བལ་ཡུལ་ས་ཡོམ་ཁྲོད་ཀྱི་ཉིན་ཐོ། (གཉིས་པ།)

དགེ་འདུན་བསྟན་འཛིན་གྱིས་བྲིས།

2015/5/4 གཟའ་ཟླ་བ།

དེ་རིང་བུ་འཁྲིད་ནས་སླར་ཡང་དྷ་ར་ཧ་རཱ་ལ་ལྟ་རུ་ཕྱིན་པ་ཡིན་ལ། འདི་ནི་ས་ཡོམ་བྱུང་རྗེས་དེར་ལྟ་རུ་ཕྱིན་པ་ཐེངས་གཉིས་པ་ཡིན། ལོ་གཉིས་ཀྱི་གོང་དུ་བུ་འཁྲིད་ནས་དེའི་རྩེར་སོང་ནས་རྒྱལ་ས་ཀ་ཐ་མན་གྲུའི་མཛེས་ལྗོངས་ལ་བལྟས་པ་ད་ལྟའང་ཡིད་ལ་ལྷང་ངེར་འཆར་འོང་། ཐག་རིང་ནས་བལྟས་རུང་གསལ་ལྷང་ངེར་མཐོང་བའི་ལྕོག་མཁར་མཐོན་པོ་དེ་ད་ལྟ་འདི་ལྟར་ཐལ་རྡུལ་དུ་གྱུར་ཏེ་ཤུལ་ཙམ་ལས་མེད་པ་མཐོང་དུས། ངོ་མ། སེམས་ལ་སྐྱོ་བ་དཔག་ཏུ་མེད་པ་སྐྱེས་བྱུང་། དེར་བརྟེན། དེ་རིང་ལྕོག་མཁར་དེ་ངོ་སྤྲོད་མདོར་བསྡུས་ཤིག་བྱ་བར་འདོད།

དྷ་ར་ཧ་རཱ་ལྕོག་མཁར་ནི་སྤྱི་ལོ་ ༡༨༣༢ ལོར་སྲིད་བློན་བྷིམ་སེན་ ཐ་པ་ཡིས་བཙུན་མོ་ ལ་ལི་ཏའི་བཀོད་མངགས་འོག་གསར་བསྐྲུན་བྱས་ཤིང་། ཐག་རིང་ནས་ཕ་རོལ་གྱི་དམག་དཔུང་ཡོང་གི་ཡོད་མེད་སོ་ལྟ་བྱེད་ས་ཡིན། དེའི་སྟེང་ནས་བརྡ་བཏང་ཚེ་དམག་དཔུང་རུ་བསྒྲིགས་ནས་འགོག་སྲུང་གི་གྲ་སྒྲིག་བྱེད་དགོས།

འདི་ལ་ཐོག་བརྩེགས་དགུ་ཡོད་ཅིང་། མཐོ་ཚད་ལ་མི་ཊར་ 61.88 ཡོད། ཐོག་བརྩེགས་བརྒྱད་པའི་མཐའ་སྐོར་དུ་བྱ་འདབ་བཟོས་ཡོད་ཅིང་དེ་ནི་རྒྱང་ལྟ་བྱེད་ས་ཡིན།

སྤྱི་ལོ་ ༢༠༠༥ ལོར་མི་དམངས་ལ་སྒོ་ཕྱེས་ཏེ་ཡུལ་སྐོར་བ་རྣམས་དེའི་སྟེང་ལ་འཛེགས་ནས་རྒྱལ་ས་ཀ་ཐ་མན་ཌུའི་མཛེས་ལྗོངས་ལ་ལྟ་བར་དགའ། དགུ་ཐོག་ཏུ་ལྷ་དབང་ཕྱུག་ཆེན་པོའི་རྡོ་སྐུ་ཞིག་བཞུགས་ཡོད་པ་དང་། རྩེ་ན་ཟངས་ཀྱི་གན་དྷོ་ལ་ཡོད།

༡༨༣༤ ལོའི་ས་འགུལ་གྱིས་གནོད་སྐྱོན་ཚབས་ཆེན་མ་བཏང་། སྤྱི་ལོ་༡༩༣༤ ལོའི་ས་ཡོམ་གྱིས་གནོད་ཚབས་ཆེ་སྟེ་རྩེ་མོ་ཆག་རུང་བསྐྱར་གསོ་བྱས་ཡོད།  ༢༠༡༥/༤/༢༥ ཉིན་གྱི་ས་ཡོམ་དེས་རྦད་དེ་གཏོར་བཤིག་བཏང་བས་ད་ལྟ་རྨང་གཞི་ཙམ་ལས་ལྷག་མེད།

འདི་ནི་ད་རེས་ཀྱི་ས་ཡོམ་ཁྲོད་དུ་འཛམ་གླིང་གནའ་དངོས་སྲུང་སྐྱོབ་ཚན་པའི་ཁོངས་སུ་ཚུད་ཡོད་པའི་གནའ་ཤུལ་བཅུ་གཉིས་ལ་གཏོར་སྐྱོན་བྱུང་བའི་ནང་གི་གཅིག་ཡིན་སྐད།

འདིའི་ཞིག་རོའི་འོག་ནས་མི་རོ་བརྒྱ་དང་བརྒྱད་ཅུ་རྙེད་ཡོད་པ་དང་། དེའི་ཁྲོད་ནས་ཧ་ཅང་སྐྱི་གཡའ་བའི་བརྩེ་དུང་གི་གཏམ་རྒྱུད་ཅིག་རྙེད་ཡོད་པ་ནི།  གཞོན་ནུ་ཕོ་མོ་ཟུང་ཕན་ཚུན་འཐམས་ནས་ཤི་ཡོད་པ་དེ་རེད། ལ་ལས་བཤད་ན་ཁོ་གཉིས་ནི་རྒྱལ་སར་གནས་སྤོས་ནས་ལོ་འགའ་འགོར་ཡོད་སྐད།

ས་ཡོམ་བྱུང་བའི་ཉིན་མོ་དེ་ནི་གཟའ་སྤེན་པ་ཡིན་པས། བལ་ཡུལ་གྱི་བདུན་རེའི་གུང་སེང་གི་ཉིན་མོ་རེད། ཉིན་མོ་དེར་ཁོ་གཉིས་མཛའ་བརྩེའི་ཞགས་པས་དམ་དུ་བཅིངས་ཤིང་འབྱུང་འགྱུར་ལ་རེ་བའི་མིག་ཞགས་འཕེན་བཞིན། དཔུང་པ་གཤིབས་ནས་དགོད་སྒྲ་ཐག་གེར་སྤྲོ་སྣང་གི་གོམ་པ་རེ་རེ་མདུན་དུ་སྤོས། འོན་ཀྱང་། ལྕོག་མཁར་སྨྱུག་གསར་རླུང་བུས་བསྐྱོད་པ་བཞིན་དུ་གཡོས་ཤིང་བར་སྣང་ཁམས་ནས་ས་གཞིའི་ངོས་སུ་ཇེ་ཉེར་གྱུར་དང་འགྱུར་བཞིན་པ་ཚོར་དུས། ཨ་ཙི། སྐབས་དེའི་སེམས་ཁམས་ནི་སུ་ཞིག་གིས་རྟོགས་ཐུབ་ཨང་། ཨ་ཙི། ས་གཞིའི་གཡོ་འགུལ་ཐེངས་གཅིག་གིས་ཚེ་སྲོག་སྟོང་ཕྲག་དུ་མ་ཁྱུར་མིད་བཏང་སོང་།

འོན་ཀྱང་། སྙིང་རྗེ་སྤུ་ཙམ་ཡང་མེད་པའི་ས་ཡོམ་དྲག་པོ་དེས་ཀྱང་གཞོན་ནུ་ཕོ་མོ་དེ་གཉིས་པོ་ཁ་འབྲལ་དུ་འཇུག་མ་འདོད་པ་འདྲ་སྟེ། དེ་ལྟར་མིན་ན་ཁོ་གཉིས་གཏན་དུ་འཐམས་ནས་སྡོད་དུ་ག་ལ་འཇུག

 2015/5/7 Thursday

ང་ཚོ་དེ་རིང་ཞོགས་པ་ཆུ་ཚོད་གསུམ་པར་ལངས་ནས་སིན་དྷུ་པལ་ཅོག་ཕྱོགས་སུ་བསྐྱོད། དོས་འདྲེན་རླངས་འཁོར་བཞིའི་ནང་དུ་འབྲས་དོ་བོ་ 475 དང་སྣུམ་འགྱིག་ཁུག་ 500 བསྐྱལ་ནས་ཕྱིན། ཊ་ཊ་སོ་མ་ཞིག་གི་ནང་ལ་ཁ་ལོ་བ་དང་ཤར་པའི་བུད་མེད་གཅིག་(མོ་རང་གསར་འགོད་པ་ཡིན་མོད། ཐེངས་འདིར་དང་བླངས་པ་བྱས་ནས་ཡོང་ཡོད། རྒྱུ་མཚན་ནི་ངེད་ཅག་འགྲོ་ས་དེ་མོའི་གྲོང་སྡེ་རེད་འདུག)དང་གཞན་ངེད་ཅག་ཨ་མདོ་བ་བདུན་བཅས་བསྡད་ནས་སོང་། ཨ་མདོ་བ་གཅིག་གིས་སྦག་སྦག་བཏང་ནས་སྔོན་དུ་བསྐྱོད་པ་དང་། ད་དུང་གྲོང་སྡེ་དེ་ག་རང་ནས་ཡིན་པའི་ཤར་པ་འགའ་ཡང་ཡོད།

ལམ་དུ་ཐོ་འགོད་མང་དུ་བྱས་ནས་སོང་། གང་ནས་ཡོང་དང་གང་གི་ཡིན་སོགས་དྲི་བ་མང་པོ་ལ་ལན་འདེབས་ཀྱིན་སོང་། ང་ཚོ་བོད་མི་ཤ་སྟག་ཡིན་པས་དངོས་པོ་རྣམས་ཤར་པ་ཚོའི་ཡིན་པ་དང་། རང་གི་ཡུལ་མི་རྣམས་ལ་རོགས་སྐྱོབ་ཀྱི་དོན་དུ་སྐྱེལ་གྱི་ཡོད་པ་སོགས་སྨྲས་ནས་སོང་། ང་ཚོ་གཞན་ལ་རོགས་རམ་བྱེད་དུ་འགྲོ་གི་ཡོད་ཀྱང་ནག་ཅན་ཁྱུ་གཅིག་དང་འདྲ་བར་རང་རང་གི་ངོ་གདོང་ངོ་མ་སྦས་ནས་འགྲོ་དགོས་བྱུང་།

ང་ཚོས་མི་དང་དུད་འགྲོ་ཤི་བའི་རོ་བདག་མེད་དུ་བོར་བ་རུལ་བའི་དྲི་མ་ངར་བོ་འཐུལ་ས་མང་པོ་བརྒྱུད་ནས་བྷ་ར་བྷི་སི་ལ་སླེབས་ཤིང་། དེ་ནས་གཡས་སུ་དཀྱོགས་ཏེ་རི་ལམ་ཀྱག་ཀྱོག་བརྒྱུད་ནས་གྱེན་དུ་སོང་བས་ཆུ་ཚོད་དགུ་བ་ཡོལ་ཙམ་ལ་ང་ཚོའི་དམིགས་ཡུལ་ཨེ་ཀི་ལེ་ཞེས་པའི་གྲོང་སྡེར་འབྱོར། ང་ཚོས་བསམ་པར་ཡུལ་མི་རྣམས་སྔ་ས་ནས་འཛོམས་ནས་ང་ཚོར་བསྒུགས་ནས་བསྡད་ཡོད་སྙམ་ཞིང་དེ་ལྟར་རྗོད་ཀྱིན་སོང་། འོན་ཀྱང་། ང་ཚོ་འབྱོར་ནས་ཆུ་ཚོད་འགའི་རྗེས་སུ་ད་དུང་ཆ་ཚང་བ་མ་འབྱོར་བས། ང་ཚོས་ང་ཚོ་ཕྱིར་ལོག་རན་སོང་། མགྱོགས་པོ་གྱིས་ཞེས་ཡང་ཡང་ལབ་དགོས་བྱུང་། ཆུ་ཚོད ༡༠ ཙམ་ལ་ང་ཚོར་མགྱོགས་ཐུག་ར་རའི་ནང་ལ་སྒོ་ང་བླུགས་ནས་བསྐོལ་བ་ལྕགས་ཕོར་གང་རེ་བསྟབས།

རི་མགོ་དེར་ཉི་མ་ཧ་ཅང་ཚ་བོ་འདུག ཉི་མ་ཧ་ཅང་ཚ་བའི་ཁར་འཐུང་ཆུ་གཙང་མ་ཞིག་ཀྱང་མེད་པས། ཁ་སྐོམས་ནས་ཤི་ལ་ཁད་ཅིག་བྱུང་།

གྲོང་མི་ཕལ་ཆེ་བ་དངོས་གནས་སྐྱོ་བོ་འདུག འགའ་ཞིག་ལ་རོགས་རམ་ག་རེ་འབྱོར་ཡོད་མེད་དྲིས་པ་ལ། སྲིད་གཞུང་གིས་ཁྱིམ་ཚང་རེར་འབྲས་དོ་བོ་རེ་སྤྲད་པ་ལས་གཞན་རོགས་སྐྱོར་ཅི་ཡང་འབྱོར་མ་སོང་ཟེར། སྲིད་གཞུང་གིས་མི་ཤི་དོན་རྐྱེན་་བྱུང་བའི་ཁྱིམ་ཚང་ལ་ནེ་སྒོར་འབུམ་གཅིག་དང་། ཁང་པ་བརྡིབས་པ་ལ་ནེ་སྒོར་བཞི་ཁྲི་སྟེར་རྒྱུའི་ཁས་ལེན་བྱས་ཡོད་ཀྱང་ད་དུང་དངུལ་རག་མེད་ཟེར། སྒོར་མོ་ཁྲི་བཞིས་སོ་ཕག་འདང་ངེས་ཞིག་ཀྱང་མི་ཁུག་པས་དེས་ཁང་པ་བསྐྱར་གསོ་ཇི་ལྟར་བྱེད་ཨང་། མ་གཞི་རོགས་སྐྱོར་མང་པོ་རག་མ་རག་ནི་གྲོང་སྡེ་སོ་སོ་ནས་མི་འཇོན་ཐང་ཅན་ཡོད་མེད་ལ་རག་ལས་འདུག འཇོན་ཐང་ཅན་ཡོད་ན་ཡར་མར་ལ་འབྲེལ་བ་བྱས་ཏེ་རོགས་སྐྱོར་མང་པོ་རག་གི་ཡོད་པ་དང་། དེ་འདྲ་མེད་ན་གྲོང་མི་ཚང་མས་དཀའ་སྡུག་མྱངས་ནས་བསྡད་རྒྱུ་ལས་ལྷག་མེད། ང་ཚོ་འགྲོ་ས་དེ་ཡང་གྲོང་སྡེ་དེ་ནས་ཡིན་པའི་ཀོ་པན་དགོན་པའི་གྲྭ་བ་ཞིག་བརྒྱུད་ནས་འབྲེལ་བ་བྱུང་འདུག

བཟའ་བཅའ་རྣམས་ས་གནས་གཉིས་ལ་མང་ཚོགས་བསྡུས་ཏེ་ཁྱིམ་ཚང་རེ་ལ་འབྲས་དོ་བོ་རེ་དང་སྣུམ་འགྱིག་ཁུག་རེ་སྤྲད། དབང་པོ་སྐྱོན་ཅན་དང་མི་ཤི་ཆག་སྒོ་བྱུང་རིགས་ལ་དམིགས་བསལ་འཕར་མ་རེ་སྤྲད།  ཡུལ་མི་རྣམས་ཀྱིས་སྐད་ཅོར་ཆེན་པོ་བརྒྱབ། ང་ཚོ་ཉི་མས་འཚིག་ཅིང་ཕོ་བ་ལྟོགས། ཐོག་མར་དབང་སྐྱོན་བཞི་ལས་མེད་ཟེར་ཡང་རིམ་གྱིས་ཇེ་མང་ནས་ཇེ་མང་དུ་གྱུར། ཁོ་ཚོ་ཕན་ཚུན་ཁ་རྩོད་ཡང་ཡང་ཤོར། མཐར་ང་ཚོས་སྤྲོད་མཚམས་བཞག་སྟེ། ལྷག་མ་རྣམས་མར་འཁྱེར་འོངས་ནས་ལམ་སྐེད་དུ་སྡོད་ཁང་ཞིག་རོ་ཙམ་ལས་ལྷག་མེད་པའི་ཁྱིམ་ཚང་འགའ་ལ་བགོ་བཤའ་བྱས་ནས་སྤྲད་ཅིང་། ད་དུང་ལྷག་ཡོད་པ་དེ་ནས་ཡང་མར་བབས་ཏེ་གྲོང་སྡེ་གཞན་ཞིག་ལ་སྤྲད་ནས་འོངས།

མཐར་ཆུ་ཚོད་བདུན་པར་རང་གནས་སུ་འབྱོར། ང་ལྟ་བུས་རང་གི་རྒྱུ་ནོར་བཏང་ནས་དེ་ལྟ་བུ་སྒྲུབ་མི་ཐུབ་མོད། དེ་རིང་གཞན་གྱི་རོགས་ལ་འགྲོ་ཐུབ་པ་བྱུང་བས་དགའ་བོ་བྱུང་།

 2015/5/9 གཟའ་སྤེན་པ།

དེ་རིང་ནེ་པ་ལིའི་གྲོགས་འགའ་དང་ལྷན་དུ་ཀོ་ལ་ཏི་ཞེས་པའི་གྲོང་སྡེར་སོང་བ་ཡིན། དེ་ཡང་སིན་དྷུ་པལ་ཅོག་རྫོང་ཁོངས་རེད་འདུག རུ་ཁག་བདུན་པ་དང་བརྒྱད་པ་གཉིས་ལ་ཁྱིམ་ཚང་༦༥ ཡོད་པ་རེ་རེ་ལ་འབྲས་དོ་བོ་རེ། ཚྭ་དང་སྣུམ། འདག་ཆལ་དང་སོ་འཁྲུད་སོ་སྨན། བྱིས་པ་ཚོར་བྱི་རིལ་བཅས་བྱིན། མཇུག་ཏུ་འཕྲོད་བསྟེན་ཤེས་བྱ་དྲིལ་བསྒྲགས་བསྡུས་པ་ཞིག་ཀྱང་བྱས།

ལམ་བར་དུ་མི་ངན་འགའ་ལ་ཐུག་ནས་དལ་འགོར་བྱས་པར་མ་ཟད། རྙོག་དྲ་བསླངས་ནས་སྟེར་དུ་མ་བཅུག་པར་ཕྱིར་འཁྱེར་ནས་འོང་ལ་ཁད་ཅིག་བྱས། འོན་ཀྱང་། མཇུག་མཐར་ཐོག་མའི་དམིགས་འབེན་ལ་འཕྲོད་ཐུབ་སོང་།

དེ་རིང་གི་རོགས་དངོས་ནི་ཝི་པ་ཤྱ་ན་ཉམས་ལེན་པ་སྐོར་ཞིག་གིས་ཐབས་ཤེས་བྱས་ནས་བསྡུ་རུབ་བྱས་པ་དང་། དེའི་ནང་དུ་བལ་པོ་དང་ཕྱི་རྒྱལ་བ་གཉིས་ཀ་ཡོད། དང་བླང་ལས་མི་རྣམས་ནི་ན་གཞོན་ཚོ་རེད་ལ་རྒན་པ་ཚོས་དངོས་པོས་འགྲོ་གྲོན་བཏང་ཡོད། ང་ཚོ་མི་བཅུ་བཞི་ཡོད་ཅིང་ང་དང་ཨ་ལིན། ཕོ་ལཱ་བཅས་མ་གཏོགས་ཚང་མ་བལ་པོའི་ཕོ་གསར་ཤ་སྟག་ཡིན། ང་ཚོ་ཁ་མཚར་རྩེད་བཞིན་དང་བགད་མོ་དགོད་ཀྱིན་སོང་། ཊུ་ལུ་དྷ་ཡེ་ནི་སྣང་བ་སྐྱིད་ཤོས་དང་ཁ་མཚར་མང་ཤོས་རེད།

གྲོང་སྡེ་དེ་བྷོ་ཊི་ཀོ་སི་གཙང་པོའི་འགྲམ་དུ་ཆགས་ཡོད་མོད། ལམ་མི་བཟང་བས་གྲོང་སྡེའི་ནང་ལ་འགྲོ་མ་ཐུབ། འོན་ཀྱང་། དངོས་པོ་ལེན་དུ་འོངས་པའི་ཡུལ་མི་རྣམས་ལ་བལྟས་ན་ཁོ་ཚོའི་གྲོང་སྡེར་མ་སོང་རུང་། གང་འདྲ་ཡོད་མེད་ཟུར་བལྟས་ལེབ་མཐོང་གི་དཔེ་ལས་མ་འདས་པར་འདུག ཡིན་ནའང་མི་ལ་ཤི་སྐྱོན་མ་བྱུང་ཟེར་བས་དགའ་འོས་པ་ཙམ་ལགས།

ཕྱིར་ལོག་ཡོང་སྐབས་ང་ཚོའི་ངག་གི་དགོད་སྒྲ་སྔར་བས་མཐོ་ཞིང་། གདོང་གི་འཛུམ་མདངས་སྔར་བས་བཀྲ། ཚང་མའི་སེམས་ལ་དགའ་བ་སྐྱེས་ཤིང་ལུས་ལ་སྟོབས་ཤུགས་རྒྱས། གདོང་ལ་ཐལ་རྡུལ་སྐྱ་ཐག་གེར་ཆགས་ཡོད་ཀྱང་། ཁ་མཚར་རྒྱུན་མ་ཆད། པཉྩཁཱལ་ཞེས་པར་ལཱ་སེ་འཐུང་བཞིན་ངལ་གསོ་བྱས་ཤིང་། སང་ཉིན་ནམ་གནངས་ཉིན་ནུ་བ་ཀོ་ཊའི་ཕྱོགས་སུ་ཇི་ལྟར་བསྐྱོད་དགོས་སྐོར་ལ་གྲོས་ཁ་བྱས། ཚང་མ་སྦག་སྦག་བཏང་ནས་འགྲོ་རྩིས་འདུག་པས་ང་དང་ཨ་ལིན་ཞུགས་ཐབས་བྲལ།

ས་རུབ་ཙམ་ལ་རང་གནས་སུ་འབྱོར།

 

2015/5/12 གཟའ་མིག་དམར།

སྐབས་དེར་ང་ཚོས་རང་ཁྱིམ་དུ་བརྙན་འཕྲིན་ལྟ་བཞིན་ཡོད། གྲྭ་ཕྲུག་ལྔ་དྲུག་ཅིག་ཀྱང་ཡོད། ལྡིར་སྒྲ་དྲག་པོ་ཞིག་དང་ལྷན་ཅིག་ཁང་པ་འགུལ་བྱུང་ལ། དེ་མ་ཐག་བྱིས་པ་རྣམས་འབྲོས་པར་བརྩམས། ངས་མ་འབྲོས་མ་འབྲོས་ཞེས་བརྗོད་པ་ཡིན། རྒྱུ་མཚན་ནི། ས་འགུལ་དྲག་པོ་ཞིག་བྱུང་ནས་བདུན་ཕྲག་གཉིས་ལྷག་ལས་ཕྱིན་མེད་པས་འདི་ལྟ་བུའི་ཤུགས་ཆེན་ཞིག་འོང་གི་རེད་བསམ་པ་གཏན་ནས་མེད། ཟླ་སྔོན་མའི་ཚེས་ 25 ཉིན་ས་ཡོམ་དྲག་པོ་དེ་བྱུང་རྗེས། ས་ཡོམ་ཆུང་ངུ་རེ་ཉིན་རེར་ཡང་ཐེངས་ལྔ་དྲུག་རེ་འོངས་དང་འོང་བཞིན་པ་ཡིན་པས། དེ་རིང་གི་དེ་ཡང་དེ་འདྲ་ཞིག་ཡིན་རྒྱུ་རེད་སྙམ། འོན་ཀྱང་། བསམ་ཡུལ་ལས་འདས་པ་ཞིག་ལ། དེ་མ་ཐག་ཁང་པའི་ནང་གི་ཅ་དངོས་རྣམས་ཚག་སྒྲ་དང་བཅས་འདར་ཡོམ་ཡོམ་བྱས་པར་མ་ཟད། ཤིང་གི་ཆ་སྒམ་དེ་ཡང་འགྱེལ་ལ་ཁད་ཅིག་བྱས་པ་དང་། ཁང་པ་ཡང་གཡོ་འགུལ་ཆེ་རུ་གྱུར་པས། ངས་བྲོས་བྲོས་ཞེས་བྲེལ་བ་བྱས་པས་བྱིས་པ་རྣམས་མྱུར་དུ་ཕྱི་ལ་ཐོན། དེའི་རྗེས་ལ་ངའི་བཟའ་ཟླ་རྒྱུགས། ཚང་མའི་རྗེས་ལ་ང་རྒྱུགས།

ང་ཚོ་ཕྱི་རོལ་དུ་འབྱོར་སྐབས། ཁྱིམ་མཚེས་རྒད་པོ་ཞིག་ཡོད་པ་ཁོས་འདོམས་ཁེབས་གཅིག་པོ་གྱོན་ནས་ཕྱི་ལ་བྲོས་འོང་བ་དང་འཕྲད་པས། བྱིས་པ་འགས་ཁོ་ལ་མཛུབ་མོ་བཙུགས་ནས་”ཀུ་མཱ་ར་ལ་ལྟོས་དང་”ཟེར་བཞིན་གད་མོ་བགད། ཁོ་སླར་ཡང་ཁང་པའི་ནང་ལ་བྲོས། ཧ་ཧ་ཧ། བྱིས་པ་འགའ་མུ་མཐུད་ནས་བགད། འགའ་ཞིག་བླ་འཁྱམས་པ་ལྟར་གྲག་འགུལ་ཅི་ཡང་མེད་པར་ཁུ་སིམ་མེར་གནས།

ས་ཡོམ་རྒྱུག་སྐབས་ཉིན་གུང་གི་ཆུ་ཚོད་ ༡༢:༥༠ ཙམ་རེད། ཅུང་མ་འགོར་བར་སི་ཨེན་ཨེན་CNN གསར་ཁང་གིས་ཐེངས་འདིའི་ས་ཡོམ་གྱི་འགུལ་ཚད་ ༧་༤  ཡིན་པ་དང་། རྒྱུགས་ཡུལ་ལྟེ་བ་གནམ་ཆེ་གྲོང་བརྡལ་ཡིན་པ་བསྒྲགས་བྱུང་། གནམ་ཆེ་ནི་ཤར་ཁུམ་བུ་རྫོང་གི་ལྟེ་བ་ཡིན་ལ། བོད་དང་ཧ་ཅང་ཉེ་བས། ད་རེས་བོད་ལའང་མི་ཟོག་ལ་འཆི་སྐྱོན་དང་ཁང་ཁྱིམ་ལ་རྡིབ་ཞིག་བྱུང་ཡོད་ངེས་རེད།

ཟླ་སྔོན་མའི་ས་ཡོམ་དེས་མི་རྣམས་ལ་ཞེད་སྣང་ཚད་མེད་བསླངས། ཉིན་འགའི་གོང་ནས་མི་རྣམས་ཅུང་ཟད་ལྷོད་ལ་བབས་ཏེ་རང་རང་སོ་སོའི་ཁྱིམ་དུ་སྤོས་ནས་ཉལ་འགོ་བརྩམས་ཡོད། འོན་ཀྱང་། དེ་རིང་གི་ས་འགུལ་གྱིས་མི་རྣམས་སླར་ཡང་ཕྱི་ལ་ཕུད། ད་ལྟ་ང་ཚོ་གུར་ཁང་ནང་ན་ཉལ་བཞིན་ཡོད། དྲང་པོར་བཤད་ན་གུར་ངོ་མ་ཞིག་མིན་པར། འགྱིག་ཤོག་གྲུ་བཞི་ཞིག་གི་སྣེ་མོར་ཐག་པ་བཏགས་ནས་དཀྱིལ་མཐོ་ཙམ་དང་མཐའ་དམའ་ཙམ་བྱས་པ་ཞིག་ཡིན། དོ་དགོང་གནམ་ངོ་གཙང་སང་ངེར་འདུག་པས་ཕལ་ཆེར་ཆར་བ་འབབ་ས་མ་རེད་སྙམ།

ད་ལྟ་གནས་ཚུལ་ཐོན་པ་ལྟར་ན། དེ་རིང་གི་ས་ཡོམ་གྱི་གོད་ཆག་ཁྲོད་དུ་མི་ ༣༦ ལ་ཤི་སྐྱོན་བྱུང་ཡོད་པ་དང་། ༡༡༢༩ ལ་རྨས་སྐྱོན་བྱུང་། ཁང་པ་མང་པོ་ལ་རྡིབ་སྐྱོན་བྱུང་ཡོད་འདུག

2015/5/13 གཟའ་ལྷག་པ།

 དེ་རིང་ང་ཚོས་འབྲས་དོ་བོ་ ༩༠ དང་སྣུམ་འགྱིག་ཁུག་༡༠༠། སྦ་རྗེ་དོ་བོ་ ༢༠། ཚྭ་བཅས་བསྐྱལ་ནས་ནུ་ཝ་ཀོ་ཊ་རྫོང་གི་པི་པོལ་ཊཱལ་ཞེས་པའི་ས་ཆར་སོང་བ་ཡིན། དེ་ནི་གྲོང་སྡེ་དེ་ག་རང་གི་མི་ཡིས་ཐོ་འགོད་བྱས་ནས་ང་ཚོར་སྤྲད་པ་གཞིར་བཞག་ནས་གྲ་སྒྲིག་བྱས་པ་ཡིན། ཡིན་ནའང་། བགོ་བཤའ་བྱེད་སྐབས་ཁྱིམ་ཚང་གསུམ་ཙམ་ལ་འདང་མ་སོང་། གྲོང་སྡེ་གཞན་གྱི་མི་འགའ་རེ་ཡང་འོངས་ནས་རེ་བའི་མིག་ཟུང་བགྲད་ནས་ང་ཚོའི་ཉེ་འཁོར་ན་ཅི་ཞིག་ཨེ་རག་ལྟ་བཞིན་འདུག དེར་བརྟེན། ང་ཚོས་ཉིན་འགའི་རྗེས་ནས་སླར་ཡང་དངོས་པོ་འཁྱེར་ནས་འོང་ངེས་ཡིན་ཞེས་བརྗོད་དེ་སེམས་གསོ་བྱས། ང་ཚོ་དངོས་གནས་འགྲོ་རྩིས་ཡོད།

གྲོང་སྡེ་དེ་ཆགས་ས་ནི་རྒྱ་ཅུང་ཟད་ཆུང་བ་མ་གཏོགས་ཧ་ལམ་ཀ་ཋ་མན་ཌུ་དང་འདྲ་སེ་འདུག མཐའ་ཀུན་ནགས་རིས་བསྐོར་བའི་དབུས་ན་ཐང་ཆུང་ཆུང་ཞིག་ཡོད་པ་ནི་པི་པོལ་ཊཱལ་གྲོང་སྡེ་རེད། སྡོད་ཁང་མང་ཆེ་བ་ལ་རྡིབ་སྐྱོན་བྱུང་འདུག་པས། ཧ་ཅང་ཉུང་ཉུང་ཞིག་ལས་ཀྲོང་ངེར་ལངས་ཡོད་པ་མཐོང་རྒྱུ་མེད། ང་ཚོ་ཉིན་གུང་གི་ཆུ་ཚོད་༢་པ་ཙམ་ལ་འབྱོར་བས་ཚ་བ་ཧ་ཅང་ཆེ་བའི་སྐབས་རེད། ང་ཚོ་སླེབས་པ་ཤེས་པ་དང་སྔོན་ལ་བྱིས་པ་རྣམས་རྒྱུགས་ནས་འོངས་པ་དང་། དེ་ནས་བུད་མེད་རྣམས་བྲེལ་སྟབས་ཀྱིས་གཅིག་རྗེས་གཉིས་མཐུད་དུ་འོངས། སྐྱེས་པ་འགའ་ཡང་སླེབས་སོང་། སྐྱེས་པ་ཉུང་ཉུང་ཞིག་ལས་མེད་དེ་སྐྱེས་པ་རྣམས་ཡུལ་གཞན་དུ་ལས་ཀ་བྱེད་དུ་སོང་ཡོད་པ་བལ་ཡུལ་གྱི་གྲོང་གསེབ་ཕལ་ཆེ་བ་གཅིག་མཚུངས་རེད། བུད་མེད་ཁ་ཤས་ཀྱིས་འབྲས་དོ་བོ་གཅིག་པོ་དེ་ཡང་ལས་སླ་བོ་བྱས་ནས་འཁྱེར་མི་ཐུབ་པས་ང་ཚོའི་ལས་རོགས་ཚོས་སྐྱེལ་རོགས་བྱས། བྱིས་པ་རྣམས་ལ་བྱེ་རིལ་དང་བཤལ་འགོག་སྨན་ཡང་སྤྲད།

མི་འགའ་ཞིག་ལ་དྲིས་པར། གྲོང་སྡེ་དེ་རུ་མི་གཅིག་ཀྱང་ཤི་མེད་པ་ཤེས་བྱུང་། དེ་ནི་དགའ་འོས་པ་ཞིག་རེད། གཞུང་གིས་ཁྱིམ་རེ་ལ་སྒོར་མོ་ ༢༠༠༠ རེ་ལས་སྤྲད་མ་སོང་ཟེར། མི་ལྔ་ཡོད་པའི་ཁྱིམ་ཚང་གཅིག་ལ་ཆ་བཞག་ན། སྒོར་ཉིས་སྟོང་གིས་བདུན་ཕྲག་གཅིག་གི་འགྲོ་གྲོན་ཡང་མི་འདང་། ཅི་འདྲའི་སྲིད་གཞུང་ཐབས་རྡུགས་ཤིག་རེད་ཨང་། སྤྱི་སེམས་ཀྱིས་དབུལ་བའི་འགོ་ཁྲིད་དེ་ཚོ་ས་གཞི་འདིས་ཀྱང་ཁྱུར་མིད་གཏོང་མ་འདོད་པ་འདྲ། དེ་ལྟར་མིན་ན་མི་སྟོང་ཕྲག་བཅུ་ལ་ཉེ་བའི་ཚེ་སྲོག་འཕྲོག་སྐབས་གཞུང་གི་འགོ་ཁྲིད་དེ་དག་གཅིག་ཀྱང་མ་ཤི་བ་ག་རེ་ཡིན་ནམ།

ང་ལྟ་བུ་ལ་རང་གི་སྦ་ཁུག་ནས་དངུལ་བཏོན་ནས་རོགས་རམ་བྱེད་པའི་ནུས་པ་མེད། འོན་ཀྱང་། དུས་སྐབས་འདི་འདྲ་ལ་ཙོག་གེར་སྡོད་པ་ནི་དངོས་གནས་མི་འོས་པ་ཞིག་རེད། གལ་ཏེ་ཁྱེད་རང་གིས་གནོད་ཐེབས་མང་ཚོགས་ཀྱི་གནས་བབ་ངོ་མ་དངོས་སུ་མཐོང་ཡོད་ཚེ། ཁྱོད་ཀྱིས་སྙིང་དམར་པོས་ཁྱེད་རང་སོས་དལ་བག་ཕེབས་སུ་སྡོད་དུ་མི་འཇུག་ཐག་ཆོད་ཡིན།

ཉིན་འདི་གར་ང་ཚོས་རོགས་སྐྱོར་བྱས་པའི་འགྲོ་གྲོན་ནི་ཆུང་ཆུང་ཞིག་མིན་རུང་། དེ་དག་བདག་གི་ཆུང་མ་དང་ཆི་ལི་ནས་ཡིན་པའི་ཕའོ་ལཱ། ད་དུང་ཝི་པ་ཤོ་ནཱ་ཉམས་ལེན་པ་འགའ་དང་། ཁོ་ཚོའི་ངོ་ཤེས་འཛམ་གླིང་གི་ས་གནས་གང་སར་ཡོད་པ་རྣམས་ཀྱིས་ཕྱར་བ་གྲུ་འདེགས་བྱས་ནས་བསྡུ་རུབ་བྱས་པ་ཡིན་ལ། ཐེངས་འདིའི་གོད་ཆག་ལ་མི་རྒྱུ་ཅི་རིགས་ཀྱི་རོགས་རམ་བྱེད་མཁན་རྣམས་ལ་སྙིང་ཐག་པ་ཡི་རང་དང་བསྔགས་བརྗོད་ཞུ། བལ་ཡུལ་མི་དམངས་ལ་ད་དུང་ཡང་འཛམ་གླིང་གི་རོགས་རམ་དགོས་མཁོ་ཆེ།