པ། རྒྱུ་འབྲས་མེད་པ། བརྩི་བཀུར་མེད་པ། མི་གཤིས་མེད་པ། ངོ་ཚ་མེད་པ། ཁྲེལ་གཞུང་མེད་པ། ཕྱི་ཐག་མེད་པ། ཧམ་སེམས་དང་། ཕྲག་དྭོགས་ཆེ་བ་དག་གིས་གནོད་སེམས་འཆང་ནས་བཤད་པ་རྣམས་ལ་རེ་རེ་བཞིན་དུ་རྔོ་མི་ཐོགས་ཀྱང་དྲྭ་ཐོག་ནས་ཁྱབ་སྲིད་ཀྱི་ཉམས་ཚད། གྲུབ་མཐའ་དང་སྒེར་གྱི་ཉམས་ཚད་བླངས་ཏེ་གཡས་ཕྱོགས་ནས་གཡོན་ཕྱོགས་དང། གཡོན་ཕྱོགས་ནས་གཡས་ཕྱོགས་སུ་བསྡུས་ཏེ་ཉམས་ཚད་མང་པོ་ལེན་གྱི་ཡོད་འདུག་པས། ལྷག་བསམ་དང་རྣམ་དཔྱོད་ལྡན་པ་ཚོས་གཟབ་རོགས། ཧ་ཅང་གལ་ཆེ་བས་ཅིས་ཀྱང་གཟབ་གཟབ་རོགས། མཐར་དོན་བསྟན་འཛིན་དམ་པ་དག་གིས་ཐུགས་ཀྱི་བཞེད་དོན་ཡིད་བཞིན་འགྲུབ་པའི་རྒྱུར་གྱུར་ཅིག་གུ །།
ཅེས་པ་རབ་རྒྱན་མེ་ལུག་ཆོ་འཕྲུལ་ཟླ་བའི་དབང་ཚེས་རྒྱལ་བ་གསུམ་པ་འམ། ཕྱི་ལོ་༢༠༡༥ / ༢ / ༦ ལ་ཤྲྰི་ཨེ་མ་ཧོས།།
ཨ་མ་འཁྲིས་སུ་བཞག་ནས་བསྙེན་བཀུར་ཞུ་རྒྱུ་ཡོད་པ་འདི་ཁྱེད་བསྐལ་པ་རེ་བཟང་།