སེམས་དཔའ་ཆེན་པོའི་འོད་སྣང་ནུབ་ཕྱོགས་སུ་མཆེད་པ། (མུ་འགོད་བཅུ་བཞི་པ།)

མི་གསོན་པོ།

 
སྤྱི་ཟླ་༤ ཚེས་༦ དགོང་མོར་༧དཔལ་རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་ཨ་རི་ནིའུ་ཧེ་ཝེན་ལ་ཡོད་པའི་གྲགས་ཅན་གྱི་གཙུག་ལག་སློབ་ཆེན་ཡེལ་གྱི་ནང་དུ་ཆིབས་བསྒྱུར་གནང་སྐབས་སློབ་ཆེན་གྱི་ལས་བྱེད་བོད་རིགས་རྣམས་ལ་སློབ་ཆེན་གྱི་ངོས་ནས་དམིགས་བསལ་གྱི་གོ་སྐབས་སྩལ་བ་ལྟར་ཕེབས་བསུ་ཞུས་ཟིན་རྗེས། སློབ་ཆེན་གྱི་སློབ་གཙོ་གཞོན་པ། ཁོར་ཡུག་གི་འགན་འཛིན། གཙུག་ལག་སློབ་ཆེན་གྱི་ཆོས་ལུགས་སློབ་དགེ་དང་འགན་འཛིན། དེ་བཞིན་སློབ་གྲྭའི་གནད་ཡོད་ཀྱི་མི་སྣ་རྣམས་ཀྱིས་ཆེད་དུ་གོ་སྒྲིག་ཞུས་ཏེ་དགོང་མོའི་གསོལ་ཚིགས་དང་ལྷན་བགྲོ་གླེང་དང་དགོངས་ཚུལ་བརྗེ་རེས་གནང་།

ལོ་ཤས་གོང་ནས་༧དཔལ་རྒྱལ་དབང་ཀརྨ་པ་མཆོག་ཡེལ་གཙུག་ལག་སློབ་ཆེན་གྱི་ཁོར་ཡུག་སྲུང་སྐྱོབ་སྡེ་ཚན་གྱི་ཧི་མ་ལའི་ཁོར་ཡུག་སྲུང་སྐྱོབ་ཀྱི་དབུ་འཛིན་དང་སློབ་སྟོན་པ་རུ་གསོལ་བ་བཏབས་པ་ལྟར་༧རྒྱལ་དབང་མཆོག་གིས་ཧི་མ་ལའི་ཁོར་ཡུག་ལ་སྲུང་སྐྱོབ་དང་། ལམ་སྟོན། ལས་འགུལ་སོགས་སྤེལ་མཛད་པར་སློབ་གྲྭའི་གནད་ཡོད་མི་སྣ་རྣམས་ཀྱིས་བསྔགས་བརྗོད་དང་གུས་བཀུར་ཞུས་གནང་བ་དང་། པར་བ་མཁས་དབང་ཞིག་གིས་བོད་དང་ཧི་མ་ལའི་རི་བརྒྱུད་དུ་བསྐྱོད་དེ་པར་ལེན་བྱས་པའི་པར་རིས་རྣམས་གཟིགས་འབུལ་དང་འབྲེལ་སྐར་མ་སུམ་ཅུ་ཙམ་གྱི་དུས་ཡུན་རིང་དུ་འགྲེལ་བརྗོད་ཀྱི་གཏམ་བཤད་ཀྱང་སྙན་སེང་ཞུས་པར་༧རྒྱལ་དབང་མཆོག་གིས་དགྱེས་ཚོར་ཆེན་པོས་གསན་གཟིགས་གནང་སོང་།

སྤྱི་ཚེས་བདུན་གྱི་ཞོགས་པ་སྟེ། དེ་རིང་གི་ཆུ་ཚོད་བཅུ་པར་གོ་སྒྲིག་པ་སློབ་དགེ་ཁག་ཅིག་དང་ལྷན་སློབ་གྲྭའི་ཡུལ་ལྗོངས་དང་བཀོད་པ་ལ་གཟིགས་ཞིབ་གནང་བ་དང་། གཙུག་ལག་སློབ་ཆེན་གྱི་གཞི་རྒྱ་ཆེ་བའི་དཔེ་མཛོད་ཁང་དུ་ཕེབས་ཏེ་ཕྱག་དཔེ་ཁག་ལ་གཟིགས་ཞིབ་གནང་བ་དང་འབྲེལ། ལོ་ངོ་བརྒྱ་ཕྲག་མང་པོའི་ལོ་རྒྱུས་མངའ་བའི་དཔེ་མཛོད་ཁང་དུ་ཡོད་པའི་བོད་ཀྱི་དཔེ་རྙིང་དང་ཐང་ཀ་སོགས་རྩ་ཆེན་གྱི་རིག་དངོས་རྣམས་༧རྒྱལ་དབང་མཆོག་ལ་སྤྱན་བསྟར་གཟིགས་འབུལ་ཞུས་སོང་། དེ་བཞིན་གནའ་རབས་ཀྱི་ཡིག་རྙིང་ཁག་ལ་གཅེས་སྤྲས་དང་སྲུང་སྐྱོབ་ཇི་ལྟར་བྱེད་ཚུལ་དང་མཐོར་ཞིག་སོང་བ་རྣམས་སླར་གསོ་དང་ཉར་ཚགས་བྱེད་ཚུལ་སོགས་ཀྱི་ལག་ཤེས་དང་ལག་ལེན་ལ་༧རྒྱལ་དབང་མཆོག་གིས་བཀའ་འདྲི་ཉམས་ཞིབ་གནང་བ་སོགས་ཞར་བྱུང་གི་མཛད་སྒོ་རྣམས་ལེགས་པར་གྲུབ་རྗེས། འཛམ་གླིང་མི་མང་ལ་སེམས་འགུལ་ཐེབས་པའི་ལས་དོན་དང་བྱ་གཞག་སྤེལ་མྱོང་བའི་རླབས་ཆེན་གྱི་སྐྱེས་བུ་དག་ལ་་གཙུག་ལག་སློབ་ཆེན་ཡེལ་གྱི་ངོས་ནས་སྤྱི་ལོ་༡༩༣༦ ནས་ཆབ་བྷི་ཧྥི་ལོ་ཤིབ་པི་ཞེས་པའི་ཆེ་མཐོང་གི་མཚན་སྙན་གཟེངས་བསྟོད་ཕུལ་བའི་ལུགས་སྲོལ་བཞིན། དེ་རིང་སྤྱི་ཟླ་༤ ཚེས་༧ ཉིན་ ༢༠༡༥ལོའི་ཆབ་བྷི་ཧྥི་ལོ་ཤིབ་པི་ཡི་ཆེ་མཐོང་གི་མཚན་སྙན་དེ་བོད་ཀྱི་བླ་ཆེན་༧དཔལ་རྒྱལ་དབང་ཀརྨ་པ་བཅུ་བདུན་པ་ཨོ་རྒྱན་འཕྲིན་ལས་རྡོ་རྗེ་མཆོག་ལ་ཕུལ་སོང་།

ཆེ་མཐོང་གཟེངས་བསྟོད་འདི་ནི་སྤྱི་ཚོགས་ཐོག་ཏུ་རང་དབང་དང་ཞི་བདེ། སྤྱི་ཚོགས་དང་ཁོར་ཡུག སྒྱུ་རྩལ་དང་སློབ་གསོ་སོགས་ཀྱི་ཐད་དུ་གཟེངས་སུ་ཐོན་པའི་བྱས་རྗེས་ཅན་གྱི་མི་སྣ་རྣམས་ལ་ཕུལ་བ་བཞིན་འདས་པའི་ལོ་རྒྱུས་ཐོག་ཏུ་རླབས་ཆེན་གྱི་བྱས་རྗེས་མངའ་བའི་ཨ་རི་སྲིད་འཛིན་བཞི་དང་། ནོ་ཝེལ་ཞི་བདེ་གཟེངས་རྟགས་ཐོབ་མྱོང་བའི་ཁོ་སི་ཊོ་རི་ཁའི་སྲིད་འཛིན་ཨོ་སི་ཁར་དང་། འབར་མའི་ལྕམ་ཨང་སན་སུ་སོགས་ཀྱིས་མཚོན་པའི་སྐྱེས་མཆོག་དམ་པ་མང་པོས་མཚན་སྙན་འདི་བཞེས་ཏེ་ལམ་སྟོན་གྱི་བཀའ་སློབ་སྩལ་མྱོང་བ་ལྟར་༧དཔལ་རྒྱལ་ཀརྨ་པ་མཆོག་ལ་ཡེལ་གཙུག་ལག་སློབ་ཆེན་གྱིས་ཇི་ལྟར་གསོལ་བ་བཏབས་པ་བཞིན་སྙིང་རྗེའི་རྣམ་འགྱུར་ལྡན་པའི་ནང་ཆོས་དང་ཁོར་ཡུག་ཅེས་པའི་བརྗོད་གཞི་ཐོག་ཏུ་བཀའ་སློབ་ལམ་སྟོན་ཟབ་རྒྱས་སྩལ་གནང་སོང་། ཆེས་རིན་ཐང་དང་ལྡན་ལ་དུས་རབས་ཉེར་གཅིག་པའི་ནང་དུ་ཧ་ཅང་དགོས་མཁོ་ཅན་གྱི་བཀའ་སློབ་དེ་ཉིད་མི་རྣམས་ཀྱིས་བརྗེད་པར་ཕངས་ནས་ཟིན་བྲིས་བཏབས་ཡོད་པས་རྗེས་སུ་མུ་འགོད་ཞུ་ཆོག

ཆེ་མཐོང་གི་མཚན་སྙན་ཕུལ་ཏེ་བཀའ་སློབ་གྲུབ་རྗེས་ཆབ་བྷི་ཧྥི་ལོ་ཤིབ་པི་ཡི་གཟེངས་བསྟོད་འབུལ་མཁན་གྱི་ཉེ་བའི་རིགས་བདག་ཁང་དུ་ཡེལ་གཙུག་ལག་སློབ་ཆེན་གྱི་མཐོ་སློབ་ཁག་གི་འགན་འཛིན་དང་སློབ་དགེ་སོགས་གནད་ཡོད་མི་སྣ་བརྒྱ་ཕྲག་ལ་ཉེ་བས་༧རྒྱལ་དབང་ཀརྨ་པ་མཆོག་ལ་མཇལ་འཕྲད་དང་གསུང་གླེང་གསོལ་ཚིགས་སོགས་ཀྱིས་མགྲོན་བསུ་གནང་སོང་། ཐོག་བརྩེགས་གསུམ་ཅན་གྱི་ཉེ་བའི་རིགས་བདག་ཁང་གི་མགྲོན་བསུ་བསྟི་གནས་སུ་འདས་པའི་ལོ་རྒྱུས་ཐོག་ཏུ་ཆབ་བྷི་ཧྥི་ལོ་ཤིབ་པི་གཟེངས་བསྟོད་བཞེས་མྱོང་བའི་རླབས་ཆེན་གྱི་མི་སྣ་རྣམས་ཀྱི་སྐུ་པར་བྱུང་རིམ་བཞིན་བཤམ་བཀོད་གནང་འདུག རླབས་ཆེན་གྱི་མི་སྣ་དག་གི་བྱས་རྗེས་ནམ་ཡང་ཡལ་དུ་མེད་པར་མཚོན་པའི་ཚོན་མདངས་རྣམ་པ་བཀྲ་བའི་སྐུ་པར་དེ་དག་གི་ཁྲོད་དུ་སྐུ་ན་གཞོན་ལ་གཟི་བརྗིད་ཆེ་བའི་༧རྒྱལ་དབང་མཆོག་གི་ཞལ་རས་འཛུམ་མདངས་དང་ལྡན་པའི་སྐུ་པར་ཆེས་གསོན་ཉམས་དང་ལྡན་པར་མཇལ་རྒྱུ་ཡོད་པ་འདི་ནི་གངས་ཅན་བོད་ཀྱི་ལོ་རྒྱུས་ནང་དུ་གཟི་བརྗིད་ཀྱི་རྒྱལ་ཁ་གསར་པ་ཞིག་ཅི་ལ་མིན།

བོད་ཀྱི་ལོ་རྒྱུས་ནང་དུ་བོད་ཀྱི་མི་སྣས་གཟེངས་བསྟོད་འདི་ཉིད་བཞེས་པ་ཐེངས་དང་པོའང་རེད་འདུག་པས་དད་འདུན་དང་དགའ་བསུ་ཁྲོད་ནས་ལོ་ན་ཆུང་བའི་ཆོས་ལུགས་ཀྱི་དབུ་ཁྲིད་ཁོང་ལ་བཀྲ་ཤིས་བདེ་ལེགས་དང་དགའ་བསུ་གྲངས་མེད་ཞུ་ལོས་འོས།
གངས་ཅན་བོད་ཀྱི་ན་གཞོན་ཚོ། ཁོང་ནི་ང་ཚོའི་རེ་བ་དང་མིག་དཔེའི་ཚབ་མཚོན་གསོན་པོ་ཞིག་ཡིན་པས་ཁོང་གི་མཛད་འཕྲིན་དང་ཕུགས་རྒྱང་རིང་པོའི་གཟིགས་རྒྱ་བཅས་ཀྱིས་ང་ཚོ་ལ་རེ་བ་དང་སྤོབས་པ་སྩལ་བྱུང་། ༧གོང་ས་ཐམས་ཅད་མཁྱེན་པའི་ཐུགས་རེ་དང་ལམ་སྟོན་ཆུད་ཟོས་སུ་བཏང་མ་སོང་ལ་གངས་ཅན་བོད་པ་ཚང་གི་དད་འདུན་དང་ཡིད་ཆེས་ལ་ཐེ་ཚོམ་སྤྲད་མ་སོང་། ༧རྒྱལ་དབང་ཀརྨ་པ་སྐུ་ཚེ་ཞབས་པད་བརྟན་ཁྱེད་ནི་ངའི་སེམས་ནང་གི་དུས་རབས་ཀྱི་ལམ་སྟོན་པ་ངོ་མ་དེ་ཡིན།

མི་གསོན་པོས་ཡེལ་གཙུག་ལག་སློབ་ཆེན་ནས་མགྱོགས་བྲིས་བྱས།