མི་ཉག་ཀུན་དགའ་བཀྲ་ཤིས།
གནའ་གཏམ་ཁྲོན་པའི་སྦལ་པར་སྦྱར་བའི་༢༠༡༦ ལོའི་བོད་ཀྱི་སྲིད་སྐྱོང་འོས་བསྡུ་ཆེན་མོ།
འཆར་ལ་ཉེ་ཞིང་། ད་ལྟ་འཁྲུག་ཆ་ཧ་ཅང་དོད་པའི་ ༢༠༡༦ ལོའི་སྲིད་སྐྱོང་འོས་བསྡུ་ལས་འགུལ་འདི་དྲྭ་རྒྱ་སོགས་དེང་དུས་ཀྱི་སྤྱི་ཚོགས་བརྒྱུད་ལམ་འདྲ་མིན་ཁག་ཏུ་མཐོང་དུས། གནའ་མིའི་གཏམ་དཔེ། ཁྲོན་པའི་ནང་གི་སྦལ་པ་ཞེས་པ་དེ་སེམས་ལ་དྲན་འོང་། གཏམ་དཔེ་འདི་ངས་སྲིད་སྐྱོང་གི་འོས་བསྡུ་ལ་སྦྱར་ནས་བཤད་ན། འདི་འདྲ་ཞིག་ཅི་ནས་ཀྱང་རེད།
ས་ཁུག་ཞིག་ན་ཁྲོན་པ་ཆུང་ཆུང་ཞིག་ཡོད། ཁྲོན་པ་དེ་ཉིད་ཙམ་ལས། དེའི་ཕྱི་རོལ་གྱི་མཐའ་ཡས་པའི་རྒྱ་མཚོ་ཆེན་པོ་གཏན་ནས་མཐོང་མ་མྱོང་བའི་སེམས་ཅན་འགའ་ཡོད། སེམས་ཅན་དེ་དག་ནི་མིག་ཟུང་ཆེ་ཞིང་རྐང་པ་ཕྲ་བ། ལྟོ་བ་ཆེ་ལ་སྐད་སྒྲ་ཆེ་བའི་ཁྲོན་པ་ནང་གི་སྦལ་པ་འགའ་དང་། སྦལ་པའི་འཁོར་དུ་བསྐོར་བའི་ལྕོང་མོའི་ཁྱུ་ཞིག་གིས་རྒྱ་མཚོ་ནས་ཡོང་བའི་རུས་སྦལ་འགའ་ཤས་ལ་རྐྱལ་རྩལ་རྒྱས་མེད་པ་དང་། ཁྲོན་པའི་གཏིང་མཐའ་མི་དཔོག་པའི་འཕྱ་ལད་དང་དམའ་འབེབས་བྱེད། རེ་ཟུང་ལ་ཡིད་སྨོན་དང་བསྟོད་བསྔགས་གི་མེ་ཏོག་གནམ་ལ་འཐོར་ཁུལ་བྱེད་། དོན་དུ་ཁྲོན་པ་དེ་ཆུང་དྲགས་པ་དང་འཕག་འཚག་རྒྱབ་པ་ཚད་ལས་བརྒལ་སོང་བས་ཁྲོན་པ་ནང་གི་གཏིང་ཐུང་བའི་ཆུ་ཡང་ཇེ་རྙོག་ཏུ་སོང་ནས་མཐར་སྦལ་པ་རང་ཉིད་གཙོ་བོར་གྱུར་པའི་ལྕོང་མོ་རྣམས་ལ་ཡང་ལུས་སེམས་གཉིས་མི་བདེ་ཤིག་ཤིག་ཅིག་ཆགས་པ་མ་ཟད། སྦལ་པ་ཁོ་རང་ཡང་སྦལ་པའི་གྲས་སུ་མི་ཚུད་པའི་སྐབས་ཤིག་ལ་འགྱུར་བཞིན་ཡོད། དེ་ནི་སྦལ་པ་རང་གིས་རང་མགོ་བརྡུང་བ་ཙམ་དུ་ཟད་པ་ལས་གསེར་གྱི་རུས་སྦལ་དག་གནས་བཅའ་སའི་རྒྱ་མཚོར་ཏིལ་འབྲུ་ཙམ་ཡང་གནོད་པར་མི་འགྱུར།
རུས་སྦལ་ནི་རུས་སྦལ་རང་སྟེ། ཚེ་རིང་ཞིང་ཉམས་མྱོང་ལྡན་པ། བརྩོན་འགྲུས་ཆེ་ལ་སྐད་ཅོར་ཉུང་བ། ལེགས་ཉེས་དབྱེ་འབྱེད་ལ་མཁས་ཤིང་རང་ཚུགས་ཐུབ་པ་བཅས་རེད། དགའ་འོས་པ་ཞིག་ལ། ང་ཚོར་རུས་སྦལ་འདི་འདྲ་ཧ་ཅང་མང་པོ་ཡོད། དཔེར་ན། སྲིད་སྐྱོང་བློ་བཟང་སེང་གེ་ལགས། ཚོགས་གཙོ་སྤེན་པ་ཚེ་རིང་ལགས། བོད་མིའི་སྤྱི་མཐུན་མཉམ་འབྲེལ་གྱི་སྤྱི་ཁྱབ་འགན་འཛིན་བཀྲ་ཤིས་དབང་འདུས་ལགས། ཉམས་ཞིབ་པ་དང་རྩོམ་པ་པོ་ཨ་ཚོགས་ཀླུ་མཁར་བྱམས་ལགས་སོགས། དེར་བརྟེན་རང་རེའི་སྤྱི་ཚོགས་ནང་ཡང་དག་པ་དང་ཚད་ལྡན་གྱི་སྲིད་སྐྱོང་འོས་མི་མ་འདང་བའི་སྐྱོན་ཕྲ་མོ་ཙམ་ཡང་མེད།
འོན་ཀྱང་ཁྲོན་སྦལ་འགས་བསྟོད་མ་ཤེས་ནས་སྐབས་རེ་སོ་སོའི་རྒྱབ་སྐྱོར་ཞུ་ས་གང་དེའི་མཚན་སྙན་ལ་གནོད་པའི་ལས་འགུལ་བརྩམས་དང་རྩོམ་བཞིན་པ་རེད། དཔེར་ན་ཚོགས་གཙོ་དང་མཉམ་དུ་བསྒྲོན་པའི་དཔར་རེ་གཉིས་ངོ་དེབ་ཐོག་བཀྲམ་ནས་ལས་ཐོག་གི་སྲིད་སྐྱོང་མཆོག་མཁས་དབང་མ་ཡིན་པ་དང་། བོད་པ་ཕྱེད་ཀ་ཡིན་པ་སོགས། གཞི་མེད་པའི་སྙོན་འཛུགས་རེ་བྱེད་དུས། ཁྲོན་པ་ཆུང་ཆུང་གཞན་དེའི་ནང་གི་སྦལ་ཆུང་ཚོས་རྒྱ་མཚོ་ནས་ཡོང་བའི་རུས་སྦལ་(ཚོགས་གཙོ་སྤེན་ཚེ)་མཆོག་སྦལ་ཆུང་ཞིག་གི་རྒྱབ་ཏུ་མི་མངོན་པའི་ཚུལ་དུ་གནས་ཡོད་པར་ཡིད་ཆེས་བྱེད། དོན་དངོས་སུ་སྤེན་ཚེ་ནི་ཤེས་ཡོན་དང་ཉམས་མྱོང་། དེ་བཞིན་བསམ་ཤེས་ཀྱིས་ཕྱུག་པའི་རྒྱ་མཚོ་ནས་ཡོང་བའི་རུས་སྦལ་རྒན་གྲས་ཤིག་ཡིན་པས་ཁྲོན་སྦལ་ཆུང་ཆུང་ཞིག་ལ་འུ་ཐུག་པའི་རེ་བཅོལ་མི་བྱེད། (ད་དུང་དམངས་ཚོགས་ཁྲོད་ཕོ་བྲང་གོང་མ་ཡང་སྦལ་ཆུང་གི་རྒྱབ་ཏུ་གབ་ཡོད་པའི་དོགས་སློང་བྱེད། ཕོ་བྲང་གོང་མ་ཟེར་ན་དགའ་ལྡན་ཕོ་བྲང་རེད། བདེན་མིན་གང་ལྟར། དེ་ཡང་ཕོ་བྲང་གོང་མའི་མཚན་ཤས་རེད།) དེ་ལས་ལྡོག་སྟེ། སྦལ་ཆུང་གི་དམིགས་ཡུལ་གཙོ་བོ་ནི་ལྕོང་མོ་ཚོའི་མིག་ལམ་དུ་ཁྲོན་ཆུང་དེ་རྒྱ་མཚོར་དང་། རང་ཉིད་རྒྱ་མཚོ་ནས་ཡོང་བའི་རུས་སྦལ་ལ་མཐོང་བའི་དོན་དུ་རེད། དེ་ལྟ་ན་ཡང་། ལྕོང་མོ་སྦལ་པར་འགྱུར་བའི་གོ་སྐབས་ཡོད་ན་ཡང་། ཁྲོན་པ་རྒྱ་མཚོར་དང་། སྦལ་པ་རུས་སྦལ་ལ་འགྱུར་མི་འགྲོ་བ་དངོས་ཡོད་ཡིན་པས་རེ་སྟོང་ཙམ་དུ་ཟད།
རུལ་སྦལ་བཞི་པོ་སུ་ཞིག་སྲིད་སྐྱོང་གི་ཞབས་སྟེགས་སུ་ཕེབས་ན་ཡང་། ད་ལྟའི་སྲིད་སྐྱོང་ལྟར། གང་ཅིའི་ཐད་ནས་འཛམ་གླིང་གི་དབུ་ཁྲིད་གཞན་དང་དཔུང་པ་མཉམ་གཤིབ་གནང་ཐུབ་མཁན་ཤ་སྟག་དང་། བོད་མི་རིགས་ཀྱི་གཟི་བརྗིད་དང་སྤོབས་པར་རློམ་ཆོག འོན་ཀྱང་འབྱུང་འགྱུར་གྱི་ལོ་ལྔ་ཡི་ནང་ལ་འདས་པའི་མི་ལོ་དྲུག་བཅུ་རེ་གྲངས་ནང་གཙང་བཟོ་བྱས་མ་ཐུབ་པའི་བོད་རྒྱའི་ཆབ་སྲིད་དཀའ་རྙོག་གི་རྒྱ་མཚོ་གཡའ་དག་པར་གནང་མི་ཐུབ་པ་དང་། དུས་རབས་ཕྱེད་ལྷག་གི་ནང་ལ་གཏན་འབེབས་ཡང་དག་པར་མ་བྱུང་བའི་བཙན་བྱོལ་ནང་གི་ཤེས་ཡོན་སྲིད་ཇུས་ལེགས་གྲུབ་གཏན་འབེབས་ཡོང་བའི་མིག་སྒྱུ་ཞིག་ལ་ཡང་རེ་སྒུག་ནི་དེ་བས་ཀྱང་ཞུ་མི་ཉན།
གང་ལྟར། ‘ཨ་ཚོགས་’ཕུད་པའི་རུས་སྦལ་གཞན་གསུམ་པོ་སུ་ཞིག་སྲིད་སྐྱོང་གི་ཞབས་སྟེགས་ཐོག་ཕེབས་ན་ཡང་རབས་བྱུང་ན་ལས་ཐོག་སྲིད་སྐྱོང་གིས་ད་ལྟ་གནང་བཞིན་པ་ཙམ་དང་། ཡང་ན་དེ་ལས་སྐྱོ་བ་ཙམ་ལས། ཁོང་ཚོའི་ཁྱོན་ཡོངས་ཀྱི་ཆབ་སྲིད་ཀྱི་ལྟ་བ་དང་ལངས་ཕྱོགས་སོགས་རིགས་མཚུངས་པས་མཐའ་མའི་འཛིན་སྐྱོང་གི་གནས་བབ་དང་། ལས་འགུལ་གྱི་ནུས་པ། དེ་བཞིན་གྲུབ་འབྲས་ཀྱི་ལྗིད་ཚད་ཀྱི་ཆ་ནས་ཀྱང་གཅིག་པ་ལྟ་བུར་ཆགས་འགྲོ་བ་སྔོན་དཔག་བྱེད་ཐུབ། རྒྱུ་མཚན། ཤེས་ཡོན་སྲིད་ཇུས་དང་བོད་རྒྱ་ཞི་མོལ། དེ་བཞིན་ཆིག་སྒྲིལ་སོགས་མང་ཆེ་བ་ལྟོས་གྲུབ་ཡིན་པ་ལས་ཕྱོགས་གཅིག་གིས་འབད་བརྩོན་ལས་བསྒྲུབ་ཐུབ་པའི་བྱ་བཞག་ཅིག་མ་རེད།
དེས་ན་ང་ཚོར་༢༠༡༦ ལོར་དགོས་པ་ནི་ཆོས་བརྒྱུད་དང་། ཆོལ་ཁ། ལུང་ཚན། དེ་བཞིན་གསར་རྙིང་སོགས་ཀྱི་ལྟ་སྤྱོད་ཀྱི་གཞན་དབང་དུ་མ་སོང་ཞིང་། མིང་དོན་མཚུངས་པའི་འོས་བསྡུ་ཞིག་ལ་ཁ་ཕྱོགས་དགོས་པ་ལས་ཁྲོན་པའི་སྦལ་པའི་འུར་སྒྲོག་ལ་མགོ་བོ་འཁོར་བའི་ཀློང་ན་སྲིད་སྐྱོང་ཞིག་བསྐྲུན་མི་རུང་བ་དེ་རེད། ནུས་ཤུགས་ཀྱི་རྩ་བ་ཆིག་སྒྲིལ་དང་། མང་གཙོའི་རྨང་གཞི་བརྩི་བཀུར་གཉིས་སྔོན་དུ་བཏང་ནས་ད་ལྟའི་གཉན་འཕྲང་ཅན་གྱི་བོད་མི་རིགས་ཀྱི་དོན་དུ་བོད་ནམ་ཡང་རྒྱལ་བར་ཕྱིར་འཐེན་མེད་པར་མདུན་སྐྱོད་བྱ་དགོས།།
མི་ཉག་ཀུན་དགའ་བཀྲ་ཤིས་ཀྱིས་སྤྱི་ལོ་༢༠༡༥ ལོའི་༠༨ པའི་ཚེས་ ༠༤ གཟའ་མིག་དམར་གྱི་ལས་ཞོར་དུ་བྲིས།།
ཡག་པོ་བྲིས་གདའ་མངོན་པར་བསྟོད།
ཨ་ཚོགས་ཕུད་པའི་ཟེར་བ་ལ་ལྟོས་དང་་་་་་ད་དུང་ཕྱོགས་འཛིན་མེད་པ་སོགས་མང་མང་ཞིག་བཤད་གི་་་་་་་་ཧ་བོ་་་་ད་ཚར་སོང་ཟིག་་་་་་་་མི་ཉག་པ་ལ་དེ་བས་ཅང་ཡོད་མ་རེད་་་་་ཡོད་ཚད་རྨོངས་དད་་་་་་་
གངས་སྤྲེལ་ཚ་ལགས། “ཨ་ཚོགས་ཕུད་པའི་”ཟེར་བའི་བསྟན་བྱ་གཙོ་བོ་ག་རེ་རེད་འདུག གསལ་པོ་ཞིག་བཟོ་རོགས།
ཨ་ཚོགས་ཕུད་པའི་”ཟེར་བའི་བསྟན་བྱ་གཙོ་བོ་ནི་གཅིག་བྱས་ན་ལྟ་གྲུབ་ཡོད་མེད་བཤད་ཀྱི་ཡོད་སྲིད། ཉི་མ་དེ་རིང་བར་དུ་སྲིད་སྐྱོང་ལ་ལངས་མཁན་དང་འདེམས་པ་ཚང་མ་ལོ་ཁ་ཉན་གྱི་ཡིན་ཟེར་མཁན་རྐྱང་རེད། དེ་ལས་ལྡོག་ནས་ཨ་ཚོགས་ཀླུ་མཁར་བྱམས་ཀྱིས་རང་བཙན་གྱི་ལྟ་བ་ཁུར་ནས་སྲིད་སྐྱོང་འོས་མིར་ལངས་ཀྱི་ཡོད་ཙང་། མ་འདྲ་བ་དང་རྣམ་པ་གསར་བ། དོ་སྣང་སྤྲད་ས་གསར་བ་ཞིག་ཏུ་གྱུར་ཡོད།
ཨ་ཚོགས་ཕུད་པའི་་གཞན་རུས་སྦལ་གསུམ་པོ་
ཡང་ན་མི་ཉག་པའི་མིང་ཕར་གཡུགས་་་་ཡང་ན་སྐད་ཆ་དྲང་མོ་ཤོད་་་་་དོན་དངོས་ནས་བཤད་ན་མི་ཉག་པ་ཡོངས་སུ་ཨ་ཚོགས་ལ་དགའ་སྲིད་་་་་རང་བཙན་འདོད་པའི་རེས་འབྲང་བ་མང་བ་དོན་དངོས་རེད་་་་་་་་་་་
ད་ར་མགོ་དང་ལུག་མགོ་ཚང་མ་སྲིད་སྐྱོང་ལ་ཚང་ཁ་རྒྱག་སྟངས་ལ་བལྟས་ན་ཡག་རྟགས་ཤིག་ཨ་ཡིན་ནམ་ ཚོགས་པ་དང་ཆོལ་ཁ་ལུང་ཚན་ཤོག་བསྒྲིལ་ལ་སྐྱབས་བཅོལ་ནས་ར་མགོ་དང་ལུག་མགོ་ཚང་མ་མི་མང་གི་མདུན་དུ་ངོ་འབག་རྒྱོན་ནས་སྲིད་སྐྱོང་ལ་ཚང་ཁ་རྒྱག་རྒྱུའི་དུས་ཚོད་ཤར་ཚར་བ་རེད་2021གི་སྲིད་སྐྱོང་དེ་ཆོལ་ཁ་ལ་རྒྱན་རྒྱག་རྒྱུ་ཡིན་པ་ཐག་ཆོད་
གངས་སྤྲེལ་ཚ་ལགས། ངས་བཤད་པའི་སྐད་ཆ་དེ་ཁྱེད་ཀྱིས་མཁྱེན་མེད་པར་འདུག་པ་ནང་བཞིན། ཁྱེད་གསུང་འདོད་པའི་སྐད་ཆ་དེ་ཡང་གུས་མགོ་འཚོས་ཀྱི་མི་འདུག ཡི་གེ་དེ་ཡག་པོ་ཞིག་ལྗགས་ཀློག་གནང་རོགས།
བསམ་བློ་གཏོང་ས་ཡོད་པའི་རྩོམ་ཡག་པོ་ཞིག་བྲིས་འདུག དགའ་བསུ་ཞུ།
རྩོམ་དེའང་ཁྲོན་པའི་ནང་ལ་བསྡོད་མཁན་ཞིག་གིས་བྲིས་པ་འདྲ་པོ་འདུག་།
ཡིན་ན་ཡང་། ཨ་ཁུ་ནོར་བུས་ཚིག་སྒྲུབ་ཐུང་ཐུང་ཞིག་གི་ནང་དག་ནོར་ཁ་ཤས་ཡོད་པ་དང་བསྡུར་ན་རྩོམ་དེ་རྒྱ་མཚོ་ནས་ཡོང་བའི་རུས་སྦལ་ཆེན་པོ་ཞིག་གིས་བྲིས་པ་རེད་ཟེར་ན་མ་འགྲིག་པ་མི་འདུག
ངོས་ལེན་མེད་་་ང་སྲིད་སྐྱོང་ལ་ཐང་ཆད་བསྡད་ཡོད།ཁོང་གི་ཁས་ལེན་ནང་།གཅིག་སྒྲིལ་གཙོ་བོར་བཞག་ཡོད།གཅིག་སྒྲིལ་ལ་གཏོར་བརླགས་གཏོང་མཁན་གཙོ་བོ་ཏོལ་ཚོགས་རེད།ཁོང་ཚོས་རྒྱ་དམར་དང་ལག་འབྲེལ་བྱས་ནས།བོད་ཀྱི་འཆི་གསོན་གྱི་ཀ་བ་༧གོང་ས་ཏཱ་ལའི་བླ་མའི་མཚན་སྙན་དང་སྐུ་སྲོག་ལ་མངོན་ལྐོག་གཉིས་ནས་རྒོལ་བའི་སྐབས་འདིར།ཁོང་གིས་དེར་གདོང་ལེན་གྱི་ནུས་ཤུགས་ལྡན་པའི་ཞིབ་འཇུག་ཚོགས་པའམ།ཡང་ན་རྒྱ་ཆེའི་བོད་མི་མང་གི་སེམས་ཁ་གསོ་བའི་གཏམ་བཤད་གཅིག་ཀྱང་མ་གནང་བ་དེས།རང་ཉིད་འདེམས་མཁན་གྱི་མི་མིང་གི་སེམས་ཚོར་ལ་དོ་སྣང་དང་གུས་བཀུར་མེད་པའི་མཚོན་རྟགས་ཤིག་ཏུ་གྱུར་བ་མ་ཟད།གཅིག་སྒྲིལ་གཙོ་བོར་འཛིན་པའི་ཁས་ལེན་དང་དངོས་སུ་འགལ་ཡོད།
ད་དུང་ཁོང་གིས་རང་ཁ་རང་གསོའི་ཁས་ལེན་གནང་ཡོད།ཁས་ལེན་དེ་དང་རོགས་སྐྱོར་གང་མང་བླངས་པ་གཉིས་པོ་ཡང་དངོས་འགལ་དུ་གྱུར་ཡོད།སྤྱིར་བཙན་བྱོལ་བ་ཞིག་ལ་མཚོན་ན་རོགས་སྐྱོར་ནི་མེད་དུ་མི་རུང་བ་ཞིག་རེད་།འོན་གྱང་རོགས་སྐྱོར་ལེན་རྒྱུ་མང་བ་ཡིན་ན་མ་འོངས་པའི་རོགས་སྐྱོར་གྱི་སྒོ་དེ་འགག་འགྲོ་བ་ཞིག་རེད།རྒྱུ་མཚན་ནི་རོགས་སྐྱོར་དེ་ལ་བརྟེན་ནས་་།
མ་འོངས་པར་རོགས་སྐྱོར་གྱི་གནས་སུ་འདུག་མི་དགོས་པའི་ཆེད་དུ་ཡིན་པས་རེད།མཁས་དབང་ཟམ་གདོང་རིན་པོ་ཆེའི་སྐབས་སུ་རོགས་སྐྱོར་ཁ་ཤས་ཕྱིར་ལོག་བྱས་འདུག། ད་དུང་ཁོང་གིས་ལོ་ལྔའི་ནང་བོད་ནང་ནས་རིགས་གཅིག་རྐང་འཛིན་པ་འབུམ་གཅིག་ཐོན་པའི་རེ་བ་དང་།བཙན་བྱོལ་ནས་ཁྲི་གཅིག་ཐོན་པའི་ཁས་ལེན་བྱས་པ་དེ་ནི།གང་ཟག་གཅིག་གི་སློབ་སྦྱོང་གི་བརྒྱུད་རིམ་དང་དུས་ཡུན་གང་གི་ཆ་ནས་ཀྱང་འགྲུབ་མི་ཐུབ་པ་ཞིག་རེད།༧གོང་ས་མཆོག་གིས་ལོ་ངོ་སུམ་ཅུའི་ནང་རིགས་གཅིག་རྐང་འཛིན་པ་ཐོན་ཐུབ་པའི་རེ་བ་དང་འཆར་གཞི་བསྒྲིགས་པ་ཡིན།ཏ་རིགས་གཅིག་རྐང་བཛིན་པ་ཡོད་ན་ཐོན་ཤོགས་ཅེས་བཀའ་སློབ་གནང་ཡོད།དེས་ན་ཛ་དྲག་གི་སྐབས་དེ་འདྲ་ཞིག་ལ་ལོ་ངོ་སུམ་ཅུ་རུ་ངང་སྒུག་བྱེད་དགོས་པ་ཞིག་ལ།སྲིད་སྐྱོང་གིས་ལོ་ལྔའི་ནང་ལ་རེ་བ་དང་ཁས་ལེན་གནང་བ་དེ་ནི།གཞི་རྩ་མེད་པའི་གཏམ་བཤད་གཅིག་ཡིན་པ་ད་ལྟ་ངོས་སུ་ལྷང་ལ་བུད་པ་རེད།སྔོན་ཆད་ང་ཚོས་ཁོང་གི་སློབ་སྦྱོང་གི་བརྒྱུད་རིམ་དང་མང་བོ་ཞིག་ལ་བསམ་བློ་བཏང་ནས་རེ་བ་བྱས་པ་རེད།ད་རེབ་དེ་ལྟར་བྱེད་མི་དགོས།ཁོང་གིས་ལོ་བཞིའི་རིང་གི་ཕྱག་ལས་དང་འཇོན་ཐང་ལ་མིག་གིས་བལྟས་ནས།ཉམས་མྱོང་གི་ཐོག་ནས་བསམ་བློ་གཏོང་རྒྱུ་ལས།སྔོན་ཆད་ཀི་ཁོང་ལ་ཚོད་དཔག་བྱེད་པའི་རྒྱུ་ཆ་དེ་ཚོ་དགོས་མཁོ་མེད་པ་ཞིག་རེད།གསར་ཤོག་ཐོག་གི་རེ་འདུན་དེ་ནི་ངོ་མ་དགོད་སྤྲོ་བོ་ཞིག་རེད།ཆེས་ཉམས་མྱོང་མེད་པའི་མི་གསར་བ་ཞིག་ལ་བཟང་ཕྱོགས་ཀྱི་རེ་བ་གནང་སྟངས་ཤིག་རེད།རེ་བ་དེ་ནི་བེ་རིས་རྩོམ་ཡིག་བྲིས་པ་དེ་དང་གཅིག་མཚུངས་ཡིན།(བེ་རིས་སྲིད་སྐྱོང་མཆོག་ལ་བྲིས་པའི་སྙན་རྩོམ)