ཏཱ་ན་བློ་བཟང་།
བ་སྤུ་སྔོན་མོར་ཆུ་ཀླུང་འཁོར་བས་ཉི་འོད་དེ་ཡང་ཕྱོགས་བཞིར་བརྡལ།།
སྤྲིན་དཀར་ཉག་མས་རླུང་བུ་བསུ་བ་མགོ་སྐྲའི་ལྕང་ལོ་གར་ལ་ཆས།།
རང་སེམས་འཁྲིགས་པའི་སྤུ་ཉག་དེས་ཀྱང་གནམ་ས་གཉིས་ཀ་གས་ཉམས་བྱས།།
བརྩེ་བའི་མགོན་ཁྱེད་དྲག་ཆར་ཁྲོད་ཀྱི་གློག་ཞགས་འཁྱུག་པའི་ཚ་ཚ་ཡིན།།
མེ་ལོང་ཡིན་ལ་ངོ་གདོང་ཡིན་པའི་དཔའ་བོའི་ལག་པ་སྟོང་བར་ལུས།།
མེ་ཆུ་འཐབ་པའི་རླུང་བུའི་དཀྱིལ་འཁོར་ནམ་མཁའི་དབྱིངས་སུ་འཐིམ་ནས་ཐལ།།
ལྷ་མོས་འོད་ཀྱི་ལན་བུ་བསླེས་བས་སྒོ་ཆེན་རེ་དང་ཏིང་འཛིན་རེ།།
རིགས་དྲུག་རྫིང་བུ་གཅིག་ཏུ་འཁྱིལ་བས་འཇའ་ཚོན་ཞོགས་པའི་རི་མོ་བྲིས།།
ལམ་ཆེན་ངོས་སུ་རླངས་འཁོར་འཚུབ་པས་རྡུལ་གྱིས་འཇིག་རྟེན་གཡོགས་པར་བྱས།།
སྙན་པོའི་གཞས་ཀྱིས་རི་ལུང་གཤེགས་པ་རི་གསུམ་རྩེ་ཡི་སྨུག་པར་འདྲ།།
དལ་བུར་བབས་པའི་དུས་ཀྱི་ཟིང་ཆ་པདྨའི་ཚལ་གྱི་བང་བ་བཞིན།།
ཉི་རྡུལ་གཅིག་གི་ནུས་མཐུ་དེ་ཡང་རྣོ་ལྕགས་བཞུས་པའི་ཆུ་བོ་ཡིན།།
སེམས་པའི་ནད་ཀྱི་ཐིགས་སྐུད་སྐྱ་བོ་བར་མཚམས་མེད་པར་བརྡུངས་བཞིན་ཡོད།།
བརྩེ་བ་ལྗང་ཁུའི་མིག་ཆུ་རྡོག་ཅིག་ལམ་ཆེན་འདི་རུ་བྲུག་བཞིན་ཡོད།།
རྒྱང་རིང་མཚམས་ཀྱི་སེམས་པ་རྡོག་པོ་ན་བུན་ཁྲོད་ཀྱི་གླུ་སྐད་ཡིན།།
ལོ་གསུམ་ལོ་བཞིའི་སྒེའུ་ཁུང་བརྩེགས་པ་ཟླ་འོད་ངུས་པའི་མིག་ཆུ་འདྲ།།
style=”text-align: center;”>༢༡༤༢ ༧ ༢༢ལ་བྲིས།