གཞུང་བ་ཚེ་དབང་བསོད་ནམས།
བཙན་བྱོལ་བོད་མིའི་བཅའ་ཁྲིམས་ལ་འགན་འཁུར་ནས་སྲིད་སྐྱོང་དང་སྤྱི་འཐུས་ཀྱི་འོས་མི་ལ་ལང་མཁན་ཡོད་ན་དགའ་བསུ་ཡོད་ལ། བཅའ་སྒྲིག་དང་འགལ་ནས་སྲིད་སྤྱིའི་འོས་མི་ལ་ལང་མཁན་ཡོད་ན་ངོ་རྒོལ་ཡོད།
དེང་སྐབས་བཙན་བྱོལ་སྤྱི་ཚོགས་ཆུང་ཆུང་འདིའི་ནང་སྲིད་སྐྱོང་དང་སྤྱི་འཐུས་ཀྱི་འོས་བསྡུའི་ལས་རིམ་ནང་མཐོ་དམའ་བར་གསུམ་བྲེལ་ཟིང་ལངས་ནས་ཞི་བའི་མི་མང་གི་མདུན་དུ་བཅའ་སྒྲིག་སྣང་མེད་དུ་བཞག་ནས་ཁ་དམག་དང་། སྟོང་གཏམ་ཆབ་སྲིད་ཀྱི་འཁོར་ལོ་བསྐོར་ནས་བཅའ་ཁྲིམས་ནང་མ་གསལ་བའི་ཚིག་རང་བཙན་དང་དབུ་མ་མདུན་དུ་འཕྱར། ཆོལ་ཁ་དང་ལུང་ཚན་རྒྱབ་ཏུ་འཁྱེར་ནས་སྲིད་སྤྱིའི་འོས་འགྲན་ལ་རེ་བཞིན་པ་ནི། བཅའ་ཁྲིམས་དོན་ཚན་བཅུ་གསུམ་ནང་དུ་གསལ་བའི་བོད་ཀྱི་ཡུལ་མིའི་ལས་འགན་འགྲུབ་ཡོད་མེད་ནི་བཅའ་ཁྲིམས་ནང་བོད་དོན་བདེན་མཐའ་གསལ་ཐབས་ལས་རང་བཙན་དང་དབུ་མ་གང་ཡང་གསལ་མེད་ལ་ཆོལ་ཁ་དང་ལུང་ཚན་ཚོགས་སྐྱིད་སོགས་ནས་སྲིད་སྤྱིའི་འོས་མི་འདོན་ཆོག་པའི་ཆ་རྐྱེན་ཡང་གསལ་མེད་ན། དབུས་ས་གཉིས་ཀྱི་འོས་བསྡུའི་ལས་བྱེད་ནས་བཅའ་སྒྲིག་དང་འབྲེལ་བའི་གནད་དོན་འདི་དག་ལ་ཁྲིམས་མཐུན་བྱུང་ཡོད་མེད་ཐོག་ཞིབ་འཇུག་ནན་པོ་གནང་དགོས་པ་ནི་མང་གཙོ་དང་ཁྲིམས་ཀྱི་དབང་བསྒྱུར་ཟེར་བའི་ཁ་གཡང་ཆེན་པོའི་གཏམ་དེ་དོན་ལ་གནས་དགོས་ཀྱི་མེད་པ་ཡིན་ནམ།
བཅའ་ཁྲིམས་ནོར་བུ་མ་ནོར་ལམ་སྟོན་ལ།།
བརྩི་བཀུར་དགོས་པ་མང་གཙོའི་ཁྲིམས་ཀྱིས་བསྟན།།
བཅའ་སྒྲིག་འགལ་ན་ཉེས་པའི་རྒྱུ་ལ་སོང་།།
ཉེས་པ་ཅན་ལ་ཉེས་འགེལ་ཁྲིམས་ཀྱིས་བསྟན།།
མཁས་དབང་གཞུང་པ་ལགས། སྐྱིད་སྡུག་ཁག་གིས་འོས་བསྡུ་ཡོང་ཐེངས་རེ་རེར་འོས་མི་འདོན་བཞིན་པས། ཁྱེད་རང་ག་བ་ནས་གཉིད་ལ་ཤོར་བ་ཡིན་ནམ།
དེང་སྐབས་འགྱིག་གི་མི་དེ་ཚོའི་སྙིང་ལ་ཚ་ཤར་རྒྱག་གི་ཡོད་པ་འདྲ།