གནས་ཚུལ་གཏོང་མཁན། ཚེ་རིང་དབང་ཕྱུག
ཕྱི་ལོ་༢༠༡༥ ཟླ་༧ ཚེས་༩ ཉིན་གྱི་ཕྱི་དྲོ་བོད་ནང་གི་ཆུ་ཚོད་ ༦ པ་ཡས་མས་ལ་ཡུལ་ཤུལ་སྐྱེ་རྒུ་མདོའི་གེ་སར་ཐང་ཆེན་བོད་པའི་ཁང་པ་མང་པོ་ཡོད་སའི་ཉེ་འགྲམ་དུ། ཕ་ཡུལ་ནང་ཆེན་ནས་ཡིན་པའི་རང་ལོ་ ༢༦ ཡིན་པའི་བོད་པའི་དགེ་འདུན་པ་བསོད་ནམས་སྟོབས་རྒྱལ་ལགས་ཀྱིས་རང་ལུས་མེར་སྲེག་བཏང་བ་དང་། ལི་ཐང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་ནག་གཞུང་གི་བཙོན་འཇུག་དོ་དམ་འོག་བཞུགས་མུར། ཕྱི་ལོ་ ༢༠༡༥ ཟླ་ ༧ ཚེས་ ༡༢ ཉིན་ས་གནས་ཁྲིམས་ཁང་མི་སྣས་རིན་པོ་ཆེ་མཆོག་དགོངས་པ་རྫོགས་པའི་བརྡ་ཁྱབ་བྱས་ཡོད་པར། བོད་མིའི་སྒྲིག་འཛུགས་བཀའ་ཤག་གི་བཀའ་འབྲེལ་འོག་ཕྱི་ལོ་ ༢༠༡༥ ཟླ་ ༧ ཚེས་ ༡༥ ཉིན་ཆོས་རིག་ལས་ཁུངས་ནས་གོ་སྒྲིག་ཞུས་ཏེ། དམ་པ་ཁོང་རྣམ་གཉིས་ལ་གཞུང་ཕྱོགས་ནས་གདུང་སེམས་མཉམ་སྐྱེའི་མྱ་ངན་རྗེས་དྲན་ཞུ་སླད། གོང་ཚེས་ཉིན་གྱི་ཕྱི་དྲོ་ཆུ་ཚོད་ ༤ པ་ནས་ལས་ཁུངས་ཁག་སྒོ་བརྒྱབ་སྟེ། རྡ་ས་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔའི་དྲུང་དུ་མཆོད་སྤྲིན་སྣ་ལྔ་འབུལ་ཤོམ་དང་འབྲེལ།
མཆོད་འབུལ་སྨོན་ལམ་གྱི་ཚོགས་མགོན་དུ་བཀའ་ཟུར་ཀིརྟི་རིན་པོ་ཆེ་མཆོག་དབུ་བཞུགས་ཐོག་སྲིད་ཚབ་ཤེས་རིག་བཀའ་བློན་དངོས་གྲུབ་ཚེ་རིང་མཆོག་གིས་དབུས་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། བོད་མི་མང་སྤྱི་འཐུས་རྒྱུན་ལས་རྣམ་པ། ལྷན་ཁང་ཁག་གི་དྲུང་ཆེ་ཆུང་རྣམ་པ། སྲི་ཞུའི་ལས་བྱེད་རྣམ་པ། བཞུགས་སྒར་ཁུལ་གནས་རིས་མེད་ཆོས་སྡེ་ཁག་གི་དགེ་བཙུན་སྔགས་གསུམ། གཞན་ཡང་གཉུག་མར་གནས་པ་དང་གློ་བུར་ལྷགས་པའི་དགེ་བཙུན་སྔགས་གསུམ། དེ་བཞིན་མི་མང་། ཕྱི་རྒྱལ་བ་བཅས་ཁྱོན་མི་གྲངས་བརྒྱ་ཕྲག་བརྒལ་བ་འདུ་འཛོམས་ཀྱིས་སྨོན་ལམ་གསུང་འདོན་གནང་མུར་རྣམ་རྒྱལ་གྲྭ་ཚང་གི་དགེ་བསྐོས་ནས་ཆོས་རིག་ལས་ཁུངས་ཀྱི་སྐྱབས་ཐོ་སྒྲོགས་སྦྱང་གནང་། དེ་ནས་སྲིད་ཚབ་མཆོག་གིས་གསུང་བཤད་གནང་རྗེས་ཕྱི་དྲོ་ཆུ་ཚོད་ ༥ བར་སྨོན་ལམ་གསུང་འདོན་གནང་ཡོད།
དེ་བཞིན་བོད་མིའི་སྒྲིག་འཛུགས་ཆོས་རིག་ལས་ཁུངས་ནས་ཞིང་མཆོག་འདུས་པ་རྒྱ་མཚོར་བསྙེན་བཀུར་གསོལ་ཇ་དང་དགེ་བཙུན་སྔགས་གསུམ་ལ་སྐུ་འགྱེད་ཧིན་སྒོར་ ༡༠༠ རེར་ཕུལ་ཡོད་པ་བཅས།།
སྲིད་སྐྱོང་གིས་གཙོས་པའི་ཆོས་རིག་བཀའ་བློན་དང་། བདེ་སྲུང་བཀའ་བློན། ཕྱི་དྲིལ་བཀའ་བློན་རྣམས་ཛ་དྲག་གི་དུས་ཚོད་འདི་འདྲའི་སྐབས་ལ་ཡང་ཕྱི་རྒྱལ་ན་༧རྒྱལ་བ་རིན་པོ་ཆེའི་སྐུ་རྗེས་དེད་ནས་བསྡད་ཡོད། བོད་དོན་རྩོད་ཡུལ་དངོས་ནི་རྒྱ་ནག་ཏུ་ཡོད་པ་ལས་ཕྱི་རྒྱལ་ཡུལ་གྲུ་ཁག་ན་མེད། རྒྱ་ནག་ལ་ཁ་ཕྱོགས་ནས་བོད་ཀྱི་དཀའ་ངལ་སེལ་ཐབས་བྱ་དགོས་པ་ལས། ཕྱི་རྒྱལ་ཁག་ནས་བོད་ཀྱི་དཀའ་ངལ་སེལ་མི་ཐུབ། ཚད་བརྒལ་རང་བཞིན་གྱི་རྒྱ་ནག་གི་བཙན་གནོན་སྡུག་སྤྱོད་ལ་འཁོན་ལན་སློག་མི་ནུས་ཀྱང་། སྒུལ་ཤུགས་ཅན་གྱི་བདེན་པའི་ངར་སྐད་རེ་དུས་དང་དུས་སུ་སྒྲོག་ལོས་དགོས།
ཉེ་སྔོན་གྲྭ་བསོད་ནམས་སྟོབས་རྒྱལ་ལགས་ཀྱིས་རང་གི་གཅེས་པའི་སྐུ་ལུས་དེ་ཚ་ལམ་ལམ་ངང་ལྷོག་ལྷོག་ཏུ་འབར་བཞིན་པའི་མེ་ལྕེའི་ཁྲོད་འབུལ་དུས་སྲིད་སྐྱོང་འཁོར་བཅས་ཨ་རིར་ཡོད་ལ། རྒྱའི་བཙོན་དོང་ནང་ཡུན་རིང་སྡུག་སྦྱོང་མནར་གཅོད་བཏང་མཐར་ཆེད་བཀྲོངས་བྱས་པའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དགོངས་པ་རྫོགས་སྐབས་ཀྱང་ཁྱེད་ཚོ་འཇར་མན་དུ་ཕྱོགས་སྐྱོད་བྱས་ནས་བསྡད་ཡོད། འདི་འདྲའི་བོད་ཀྱི་ལས་དབང་ལ་བསམ་གྱིན་བསམ་གྱིན་ཡིད་སེམས་ཤིན་ཏུ་སྐྱོ་ཡོང་།
ཁ་ནས་བཤད་དུས་སྟབས་བདེ་ལ་ཚིག་རྣོ་བ་ག་རེ་ཡིནའང་ལས་སླ་པོ་རེད། གང་ཟེར་ན་དོན་དངོས་ལ་མནོ་བསམ་གང་ཡང་མེད་པས་རེད། དོན་དངོས་ནི་བོད་མི་ཡོངས་ཀྱིས་མཁྱེན་གསལ་བཞིན་བོད་དོན་དེ་རྒྱ་གཞུང་དང་འབྲེལ་ནས་སེལ་དགོས་པ་དེ་རེད། འོ་ན་ཇི་འདྲ་བྱས་ནས་སེལ་དགོས་པ་རེད་ཟེར་ནས་དྲི་བ་དེ་ལ་ལན་དོན་དངོས་དང་མཐུན་པ་ཞིག་ལ་མནོ་བསམ་གཏང་ན། ད་ཟོད་ཁྱི་ཁ་དེ་ལ་སྐྱག་པ་ཚ་པོ་ཞིག་རག་འདོག་ཁག་པོ་རེད། རྒྱ་ནག་གཞུང་དང་འབྲེལ་ལམ་ཙམ་འཛུགས་རྒྱུར་བློས་གཏོང་དང་དཀའ་ངལ་མང་པོ་ཞིག་གི་བརྒྱུད་རིམ་ཡོད་པ་གསལ་པོ་རེད། ཤར་ཁུག་གཙོ་བྱས་པའི་བོད་ཡིག་ཆ་རེ་ཆོར་རེ་འབྲི་ཐུབ་མཁན་ཁ་ཤས་ནས་བཙན་བྱོལ་བོད་པའི་ཐོག་མའི་སྲིད་སྐྱོང་མཆོག་དང་ཁོང་གིས་དབུ་འཁྲིད་པའི་སྒྲིག་འཛུག་ལ་སྨྱོན་ནས་འདས་པའི་ལོ་བཞི་ལྷག་ནང་བོད་པའི་རྩ་དོན་ལ་གང་བྱས་མ་སོང་གོང་ས་མཆོག་བོད་ལ་གདན་འདྲེན་ཞུས་མ་སོང་སྐུ་བཅར་བ་དང་སྐུ་སྲུང་བ་བྱས་ནས་བསྡད་རབ་འབྲེལ། གནས་ཚུལ་དེ་དོན་དངོས་མ་བསམ་པའམ་མ་ཤེས་པ་ཡིན་པ་གསལ་པོ་རེད། བོད་ཀྱི་རྩ་དོན་དེ་ལོ་བཞི་ལྔའི་ནང་སྒྲུབ་ཐུབ་པ་ཞིག་ཡོད་ན་གོང་ས་མཆོག་གཙོས་དབུ་ལམ་གྱི་སྲོལ་འབྱེད་པ་མང་པོའི་ལོ་ངོ་ང་གྲངས་ནང་ལ་ཐུགས་འགན་བཞེས་ཡོད་ཀྱང་ད་དུང་ཡང་ང་ཚོའི་གནས་བབ་ལ་འགྱུར་བ་གང་ཡང་མེད། ང་ཚོ་བོད་པའི་རྩ་དོན་དེ་གང་འདྲ་བྱས་ནས་སེལ་དགོས་པ་ཚང་མས་ཤེས་གསལ་རེད་རྒྱ་གཞུང་དང་འབྲེལ་བ་འཛུག་ནས་སེལ་དགོས་པ་རེད།དེ་ལྟར་ན་འབྲེལ་ལམ་གང་ཡོད་ཟེར་ན་རྒྱ་ནག་གི་དབང་འཛིན་པ་འཕོ་འགྱུར་དང་དམངས་གཙོ་ལ་རེ་སྟོང་བཅངས་པ་མ་ཡིན་པར་རེ་བ་ཏོག་ཙམ་ཡོད་པའི་ལམ་ཁ་གཉིས་ཡོད། དང་པོ་དེ། ༢༠༠༨ཞི་རྒོལ་ཆེན་མོ་ནང་བཞིན་ནར་མར་འབྱུང་ན་ང་ཚོས་ཕར་ཆ་རྐྱེན་འཇོག་ཆོག་པའི་ལམ་ཁ་ཡོང་སྲིད། གཉིས་པ་དེ་འཛམ་གླིང་རྒྱལ་ཁབ་ཁག་གིས་གནོན་ཤུགས་དང་རྒྱབ་བཅོར་ལ་བརྟེན་ནས་འབྲེལ་ལམ་འཛུག་ཐབས་གནང་དགོས། ད་བར་གྱི་ང་ཚོའི་གཞུང་དང་སྒྲིག་འཛུག་ནས་ཐབས་ལམ་གཉིས་པ་དངགཙོ་བོར་འཛིན་ཡོད་ལ་དེ་ལས་ལྷག་པ་བྱ་ཐབས་གང་ཡང་མེད་ང་ཚོ་ནི་འཚེ་བ་མེད་པའི་འཐབ་རྩོད་པ་རེད། ད་ལྟའི་སྲིད་སྐྱོང་མཆོག་ཀྱང་བཀའ་དང་ལུང་གིས་གཏན་པ་ཕབ་པའི་གཞུང་གི་སྲིད་ཇུས་ཐོག་བསྡད་ཡོད་སྟབས་རྡ་ས་རི་ཁུག་དེར་སྲིད་སྐྱོང་གི་སྤོབས་ཉམས་སྟོན་པ་ལས་ཕྱི་རྒྱལ་ཡུལ་གྲུ་ཁག་ལ་མང་ཙམ་ཕེབས་ནས་བོད་དོན་རྒྱབ་བཅོར་བ་དང་གནད་ཡོད་མི་སྣ་དེ་བཞིན་བོད་དོན་ཁྱབ་བསྒྲགས་སོགས་ཀྱི་ཕྱག་ལས་དེ་དག་ལས་སྒྲུབ་ཐབས་མེད། གོང་ས་མཆོག་དང་ལྷན་བཅར་བྱས་པར་ཕྲག་དོག་མིག་གི་རིལ་བུ་འབུར་དགོས་དོན་མེད་གལ་ཆེའི་དཔོན་རིགས་གྲགས་ཅན་མི་སྣ་སོགས་ཕན་ཚུན་ངོ་ཤེས་དང་འབྲེལ་ལམ་འཛུག་སའི་གོ་སྐབས་བཟང་ཤོས་དེ་རེད། ཕྱོགས་གཞན་ནས་སྦྱིན་བདག་ཚོའི་འགྲོན་འབོད་གནང་སྐབས་གོང་ས་ཕེབས་ཀྱི་ཡོད་སྟབས་ང་ཡོང་གི་མིན་ཟེར་ན་ཡང་ཁྱོད་ཚོས་གང་བཤད། མཐའ་དོན་ང་ཚོའི་བལྟ་བ་དང་ལང་ཕྱོགས་དེ་ལ་དེ་ཙམ་ལས་སུ་དང་གང་གིསའབྱོན་གྱི་མ་རེད་ལ་འགྱོན་པའི་ཡུལ་ཡང་དེ་ཙམ་ལས་ཡོད་པ་མ་མངོན།
རྒྱང་མིག་དེ་དུས་གང་དུ་སོང་བ་ཡིན་ནམ། དོང་ནག་པོའི་ཞབས་ལ་གབ་སྡད་ཡོད་པ་མིན་ནམ།
སྲིད་སྐྱོང་མཆོག་ཕྱི་རྒྱལ་ཡུ་གྲུ་ཁག་ལ་རྒྱབ་སྐྱོར་འཚོལ་ཆེད་ངེས་པར་ཕེབས་དགོས་པ་རེད་ལ། སྐབས་རེ་༧གོང་ས་མཆོག་གི་ཆིབས་བསྒྱུར་གནང་སར་གདན་ཞུ་བ་ནས་མགྲོན་འབོད་བྱུང་ན་ངེས་པར་ཕེབས་དགོས་པའང་རེད། ཡིན་ཀྱང་ལས་དོན་ཐད་ལ་བསྣོ་བསམ་བཞེས་ན་སྲིད་སྐྱོང་མཆིག་ནས་གནང་མ་ཐུབ་པ་མེད་པས་ཕྱི་དྲིལ་བཀའ་བློན་དང་ཆོས་རིག་བཀའ་བློན་གཉིས་མཉམ་བཅར་ཞུ་དགོས་དོན་མིན་འདུག་སྙམ། གདན་ཞུ་བས་མགྲོན་འབོད་གནང་སྟབས་བཅར་བ་ཡིན་ཟེར་ཡ་དེ་ཁ་གཡར་ས་ལྟ་བུ་ཡིན། དེས་ལྟ་ན་ལས་དོན་གལ་ཆེ་ཆུང་དང་གཞུང་གྲོན་བསྲི་ཚགས་ལ་དགོངས་པ་བཞེས་རོགས་གནང་།