སྤྱན་ཆེན་པོ།
___རྗེ་བློ་བཟང་དགེ་འདུན་མཆོག་སྐུ་འདས་ནས་མི་ལོ་བདུན་ (༢༠༠༨-༥-༢༡____༢༠༡༥-༥-༢༡) འཁོར་བར་རྗེས་དྲན་ཞུ།
གནམ་སའི་བར་མཚམས་ཀྱི་ཧྲག་བར་ཞིག་ནས
བདེན་མེད་ཀྱི་ཐིག་ལེ་གསལ་བའི་འོད་སྣང་ཞིག་སྟོབས་ཀྱིས་མངོན་བྱུང
གསེར་ནག་གི་ཡིག་འབྲུ་སྦྲུམ་པའི་འོད་སྣང་གི་ཟེགས་མ་རེ་རེ
མིའི་རིགས་ཀྱི་སྤྱི་གཙུག་དང་སྙིང་ཁ་སོགས་སུ་འཐིམ་སོང
གཟི་བརྗིད་ངང་ཁྱེད་རང་ཉི་འོད་ཀྱི་ཀློང་དུ་བཞུད་སོང་ན་ཡང
མུན་ནག་གི་བྲང་གཞུང་ནས་བསམ་གཞིག་གི་བདེན་པ་བདར་དུས
ཁོ་བ་ཚོའི་ཟུངས་ཁྲག་ལ་འདྲེས་པའི་གསེར་གྱི་ཡིག་འབྲུ་དག
སེམས་ཀྱི་མངའ་ཐང་ན་སྔར་བཞིན་གསོན་འདུག་པས
དྲན་འོང་བ་ནི་འོད་འཚེར་བའི་ཉིད་ཀྱི་མིག་འབྲས་དེའོ
འདས་ཟིན་པའི་ཁ་སང་གི་ཁོ་བ་ཚོའི་འོད་སྣང་དེ་ཁྱེད་ཡིན་ལ
ཡབ་མེས་ཀྱི་རྩྭ་ཐང་ནས་གཏོར་བའི་ཤེས་རབ་ཀྱི་ས་བོན་དེ
ཁྱེད་ཀྱིས་ཕྱི་རབས་པ་རྣམས་ལ་གནང་བའི་སྒྲོན་མེ་དེ་ཡིན་པས
འཁྱག་གྲང་དང་ལྟོགས་སྐོམ་གྱིས་གཟིར་བའི་འཇིག་རྟེན་འདིར
ཁྱེད་ཉིད་འོད་ཀྱི་གཤོག་པ་ཞིག གངས་ཀྱི་རི་བོ་ཞིག
༢༠༡༥-༥-༢༠མཚན་སྨད་ལ་གྲུབ།
བཀའ་དྲིན་ཆེ། ངོ་མ་དྲན
དགེ་བཤེས་ཡག་པོ་དེ་ངོ་མ་དྲན། ཁོང་གིས་སྤྲུལ་རྫུན་མ་བཟོས། ཉམས་ཆུང་ཐུབ་ཚོད་མ་གཏོང་།
གཡོ་སྒྱུ་མེད་པའི་སེམས་དཔའ་ཆེན་པོ་ཁྱེད་ང་ཚོ་དང་ཞལ་གྱེས་པ་ནི་བདེན་སྲིད་དམ།
མཆོག་གི་སྔར་རྗེས་ཚང་མའི་བདེན་པའི་རྣམ་ཐར་དེ་ང་ཚོའི་སྙིང་ནས་ནམ་ཡང་ནུབ་མི་སྲིད་དོ།།
བླ་མའི་མཛད་རྗེས་བསྐལ་བའི་བར་དུ་དྲན།