རེ་བ་ཚང་མ་བསྒྲུབ་དགོས་པའི་རེ་བ་མ་བྱེད། དེའང་དམངས་གཙོ་མ་རེད།

——-གསལ་ལེ་རྒྱལ།

 
ཆོས་ལུགས་པ་འགའ་དམངས་གཙོ་ཞེས་པའི་མིང་ཚིག་ཅིག་གི་རྔ་མར་འཐམ་ནས་སྲིད་སྐྱོང་དང་གྲོས་ཚོགས་ཀྱི་ཚོགས་གཙོ་གཉིས་ཀའི་མདུན་ན་ངུ་གིན་འདུག བློ་ཕམ་སོང་ཟེར། རེ་ཐག་ཆད་སོང་ཟེར། ལྷ་སའི་སྐད་ལྟར་བཤད་ན་ང་ནི་དཔེ་ཧང་སངས་སོང་།
རྩ་ཁྲིམས་དང་བཅའ་ཁྲིམས་ནི་སྲིང་སྐྱོང་དང་གྲོས་ཚོགས་ཀྱི་ཚོགས་གཙོ་གང་རུང་ནས་ཐག་གཅོད་བྱེད་ཐུབ་པ་ཞིག་མ་རེད། གལ་ཏེ་དེ་ལྟར་བྱས་པའི་དབང་དུ་བཏང་ན་སྐྱོན་འགའ་ཡོང་གི་རེད།

གཅིག དེ་ནི་དམངས་གཙོའི་འགྲོ་སྟངས་ཤིག་མ་ཡིན་པར་དབང་འཛིན་ལམ་ལུགས་པའི་འགྲོ་སྟངས་ཆགས་ཀྱི་རེད། དཔེར་ན་ང་ཚོས་དགག་བཞིན་པའི་རྒྱ་ནག་གི་ཆབ་སྲིད་ལམ་ལུགས་ལྟ་བུ་རེད། དམངས་གཙོའི་འགྲོ་སྟངས་ལྟར་བྱས་ན་ཁོ་གཉིས་ལ་འདིའི་དབང་ཚད་མེད།

གཉིས། སྤྱི་འཐུས་ཤིག་སྲིད་སྐྱོང་དང་གྲོས་ཚོགས་ཀྱི་ཚོགས་གཙོ་གང་རུང་གིས་འདེམས་ཆོག་པའི་དབང་དུ་བཏང་ནའང་དེ་ནི་མི་གང་དེས་ཐད་བསྐོས་སྤྱི་འཐུས་ཆགས་ཀྱི་ཡོད་པ་ལས། ཆོས་བརྒྱུད་དང་ཆོལ་ཁ་གང་རུང་གི་སྤྱི་འཐུས་ཆགས་ཀྱི་མ་རེད། དེ་བས་སྲིང་སྐྱོང་དང་ཚོགས་གཙོ་ལ་བློ་ཕམ་ཚུལ་བཤད་ནས་ཡོང་རྒྱུ་ཅི་ཡང་མེད། དེས་ན་གནད་དོན་དེ་སུ་ལ་བཤད་དགོས། གནད་དོན་དེ་སུ་ཡིས་ཐག་གཅོད་བྱེད་ཐུབ།

གནད་དོན་དེ་ནི་མི་དམངས་ཀྱིས་ཐག་གཅོད་བྱེད་ཐུབ་པ་ཞིག་དང་མི་དམངས་ཀྱིས་ཐག་གཅོད་བྱེད་དགོས་པ་ཞིག་རེད། དེའང་མི་རེ་རེ་ལ་སྐད་ཆ་དྲིས་ནས་ཐག་གཅོད་བྱེད་དགོས་པ་ཞིག་མ་ཡིན་པར། མི་རེ་རེ་ལ་རང་རང་གི་ཚབ་བྱེད་ཐུབ་པའི་མི་སྣ་རེ་གྲོས་ཚོགས་ར་བའི་ནང་ན་ཡོད་པ་དེས་ཐག་གཅོད་བྱེད་དགོས་པ་ཞིག་རེད། རང་གི་ཚབ་མཚོན་མི་སྣའམ་རང་གི་སྤྱི་འཐུས་དེས་ཐག་གཅོད་གང་བྱས་པར་རང་གིས་ངོས་ལེན་མ་བྱས་ན་རང་གིས་རང་ལ་ངོས་ལེན་མ་བྱས་པ་དང་གཅིག་པ་རེད། བློ་ཕམ་ནའང་རང་ཉིད་ལ་བློ་ཕམ་པ་རེད་ལ། རེ་ཐག་ཆད་ནའང་རང་ཉིད་ལ་རེ་ཐག་ཆད་པ་རེད།

འདི་ནི་དམངས་གཙོའི་འགྲོ་སྟངས་རེད། དམངས་གཙོ་དགོས་ཟེར་མཁན་དག་དམངས་གཙོའི་ལམ་ནས་ཕམ་ན་འགྲོ་ས་གཞན་ཡོད་པ་མ་རེད། ཡིན་ནའང་ག་ཟི་བ་དང་ར་བཟི་བ་སོགས་མི་ཁ་ཤས་ཀྱིས་ཐག་གཅོད་ཐུབ་པ་ཞིག་ཀྱང་མ་རེད། ཧེ་ཧེ། རེ་བ་ཚང་མ་བསྒྲུབ་དགོས་པའི་རེ་བ་མ་བྱེད། དེའང་དམངས་གཙོ་མ་རེད།

༡༨/༠༩/༢༠༡༥ ལ་ཕ་རེ་སི་ནས།