རྔ་བཟའ་བདེ་པོ་འཚོ།
སྙིང་རྗེའི་བདག་ཉིད་འཕགས་མཆོག་སྤྱན་རས་གཟིགས།།
འགྲོ་ཁམས་རྒྱ་མཚོའི་མགོན་པོ་སངས་རྒྱས་དངོས།།
བླང་དོར་མུན་སེལ་དུས་མཐའི་སྟོན་པ་རུ།།
བྱོན་པའི་སེམས་དཔའ་ཆེ་ལ་སྙིང་ནས་འདུད།།
འཛམ་གླིང་མཁས་བཙུན་སྐར་ཚོགས་བྱེ་བའི་ཁྲོད།།
ཁྱེད་ནི་འོད་ཆེན་ཉི་མ་རང་ཤར་སྟེ།།
བྱམས་དང་སྙིང་རྗེའི་གཟུགས་སུ་ཤར་པ་ཡི།།
དུས་རབས་འདི་ཡི་བླང་དོར་མིག་འབྱེད་ཉིད།།
ཤར་ལྷོ་ནུབ་བྱང་རིས་མེད་སྐྱེ་འགྲོ་ལ།།
ཐུགས་བརྩེའི་བདུད་རྩི་བྱིན་རླབས་ངང་གིས་བསྩལ།།
དྲི་མེད་ཐུགས་རྗེ་ཅན་གྱི་མཐུ་ནུས་ཀྱིས།།
སྐྱབས་མེད་འགྲོ་བའི་སྙིང་གི་སྡུག་བསྔལ་སེལ།།
དེ་རིང་བཅུ་ཕྲག་བརྒྱད་ཀྱིས་བརྩེགས་པ་ཡི།།
ཉིད་ཀྱི་དགུང་ལོ་བརྒྱད་ཅུའི་དགའ་སྟོན་དེར།།
མདོ་དབུས་ཁམས་གསུམ་བོད་རིགས་སྤུན་ཟླ་དང་།།
འཛམ་གླིང་གྲོགས་པོ་ཚང་མས་རྟེན་འབྲེལ་ཞུ།།
རྨད་བྱུང་མཁྱེན་པའི་རྦ་རླབས་གཡོ་བའི་རྩེར།།
བྱམས་དང་བརྩེ་བའི་རླབས་ཀྱི་ཟེགས་མ་ཅན།།
བླ་མ་མཁྱེན་པའི་རྒྱ་མཚོའི་མཚན་ཅན་གྱི།།
བཀྲ་ཤིས་གྱ་སྟོན་དགའ་དད་སེམས་ཀྱིས་བསུ།།
2015.6.21
སྟོང་ཉིད་སྙིང་རྗེ་ཟུང་དུ་འཇུག་པའི་ལམ།།
ཆེས་ཆེར་གསལ་མཛད་གངས་ཅན་བསྟན་འགྲོའི་མགོན།།
ཕྱག་ན་པདྨོ་བསྟན་འཛིན་རྒྱ་མཚོ་ལ།།
གསོལ་བ་འདེབས་སོ་བཞེད་དོན་ལྷུན་གྲུབ་ཤོག།
དིལ་མགོན་མཁྱེན་བརྩེ་རིན་པོ་ཆེས་གསུངས་སོ།།
ཡག་པོ་བྲིས་འདུག་་་གྱ་སྟོན་ལ་རྟེན་འབྲེལ་ཞུ།
མནའ་མས་ཡག་པོ་བྲིས་འདུག རྡོས་སྦིས་ཚང་དགའ་ཡོད།