སྐལ་བཟང་།
ཁ་སང་དེ་རིང་དྲ་ལམ་ཁག་ན་མ་འོངས་པའི་སྲིད་སྐྱོང་དང་སྤྱི་འཐུས་སྐོར་ལ་ཚོགས་པ་དང་སྒེར་བ་མང་པོ་ཞིག་གིས་སྲིད་དོན་གྱི་གོ་རྟོགས་ཡོད་མེད་ལ་མ་བལྟས་པར་རང་རང་ས་ན་རང་གི་འདོད་པ་ཞིག་བཤད་ཡོང་གིན་འདུག ཡག་པོ་རེད། གཅིག་བྱས་ན་ཀུན་པོས་བོད་ཀྱི་མ་འོངས་པའི་རྩ་དོན་ལ་འགན་འཁུར་གྱི་ཡོད་པའི་རྟགས་མཚན་ཞིག་རེད།
ངས་འདིར་བཤད་འདོད་པ་ནི་སྲིད་སྐྱོང་མིན་ལ་སྤྱི་འཐུས་ཀྱི་སྐོར་ཡིན། རང་ཉིད་སྐྱབས་བཅོལ་ལ་འབྱོར་ནས་བཟུང་ད་ལྟའི་བར་དུ་གྲོས་ཚོགས་ཀྱི་ཚོགས་དུས་ཡོད་ཚད་ལ་སྔོན་མ་ཡིན་ན་དྲ་ལམ་མེད་ཙང་ཚགས་ཤོག་བརྒྱུད་ནས་གང་ཐུབ་ཀྱིས་དོ་སྣང་བྱེད་ཀྱི་ཡོད། དེང་སང་དྲ་ལམ་བརྒྱུད་ནས་ཐད་ཀར་རྒྱང་བསྲིང་ལ་མ་ནོར་མ་འཐུས་པ་བྱས་ནས་ལྟ་གིན་ཡོད།
སྤྱི་ཡོངས་ནས་བཤད་ན་ད་ལྟའི་སྤྱི་འཐུས་ཚང་མ་སྔོན་མ་ལས་ལྡབ་འགྱུར་གྱིས་ཤེས་ཡོན་དང་སྲིད་དོན། ད་རུང་སྤྱི་སེམས་གང་ཆ་ནས་ཀྱང་ཡག་པོ་འདུག་བསམ་ཡོད། འདིར་སྤྱི་འཐུས་ཀྱི་ཡོང་ཁུངས་དང་དེའི་ལོ་རྒྱུས་སོགས་མང་པོ་ཞིག་ཞིབ་འགྲེལ་མི་དགོས་པར་ཁ་རུ་ཁ་ཐུག་ལ་རང་གི་བསམ་ཚུལ་ཞིག་བཤད་ན་ཆོས་བརྒྱུད་ཁག་གི་སྤྱི་འཐུས་དག་དགོས་མེད་ཅིག་རེད་བསམ་གྱི་འདུག དེ་ཚོས་གྲོས་ཚོགས་ནང་སྤྱི་སེམས་ལ་རམ་འདེགས་ལས་ཞབས་འདྲེན་ཞུ་རྒྱུ་མང་པོ་འདུག
དང་པོ་རང་སོ་སོས་སྤྱི་འཐུས་དམ་འབུལ་སྐབས་ཀྱི་སེམས་ཤུགས་དེར་རྗེས་སུ་ཕྱོགས་རིས་དང་ཞེན་ཁོག་གི་གདོན་གྱིས་བསླུས་ནས་རང་ཉིད་ཀྱིས་རང་ངོ་མི་ཟིན་པའི་ཆོས་བརྒྱུད་ཁག་གི་སྤྱི་འཐུས་ཁ་ཤས་བྱུང་དང་འབྱུང་གིན་ཡོད་པ། གལ་སྲིད་ཆོས་བརྒྱུད་ཁག་གི་སྤྱི་འཐུས་དེ་བོད་པའི་གྲོས་ཚོགས་སུ་མེད་དུ་མི་རུང་བ་ཞིག་ཡིན་ན་དེ་ངེས་པར་དུ་ཆོས་བརྒྱུད་ཁག་གི་བླ་ཆེན་དེས་ཐད་བསྐོས་ཞིག་གམ། ཡང་ན་ངེས་པར་དུ་ཆོས་བརྒྱུད་དེའི་འཐུས་མི་འབའ་ཞིག་ལས་ཆོལ་ཁ་དང་ལུང་ཚན་གྱི་ཞེན་ཁོག་ཏུ་མི་འགྲོ་བར་ཆོས་བརྒྱུད་དེའི་བླ་ཆེན་གྱིས་ཀྱང་འགན་འཁུར་དགོས་པར་སྙམ།
ད་ལྟ་ང་ཚོའི་གཞུང་དེ་དམངས་གཙོ་བརྒྱ་ཆ་བཅུ་རྩམ་མ་གཏོགས་བརྒྱ་ཆ་དགུ་བཅུ་ཆོས་སྲིད་གཉིས་ལྡན་གྱི་གཞུང་མུ་མཐུད་པ་ཞིག་རེད་ གལ་སྲིད་དམངས་གཙོའི་གཞུང་དངོས་གནས་ཞིག་ཡིན་ན་ དམངས་གཙོའི་ལས་ཁུངས་གལ་ཆེ་ཤོས་དེའི་ནང་སྲིད་དོན་གང་ཡང་མ་ཤེས་པའི་ཆོས་ལུགས་མི་སྣ་མང་པོ་དེ་འདྲ་ཡོད་པ་གང་ཡིན་ནམ་ ཁོང་ཚོ་ཆོལ་ཁ་གསུམ་ནང་མ་ཚུད་པའི་བོད་པ་ཡིན་ནམ་ གྲོས་ཚོགས་ནང་ཕྱེད་ཀ་ཆོས་ལུགས་མཐུས་མི་ཡིན་པ་མང་གཙོའི་ལུང་པ་གང་དུ་འདུག་གམ་ ༧གོངས་ས་མཆོག་གི་གསུང་ཆོས་་གནང་རིམ་བཞིན་དང་ཆོས་ལུགས་བྱེད་སྒོ་ཡོད་ཚད་ལ་གཞུང་གི་མཛད་གཙོ་ཚང་མ་བཞུགས་ནས་ལས་ཀའི་དུས་ཚོས་ཕྱེད་ཀ་ལྷག་རྩམ་གཏང་དགོས་པ་གང་ཡིན་ནམ་
གྲོས་ཚོགས་ནང་ཆོས་རྒྱུད་ཁག་གི་སྤྱི་འཐུས་དགོས་གལ་ཆེ་བ་ནམ་ཡང་མཐོང་གི་མེད། ཆོས་དོན་ལས་ཁུངས་ནང་ཆོས་རྒྱུད་སོ་སོའི་སྐུ་ཚབ་མ་ལུས་མ་ཆད་པ་ཞིག་བྱུང་ན་ཕན་ནུས་ཆེ་བ་ཡོང་གི་རེད་བསམ་གྱི་འདུག། སྐུ་ཚབ་ཕེབས་སྟངས་ནི་ཆོས་རྒྱུད་སོ་སོའི་ཐུགས་འགན་ཡོད་མཁན་ཚོས་གང་དགའ་ཅི་ལེགས་དགོངས་བཞེད་གནང་རྒྱུ་རེད། ཁ་བདེ་པོ་འདྲ་ཞིག་ཆགས་སོང་ཡང་ཤ་ཚ་ཟོལ་མེད་ཀྱི་བསམ་ཚུལ་ཡིན།
དགོངས་དག། སྤྱི་དོན་ཤ་ཚ་ཟོལ་མེད་ཀྱི་བསམ་ཚུལ་ཡིན་ཞེས་ཟེར་རྒྱུ་ཡིན།
ཡང་དགེ་ལུགས་མི་སྣས་ཆོས་རྒྱུད་སྤྱི་འཐུས་མེད་པ་བཟོ་ཆེད་ཤུགས་རྒྱབ་ཀི།