བསོད་ནམས་ནོར་བུ། ༼རྣམ་གྲོལ་གླིང་།༽
ཨ་མ་གཤིན་ཡུལ་གྱར་ནས་ཞེ་དགུ་ལོན་སོང་།།
ཨ་ཕ་མལ་དུ་ལྷག་བཞིན་ལོ་ངོ་འདས་སོང་།།
ཕུ་ནུ་ལྷན་དུ་མ་འཛོམས་དུས་ཡུན་རིང་སོང་།།
འཇིག་རྟེན་འཚོ་བ་རླབས་ཀྱི་དུག་ཁུ་ཡིན་འགྲོ།།
སྐྱོ་བ་མིག་སྔར་བབ་པའི་དེང་གི་དུས་ལ།།
སྟག་རྒོད་མཆེ་བ་གཟེང་བའི་སྣང་བ་འདི་ཀོས།།
མགོ་བོ་སྔས་ལ་ཕབ་ཀྱང་གཉིད་དུ་མི་འཇུག།
ཤ་རུས་འཐག་པའི་བྲང་ཁོག་ཡར་ཡར་ཕུག་ཡོང་།།
དེ་རིང་སྨུག་ཆར་ཀློང་གི་རྣམ་ཤེས་དམར་པོ།།
ཚོད་ཚོད་ག་བར་ཕྱིན་པ་མངགས་ནས་བཞག་ན།།
ཞིང་ཐང་ནགས་ཀླུང་རྫོབ་པོ་ཧེབ་ཀྱིས་བརྒལ་ནས།།
གོ་ལའི་ཕྱི་ལོགས་འཕུར་ཏེ་ལོག་ན་མི་འདོད།།
མི་ཚེ་མི་ཡི་ལུང་པར་སྐྱབས་སུ་བཅོལ་ནས།།
དགུན་གྱི་འཁྱག་རོམ་གྱུར་པའི་གློ་བ་མཆིན་པ།།
ས་མཐའི་ལྡོམ་པོ་ཞིག་གི་ནང་ཁྲོལ་ཡིན་པས།།
བྱམས་པའི་གདོང་གི་མེ་ཏོག་ཚེར་མ་རེད་འགྲོ།།
15/ 8/ 2015
སེམས་གསོ་ཞུ་བ་ཡིན།