ཟླ་བ་ཆོས་གྲགས།
ང་ཚོ་ཕྱོགས་སོ་སོ་ནས་ཡོང་བའི་འཁྱམས་པོའམ་ཡུལ་གྱར་བ་འགའ་དད་ཡུལ་གཅིག་པ་དང་ལས་དབང་གཅིག་པ་ཞིག་གིས་ང་ཚོ་ས་ཆ་གཅིག་དང་དགོན་པ་གཅིག་ལ་མཉམ་དུ་འཛོམས་མྱོང་། དེའི་སྐབས་སུ་ང་ཚོ་སུ་ལའང་གྲྭ་པ་དང་ཇོ་མོའི་གྱོན་ཆས་མེད་པའི་སྐྱ་བོ་ཤ་སྟག་ཡིན། དགོན་པ་གཅིག་ཏུ་འཛོམས་ཡོང་བའི་རྒྱུ་མཚན་ནི། ཁོའི་སྤུན་མཆེད་མགྲོན་གཉེར་དང་། མོའི་སྤུན་ཉེ་ཡང་མགྲོན་གཉེར་རེད། གཞན་འདི་ཡང་དགོན་པའི་ལས་བྱེད་མི་སྣ་དང། ང་ཡང་ཕྱོགས་གང་ཐད་ནས་འབྲེལ་བ་ཡོད་པའི་མི་བུ་ཞིག་ཡིན། ང་ཚོ་ཕྱོགས་གང་ཐད་ནས་གནས་བབ་གཅིག་པ་དང་དམིགས་ཡུལ་གཅིག་པ་ཡིན་པའི་བར་སྐབས་དེར། ང་ཚོ་ཕན་ཚུན་བར་སེམས་ཐག་ཉེ་བོ་བྱུང་། ང་ཚོ་ལ་ཡོད་པའི་སྤུན་མཆེད་ཚོ་ཡང་ཡུན་རིང་ཐུགས་འདྲིས་ཟབ་ལ་ཕན་ཚུན་བར་བརྩི་བཀུར་དང་ཡིད་ཆེས་ཆེ་བའི་ཆོས་མཆེད་ཤ་སྟག་རེད།
སྐབས་དེའི་དུས་ཤིག་ལ་༧སྐྱབས་རྗེ་གོ་ཤྲི་རྒྱལ་ཚབ་རིན་པོ་ཆེས་བཀའ་བརྒྱུད་བསྔགས་མཛོད་ཆེན་མོའི་དབང་ལུང་ཟབ་མོ་ཉིན་ཉེར་བདུན་རིང་གནང་བྱུང་བ་མཉམ་ཞུ་བྱས་པས་ང་ཚོ་ཕན་ཚུན་ལྷག་ཏུ་འདྲིས་པོ་དང་། ནང་པའི་ཆོས་ཕྱོགས་ནས་བཤད་ན། དབང་ལུང་གདམས་ངག་མཉམ་དུ་ཞུས་པའི་ཆོས་གྲོགས་བཟང་པོ་རུ་གྱུར།
ང་ཚོས་སོ་སོའི་རེ་བ་དང་དམིགས་ཡུལ་ལ་མུ་མཐུད་འབད་པ་བྱས་པའི་མཐར་ལོ་དང་ཟླ་བའི་སྔོན་རྗེས་ཙམ་ལས། ང་ཚོ་ཚང་མ་ནུབ་ཕྱོགས་ཀྱི་རྒྱལ་ཁབ་ཧྥ་རིན་སི་ལ་འབྱོར། ཟླ་ཤས་སྔོན་ང་ཚོས་ཕན་ཚུན་སྐད་ཆ་བཤད་པའི་སྐབས་སུ་ད་ལོ་ནས་མགོ་བཙུག་སྟེ་ལོ་རེ་བཞིན་༧སྐྱབས་རྗེ་རྒྱལ་ཚབ་རིན་པོ་ཆེ་མཆོག་གི་སྐུའི་འཁྲུངས་སྐར་ཧྥ་རན་སི་ལ་གང་ཐུབ་ཅི་ཐུབ་ཀྱིས་བསྲུང་བརྩི་བྱ་རྒྱུ་སྐད་ཆ་བཤད་པས་ང་ཚོ་ཚང་མ་མོས་མཐུན་བྱུང་། ད་དུང་གཞན་འགའ་ཡང་རིན་པོ་ཆེའི་སློབ་མ་ཡིན་པ་ཡོད་སྐད་ཐོས་ཏེ། ཕན་ཚུན་ཡར་མར་འབྲེལ་བ་བྱས་ཀྱང་ལས་ཀ་དང་ས་ཐག་གི་དབང་གིས་འགའ་ཤས་འདིར་འཛོམས་ཐུབ་པ་མ་བྱུང་
ཡང། མ་འོངས་པ་རྗེས་ཕྱོགས་མཉམ་གཅིག་ཏུ་རིན་པོ་ཆེའི་སྐུ་ཡི་འཁྲུངས་སྐར་བསྲུང་བརྩི་ཞུ་ཐུབ་པའི་རེ་བ་ཡོད།
སྤྱིར་བཏང་རྒྱལ་ཚབ་རིན་པོ་ཆེའི་སྐུ་འཁྲུངས་སྐར་དེ་བོད་ལུགས་ཀྱིས་བརྩིས་ན་འཛམ་གླིང་སྤྱི་བསང་གི་ཉིན་མོ་དང་། ལོ་འདིར་སྤྱི་ཟླ་བདུན་པའི་ཚེས་པ་གཉིས་ལ་ཁེལ་གྱི་ཡོད་ཀྱང་། ང་ཚོའི་ལས་ཀ་དང་དུས་ཚོད་ཀྱི་དབང་གིས་ཉིན་འགའ་ཤས་ཕྱིར་འགྱང་བྱ་དགོས་བྱུང་། ཕྱིར་འགྱང་དེ་ཡང་དུས་ཚོད་དང་ཉི་མ་བཟང་པོ་ཞིག་སྟེ། ༧གོང་ས་སྐྱབས་མགོ་ཆེན་པོ་འཛམ་གླིང་ཞི་བདེའི་དེད་དཔོན། ང་ཚོ་བོད་གངས་ཅན་པའི་གཙུག་གི་ནོར་བུ་ལྟ་བུའི་༧རྒྱལ་བ་བསྟན་འཛིན་རྒྱ་མཚོའི་སྐུ་ཡི་འཁྲུངས་སྐར་དེ་སྤྱི་ལོ་ལྟར་བརྩིས་ན། སྤྱི་ཟླ་བདུན་པའི་ཚེས་དྲུག་ལ་ཡིན་པས། དེ་དང་སྟབས་གཅིག་ཏུ་ང་ཚོས་ཀྱང་རིན་པོ་ཆེའི་སྐུ་ཡི་འཁྲུངས་སྐར་བསྲུང་བརྩི་བྱ་རྒྱུ་བྱུང་བས་ཧ་ཅང་དགའ་བོ་བྱུང་། བཀྲ་ཤིས་བདེ་ལེགས་ཀྱི་ངང་ནས་ལོ་འདིར་གཞན་ཡང་གྲོགས་པོ་བཟང་པོ་འགའ་ཤས་མཉམ་དུ་འཛོམས་རྒྱུ་བྱུང་བས། ཧ་ཅང་སྐྱིད་པོ་བྱུང་། བཀྲ་ཤིས་པར་ཤོག་ཅིག །རིན་པོ་ཆེའི་སྐུ་ཚེ་རིང་ལ་འགྲོ་དོན་རྒྱས་པར་ཤོག །Happy birthday Renpo Che!
བཀྲིས་བདེ་ལེགས་ཞུ།