ལྷ་སྲས་བསོད་ནམས།
ཁ་སང་ཕྱི་ཚེས་༡༧ཉིན་མདོ་ཁམས་འཇང་དགུན་ཆོས་ཚོགས་ཆེན་མོ་ཐེངས་བཅུ་དྲུག་པ་ལབ་དགའ་ལྡན་མདོ་སྔགས་བཤད་སྒྲུབ་འཕེལ་རྒྱས་གླིང་དུ་མཇུག་ལེགས་པར་གྲུབ། མདོ་ཁམས་འཇང་དགུན་ཆོས་ཐེངས་དང་པོ་རྫ་སེར་ཤུལ་དགོན་དུ་ཚོགས་པ་དང་ལོ་ལྟར་དགོན་ཁག་མི་འདྲ་བ་སོ་སོ་ལ་རེས་མོས་བཞིན་ཚོགས་གྲུབ་ནས་ད་རེབ་ཀྱི་མདོ་ཁམས་འཇང་དགུན་ཆོས་ཆེན་མོ་ཐེངས་༡༦པ་ཡུལ་ཤུལ་ཁོངས་ཁྲི་འདུ་རྫོང་ལབ་དགོན་དུ་ཚོགས་ཡོད།
དགུན་ཆོས་དེ་རུ་ཚོགས་ཞུགས་པར་དགོན་ཁག་བདུན་ཅུ་ཡས་མས་ནས་དགེ་བཤེས་ལྷ་རམས་པ་དང་དཔེ་ཁྲིད་དགེ་རྒན་སོགས་གྲྭ་བ་སུམ་སྟོང་ལྷག་ཕེབས་ཡོད་འདུག དེར་ཕེབས་པའི་དགོན་ཁག་ནི་ཚོགས་ཡུལ་ལབ་དགོན་ཆེན་གྱིས་གཙོས་པའི་རྫ་སེར་ཤུལ་དགོན་མཐོ་རིམ་ནང་བསྟན་སློབ་གླིང་དང་ཟིལ་དཀར་དགོན་ཆེན། དེ་བཞིན་མདོ་སྟོད་ཀྱི་དགོན་པ་ཁག་ཅིག་དང་མདོ་སྨད་ཀྱི་དགོན་ཁག་མཐོ་ལས་དགོན་དང་ཨ་མཆོག་མཚན་ཉིད་དགོན་སོགས་ནས་ཕེབས་ཡོད་འདུག
མདོ་ཁམས་འཇང་དགུན་ཆོས་ཐེངས་བཅུ་དྲུག་པ་ནི་སྤྱི་ལོ་༢༠༡༥ ཟླ་༧ པའི་ཚེས་༦ ཉིན་ཡུལ་ཤུལ་ཁུལ་ཁྲི་འདུ་རྫོང་ལབ་དགའ་ལྡན་མདོ་སྔགས་བཤད་སྒྲུབ་གླིང་དུ་དབུ་འཛུགས་ཀྱིས་ཕྱི་ཚེས་༡༧ བར་དུ་འཚོགས་ཡོད་པ་རེད།
ཐེངས་འདིའི་མགྲོན་བདག་ལབ་དགོན་པ་རུ་གངས་ལྗོངས་མཁས་པའི་བགྲོ་གླེང་ཚོགས་ཐུབ་ཡོད་པ་དང་། ད་རེབ་འཇང་དགུན་ཆོས་ཚོགས་རྒྱུ་བྱུང་བ་ནི་ཆེས་དགའ་འོས་པ་ཞིག་ཏུ་སེམས།
དགུན་ཆོས་འདིའི་སྐུ་མགྲོན་གཙོ་བོ་སྐུ་ཞབས་ནམ་མཁའ་རྒྱལ་མཚན་དང། ལི་ཐང་བླ་མ་བཞག་པ་རིན་པོ་ཆེ་སོགས་གདན་དྲངས་ནས་འཇང་དགུན་ཆོས་ཚོགས་པ་དང་ཆབས་ཅིག་ལྷ་སའི་འདུ་ཁང་གསར་བའི་རྟེན་དང་བརྟེན་པ་ལེགས་གྲུབ་ཟིན་པའི་མཛད་སྒོ་ཡང་བྱས་འདུག
ལབ་དགོན་ནི་རྗེ་རིན་པོ་ཆེའི་དངོས་སློབ་ལྡན་མ་མཁན་ཆེན་ཡོན་ཏན་པས་ཕྱག་བཏབ་པ་དང། དེང་སྐབས་དགོན་པ་དེ་རུ་ལྷ་རམས་ཐོན་ཟིན་པའི་དགེ་བཤེས་བཞི་དང་གཞན་དགེ་བཤེས་གཉིས། སྔགས་རམས་པ་གཉིས་བཅས་ལས་འཆད་ཁྲིད་གནང་བ་དང། སློབ་གཉེར་བར་མདོ་དབུས་ཁམས་གསུམ་རིས་སུ་མ་མཆིས་པ་ནས་ཕེབས་པའི་དགེ་འདུན་པ་རྣམས་ཀྱིས་གཞུང་ཆེན་ཁག་ལ་སློབ་གཉེར་བྱེད་མུས་རེད་འདུག