དབྱིན་ཇིའི་རྒྱལ་སྲས་པི་རིན་སི་ཅལ་སི། རྫ་ཚེ་རིང་བཀྲ་ཤིས་ཀྱིས་བསྒྱུར།
༸གོང་ས་རྒྱལ་བ་རིན་པོ་ཆེའི་དགུང་གྲངས་དོན་ལྔར་ཕེབས་པའི་དྲན་དེབ་ལ་ཆེད་བརྗོད་འབྲི་རྒྱུའི་གོ་སྐབས་ཐོབ་པར་ང་ལ་དགའ་སྤྲོ་ཧ་ཅང་ཆེན་པོ་བྱུང་། ངས་ད་བར་ས་གནས་འདྲ་མིན་མང་པོ་ཞིག་ནས་༸གོང་ས་མཆོག་མཇལ་མྱོང་ཞིང་། མཇལ་ཐེངས་རེ་རེ་ཡིས་ང་ལ་བག་ཆགས་གཏིང་ཟབ་བཞག་ཡོད། དེ་ནི་ཁོང་གི་ངག་གི་ཀློང་ལས་བརྡོལ་བའི་བྱམས་བརྩེ་ལས་གཞན། ད་དུང་མི་ཚང་མར་རྒྱུས་མངའ་ཡོད་པའི་ཁ་མཚར་དང་འདྲེས་པའི་སྤྲོ་སྣང་ཅན་གྱི་ཐུགས་གཤིས་དང་ཁོང་གི་ཤེས་རབ་ལས་མཆེད་ཅིང་སྤྲོས་པའི་འོད་སྣང་བཅས་ཡིན།
ད་ལྟ་འཛམ་གླིང་འདིར་ནང་སེམས་ཀྱི་རྣམ་བཞག་རྦད་དེ་རྩིས་མེད་དུ་གཏོང་བཞིན་པ་ལྟར་སྣང་བའི་སྐབས་འདིར། ༸གོང་ས་མཆོག་ལྟ་བུ་ཞིག་བཞུགས་པ་ནི་དེ་བས་ཀྱང་ང་ཚོའི་ནང་སེམས་ཀྱི་གལ་ཆེའི་རང་བཞིན་ལ་སྐུལ་མ་བྱས་པ་ཞིག་སྟེ། དེའི་ཕྱིར་མང་པོ་ཞིག རང་ཉིད་ཀྱིས་ཀྱང་གོ་ཚོར་མེད་པ་ལྟ་བུའི་ངང་ནས་༸གོང་ས་མཆོག་གི་ཆེས་མཐུས་སྒོ་ཚང་བའི་སྒོ་ནས་གོ་བརྡ་སྤྲོད་བཞིན་པའི་མིའི་རིགས་ཀྱི་སེམས་དབུས་སུ་སྦས་ཏེ་ཡོད་པའི་ཚེ་སྲོག་གི་བདེན་དོན་གྱི་རྗེས་སུ་འཚོལ་སྙེགས་བྱེད་ཅིང་ཡོད། དེ་ནི་འཛམ་བུ་གླིང་གིས་ད་ཆ་ཁོང་ལ་དགའ་བསུ་ཞུ་ཚད་སྔར་ལས་ཀྱང་མཐོ་རུ་ཕྱིན་པའི་རྒྱུ་མཚན་གལ་ཆེན་ཞིག་རེད། དེ་བཞིན། ཁོང་གིས་ཧ་ཅང་ཁ་གསལ་དོན་གསལ་གྱི་ཐོག་ནས་ཕྱི་དངོས་པོ་དང་ནང་སེམས་བརྒྱུད་ཀྱི་སྙོམ་སྒྲིག་གི་རང་བཞིན་གསལ་བཏོན་གནང་བ་དེས་ཀྱང་། མི་མང་པོ་ཞིག་དང་། ཁྱད་པར་དུ་ན་གཞོན་ཧ་ཅང་མང་པོ་ཞིག་གཏིང་ཟབ་པོའི་ཐོག་ནས་་ཡིད་དྲངས་ཏེ་ཡོད།
སྤྱིར་བཏང་། བྱ་བ་དོན་དག་འདྲ་དང་མི་འདྲ་མ་པོ་ཞིག་གིས་ང་ཚོར་རེ་བ་བརླགས་པ་དང་ཡིད་ཆེས་ཉམས་པའི་རྐྱེན་བྱེད་ཀྱི་ཡོད་ན་ཡང་། ཁོང་གིས་ང་ཚོར་ཨ་ནས་ཡང་དུ་ང་ཚོའི་སེམས་ཀྱི་ཆེས་ཡང་དག་པའི་རང་བཞིན་གྱི་བདེན་དོན་མངོན་དུ་གྱུར་པའི་སྐབས་སུ། མིའི་རང་གཤིས་དངོས་དེ་ནི་གདོང་ཐུག་དང་འཁོན་འཛིན་གྱི་ཕྱོགས་སུ་གནས་པ་ཞིག་མིན་པར། དེ་ལས་ལྡོག་སྟེ་བྱམས་བརྩེ་དང་སེམས་ཁུར་གྱི་ཕྱོགས་སུ་ཡོད་པ་ཞིག་ཡིན་ཞེས་སྐུལ་མ་གནང་གིན་ཡོད།
༸གོང་ས་མཆོག་གི་བཀའ་སློབ་ནི་དངོས་ཡོད་གནས་ཚུལ་དང་འཚམས་ཤིང་། ཁྱད་འཕགས་ཀྱི་རང་བཞིན་དང་ཡང་ལྡན་པ་སྟེ། ང་དང་ང་ནང་བཞིན་ཁོང་ཉིད་མཇལ་བའི་གོ་སྐབས་ཐོབ་ཡོད་མྱོང་བ་ཚང་མས་མགྲིན་དབྱངས་གཅིག་གྱུར་གྱིས་ཁོང་གི་ཁྱད་ཆོས་འདི་བརྗོད་ཀྱི་ཡོད། དེ་ནི་སེམས་ཐག་ཉེ་ཞིང་སྤྲོ་སྣང་གིས་ཕྱུག་པའི་ཤེས་རབ་དང་བྱམས་བརྩེ་ཟུང་དུ་འབྲེལ་བ་ཞིག་རེད།
ཁོང་གིས་ཁོང་ཉིད་དཔེ་རུ་བཞག་སྟེ། ང་ཚོར་སེམས་དགེ་བའི་དྲན་པ་ལ་གནས་དགོས་པ་ལས་ཁ་རྐྱང་པས་སྙིང་པོ་མེད་པའི་སྐད་ཆ་བཤད་ནས་འདུག་རྒྱུ་མེད་པར་དུས་ཚོད་སྐད་ཅིག་དང་ཡུད་ཙམ་རེ་རེ་བཞིན་ཚང་མར་དགེ་བ་སྒྲུབ་དགོས་པའི་བཀའ་སྩོལ་གྱི་ཡོད། ཁོང་གི་བཀའ་གསུང་འདི་དག་གིས་ང་ལ་༼ཤེས་རྟོགས་བྱུང་བའི་ཉེན་ཁ་༽ཞེས་འབོད་པ་དེ་དང་། ཛ་དྲག་གི་དགོས་མཁོར་དམིགས་པའི་དངོས་ཡོད་ཀྱི་འགུལ་སྐྱོད་གཉིས་ཀྱི་བར་དུ་ཕྱོགས་གཉིས་ཀྱི་འབྲེལ་བ་གསར་སྐྲུན་བྱེད་པའི་གལ་འགངས་དང་། དེ་ལྟར་བྱས་ན་གཞི་ནས་འཆམ་མཐུན་དང་སྙོམས་སྒྲིག་བསྐྱར་གསོ་བྱེད་ཐུབ་རྒྱུ་ཡིན་པ་སྟེ། དེའི་ཕྱོགས་ལ་འབད་བརྩོན་བྱེད་དགོས་པའི་བློ་སྒོ་ཕྱེས་བྱུང་།
༸གོང་ས་མཆོག་དང་ངེད་གཉིས་ཐུག་ཐེངས་རེ་རེ་བཞིན། རྒྱུན་དུ་གླེང་རྒྱུའི་སྐད་ཆ་གཙོ་བོ་ཞིག་ནི། སྔར་བཞིན་ངེད་གཉིས་ཆར་མཉམ་ཞུགས་བྱེད་ཀྱི་ཡོད་པའི་ཁོར་ཡུག་སྲུང་སྐྱོབ་ཀྱི་ལས་དོན་སྐོར་རེད། འདིའི་ཐད་ང་གཉིས་ལ་ཐུན་མོང་གི་དོ་ཁུར་ཡོད་ཅིང་། དེ་ནི་དཔེར་ན། ཁོང་གི་སྟོང་ལོ་གསར་པའི་ཀུན་སྤྱོད་ཅེས་པའི་ཕྱག་དེབ་ཀྱི་ནང་དུ།
དེ་རིང་གི་ཉི་མ་འདི་ལ་ཐུག་གི་བར་དུ། སའི་གོ་ལའི་སྐྱེད་མ་འདིས་གོ་རིམ་དང་སྒྲིག་གཞི་མེད་ཅིང་རྙོགས་ཟིང་ཆེ་བའི་ང་ཚོར་བཟོད་སྒོམ་བྱས་ཡོད་ན་ཡང་། ད་ཆ་དེ་ལས་ལྡོག་སྟེ་སྐྱེད་མ་འདིས་ང་ཚོའི་བྱ་སྤྱོད་ལ་མུ་མཐུད་ཇི་མི་སྙམ་པའི་ཚུལ་གྱིས་བཟོད་སྒོམ་བྱེད་མི་ཐུབ་པའི་ཚོད་དུ་སླེབས་ཡོད། ཁོར་ཡུག་གི་གནོད་འཚེས་བཟོས་པའི་གནད་དོན་ནི་ང་ཚོས་སྐྱེད་མ་འདིར་འགན་འཁུར་མེད་པའི་ལས་ཀ་བྱས་དྲགས་པའི་ཡན་ལན་སློག་པ་ཞིག་ཏུ་བལྟས་ནའང་འགྲིག སྐྱེད་མ་འདིས་ང་ཚོར། ཁོང་གི་བཟོད་སྲན་ཡང་ཚད་ཡོད་ཅིག་ཡིན་པའི་ཉེན་བརྡ་གཏོང་གིན་ཡོད། ཅེས་གསུངས་པ་ནང་བཞིན་རེད།
༸གོང་ས་མཆོག་གི་གསུང་ཚིག་མཐའ་དག་དེ་དང་དེ་ནང་བཞིན། སྟབས་བདེ་ཞིང་བབ་ཆགས་ལ་ནུས་པ་ཆེ་བ་ཞིག་རེད། ང་ཚོས་༸གོང་ས་མཆོག་དགོང་གྲངས་དོན་ལྔར་ཕེབས་པའི་འཁྲུངས་སྐར་བསུ་བཞིན་པའི་དུས་ཚིགས་འདིར། ང་ཚོས་ཁ་ཞེས་གཉིས་མེད་ཀྱི་ཐོག་ནས་ཁོང་གི་བྱམས་བརྩེའི་ཐུགས་ཁུར་ལ་བཀའ་དྲིན་ཆེ་ཞུ་དགོས་པར་མ་ཟད། ཁྱད་པར་དུ་ཁོང་ཉིད་སྐུ་ཚེ་མི་འགྱུར་ཡུན་ཏུ་བརྟན་པ་དང་། བྱམས་བརྩེ་དང་ཤེས་རབ་ཀྱི་གཟིགས་པ་ང་ཚོ་དང་མཉམ་དུ་ཡུན་གནས་ཡོང་བའི་སྨོན་ལམ་འདེབས་དགོས།
(ལྡི་ལི་དོན་ཁང་གིས་བཏོན་པའི་འཛམ་གླིང་གྲགས་ཅན་མི་སྣའི་འཁྲུངས་སྐར་ཆེད་བརྗོད་ཕྱོགས་སྒྲིག་《བྱམས་བརྩེའི་རྒྱ་མཚོ》ཞེས་པའི་ཆེད་དེབ་རྒྱ་འགྱུར་ལས་བསྒྱུར། )