ཨོ་སི་ཁྲི་ལིའི་རྒྱ་ནག་གཞུང་ཚབ་ལ་དྲི་བ།

ཆབ་སྲིད་བཙོན་ཟུར་བསྟན་པ་དར་རྒྱས།

 
ཨོ་སི་ཁྲི་ལི་ཡ་གནས་སྡོད་བྱས་ཡོད་པའི་རྒྱ་ནག་གཞུང་ཚབ་ཁང་གི་སྐུ་ཚབ་མྭ་ཀྲུས་ཤུས་ (Ma Zhaoxu)ལགས་སུ་ཆེད་ཞུ།།

ངའི་མིང་ལ་བསྟན་པ་དར་རྒྱས་དང་ད་ལྟ་ཨོ་སི་ཁྲི་ལི་ཡའི་གྲོང་ཁྱེར་སྦིར་སི་བྷན་ལ་གནས་སྡོད་བྱས་ཡོད། ཁྱེད་རང་གིས་ཤེས་གསལ་ལྟར་ད་ལྟ་བོད་ཁམས་དཀར་མཛེས་ཁུལ་གྱི་མངའ་ཁུངས་སུ་གཏོགས་པའི་ལི་ཐང་དང་ཉག་ཆུ་སོགས་སུ་ངུ་ངག་གི་སྐད་སྒྲས་རི་ལུང་གང་སར་ཁྱབ་བཞིན་ཡོད་པ་བཅས་ལ་བརྟེན། ཁྱེད་རང་གི་མིང་ཐོག་བརྒྱུད་ནས་རྒྱ་ནག་གཞུང་ལ་དྲི་བ་འདི་འདྲ་ཞིག་གཏོང་འདོད་བྱུང་།  (ང་ཚའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྐང་བཙུགས་ནས་བཀྲོངས་དགོས་པའི་རྒྱུ་མཚན་གང་ཡིན་ནམ།) འདི་ནི་ངས་ཁྱེད་ཅག་ལ་ཆེས་འདྲི་ན་འདོད་པའི་དྲི་བ་ཞིག་ཡིན། ཁྱེད་ཚོས་རིན་པོ་ཆེས་རྒྱ་ནག་གཞུང་གི་ཁྲིམས་དང་འགལ་བའི་ནག་ཉེས་མང་པོ་བསགས་པའི་རྒྱུ་མཚན་གྱིས་རེད་ཟེར་ན། ཁྱེད་ཚོས་མ་ཉེས་ཁག་གཡོགས་བྱས་པའི་ཁྲིམས་ཆད་དེ་དག་རིན་པོ་ཆེས་ཁུར་བཞིན་པ་འདིས་མ་འགྲིག་པར་ད་དུང་སྐུ་སྲོག་ལ་རྔམ་དགོས་དོན་ཅི་ཡིན། རིན་པོ་ཆེ་དང་པོ་སྲོག་ཁྲིམས་དང་། གཉིས་པ་ཚེ་བཙོན་སོགས་ཀྱི་ཁྲིམས་ཆད་འདི་དག་ཁྱེད་ཚོའི་མི་མང་ཁྲིམས་ཁང་གིས་ཐག་བཅད་པ་ཤ་སྟག་རེད།

འོ་ན། སྐབས་དེ་དུས་ཀྱི་ཁྲིམས་ཁང་གིས་ནོར་འཁྲུལ་ཤོར་བ་རེད་ཟེར་རྒྱུ་ཨེ་ཡིན། ཡང་ན་སྐབས་དེ་དུས་ཁྲིམས་དཔོན་གྱི་ཀླད་པ་ལ་སྐྱོན་ཤོར་བ་རེད་ཟེར་རྒྱུ་ཨེ་ཡིན། ཡང་ན་བོད་མི་རིགས་ལ་ཕན་ཐོག་ཡོད་པའི་མི་སྣ་རླབས་ཆེན་དེ་དག་རིམ་གྱིས་མེད་པ་བཟོ་པའི་གསང་བའི་ཁྲིམས་ཤིག་ཡོད་ཟེར་རྒྱུ་ཨེ་ཡིན། དེ་མིན་ན་གོང་གི་དྲི་བ་འདི་ལ་ལན་འདེབས་ཇི་ལྟར་བྱ་རྒྱུ། ངས་དེ་རིང་སྐད་གཟེངས་མཐོན་པོས་འཛམ་གླིང་མི་མང་ལ་ང་ཚོའི་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྒྱ་ནག་གཞུང་གིས་རྐང་བཙུགས་ནས་བཀྲོངས་བ་རེད་ཟེར་ནས་བཤད་ཀྱིན་ཡོད། ཁྱེད་ཚོས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་ལ་མ་ཉེས་ཁ་གཡོགས་ཀྱི་ཁྲིམས་ཆད་འདི་འདྲ་བཏང་མེད་ཚེ་ང་ཚོའི་སྤྲུལ་སྐུའི་སྐུ་སྲོག་འདི་ལྟར་བྱས་ནས་ཤོར་ག་ལ་སྲིད། དེ་མིན་ན་རྐང་བཙུགས་ནས་ཀྲོངས་བ་རེད་ཟེར་བ་དེ་ངའི་སྐྱག་རྫུན་རེད་ཟེར་ནས་འཛམ་གླིང་མི་མང་ཧང་སང་དགོས་པ་ཞིག་དང་བོད་པ་མི་མང་ངོ་ཚ་དགོས་པའི་ལན་འདེབས་ཤིག་བྱོས་དང་། ཁྱེད་ཅག་གིས་ཅི་ཡང་མི་སྨྲ་པའི་ངང་ནས་རང་སྐྱོན་ངོས་ལེན་བྱ་རྒྱུ་ལས་དཔང་རྟགས་དང་ཁུངས་ལུང་ར་སྤྲོད་ཡོད་པའི་ལན་ཞིག་ཁྱེད་ཚོར་མེད་པ་ང་ལ་གདེང་ཚོད་ཡོད།

མགོ་ནག་བོད་ཀྱི་གཏམ་དཔེ་ལ”གཡག་གི་རྩ་མ་ཟོས་ན་ནད་དང་། མི་ཡིས་ཁ་མ་དྲག་ན་སྐྱོན་”ཟེར་བའི་དཔེ་ལྟར་ཁྱེད་ཚོས་རང་ཉིད་ལ་གནོང་ཡོད་དུས། སུ་གཅིག་ལ་ལན་མི་འདེབས་པར་ཁུ་སིམ་མེར་འདུག་རྒྱུའི་ངན་གོམས་དེ་ཉམས་ལེན་བྱེད་རྒྱུ་ལས་བྱ་ཐབས་ག་རེ་ཡོད། ད་རེབ་ཀྱི་ཁྱེད་ཚོའི་བྱ་སྤྱོད་དེས་བོད་རྒྱ་མི་རིགས་བར་གྱི་འཁོན་སེམས་ཆེ་རུ་བཏང་བ་དང་། ཁྱེད་ཚོའི་སྲིད་འཛིན་དག་གིས་ཁ་ན་རླུང་ལྟར་གྲག་པའི་འཆམ་མཐུན་སྤྱི་ཚོགས་ལ་གཏོར་གཤིག་རི་རིབ་ལས་ཆེ་བ་ཞིག་བཟོས་བ་དེས་ཁྱེད་སྒེར་གཅོད་པ་དག་ལ་ཡིད་ཚིམ་པའི་ངལ་གསོ་ཞིག་ཐེབས་ཡོད་པ་འདྲ། ད་དུང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་ལ་དད་པ་དང་དམ་ཚིག་གཡོ་བ་མེད་མཁན་གྱི་ཉམ་ཆུང་མི་མང་སྟེང་ལ་མེ་མདའ་བརྒྱབ་པ་དང་བཙོན་འཇུག་བྱས་བ་སོགས་དྲག་གནོན་ཚད་ལས་བརྒལ་བ་དེ་དག་ཁྱེད་ཚོས་གཏན་ལ་ཕབས་པའི་”ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་”ཟེར་བ་དེ་དང་ཡོངས་སུ་འགལ་ཡོད།  “ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས” “དོན་ཚན་སོ་ལྔ་པ། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་དམངས་ལ་གཏམ་བརྗོད་དང་། དཔེ་སྐྲུན། འདུ་ཚོགས། ཚོགས་འཛུགས། ཁྲོམ་སྐོར། རྔམ་སྟོན་བཅས་བྱེད་པའི་རང་དབང་ཡོད། ཅེས་དང་།

དོན་ཚད་སོ་དྲུག་པ། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་དམངས་ལ་ཆོས་དད་ཀྱི་རང་དབང་ཡོད། རྒྱལ་ཁབ་ཀྱི་ལས་ཁུངས་དང་། སྤྱི་ཚོགས་ཀྱི་ཚོགས་པ། མི་སྒེར་བཅས་གང་ཡིན་རུང་བཙན་ཤེད་ཀྱིས་སྤྱི་དམངས་ལ་ཆོས་ལ་དད་མོས་བྱེད་དུ་འཇུག་པའམ་ཆོས་ལ་དད་མོས་བྱེད་དུ་མི་འཇུག་པ་བྱ་མི་ཆོག  ཆོས་ལ་དད་པ་ཡོད་པའི་སྤྱི་དམངས་དང་ཆོས་ལ་དད་པ་མེད་པའི་སྤྱི་དམངས་སུ་ལའང་མཐོང་ཆུང་བྱ་མི་ཆོག” ཟེར་ནས་འཁོད་ཡོད་པ་དེ་དག་རྒྱལ་ཁབ་ཀྱི་མགོ་ཁྲིད་དང་ལས་ཁུངས་ཁག་གིས་བརྩི་སྲུང་རྩ་བ་ནས་བྱེད་མི་དགོས་པར་རང་སྣང་གང་ཤར་བྱེད་ཀྱིན་ཡོད་པ་དེ་སྒེར་གཅོད་སྲིད་གཞུང་ཡིན་པའི་དན་རྟགས་ཡག་ཤོས་དེ་གྱུར་བ་མ་ཡིན་ནམ། ད་ཐེངས་འདི་ལ་རྒྱུ་མཚན་ལྡན་པའི་ལན་འདེབས་གང་ཡང་མེད་པར་ཁུ་སིམ་མེར་བསྡད་ན་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྐང་བཙུགས་ནས་ཁྱེད་ཚོས་བཀྲོངས་བ་ལ་ངོས་འཛིན་བྱ་རྒྱུ་མ་ཟད། དེ་སྔ་ཡན་ཆོད་དུ་བོད་མི་རིགས་དང་དེའི་རིག་གཞུང་ལ་དུང་བ་མཚོ་ལྟར་ཟབ་མཁན་གྱི་༧པན་ཆེན་སྣང་བ་མཐའ་ཡི། གུང་ཐང་བསྟན་པའི་དབང་ཕྱུག མཁན་ཆེན་འཇིགས་མེད་ཕུ་ཚོགས། རྒན་དམ་པ་བློ་བཟང་རྒྱ་མཚོ། ཨ་ཀོང་རིན་པོ་ཆེ་སོགས་ཁྱེད་ཅག་གིས་གཡོ་ཐབས་ཀྱི་བཀྲོངས་བ་ཡིན་པ་ངང་གིས་ཁེས་ལེན་བྱས་བ་ལ་དངོས་འཛིན་བྱེད་རྒྱུ་ཡིན།

ཆབ་སྲིད་བཙོན་ཟུར་བསྟན་པ་དར་རྒྱས་ནས།
ཕྱི་ལོ་༢༠༡༥ ཟླ ༧ ཚེས ༢༠ ཉིན།

ཡིག་གེ་འདི་རྒྱ་བོད་ཤན་སྦྱར་བྱས་ཏེ་ཨོ་སི་ཁྲི་ལི་ཡའི་རྒྱལ་སར་ཡོད་པའི་རྒྱ་ནག་གཞུང་ཚབ་ཁང་ལ་བཏང་པ་ཞིག་ཡིན།