—-དགེ་མང་ཟླ་བ།
ངའི་མིང་ལ་བསྟན་འཛིན་དབང་རྒྱལ་ཟེར།
ད་སྐབས་ལོ་79རེད།
ཕ་ཡུལ་བོད་འཕེན་པོ་ནས་ཡིན། ང་རང་ལོ་དྲུག་གི་སྟེང་ནས་གྲྭ་བ་བྱས། ལོ་བདུན་གྱི་སྟེང་ནས་ངའི་དགེ་རྒན་དམ་པ་གང་ཉིད་གྲོངས་སོང་། ང་སྡོད་སའི་གྲྭ་ཤག་དང་རྒྱུ་ནོར་ཚང་མ་བོད་རྙིང་པའི་མངའ་བདག་གིས་བཙན་བདག་བྱས་ནས་ང་རང་འགྲོ་ས་འདུག་ས་མེད་པར་བཟོས། དེ་དུས་རྒྱ་མིས་བོད་དུ་ཅུང་མ་སླེབ་གོང་རེད། ང་རང་ལོ་ན་ཆུང་ཡང་དགེ་རྒན་དམ་པ་གྲོངས་སོང་བའི་སེམས་སྡུག་བྱེད་པ་ལས་ཁང་ཁྱིམ་དང་རྒྱུ་ནོར་ཆ་ཚང་སྐུ་དྲག་གིས་འཕྲོག་སོང་པ་དེ་ལ་དམིགས་བསལ་སེམས་སྡུག་གང་ཡང་སླེབས་མ་སོང་། ང་རང་མུ་མཐུད་དུ་དགོན་པའི་ནང་དུ་སྡད་ནས་ནང་ཆོས་སློབ་སྦྱོང་བྱེད་དགོས་པར་རྟེན། ངའི་སྤུན་ཉེ་དགེ་བཤེས་ཤིག་གིས་ང་རང་བདག་པོ་བྱས་ཏེ་ཁྲིད་སོང་།
ངའི་ཕ་མ་རྣམས་ཞིང་བྲན་ལམ་ལུགས་འོག་འཚོ་སྡོད་བྱས་ཡོད་པས་ཁོང་ཚོའི་ང་བདག་སྐྱོང་གནང་རྒྱུ་ལས་སླ་པོ་ཞིག་ག་ལ་ཡིན། དེར་བརྟེན། ཁོང་ཚོས་ང་དགོན་པའི་ནང་དུ་སྐྱེལ་བ་ནི་ང་ཁོང་ཚོ་མཉམ་དུ་དཀའ་སྡུག་མྱོང་བཅུག་འདོད་མེད་པས་ལོས་ཡིན།
ལོ་ཉེ་ཤུ་ལ་མ་སླེབ་ཙམ་ལ་རྒྱ་མིས་བོད་ས་ཡོངས་རྫོགས་བཙན་བཟུང་བྱས་སོང་། འགྱུར་བ་དེ་ནི་མིའི་བློ་ཡུལ་དུ་ཤོང་དཀའ་བ་ཞིག་རེད་ལ་བོད་ས་གང་དུའང་ས་ཡོམ་བརྒྱབ་པ་ལྟ་བུའི་དགོན་སྡེ་གཏོར་བཤིག་དང་མི་ག་ཚོད་ཙམ་གྱིས་ཚེ་སྲོག་ཤོར་ཡོད་པ་ནི་གནམ་དང་ས་གཞི་འདི་གཉིས་ཁོ་ནས་ཤེས་ཡོད་སྲིད། ལོ་ཉི་ཤུ་རྩ་གཅིག་ཐོག་ཧི་མ་ལ་ཡའི་འཁྱགས་རོམ་བརྒལ་ནས་རྒྱ་གར་ནང་དུ་སྐྱབས་བཅོལ་དུ་ཡོང་། རྗེས་སུ་ངའི་ཨ་མ་རིག་གནས་གསར་རྗེའི་སྐབས་སུ་ལྟོགས་ཤི་ཐེབས་སོང་ཟེར་བ་ཞིག་གོ་སོང་། བདེན་པ་རེད་འདུག
རྒྱ་གར་ནང་གི་སྐད་དང་འཚོ་གནས་སོགས་ང་རང་རང་དང་རྦད་དེ་ཐ་དད་ཡིན་པས་གཡག་ཞིག་གླང་པོ་ཆེ་མང་པོའི་ནང་དུ་སླེབས་པ་དང་འདྲ་བོ་རེད། ཚ་བ་ཧ་ཅང་ཆེ་བའི་མི་ཡུལ་ལུང་པ་འདིར་འབྱོར་མ་ཐག་ངས་ཉིན་རེ་བཞིན་བོད་ཡུལ་གྱི་ཁ་བ་དང་གངས་རི་སོགས་དྲན་བཞིན་མི་ཚེ་ཐབས་ཆཊ་ཤིག་འཁྱོངས་ཐབས་བྱས་ནས་བསྡད། རྒྱ་གར་ནང་འབྱོར་ནས་ལོ་གཉིས་གསུམ་གྱི་རྗེས་སུ་མུ་མཐུད་དུ་ལྟོ་གོས་ལ་དཀའ་ངལ་གང་མང་འཕྲད་བཞིན་ཡོད་པས་ལོ་གསུམ་ཙམ་ལ་ང་རང་རྡ་རམ་སཱ་ལ་སོགས་ཧི་མ་ཅལ་མངའ་སྡེའི་ལམ་ལས་སྡེ་ཚན་ནང་དུ་ལས་དཀའ་བྱས་ནས་སྡོད་དགོས་བྱུང་།
དེའི་རྗེས་སུ་ཡང་བསྐྱར་རྒྱ་གར་བྱང་ཕྱོགས་ཀྱི་ས་མཚམས་སུ་མཐའ་སྲུང་དམག་སྒར་ནང་དུ་ལོ་མང་རིང་བསྡད་ནས་དྲག་པོས་དམག་སྤུང་གི་སྦྱོང་བརྡར་བྱས་ནས་སྡོད་མྱོང་ཡོད། འོན་ཀྱང་། འདི་ནི་ལྟོ་གོས་ཀྱི་ཆེད་དུ་དྲག་པོའི་དམག་མིའི་སྦྱོང་བརྡར་བྱས་པ་ཙམ་ལས་མི་གཞན་དག་ལ་དམག་བརྒྱབ་རྩ་མེད་བཟོ་བ་སོགས་ཀྱི་ཀུན་སློང་གང་ཡང་ཁུར་མེད། བདུན་བཅུ་དོན་གྲངས་ནང་དམག་སྒར་ནས་རྩ་དགོངས་ཞུས་པ་ཡིན། ལོ་ངོ་མང་པོར་དཀའ་སྤྱད་འབད་བརྩོན་བྱས་པར་བརྟེན་དམག་སྒར་ནས་ཕྱིར་བཏོན་དུས་ཧིན་སྒོར་འབུམ་གཅིག་ལྷག་གཅིག་གསོགས་ཐུབ་འདུག དངུལ་དེ་ཚོ་བེད་སྤྱོད་བྱས་ནས་ཚོང་བརྒྱབ་དགོས་པའི་བསམ་བློ་འཁོར་མ་སོང་ལ་དགའ་རོགས་བཙལ་ནས་བུ་མོ་མཉམ་དུ་སྐྱིད་པོ་གཏོང་དགོས་པའི་བསམ་བློ་ཡང་གང་ཡང་འཁོར་མ་སོང་། དངུལ་དེ་ཚོ་ལམ་སེང་པཱན་ཇབ་དངུལ་ཁང་ནང་ལ་བཅོལ་འཇོག་བྱས་ནས་རྡ་རཱམ་ས་ལ་ནས་ཁུ་སིམ་པའི་འཚོ་བ་ཞིག་གི་མགོ་བཙུགས་ཏེ་ཡང་བསྐྱར་གྲྭ་ཆས་གྱོན་ནས་ནང་ཆོས་ཉམས་ལེན་བྱས་ནས་འདུག་འདོད་ཧ་ཅང་ཡོད།
ལོ་དྲུག་ནས་ད་བར་ངའི་མི་ཚེའི་ནང་གི་གཞི་རྩའི་དམིགས་ཡུལ་ནི་སེམས་ཅན་གཞན་ལ་འཚེ་བ་མི་བྱེད་པ་དང་ནང་ཆོས་ཉམས་ལེན་བྱེད་རྒྱུ་འདི་ཡིན། མི་ཚེའི་ལམ་བུ་འདིའི་ནང་མིའི་བློ་ཡུལ་དུ་མི་ཤོང་བའི་དཀའ་སྡུག་མང་པོ་མྱོང་ཡང་། ཉི་མ་གཅིག་ལའང་རང་ཤི་བརྒྱབ་དགོས་བསམ་པ་དང་མི་གཞན་ལ་འཇིགས་སྐུལ་དང་རྐུ་འཕྲོག་སོགས་མ་རུང་བའི་ལས་ཞིག་བྱེད་དགོས་བསམ་མྱོང་མེད། རང་གི་སྡུག་པོ་རང་གིས་མྱོང་དགོས་བྱུང་ཡང་མི་གཞན་དག་རྣམས་སྐྱིད་པོ་ཞིག་ཡོང་བར་ཤོག་བསམ་སྟེ་འཛུམ་མདངས་བསྟན་ནས་འགྲོ་བཞིན་ཡོད། བཀྲ་ཤིས་བདེ་ལེགས།
མཇུག་མུ་མཐུད་ནས་བྲིས་ཡོད་ཚེ་ཡག་པོ་འདུག
ཧ་ཅང་ཡག་པོ་བྲིས་གནང་འདུག འུ་ཅག་གི་རྒན་རབས་པ་མི་ངོ་རེ་རེའི་མི་ཚེའི་ཉམས་མྱོང་གང་བསགས་པ་རྣམས། འདི་དང་འདི་ལྟར་ཡིག་ཐོག་ལ་འབྲི་ཐུབ་ན། མ་འོངས་པའི་སོན་རྩ་བོད་རིགས་གཞོན་སྐྱེས་རྣམས་ཀྱི་སེམས་ཤུགས་གོང་ནས་གོང་དུ་འཕེལ་བའི་རྒྱུ་རུ་འགྱུར་ངེས་སོ། ། བཀྲ་ཤིས་བདེ་ལེགས། །
བོད་རྙིང་པའི་མངའ་བདག ངའི་ཕ་མ་ཞིང་བྲན་ལམ་ལུགས་འོག ཧ་ཧ། ཚིག་བརྗོད་དེ་ཚོ་སྙན་པ་ལ། ཕལ་ཆེར་གཞིས་བྱེས་གཉིས་སུ་བོད་གཞུང་དགའ་ལྡན་ཕོ་བྲང་གི་བཀའ་དྲིན་འོག་ཏུ་འཚོ་མཁན་ཞིག་མིན་པར་གུང་བྲན་ཏང་གི་དབུ་ཁྲིད་པའི་བོད་གསར་བའི་འོག་ཏུ་ཞིང་བྲན་ཁྲི་ཚོ་བརྒྱ་བཅིངས་གྲོལ་ཐོབ་པའི་འབྱོར་མེད་གྲལ་རིམ་གྱི་རྒྱལ་གཅེས་ཆོས་གཅེས་ཀྱི་བློ་མཐུན་ཞིག་ཡིན་པ་འདྲ།
མདོར་བསྡུར་ན་ཆོས་པ་རྣམ་དག་ཅིག་རེད་འདུག་གོ།
སེམས་འགུལ་ཐབས་ཐུབ་པའི་རྩོམ་ཐུང་ཞིག་སྤེལ་འདུག ཡག་པོ་བྲིས་འདུག མུ་མཐུད་ནས་འདི་ལས་རྒྱས་པ་ཞིག་འབྲི་རོགས། སྒོམ་ཉམས་ལེན་ཡག་པོ་གནང་རོགས། མི་ལུས་ཤིག་བླངས་པའི་སྙིང་པོ་རེད། །
ཆོས་པ་རྣམ་དག་ཞིག་ཡིན་ན་ཆབ་སྲིད་ཀྱི་ཟློས་གར་ལས་ངེས་པར་དུ་གཡོལ་དགོས། ཆོས་པ་ཞིག་ལ་ཆ་བཞག་ན་ཆབ་སྲིད་ལས་ལྷག་པའི་དགྲ་ཞིག་སྲིད་ན་མེད། ཆབ་སྲིད་འདི་དུག་གི་རྫིང་བུ་ལྟ་བུ་རེད། མི་ཡག་པོ་ཚད་ལྡན་ཞིག་ཡིན་ཀྱང་དུག་གི་རྫིང་བ་འདིའི་ནང་དུ་བསྐྱལ་ཚེ་དུག་གིས་མི་གོས་མི་སྲིད། །
བླ་རྒན་ཁོང་གིས་བོད་གཞུང་དགའ་ལྡན་ཕོ་བྲང་དང་། རྒྱ་ནག་དམར་པོའི་གཞུང་གཉིས་གཅིག་མཚུངས་ཤིག་ཏུ་ངོས་འཛིན་གནང་འདུག
བེ་རེ་གདོང་ནག། ཁྱོད་དེ་འདྲའི་རང་གནོང་ཞིག་འཁྱེར་དགོས་དོན་ཅི་རེད། བོད་རྙིང་པ་བཀས་བཀོད་རྒྱུན་འཛིན་ཞིང་བྲན་ལམ་ལུགས་མ་ཡིན་པའི་རྒྱུ་མཚན་ཞིག་བཤོད་དང་། དེས་ན་དགའ་ལྡན་ཕོ་བྲང་གི་བཀའ་དྲིན་གཞིས་བྱེས་གཉིས་ལ་ཇི་ལྟར་ཁྱབ་པའི་ཁྱབས་སྟངས་ཤིག་བཤོད་དང་། ༧རྒྱལ་བ་རིན་པོ་ཆེ་བོད་མི་རིགས་ཀྱི་ལོ་རྒྱུས་རང་བཞིན་གྱི་དབུ་འཁྲིད་ཞིག་དང་། མི་དམངས་ཀྱིས་དད་མོས་རང་བཞིན་གྱི་ནང་བསྟན་ཆོས་ལུགས་ཀྱི་བླ་ཆེན་ཞིག་ཡིན་པའི་ཆ་ནས་དད་གུས་བླ་མེད་ཞུ་བཞིན་པ་ནི་བདེན་པ་རེད། འོན་ཀྱང་གཞིས་ལུས་མི་དམངས་ཀྱི་དཀའ་སྡུག་སྣ་མང་རང་བཞིན་ཅན་གྱི་སྲོག་ཐོག་བཙོན་འཇུག། རྡུང་རྡེག་ཚ་ནན། མི་ཆོས་ལས་འདས་པའི་མནར་གཅོད་ནམ་ཡང་སྐྱབས་ཐུབ་མེད་ལ་ད་དུང་བཀྲིན་ཚད་ལྡན་ཞིག་བསྐྱངས་ཐུབ་མེད། དེས་ན་གུང་ཁྲན་ཏང་གིས་བོད་གསར་འཛུགས་སྐྲུན་དང་ཞིང་བྲན་ཡན་ལག་ཁྲི་ཚོ་བརྒྱ་ལ་བཅིངས་གྲོལ་བཏང་རབས་ཀྱིས་འུར་སྒྲོགས་དང་། བཙན་བྱོལ་བའི་དད་པ་ལོག་སྤྱོད་ཀྱི་སྲིད་དོན་ཚོང་པའི་ཤོག་ཁག་གིས་གཞིས་བྱེས་གཉིས་ལ་བཀའ་དྲིན་བསམ་གྱིས་མི་ཁྱབ་པ་བསྐྱང་རབས་ཀྱིས་འུར་སྒྲོགས་གཉིས་སྒོ་ཀུན་ནས་མཚུངས་འདུག།
ཨེ་་་བེ་རེ་གདོང་ནག་རྒྱལ་བཙོང་བ། དེང་རབས་༢༡པའི་ནང་དུ་ཡང་བྲན་གཡོག་ལ་གཉའ་གནོན་སྤྲད་ཀྱི་མཚམས་འཇོག་གི་མིན་པེ། ཕ་མས་ཚེ་སྟོད་དགའ་ལྡན་ཕོ་བྲང་གི་བྲན་གཡོག་བྱས། ཚེ་སྨད་གུན་ཁྲན་ཏང་གི་བྲན་གཡོག་བྱས་ནས་མུ་གེ་ཤི ཁོང་གྷནིས་ཀྱི་བུ་བླ་རྒན་ཞིག་ལྷག་ཡོད་པ་དེ་ལ་ཡང་གཉའ་གནོན་སྤྲད་རྩིས་བྱེད་མ་འོང་ཨ།
ཁྱོད་རང་གི་ལག་པ་གཟར་རོ་དེའི་ནང་དུ་ཡོད་པའི་སྨྱུག་གུ་དེ་ཡང་བྲན་གཡོག་སྨྱུག་གུ་ཡིན་པར་ཤེས་པར་བྱོས་་་་ཨ བྲན་གཡོག་སྨྱུག་གུ་དེས་སྒེར་གཅོད་པའི་རྐུབ་གཡོག་རྒྱུགས་ནས་ཉམ་ཆུང་ལ་བརྙས་བཅོས་བྱེད་ཀྱི་ཡོད་པ་འདི་འཛམ་གླིང་སྨྱུག་འཛིན་པའི་ཁྲོད་ཀྱི་གད་རྙིགས་ཡིན་པར་ཤེས་པ་བྱོས་་་ཨ