ཨེ་མ་ཧོ།
ན་མོ་གུ་རུ་པདྨ་ཀ་ར་ཡེ།།
ལྷག་པའི་བསླབ་པ་ཚུལ་ཁྲིམས་གངས་ལྟར་དཀར།།
ལྷག་པའི་བསླབ་པ་ཏིང་འཛིན་ཟླ་ལྟར་དཀར།།
ལྷག་པའི་བསླབ་པ་ཤེས་རབ་འོད་སྣང་དཀར།།
ལྷག་དཀར་བཟང་པོ་གསུམ་འཛོམས་ཡོངས་སུ་བསུ།།
ལྷག་དཀར་སྲོལ་རྒྱུན་བཟངཔོའི་གོས་དཀར་གྱོན།།
ལྷག་དཀར་དཀར་ཟས་བཟང་པོའི་འཚོ་བ་རོལ།།
ལྷག་དཀར་སྐད་ཡིག་གཙང་མས་སྤྱི་དོན་གླེང་།།
ལྷག་དཀར་གཟའ་སྐར་བཟང་པོ་ཡོངས་སུ་བསུ།།
ལྷག་བསམ་བཟང་པོས་གཞན་དོན་འབྲས་བུ་དཀར།།
ལྷག་བསམ་དག་པས་འདི་ཕྱིའི་ཕན་བདེར་ལེགས།
ལྷག་པའི་ལྷ་མཆོག་རྒྱལ་བའི་ཐུགས་རྗེ་མཐུས།།
ལྷག་དཀར་བསྟན་འགྲོའི་དཔལ་དུ་དར་གྱུར་ཅིག།
ཅེས་པ་རབ་གནས་ཤིང་ལུག་སྣྲོན་ཟླའི་དཀར་ཕྱོགས་དགའ་བ་དང་པོ་དང་ལྷག་དཀར་གྱི་ཉི་མར་བོད་ཡུལ་དབུས་གཙང་གི་མཁའ་འགྲོ་ལྷག་པ་སྒྲོལ་མས་སྐུལ་ངོར་རྟེན་འབྲེལ་ལེགས་འགྲིགས་ཀྱིས་རྒྱལ་དབང་མཆོག་དང་ཀུན་མཁྱེན་བླ་མ་དང་བདུད་འཇོམས་སངསརྒྱས་པདྨ་དང་པན་ཆེན་ཡང་སྲིད་ཆོས་ཀྱི་རྒྱལ་པོ་སོགས་སྐྱེས་ཆེན་དུ་མའི་འཁྲུངས་གཟའ་རུ་གནས་པར་དུང་བསུ་བཅས་ཤྲྰི་ཨེ་མ་ཧོས་དབྱིན་ཡུལ་གཙུག་ལག་སློབ་གྲྭ་ཆེན་པོའི་རྒྱལ་སྤྱིའི་དགའ་སྟོན་རིས་མེད་ཚོགས་ཁང་དུ་བགྱིས་པར་དགེའོ།། །།
ལྷག་བསམ་གདུང་ལས་དཀར་བའི་སྙན་རྩོམ་ལ་།
ལྷག་བསམ་རྨ་མེད་དཱངས་བས་དགའ་བསུ་ཞུ་།
ལྷག་དཀར་ཉིན་མོར་ལྷ་སྲུང་མཆོད་པ་འདི་།
ལྷ་ཀླུ་ཞི་བདག་གཉེས་ནས་གྲོགས་འཕྲིན་མཛོད་།
ལྷག་པའི་བསླབ་པ་གསུམ་པོ་ལྷ་ཆོས་མཛད། །
ལྷག་པའི་ཐུགས་བསྐྱེད་གསུམ་པོ་མི་ཆོས་མཛད། །
ལྷག་དཀར་ལྷག་གཟར་འཁྲུངས་པའི་མི་མཆོག་མཆོག །
ལྷག་བསམ་རྒྱལ་པོ་༸ཁྱོད་ལ་གུས་ཕྱག་འཚལ། །
༼རེ་དོག་མེད་པའི་གྲོགས་པོ།༽
ཁ་ནས་གྲོགས་པོའི་ལ་རྒྱ་མ་བཤད་རུང་།།
ལྷད་མེད་གྲོགས་པོའི་བརྩེ་བ་འོད་ལྟར་གསལ།།
ཕྱི་ཡི་རྣམ་པ་རྫིགས་པོ་མེད་ཀྱང་རུང་།།
ནང་གི་སེམས་པ་རི་རྒྱལ་ལྷུན་དང་མཚུངས།།
གྲོགས་པོའི་སྤྱོད་པ་ཇི་ལྟར་སྡུག་ཀྱང་རུང་།།
ངོ་དགའ་སྤྲེལ་ལད་རྒྱབ་མདུན་ཡོད་མི་སྲིད།།
གནས་སྐབས་རྒྱུ་ནོར་ལོང་སྤྱོད་འཛོམས་ན་ཡང་།།
ཨ་གསར་བྱས་ནས་ལས་འབྲས་སྙོགས་མི་སྲིད།།
སྐྱིད་པའི་དུས་སུ་མཉམ་འཛོམས་མ་བྱུང་རུང་།།
དཀའ་བའི་དུས་སུ་རྒྱང་ལྟ་བྱེད་མི་སྲིད།།
ཟ་རྒྱུ་ཡོད་དུས་སྔོན་དུ་མ་སླེབས་རུང་།།
ལས་རྒྱུ་ཡོད་དུས་མཇུག་ཏུ་ལུས་མི་སྲིད།།
གྲོགས་པོའི་རྒྱུ་ནོར་དབང་པའི་རེ་བ་མེད།།
གྲོགས་པོའི་འབྲེལ་ཐག་ཆད་པའི་དོག་པ་མེད།།
རེ་དོག་མེད་པའི་ལྷད་མེད་གྲོགས་པོའི་འབྲེལ།།
ཆུ་བོའི་རྒྱུན་བཞིན་གནས་པའི་ཡིད་ཆེས་ཡོད།།
ཚེ་སྔོན་ལས་ཀྱི་མི་ལུས་རིན་ཆེན་ཐོབ།།
ལས་སྨོན་བཟང་པོས་ཚེ་འདིར་གྲོགས་སུ་འགྱུར།།
ཡིད་ཆེས་བརྟན་པོས་གྲོགས་པོར་བློ་འགལ་ཐོབ།།
དམ་ཚིག་གཙང་མས་རྟག་ཏུ་ལྷན་འཛོམས་ཡོང་།།
གཟི་མིག་དགུ་པས་ཚོར་སྣང་དུ་བྲིས།