གཡུ་སྒང་དགེ་འདུན་གྱིས།
དམར་ཕྱོགས་ཁྲིམས་ཀྱི་རལ་གྲིའི་རྣོ་ཁ་ལས་ངན་བོད་པའི་གཉའ་རུ་གཏད།།
ཡིད་གཏད་མེད་པའི་རྫུན་གཏམ་གད་སྙིགས་རྨོངས་འཐོམ་བོད་པའི་ཀླད་པར་བླུགས།།
ཏང་ལ་བློ་དཀར་གཞུང་དྲང་དགོས་པའི་མངར་མོའི་རྔན་པའི་ཟུར་ཙམ་བསྟན།།
ཅོལ་ཆུང་ཤ་ཁྲག་རུས་གསུམ་དོར་ནས་རང་རིགས་རང་གི་གཤེད་མར་སྡང་།།
ཡ་ངའི་འཚོ་བའི་བརྒྱུད་རིམ་ཞིག་ན་ལྷ་སྒྲུང་བྱེ་བ་ཁྲི་འབུམ་ཞིག །
མེད་མུག་དུས་ཀྱི་ཧྲག་བར་ཞིག་ན་ཡི་དྭགས་ཉེ་ཚེའི་འཚོ་བ་འབུམ།།
རེ་ཤི་རེ་གསོན་དམྱལ་བའི་བརྒྱུད་རིམ་ཡོད་ཚད་ཁ་བའི་ལྗོངས་སུ་རྒྱུ།།
འཛམ་གླིང་སྐྱེ་འགྲོའི་རྣ་མིག་གབ་ནས་ངག་མེད་ལྐུགས་པའི་ཚུལ་དུ་གནས།།
དྲིན་ཆེན་ནེ་རུས་བོད་འདི་རྒྱ་ཡི་ཆ་ཤས་ཡིན་པའི་ངོས་ལེན་བྱས།།
མགོན་མེད་དཔུང་མེད་བོད་མི་ཁེར་རྐྱང་རྒྱ་འོག་ཚུད་པའི་གཏམ་རྒྱུད་དུ།།
བརྩེ་ལྡན་ཕ་ལོ་དགྲ་རུ་འཛིན་ཞིང་གདུག་ཅན་གཤེན་མ་མགོན་དུ་བཀུར།།
གོ་ལྡོག་དུས་ཀྱི་ཡོ་ལང་ཞིག་གིས་བོད་ཡུལ་ཤ་ཉོག་རུས་ཉོག་བཏང་།།
མི་ལོ་དྲུག་ཅུར་འཚོ་བ་སྐྱུར་མོས་བོད་པའི་ཕོ་བར་རྨ་ངན་བསྐྱེད།།
ཕོ་ནད་དྲག་པོའི་ཟུག་གཟེར་ལངས་ཀྱང་འཛམ་གླིང་མི་ཡིས་ལྟད་མོ་བལྟས།།
ཤི་གསོན་སོ་ཁའི་ལམ་ཕྲན་འདི་ནས་འཛམ་གླིང་མཉམ་འབྲེལ་ལྷ་རྗེ་བཙལ།།
ལྷ་མིན་ལྷ་རྗེ་འདྲེ་རུ་བརྫུས་ཏེ་གོས་སྔོན་སྲིན་པོའི་གདོན་དང་བསྡོངས།།
གཉོམ་ཆུང་སྤྲང་པོའི་དྲང་བདེན་གཏམ་ལ་སླུ་བྲལ་གཡོ་སྒྱུའི་ཟློས་གར་ཟེར།།
སྟོབས་ཆེན་དཔུང་གིས་བཙན་གནོན་བྱས་ཀྱང་བདེན་པའི་རྒྱལ་ཁ་ཁྱེད་ཡིན་སྐད།།
རྒྱུ་འབྲས་མེད་པའི་གོ་ལའི་སྟེང་ན་ལས་ངན་ས་ཡ་དྲུག་པོའི་ལས།།
ཨ་མདོའི་བུ་ཡི་ཕྲག་ཏུ་བཟུང་ནས་མི་ལོ་རེ་གྲངས་ཁད་ཀྱིས་ཡལ།།
ཕ་རྒྱུད་བྱང་ཆུབ་སྤྲེའུའི་རྒྱུད་ལ་མ་རྒྱུད་བྲག་སྲིན་སྒྲོལ་མའི་རྒྱུད།།
ངག་ཐོག་ལྷ་ཡི་གཏམ་རྒྱུད་རིང་ཡང་གཞན་ཡིད་འཕྲོག་པའི་སྙན་ཆ་སྟོངས།།
འོན་ཀྱང་ཤཱཀྱའི་ཐུགས་སྲས་གྱུར་པའི་ཨ་མདོའི་བྱ་བྲལ་གྲྭ་རྐྱང་ཞིག །
འཛམ་གླིང་སྐྱེ་རྒུས་གཙུག་ཏུ་བཀུར་པའི་ཞི་བདེའི་དེད་དཔོན་གྱུར་དེ་མཚར།།
གཡུ་སྒང་དགེ་འདུན་གྱིས། ༢༠༡༥ ཟླ་ ༠༩ ཚེས་ ༠༤ ཉིན།
བརྩེ་ལྡན་ཕ་ལོ་དགྲ་རུ་འཛིན་སྟངས་གང་ཡིན་ནམ།།
རིག་གནས་གསར་བརྗེའི་སྐབས་སུ་བུས་ཕ་ལ་འཐབ་རྩོད་བྱས་པ་དག་ངོས་ཟིན་དགོས་པ་ཞིག་རེད་སྙམ།