རྩིས་པ་ག་གེ་མོས་དེ་ལྟར་ལུང་བསྟན་ཡོད་རེད་ཟེར།

དགེ་འདུན་བསྟན་འཛིན།

 
དེ་རིང་ནི་སྤྱི་ཟླ་༥ ཚེས་༢༠ སྟེ་༤•༢༥ ས་འགུལ་བྱུང་ནས་ཉིན་༢༥ ཕྱིན་པའི་ཉིན་མོ་རེད། དེ་རིང་སྔ་དྲོ་དང་ཉིན་གུང་། ས་སྲོད་བཅས་སོ་སོར་ས་འགུལ་འགུལ་ཤུགས་མི་ཆེ་རུང་ལྡིར་སྒྲ་ཧ་ཅང་ཆེ་བ་རེ་བརྒྱབ། མི་རྣམས་ཀྱིས་ཁ་སང་གཟའ་མིག་དམར་དང་གཞེས་ཉིན་གཟའ་སྤེན་པ་གཉིས་ལ་ས་འགུལ་ཆེན་པོ་འོང་ཉེན་ཡོད་ཚུལ་རྒྱ་ཆེར་བསྒྲགས་སོང་། རྩིས་པ་ག་གེ་མོས་དེ་ལྟར་ལུང་བསྟན་ཡོད་རེད་ཟེར། གཟའ་མིག་དམར་སོང་ཟིན་ལ་ས་འགུལ་ཆུང་ངུ་ཙམ་ལས་མ་བརྒྱབ། ཀོང་སྤྲུལ་ཡོན་ཏན་རྒྱ་མཚོའི་རང་རྣམ་དུ་སངས་རྒྱས་ཀྱི་ལུང་བསྟན་ཡང་དོན་དུ་འགྱུར་མི་འགྱུར་སྣ་ཚོགས་ཡོད་པར་གསུངས་འདུག
དེས་ན་རྩིས་པ་ག་གེ་མོའི་ལུང་བསྟན་ལ་ཡིད་ཆེས་བྱེད་རིན་ཅི་ལ་ཡོད། ཡིན་ནའང་གཟའ་སྤེན་པ་ད་དུང་འོང་རྒྱུར་བསྡད་ཡོད་ལ། གཅིག་བྱས་ན། མང་པོ་མང་པོ་བཤད་ན་ཐིག་པའི་དཔེ་ལྟར། དེ་འདྲའི་ལུང་བསྟན་དོན་ཐོག་ལ་མི་འགྲོ་བའི་ངེས་པའང་མེད་སྙམ།

ས་འགུལ་མ་རྒྱུགས་གོང་ནས་ས་རྒྱུས་སྨྲ་བ་རྣམས་ཀྱིས། བལ་ཡུལ་ལ་ས་འགུལ་རྒྱུག་པའི་ཉེན་ཁ་ཡོད་ཚུལ་ཐེངས་འགར་བསྒྲགས་ཡོད་པ་དང་། དེ་ཡང་ས་འགུལ་མ་བྱུང་བའི་བདུན་ཕྲག་གཅིག་གི་ནང་ལ་བསྒྲགས་ཡོད་པ་རེད། ཡིན་ནའང་། མི་རྣམས་ཀྱིས་འདི་ལྟ་བུའི་ཤུགས་ཚད་ཆེ་བའི་ས་འགུལ་ཞིག་འོང་སྲིད་པའི་གྲ་སྒྲིག་མ་བྱས་པ་དང་། ལྷག་པར་དུ་སྲིད་གཞུང་གིས་དེའི་ཐད་ལ་འཐུས་ཤོར་ཚབས་ཆེན་ཕྱིན་ཡོད་པས། ཐེངས་འདིའི་ཆག་སྒོ་འདི་བྱུང་བ་རེད། འདི་ལྟར་བཤད་ན་འདི་ཡང་ལུང་བསྟན་ཞིག་ལས་མ་འདས་པར་མ་ཟད། འཁྲུལ་བ་མེད་པའི་ལུང་བསྟན་ཞིག་ཏུ་གྱུར་པའང་རེད་མོད། འདི་ནི་ཚན་རིག་གི་ལུང་བསྟན་ཡིན་པ་དང་། བསྟན་དོན་མངོན་དུ་གྱུར་ཟིན་པའི་ལུང་བསྟན་ཞིག་རེད།
གནའ་བོའི་རྩིས་ཀྱི་རིག་པ་དེ་དག་ད་ལྟའི་ཚན་རིག་གི་རིགས་པའི་རྒྱ་མར་བཀྱགས་ན། ལྗིད་གོག་གཏན་ནས་མེད་པ་ཞིག་ཡིན་ག་ལ་སྲིད། འོན་ཀྱང་། ང་ནི་དེ་འདྲའི་རིགས་ལ་ཡིད་མི་ཆེས་པ་ཞིག་ཡིན། གང་ལྟར། ཉིན་གཉིས་ལས་མེད་པས་བལྟས་པས་ཆོག་གོ།

མཚམས་འདིར་སླེབས་དུས། ངས་གནད་དོན་གཞན་ཞིག་དྲན་བྱུང་། བལ་ཡུལ་ལ་ས་འགུལ་གྱི་ཆག་སྒོ་བྱུང་ནས་མི་རྒྱུ་གཉིས་ཀར་གྱོང་གུན་ཚབས་ཆེན་ཐེབས་པ་ལ། དགོན་ཁག་དུ་མས་སྣེ་འཁྲིད་དེ་མྱུར་སྐྱོབ་ཀྱི་ལས་འགུལ་ཧ་ལས་པའི་གཞི་རྒྱ་ཆེན་པོ་ཞིག་བརྩམས་དང་རྩོམ་བཞིན་ཡོད། དེའི་ནང་དུ་ཚོགས་པ་ཡོད་པར་མ་ཟད། སྒེར་པ་ཡང་མང་པོ་ཡོད། དེ་ལྟ་བུའི་རྣམ་དཀར་གྱི་བྱ་བ་ལ་ཡི་རང་ཤོར་ནས་ང་ཡང་དང་བླངས་པར་མཉམ་ཞུགས་བྱས་པ་ཡིན་ལ། རང་གིས་གང་མཐོང་གང་ཐོས་ཉིན་ཐོར་བཀོད་ནས་ངོ་དེབ་སོགས་སུ་འགོད་སྤེལ་བྱེད་ཀྱིན་ཡོད། ཀློག་མཁན་ཧ་ཅང་མང་པོས་བསྔགས་བརྗོད་གནང་བར་མ་ཟད། སེམས་ཤུགས་སྤར་རོགས་བྱས་པ་དང་གནས་ཚུལ་བརྒྱུད་འགོད་བྱེད་པ་སོགས་ཕྱོགས་མང་པོ་ནས་མཉམ་ཞུགས་ལ་འབད་པ་གནང་སོང་། འོན་ཀྱང་། འགའ་ཞིག་གིས་བལ་པོས་བོད་མི་སྐྱབས་བཅོལ་བར་སྡུག་པོ་བཏང་རབས་བཤད་པར་མ་ཟད། ལྷག་པར་དུ་ལ་ལས་དེ་སྔའི་གོར་བོད་དམག་འཁྲུག་སྐོར་གླེང་ཡོང་གི་འདུག

མདོར་དྲིལ་ན། ང་ཚོས་བལ་པོའི་མི་སེར་སྐྱོ་བོ་རྣམས་ལ་རོགས་རམ་བྱས་པ་ལ། བོད་མི་འགའ་ཞིག་གིས་མ་འདོད་པའི་རྣམ་འགྱུར་ཤུགས་ཆེར་བསྟན་ཡོང་གི་འདུག འདི་ནི་ཧ་ཅང་ཐབས་རྡུགས་རེད། ང་ཚོས་ལོ་རྒྱུས་ལས་ཉམས་མྱོང་དང་ལེགས་ཆ་ལེན་དགོས་པ་ལས། འཁོན་འཛིན་ནམ་ཡང་ལེན་མི་རུང་། འབྱུང་འགྱུར་གྱི་ཆེད་དུ་འདས་པ་བློས་གཏོང་བ་ལས། འདས་པའི་ཆེད་དུ་འབྱུང་འགྱུར་བློས་གཏོང་བ་ནི་བླུན་པོའི་ཡང་བླུན་མ་ཡིན་ནམ། ཅི་བྱས་རུང་བལ་བོད་གཉིས་ནི་སྔར་ཡང་ཁྱིམ་མཚེས་ཡིན་ལ་ད་ལྟའང་ཁྱིམ་མཚེས་ཡིན་པར་མ་ཟད། ཕྱིས་ཀྱང་ཁྱིམ་མཚེས་ཡིན། བློ་རྒྱ་ཆེར་བསྐྱེད་ཀྱིས་འཆམ་མཐུན་གྱི་ཁྱིམ་མཚེས་བསྐྲུན་དགོས།

2015/5/20 གཟའ་ལྷག་པ།