ཨེ་མ་ཧོ།
ན་མོ་གུ་རུ་པདྨ་ཀ་ར་ཡེ།
རབ་འབྱམས་རྒྱལ་ཀུན་སྤྱི་གཟུགས་པདྨ་ཀ་ར།།
རིགས་ཀྱི་ཁྱབ་བདག་ཐོབ་པའི་སྐལ་བཟང་ཀུན་གྱིས།།
རིག་འཛིན་བརྒྱུད་གསུམ་བླ་མའི་ཐུགས་དམ་མཛོད་དང་།།
ཚེ་སྲོག་སྙིང་པོ་བླངས་པའི་དགོངས་པ་འགྲུབ་འདུག།
བོད་རྒྱལ་ཤིང་ལུག་གནམ་ལོ་གསར་དུ་ཚེས་པས།།
དྷུ་མ་གྷ་ཡེའི་བསྙེན་པ་ཚད་དུ་ཕྱིན་ན།།
གཞིས་བྱེས་བོད་མིའི་བསམ་དོན་ལྷུན་གྱིས་འགྲུབ་ཕྱིར།།
ས་ཡ་བརྒྱད་ཀྱིས་ཐེར་འབུམ་ཁྲི་ཕྲག་འབད་མཛོད།།
ཆིག་སྒྲིལ་མཐུན་ལམ་བཟང་པོས་དར་དཀར་འཕྱར་ནས།།
གསར་གཏོད་གནའ་དེང་ཟུང་གིས་སྙིང་བཅུད་བླངས་ཏེ།།
རང་ཁ་རང་གསོས་རྒྱུ་འབྲས་བདེན་པ་མཛད་ཅིང་།།
ངོ་ལྐོག་མཚུངས་པར་རྗེ་འབངས་ཡོངས་ནས་གནང་ཤོག།
ལྷག་བསམ་དུང་ཟླ་དཀར་པོ་མེད་དུ་མི་རུང་།།
རྣམ་དཔྱོད་རྟ་བདུད་དབང་པོའི་གྲོགས་དང་འགྲོག་ནས།།
ཕྲིན་ལས་རྒྱུ་སྐར་གྲངས་བཞིན་འཇིག་རྟེན་ཁྱབ་ན།།
བསྟན་སྲིད་ཕུན་ཚོགས་སྡེ་བཞི་ཉམས་པར་མི་སྲིད།།
ཅེས་པ་འདི་ཡང་བོད་རྒྱལ་ལོ་ ༢༡༤༢ རབ་བྱུང་ ༡༧ ཤིང་མོ་ལུག་ལོའི་གནམ་ལོ་གསར་ཚེས་པ་གཅིག་ལ་རིགས་མཐུན་བོད་མི་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་བ་དང་བཅས་ཨེ་མ་ཧོས་ཀུན་བཟང་ཆོས་གླིང་ནས་ཕུལ་བར་དགེའོོ།།
ཤིང་མོ་ལུག་ལོ་ཚེས་གཅིག་བླ་མའི་ལོ་གསར་ལ་།
ཆོས་མཐུན་བྱ་བ་སྤེལ་ཞིག་དགེ་འདུན་སྡེ་།
ཚེས་གཉིས་དབང་ཆེན་དཔོན་གྱི་ལོ་གསར་ལ་།
ཆབ་སྲིད་བརྟན་པའི་བྱ་བ་བརྩམས་ན་དགའ་།
ཚེས་གསུམ་ཉམས་ཆུང་འབངས་ཀྱི་ལོ་གསར་ལ་།
རང་རང་མི་ཚེའི་འཚོ་ལམ་བརྩམས་ན་བཟང་།
བཀྲིས་བདེ་ལེགས་ཞུ།།་།།
ཤིང་དང་ཕོ་མོ་སུ་ཡིས་མཐོང་། །
ལུག་དང་སྤྲེལ་བྱར་སུ་ཡིས་བཏགས། །
འོད་གདངས་བདུན་ལ་རྟ་བདུན་ཞེས། །
སྒྲོ་བཏགས་སྙན་དངགས་སུ་ཡིས་སྙན། །