རས་པ།
གྱེས་སེམས།
སྔུར་བ་ཟ་ཟིར་ཞིག་གི་སྣ་ཐག་ལ་འཇུས་ནས
གངས་རིར་བརྒལ་བའི་གཡག་རྒོད་ཀྱི་བཟོ་འདྲ་བའི
ཧ་ཅང་ཉམ་ཆུང་ཡིན་པའི་ནང་སེམས་ཀྱི་འཇིགས་པ་ཅན
ཆབ་སྲིད་ཀྱི་འཕྲུལ་འཁོར་གྱིས་རྩྭ་སྐྱ་བཞིན་འཐགས་ཤིང
འཁོར་བའི་དཀའ་སྡུག་གིས་སྐྱག་སྦྲང་བཞིན་བརྙས་དུས
ཁྱོད་རང་ཁ་ཁུ་སིམ་པོར་ང་དང་ཁ་གྱེས་རོགས
ང་རང་སླར་ཡང གངས་རིར་བརྒལ་མྱོང་ལ
བཟོ་ལྟ་ཤོར་བའི་གཡག་རྒོད་ཅིག་བྱེད་འདོད
༢༠༡༣།༥།༣༡ དགོང་མོ།
སུ་ཡིན་ཡང་།
ལྗོན་ཤིང་གཅིག་གི་རྩེ་མོ་ལ་འཁྲུངས་པའི
ཡལ་ག་དང་ལོ་མ་ཡོད་ཚད
སུས་བལྟས་ཀྱང་ཚོགས་ཚོགས་རུབ་རུབ་རང་འདུག་སྟེ
དོན་སྙིང་ཡོད་ཚད་ཀྱི་གནས་ལུགས་ལ
རང་རང་སར་ངར་ལངས་ཤིང
རང་རང་སར་གྱེན་ལངས་བྱེད་འདོད་ཡོད་པའི
མི་ཚོགས་དང་འདྲ་སྟེ
མི་ཚོགས་ནི་དེ་དང་འདྲ་ཨང་།
༢༠༡༣།༧།༡༩དགོང་མོ།
ཞིང་ས།
ཡོད་ཚད་ཐོབ་པར་འོས་པའི་སྙེ་མའི་ཚོགས
མགོ་བོ་གྲོང་ངེར་འགྲེངས་ཤིང
སྐྱེས་སྟོབས་ཆེན་པོས
ཉམས་དགའ་བའི་མདངས་སྟེར་ཞིང
རྒྱང་རིང་ནས་བལྟས་ཚེ་དམག་ས་རུ་རུ་དཔུང་སྒྲིག་འདྲའི
ཞིང་བ་དང་འཐབ་རྩོད་བྱེད་འདོད་བྱེད་པའི
མགོ་བོ་རེ་རེ ཕར་གཡོ་ཚུར་གཡོ་བྱེད
ཧ་ཅང་བསམ་ཤེས་ཡིན་མདོག་གིས
གསེར་མདོག་གི་མཛེས་པས་སྣེ་ལེན་བྱེད་ཅིང
ཞིང་བའི་དངུལ་ཆུས་རང་ཉིད་བཀྲུ་རུ་བཅུག
༢༠༡༣།༨།༢༡ལ།