རྒྱ་ནག་གི་ཁྱད་ཆོས་ལྡན་པའི་མནར་གཅོད་ཅིག

ཡོང་ཁུངས། བོད་ཀྱི་བང་ཆེན།

༧གོང་ས་མཆོག་ལ་མཚན་སྨད་ཞུ་བཅུག་པ་དེ་རྒྱ་ནག་གི་ཁྱད་ཆོས་ལྡན་པའི་མནར་གཅོད་ཅིག་རེད།

ཟླ་འདིའི་ཚེས་༢༦ ཉིན་དྷ་ས་མེག་གྷན་དུ་རྒྱལ་སྤྱིའི་མནར་གཅོད་ཀྱི་ཉིན་མོ་བོད་མི་ཚོས་སྲུང་བརྩི་བྱས་ཡོད་པ་དང་། རྒྱལ་སྤྱིའི་མནར་གཅོད་ཀྱི་ཉིན་མོ་ནི་མཉམ་སྦྲེལ་རྒྱལ་ཚོགས་ཀྱིས་གཏན་ལ་ཕབས་པའི་མནར་གཅོད་མྱོང་མཁན་གྱི་མི་མང་ལ་རྒྱབ་སྐྱོར་དགོས་པའི་ཉིན་མོ་ཞིག་ཡིན་པ་རེད།
དེ་ཡང་དྷ་ས་མེག་གྷན་ཡུལ་སྐོར་སྤྲོ་འཆམ་པའི་ཚོགས་ཁང་དུ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དང་། བོད་རང་བཙན་སློབ་ཕྲུག་ཚོགས་པ་གཉིས་ཀྱི་གོ་སྒྲིག་འོག བགྲོ་གླེང་ཞིག་འཚོགས་ཡོད་པ་རེད།

སྐབས་དེར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་བཟོ་སྐྲུན་བྱས་པའི་བོད་ནང་གི་ཆབ་སྲིད་བཙོན་པ་ཚོས་རྒྱ་ནག་གི་བཙོན་འོག་ནས་མྱངས་པའི་བརྒྱུད་རིམ་ཆབ་སྲིད་བཙོན་པ་བཞི་ལ་བཅར་འདྲི་བྱས་པའི་དངོས་བྱུང་གློག་བརྙན་ཞིག་བཤམ་སྟོན་བྱས་ཡོད་པ་རེད།

མི་མང་འདུ་འཛོམས་ཀྱི་བགྲོ་གླེང་ཐོག་ཆབ་སྲིད་བཙོན་ཟུར་མགོན་པོ་འཕྲིན་ལས་(ཁོང་༢༠༠༨ ལོར་རྒྱ་ནག་གིས་འཇུ་བཟུང་བྱས་ཏེ། ལོ་གཉིས་རིང་བཙོན་འཇུག་རྗེས། གློད་གྲོལ་བཏང་བ་དང་རྒྱ་གར་དུ་བྲོས་བྱོལ་ལ་ཡོང་ཡོད་པ་རེད་)ཀྱིས་རྒྱ་ནག་གིས་བོད་མི་ཞི་བའི་ངོ་རྒོལ་བར་མནར་གཅོད་གཏོང་སྟངས་སྐོར་ལ་གཏམ་བཤད་བྱས་པ་དང་། ཁོང་བཙོན་ཁང་ནང་དུ་བོད་ཀྱི་ཆབ་སྲིད་བཙོན་པ་༣༠༠ ཙམ་ལ་ཐུག་འཕྲད་བྱུང་བ་དང་། ཚང་མའི་དམིགས་ཡུལ་གཅིག་ཡིན་སྐོར། བཙོན་ཁང་ནང་ལོ་ན་༡༨ ཅན་གྱི་ཕོ་སར་ཞིག་ལ་རྡུང་རྡེག་བཏང་སྟེ་བསད་པ་དང་། དེ་བཞིན་མནར་གཅོད་འོག་ཟླ་ཤས་རྗེས་ནས་འདས་གྲོངས་སོང་བ་འབྲེལ་ཡོད་དང་དངོས་སུ་ཤེས་རྟོགས་བྱུང་བ་སོགས་ཡོད་སྐོར་འགྲེལ་བརྗོད་བྱས་སོང་།

བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོས་གཏམ་བཤད་གནང་སྐབས། མནར་གཅོད་ཀྱི་ཉིན་མོ་འདི་ལུས་སེམས་གཉིས་ཀྱི་མནར་གཅོད་མྱངས་བ་ལ་ངོས་འཛིན་དགོས་སྐོར་དང་། ལྟེ་གནས་ཁང་དེས་༢༠༠༨ ལོ་ནས་རྒྱ་ནག་གི་མནར་གཅོད་འོག་འདས་གྲོངས་སོང་བ་བོད་མི་བཅོ་བརྒྱད་ཤེས་རྟོགས་བྱུང་ཡོད་སྐོར། དེ་བཞིན་རྒྱ་ནག་གི་སྨན་ཁང་ནས་སྨན་ལོག་སྤྲད་དེ་ཆབ་སྲིད་བཙོན་པ་ཚོ་རིམ་པས་འཆི་སྐྱོན་བྱུང་གི་ཡོད་སྐོར་དང་། སེམས་ཁམས་ནད་པ་ཆགས་ཀྱི་ཡོད་སྐོར་སོགས་ངོ་སྤྲོད་བྱས་པ་དང་། རྒྱ་ནག་གིས་མནར་གཅོད་སྐབས་ཉེན་རྟོག་པ་དང་དམག་མི་དབང་ཆ་ཆེ་དྲགས་ནས་བོད་མི་ཆབ་སྲིད་བཙོན་པ་ཚོ་བསད་ནའང་ཁྲིམས་དང་འགལ་གྱི་མེད་པས། རྒྱལ་སྤྱིའི་ཐོག་དེའི་རིགས་ངོ་སྤྲོད་ཡོང་ཐབས་བྱེད་དགོས་སྐོར། བོད་མི་ལ་མནར་གཅོད་གཏོང་སྟངས་གཞན་དང་མ་འདྲ་བ་ཞིག་ནི་༧གོང་ས་མཆོག་ལ་མཚན་སྨད་ཞུ་བཅུག་པ་དེ་ཡིན་པ་དང་། དེ་ནི་འཛམ་གླིང་གི་མནར་གཅོད་གཏོང་སྟངས་ནང་ནས་རྒྱ་ནག་གི་ཁྱད་ཆོས་ལྡན་པའི་མནར་གཅོད་གཏོང་སྟངས་ཤིག་ཡིན་སྐོར་གསུངས་སོང་།

ཉམས་ཞིབ་བསྟན་འཛིན་ཉིན་བྱེད་ཀྱིས་གཏམ་བཤད་གནང་སྐབས། རྒྱལ་སྤྱིའི་མནར་གཅོད་ཉིན་མོ་དེ་མནར་གཅོད་མྱོང་མཁན་ཚོར་རྒྱབ་སྐྱོར་དང་། ལུས་སེམས་གསོ་བའི་ཉིན་མོར་གཏན་འབེབས་བྱས་ཡོད་པས། བོད་མི་ཚོའི་ལུས་སེམས་གསོ་དགོས་ན། རྒྱལ་སྤྱིའི་ཐོག་ནས་མནར་གཅོད་མྱངས་དགོས་པའི་རྒྱུ་མཚན་དེར་རྒྱབ་སྐྱོར་ཡོད་མེད་ལ་སྐད་ཆ་འདྲི་དགོས་སྐོར་དང་། རྒྱུ་མཚན་དེར་རྒྱབ་སྐྱོར་ཡོད་ན་བོད་མིས་མྱངས་བའི་མནར་གཅོད་དེ་སེལ་ཐབས་ཡོད་པ་ལས། དེ་མིན་སེལ་ཐུབ་མེད་སྐོར་འགྲེལ་བརྗོད་བྱས་སོང་།

དེ་བཞིན་ཉིན་དེའི་ཕྱི་དྲོ་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ངོས་ནས་དྷ་ས་མེག་གྷན་ཉིན་མོའི་སློབ་གྲྭར་བོད་མི་ཆབ་སྲིད་བཙོན་པ་ཚོས་རྒྱ་ནག་གི་མནར་གཅོད་འོག་མྱངས་པའི་བརྒྱུད་རིམ་གྱི་འགྲེམས་སྟོན་དང་། མི་མང་ལ་གཏམ་བཤད་གོ་སྒྲིག་བྱས་ཡོད་པ་རེད། སྐབས་དེར་ཚོགས་པ་དེའི་ངོས་ནས་གསལ་བསྒྲགས་ཤིག་སྤེལ་བའི་ནང་“དུས་དྲན་འདི་སྲུང་བརྩི་བྱེད་དགོས་དོན་འཆར་ཅན་དང་ལམ་སྲོལ་ཙམ་དུ་ངོས་འཛིན་མི་བྱེད་པར། ང་ཚོ་ཚང་མས་དམ་བཅའ་གསར་པ་དང་ཆོད་སེམས་གསར་པ་ཞིག་བཙུགས་ནས་འཛམ་གླིང་འདིའི་ཐོག་བཙན་གནོན་དང་མནར་གཅོད་མྱོང་བཞིན་ཡོད་པའི་སྐྱེ་བོ་དེ་ཚོ་ཇི་ལྟར་བྱས་ཏེ། རང་དབང་གི་འཚོ་བ་གསར་པར་ལོངས་སྤྱོད་བྱ་རྒྱུའི་བསམ་བློ་གཏོང་བའི་ཉིན་མོ་ཞིག་ཡིན་”ཞེས་དང་། “བོད་མིའི་འཐབ་རྩོད་ནི་བོད་མི་རང་ཉིད་བཙན་གནོན་དང་མནར་གཅོད་འོག་ནས་ཐར་ཐབས་བྱེད་པའི་དྲང་བདེན་གྱི་འཐབ་རྩོད་ཅིག་ཡིན་པ་མ་ཟད། མི་རིགས་ཡོངས་ཀྱི་བཙན་གནོན་དང་མནར་གཅོད་འགོག་ཐབས་བྱེད་པའི་འཐབ་རྩོད་ཀྱི་ཆ་ཤས་ཤིག་ཀྱང་ཆགས་ཡོད་”ཅེས་སོགས་འཁོད་འདུག

གསར་འགོད་པ་ཆོས་ཉིད་འོད་ཟེར།