ཀླུ་སྨྱོན།
དེང་སང་བོད་པའི་ནང་དུ་གཅིན་པ་མངར་འགྱུར་རམ་གཅིན་སྙི་ཞེས་པའི་ན་ཚ་འདི་ཡོད་མཁན་ཧ་ཅང་མང་པོ་ཞིག་འདུག རྒྱུ་མཚན་ནི་མི་མང་པོ་ཞིག་གི་འཚོ་བའི་ཆ་རྐྱེན་ཅུང་ཇེ་ལེགས་སུ་སོང་བར་བརྟེན་སྔོན་ཆད་ལྟ་བུར་ལུས་ཤུགས་ངལ་རྩོལ་བྱེད་མི་དགོས་པའི་འཚོ་བ་ཞིག་རོལ་ཐུབ་པ་དང་། ཡང་ཟས་རིགས་མངར་མོའི་རིགས་མང་པོ་ཞིག་ངམ་ངམ་ཤུགས་ཀྱིས་ཟོས་དང་བཟའ་བཞིན་པ་སོགས་ཀྱི་དབང་གིས་ཡིན། དེར་བརྟེན་བོད་མི་མང་པོ་ཞིག་གིས་ལོ་རེ་བཞིན་རང་ལུས་ཀྱི་ཁྲག་ལ་བརྟག་དཔྱད་བྱས་རྗེས་སྨན་པས་གཅིན་པ་མངར་འགྱུར་གྱི་ན་ཚ་འདུག་ཅེས་བརྗོད་ཡོད་པ་དང་། དེ་མ་ཐག་ལ་ལ་ཞིག་དངངས་སྐྲག་ལངས་ཡོང་གིན་ཡོད། དེ་ནི་འཆི་བར་འཇིགས་པ་ཙམ་མ་ཡིན་པར་སྨན་མང་པོ་ཞིག་ཉིན་རེ་བཞིན་ཟོས་ན་དེའི་དངུལ་གྱི་འགྲོ་སོང་ཡང་ཚད་མཐོན་པོ་ཆགས་འགྲོ་བ་དེ་ཡང་སེམས་འཚབ་ཀྱི་གཞི་རྩ་གཅིག་རེད།
རྒྱ་རིགས་ཀྱི་འཚོ་བའི་ཁྲོད་དུ་གནའ་སྔ་མོ་ནས་ཟ་མ་འདི་དང་དེ་ཟོས་ན་གཟུགས་པོའི་འཕྲོད་བརྟེན་དེ་དང་གན་ལ་ཕན་ཞེས་མི་མང་ཤོས་ཀྱིས་བརྗོད་སྲོལ་དང་ཉོ་སྲོལ་ཡོད་འདུག་ཅིང་། ཟ་མ་དེ་དང་དེའི་ཕན་ནུས་ཀྱི་དབང་གིས་ལུས་ཀྱི་ན་ཚ་མང་པོ་ཞིག་སྔོན་འགྲོ་བྱེད་པར་ཕན་རླབས་ཀྱང་ཧ་ཅང་ཆེན་པོ་ཞིག་ཐོན་ཡོད། ཐ་ན་རྒྱ་རིགས་ཀྱི་འཚོ་བའི་ཁྲོད་དུ་ཆུ་ཁོལ་འཐུང་བའི་ལུགས་སྲོལ་བཟང་པོ་ཞིག་ཡོད་པ་འདི་ཁོ་ནས་ཀྱང་ལུས་པོའི་འཕྲོད་བསྟེན་ལ་ཕན་ཐོགས་ཧ་ཅང་ཆེ།
ངའི་ངོ་ཤེས་རྒྱ་མོ་ནང་ཆོས་དད་ལྡན་པ་ལོ་དྲུག་ཅུར་ཉེ་བ་ཞིག་ཡོད་པ་དེས་ནམ་རྒྱུན་ཟ་མ་གང་ཞིག་བཟའ་ཡང་འཕྲོད་བསྟེན་ལ་དེ་ཕན་འདི་ཕན་མ་གཏོགས་གང་བྱུང་གི་ཟ་མ་གཏན་ནས་མི་བཟའ། ཕར་བལྟས་ཚོད་ཀྱིས་མོ་རང་ལོ་བཞི་བཅུར་སོན་ཙམ་གྱི་ཕྱི་ཚུལ་ལྡན་པ་མ་ཟད། དེ་བཞིན་ཕྱག་འཚལ་སྐོར་གསོག་སོགས་ཆོས་ལྡན་གྱི་བྱ་བ་གང་ལ་ཡང་དར་མ་སྤྱི་དང་མཚུངས་པར་འཇུག་ཐུབ་པ་ཞིག་ཡིན། ཉེ་ཆར་ང་ཚོ་འདི་གར་བླ་མ་ཞིག་ཕེབས་པའི་སྐབས་སུ་མཉམ་འཛོམས་བྱུང་སྟེ་འཕྲོད་བསྟེན་སྐོར་བརྗོད་རེས་བྱེད་སྐབས་མོ་རང་ལ་གཅིན་མངར་གྱི་ན་ཚ་རིམ་པ་གཉིས་པ་དེ་ཡོད་ཀྱང་སྔོ་ཚོད་གཉིས་ཞོགས་པ་རྟག་པར་བཟའ་བཞིན་ཡོད་པས། ལོ་བཞིའི་རིང་སྨན་རིལ་གཅིག་ཀྱང་བཟའ་མི་དགོས་པར་འདུག་ཅེས་བརྗོད་བྱུང་བས། རང་རིགས་གཅིན་མངར་ན་ཚ་དེ་ཡོད་མཁན་ཚོར་ཕན་དུ་རེ་ནས། སྔོ་ཚལ་དེ་གཉིས་གང་ཡིན་ཡང་ཇི་ལྟར་བསྟེན་དགོས་ལུགས་ཐད་དྲི་བ་དྲིས་པར་ལན་འདི་ལྟར་བཏབ་བྱུང་།
སྔོ་ཚལ་དང་པོ། མཛུབ་ཚལ། དབྱིན་སྐད་དུ་Okara,秋葵 འམ་ཡང་ན་Lady finger ཟེར་བ་དེ་རྐང་གསུམ་ཡུ་རྐང་བཅད་རྗེས་ཆུ་དྲོད་འཇམ་ཕོར་བ་ཕྱེད་ཙམ་ཞིག་དང་མཉམ་དུ་ཞིབ་མོར་བཏགས་ཏེ་ཞོགས་པར་ལྟོ་སྟོང་ལ་འཐུང་དགོས། ཞིབ་བཏགས་བྱེད་སྤྱད་མེད་ན་དེ་རིང་དགོང་མོར་ཆུ་ཁོལ་ནང་སྦངས་རྗེས་སང་ཞོགས་ལྟོ་སྟོང་ལ་ཆུ་ཁོལ་དང་འཐུང་ན་ཡང་འགྲིག 
སྔོ་ཚལ་གཉིས་པ། ཀ་པེད་ཏིག་མོ། Bitter melon, 苦瓜 ཞེས་པ་འདིའི་ཕྱེད་ཀ་གཏུབས་པ་དང་། ཡང་སྐྱར་དེ་གྲི་གཞོག་སྲབ་བུར་གཏུབས་རྗེས་ཆུ་ཚ་བོའི་ནང་སྐར་ཆ་སུམ་ཅུ་ཙམ་ལ་སྦངས་རྗེས་ཞོགས་ཇ་དང་མཉམ་དུ་བཟའ་དགོས། 
གྲོགས་པོ་གཅིན་མངར་གྱི་སྙུང་གཞི་ཡོད་མཁན་ཚོས་གོང་གསལ་ཚལ་རིགས་འདི་གཉིས་བསྟེན་ན་ལེགས་པ་ཐུགས་འཇག་ཞུ་བ་དང་ཆབས་ཅིག གྲོགས་པོ་རང་ཉིད་ལ་ན་ཚ་འདི་མེད་ན་ཡང་སྐད་འཕྲིན་སོགས་སུ་བརྒྱུད་བསྐུར་གནང་ན་རང་རིགས་ན་ཚ་འདི་ཡོད་མཁན་གང་ན་སུ་བཞུགས་ཚང་མར་ཕན་ཐོགས་ཆེན་པོ་ཡོང་རྒྱུ་ཡིན་པས། སྤྱོད་འཇུག་ལས། སེམས་ཅན་རྣམས་ཀྱི་ཀླད་ནད་ཙམ། །བསལ་ལོ་སྙམ་དུ་བསམས་ན་ཡང་། །ཕན་འདོགས་བསམ་པ་དང་ལྡན་ཏེ། །བསོད་ནམས་དཔག་མེད་ལྡན་འགྱུར་ན། །སེམས་ཅན་རེ་རེའི་མི་བདེ་བ། །དཔག་ཏུ་མེད་པ་བསལ་འདོད་ཅིང་། །རེ་རེའང་ཡོན་ཏན་དཔག་མེད་དུ། །བསྒྲུབ་པར་འདོད་པ་སྨོས་ཅི་དགོས། །ཞེས་གསུངས་པ་བཞིན། ལུས་ཅན་ཀུན་གྱི་ལུས་ཀྱི་ན་ཚ་དང་སེམས་ཀྱི་སྡུག་བསྔལ་སེལ་ཐབས་ཅི་རིགས་ལ་བརྩོན་པར་འཚལ།།
འཕྲོད་བསྟེན་གྱི་སྐོར་ལ་གསལ་བཤད་དང་བསླབ་བྱ་གནང་བར་དགའ་བོ་བྱུང།
༡༽ སྔོ་ཚལ་དང་པོ་དེ་ལ་་་དབྱིན་སྐད་དོན་བསྒྱུར་བྱེད་ན། བུ་མོའི་མཛུབ་མོ་ཞེས་བསྒྱུར་ན་ལེགས།
༢༽ སྔོ་ཚལ་གཉིས་པ་དེའི་མིང་ལ། བོད་ཀྱི་སྨན་་གཞུང་ནས། གསེར་གྱི་ཕུད་བུ་ཞེས་མིང་དེ་ནི་ལོ་ངོ་སྟོང་ཕྲག་མང་པོའི་གོང་ནས་ཡོད་ཡོད་པ་ཡིན་པས་མིང་གསར་འདོགས་དགོས་པ་མ་མཆིས། དེ་ནི་མཁྲིས་པའི་སྨན་མཆོག་ཏུ་གྱུར་པ་ཞིག་ཡིན། གསེར་གྱི་ཕུད་བུ་ཟེར་བའང་བོད་སྐད་དག་མ་ཡིན་པ་སྟེ། གསེར་ཅེས་པ་ནི་སྔོ་ཚལ་དེའི་དང་པོ་མེ་ཏོག་གི་ཁ་དོག་གསེར་གྱི་མདོག་ལྟར་སེར་པོ་ཞིག་ཤར་གྱི་ཡོད། དེ་ནས་ཕུད་བུ་ཞེས་པའང་འདྲ་བ་རྒྱུ་མཚན་དུ་བྱས་པའི་བཏགས་མིང་སྟེ། ཕུད་བུ་ཞེས་པ་ནི་བུད་མེད་རྣམས་ཀྱིས་སྣམ་བུའི་སྤུན་བལ་སྐུད་འཁེལ་བྱེད་ཀྱི་འཕང་ལ་བཀལ་རྗེས་ཀྱི་སྐུད་པའི་ཚོམ་བུ་ལ་བཤད་བོད་སྟོད་ཕྱོགས་པ་རྣམས་ཀྱི་ཁ་སྐད་དུ་ད་ལྟའང་བརྗོད་བཞིན་ཡོད། སྔོ་ཚལ་དེ་སྨིན་དུས་དབྱིབས་ཕུད་བུའམ་ཙི་ཙི་དང་འདྲ་བ་ཞིག་ཡོད་ཅིང་ཙི་ཙིའི་རྔ་མ་དང་འདྲ་བའི་རྩེ་ལ་སྔོ་ཡི་བ་ཐག་ཅན་ཅིག་ཡོད། རྒྱ་གར་བས་དེ་ལ་ཀ་རེ་ལ་ཞེས་ཟེར་སྲོལ་འདུག བོན་གྱི་དཔེ་རྙིང་ནས་ཀྱང། སོན་ཤིང་ཕུད་བུ་བཞིན་དུ་ཕྲ་ལ་མང་བར་དཀྲིས། ཞེས་གསུངས་པ་ལྟར་རོ།
ཨ་བླ་ཀླུ་སྨྱོན་གྱིས་འགྲོ་བ་མི་རིགས་ཕན་པའི་སྐོར་བྲིས་མཛད་པ་དང་། སྐད་ཀྱི་ཐོག་ནས་རང་གི་ཕལ་སྐད་ཆེས་ཆེར་ཉུང་དུ་སོང་ཡོད་པར་སྤྲོ་བ་འཕེལ། གོང་གསལ་ཚོད་མ་གཉིས་པོ་བོད་འབྲོག་ཡུལ་དང་། ལ་དྭགས་གྲོང་ཡུལ་སོགས་སུ་འབྱོར་དཀའ་བས། གཅིན་སྙི་ནད་རིགས་ཡོད་པ་རྣམས་ཀྱིས་སྔ་དགོངས་དུས་ཀྱི་ཉི་མདངས་སུ་འཕྱན་འཕྱན་དང་། ཆོས་པ་ཡིན་ན་མཆོད་རྟེན་སོགས་ལ་བསྐོར་བ་རྒྱབ་པ་ཆེས་ཕན་ཐོགས་ཆེ། ནད་འདི་ཉིད་ཡོད་པའི་ལ་དྭགས་པ་ཞིག་གིས་གཞན་གཅིན་མངར་ནད་ཡོད་པ་ཞིག་ལ་འགྲུལ་རྒྱབ་པ་ཕན་ཐོགས་འདུག་ཅེས་བཤད་པ་ཐོས། གོང་གསལ་སྔོ་ཚལ་གཉིས་པོ་ངས་རྒྱ་གར་སོགས་སུ་མཐོང་མྱོང་ཡང་བོད་གཙང་དང་། ལ་དྭགས་སུ་་ས་ལ་བཏབ་ནས་སྐྱེས་པ་ཞིག་མཐོང་མྱོང་མེད།
་
སྐད་ཡིག་ལ་རྟོག་དཔྱོད།
ཕྱི་ཚུལ་ལྡན་པ་མ་ཟད། ཅེས་པར་ཕྱི་ཚུལ་ལྡན་པར་མ་ཟད། ཅེས་འབྲི་ན། ཁ་ན་ཐོན་པ་གཙོ་བོ་མ་ཡིན་པར་མཁས་པས་བྲིས་པའི་ཡིག་སྐད་དང་བསྟུན་པའི་བྱ་བར་ཕན། ཞོགས་པར་ཞེས་པར་སྔ་དྲོ་ཞེས་ཁྱབ་ཆེ་བ་འབྲི་ན། བོད་རིགས་ཡོངས་ཀྱི་གོ་བ་ལ་ཕན། དགོང་མོ། ཞེས་པར་དགོངས་མོ། ཞེས་འབྲི་ན། སྔོན་གྱི་མཁས་པས་བྲིས་པའི་བསྟན་བཅོས་ཀྱི་སྐད་ལ་བག་ཆགས་འཇོག་པ་སོགས་དགེ་མཚན་ཆེའོ།
ཀླུ་སྨྱོན་ཟེར་བའི་སྐྱ་མིན་སེར་མིན། གསར་མིན་རྙིང་མིན་དེ་རྫོགས་པ་ཆེན་པོདང་། དབྱིན་མོ་མགོ་སེར་ཚོ་ལ་ཞིབ་འཇུག་བྱེད་མཁན་ཞིག་ཡིན་པ་མ་ཟད་འཕྲོད་བསྟེན་ཐོག་འང་ཞིབ་་འཇུག་པ་ཞིག་ཡིན་ས་རེད། ངོ་མ་ཧྲ་གི། ཀུ་རེ་དགོངས་དག། གང་ལྟར་གྲུབ་ཐུབ་ཆུངཆུང་་ཞིག་རེད་ཟེར་ཆོག་གི།