གྱ་སྟོན་ལ་ཕུལ་བའི་གཡུང་དྲུང་ལྷ་བསང་།

བྱ་འཕུར་ལྷུན་གྲུབ་རྒྱ་མཚོ། (ཨ་རི། རྒྱལ་གཤེན་ཞང་བོད་རིག་སློབ་ཁང་།)

ཨ་ལ་ཨེ་མ་ཧོ། །
བཀྲ་ཤིས་ཉི་མ་ཤར། །
བདེ་ལེགས་འོད་སྟོང་རྒྱས། །
ཕུན་ཚོགས་བཀྲ་མདངས་འབར། །
བརྒྱད་ཅུའི་འཁྲུངས་སྐར་ཚེས། །
ཕྱོགས་བཅུའི་འཇིག་རྟེན་བྲེལ། །
ལྷ་བསང་དགུང་ལ་འཐུལ། །
ཀི་སྒྲས་ས་གཞི་འདར། །
བསྭོ་སྒྲས་བར་སྣང་ཁེངས། །
རླུང་རྟ་མཁའ་ལ་འཕུར། །
མངའ་ཐང་མཚོ་མོ་འཁྱིལ། །
ལྷ་ཚོགས་དབྱིངས་སུ་རྒྱལ། །
གླུ་སྒྲ་རྣ་བར་འཇེབས། །
བྲོ་གར་མིག་ལ་མཛེས། །
མཆོད་ཆང་ལྕེ་ལ་ཞིམ། །
དུ་སྤྲིན་དགུང་དུ་འཕྱུར། །
དར་སྣ་འཇའ་ལྟར་མཛེས། །
ལྷ་མི་ཐམས་ཅད་དགྱེས། །
མི་རྣམས་བཀའ་བཞིན་སྒྲུབ། །
ལྷ་སྲུང་དམ་ཚིག་བརྟན། །
ཡེ་ཤེས་སྤྱན་རས་གསལ། །
བརྩེ་བའི་ཕྱག་རྡང་སྦྲེལ། །
ཐུགས་མཚོ་གཅིག་ཏུ་སྤུང་། །
འཛུམ་མདངས་འོད་དུ་མཆེད། །
བཞད་སྒྲས་འཇིག་རྟེན་དཀྲོག །
ཀུན་ཁྱབ་ཐུགས་ཁུར་ཡངས། །
ཆོས་ལུགས་མཐུན་སྒྲིལ་ཟབ། །
དག་སྣང་འོད་ཀྱིས་ཁྱབ། །
བསྟན་པའི་བ་དན་འཕྱར། །
གངས་རིའི་བླ་སྲོག་བརྟན། །
ཤེས་རིག་དབྱར་མཚོ་རྒྱས། །
དཔལ་འབྱོར་མེ་ཏོག་བཀྲ། །
མི་རིགས་མདུན་ལམ་ཉེ། །
འགྲོ་ཀུན་ཞི་བདེར་རོལ། །
སྐྱེ་མེད་གཡུང་དྲུང་སྐུ། །
འགག་མེད་བརྒྱད་ཁྲིའི་གསུང་། །
འཁྲུལ་མེད་བྱམས་བརྩེའི་ཐུགས། །
རིག་འཛིན་ཚེ་ཡི་ལྷས། །
རྟག་ཏུ་བརྟན་བཞུགས་མཛོད། །
ལྷ་དང་སྲུང་མས་གཟིགས། །
དཀོན་མཆོག་གསུམ་གྱིས་སྲུངས། །
སྐུ་ཚེ་རྒྱལ་མཚན་བརྟན། །
སྐུ་ཚེ་རྒྱལ་མཚན་བརྟན། །
སྐུ་ཚེ་རྒྱལ་མཚན་བརྟན། །

༧སྐུའི་གྱ་སྟོན་བསུ་བའི་གཡུང་དྲུང་ལྷ་བསང་འདི་སྒེར་གྱི་ངོ་དེབ་ཐོག་ཟིན་བྲིས་སུ་བཏབ་པ་གྲོགས་པོ་ཞིག་གིས་ཁ་བརྡར་བསྐུར་ན་ལེགས་རབ་གསུངས་པ་ལྟར་ཞུས།