འཇམ་གཅེས།
དེང་སྐབས་འོས་བསྡུ་དང་འབྲེལ་བའི་བསམ་ཚུལ་གླེང་བའི་སྐབས་སུ། འགའ་ཤས་ཀྱིས་དད་པ་དམ་ཚིག་དང་འབྲེལ་བའི་སྐད་ཆ་བཤད་མི་ཆོག་སྟེ་མང་གཙོའི་རང་དབང་ལ་ཕོག་ཐུག་བཏང་བ་ཡིན་ཚུལ་དང་། ལྷག་པར་དུ་༸གོང་ས་མཆོག་གི་མཚན་བེད་སྤྱོད་བཏང་ན་མི་འགྲིག་སྟེ་ཆོས་དང་ཆབ་སྲིད་སོ་སོ་ནས་ཡིན་རབས་ཟེར། ངས་དེ་རིང་རྒྱས་བཤད་མང་པོ་མི་དགོས་པར་ཐད་ཀར་བརྗོད་གཞི་དེ་གཉིས་དང་འབྲེལ་ནས་གླེང་འདོད་པ་ནི་ཅིའི་ཕྱིར་དེ་དག་གིས་མང་གཙོའི་རང་དབང་ལ་ཕོག་ཐུག་འགྲོ་མིན་སོགས་ཡིན།
ཁྱེད་ཅག་གིས་ནུས་པས་གང་ལྕོགས་ཀྱིས་དུས་ཀུན་ཏུ་༸རྒྱལ་བའི་བཀའ་དྲིན་ལོག་འཇལ་གྱི་ཐོག་ནས་གཞི་མེད་པའི་སྒྲོ་སྐུར་ཅི་རིགས་པ་བྱས་དང་བྱེད་བཞིན་པ་དེ་དག་གིས་མང་གཙོའི་རང་དབང་ལ་ཕོག་ཐུག་འགྲོ་གི་མེད་ན། དད་པ་དམ་ཚིག་དང་འབྲེལ་བའི་སྨྲ་བརྗོད་དང་། ༸གོང་ས་མཆོག་གི་མཚན་བེད་སྤྱོད་བྱེད་པ་དེ་ཡང་སྐབས་དུས་སོ་སོར་སྐྱེ་བོ་མི་རེ་ངོ་རེ་ལ་མང་གཙོས་སྤྲད་པའི་ཁེ་ཕན་དང་། བདག་དབང་། འོས་འགན། སྨྲ་བརྗོད་རང་དབང་སོགས་ཅིའི་ཕྱིར་མིན།
ལྷག་པར་དུ་ཁྱེད་ཅག་གིས་འདོད་མོས་ལྟར་སྐབས་དུས་གང་བྱུང་ལ་༸གོང་ས་མཆོག་ལ་ཟུར་ཟ་དང་གཞི་མེད་པའི་སྒྲོ་སྐུར་གང་འདོད་ཞུས་ཆོག་པ་དང་། ༸གོང་ས་མཆོག་ལ་དད་པ་དང་ཡིད་ཆེས་ཡོད་མཁན་དག་གིས་མིག་མཐོང་ལག་ཟིན་གྱིས་ཁོང་གི་བཀའ་དྲིན་དང་མཛད་རྗེས་དག་ལ་རྒྱབ་སྐྱོར་གྱི་ཕྱིར་དུ། ཁོང་ཉིད་ཀྱི་མཛད་འཕྲིན་དང་མཚན་སྙན་ལ་སྙིང་ན་མཁན་དག་གི་སྣ་ཁུང་ཅིའི་ཕྱིར་བརྡུང་མི་ཆོག་པའི་གཏན་ཚིགས་ཅི་ཞིག་ཡོད་དམ།
དངོས་ཡོད་གཞིར་བཅོལ་ནས་བདེན་གཏམ་སྨྲ་བའི་སྐབས་སུ་ཁྱེད་ཚོའི་ཁ་ལ་རང་བཞིན་གྱིས་རྡོ་རྗེའི་རྒྱ་གྲམ་རེ་ཐེབས་འགྲོ་བ་ནི་བདེན་རྫུན་གྱི་གནས་ལུགས་དང་། རྒྱུ་འབྲས་རྟེན་འབྲེལ་གྱི་ཆོས་ཉིད་ལས་མ་འདས་པས་སྡུག་སྐད་དག་ལ་གཟུར་གནས་སུ་ཞིག་གིས་ཁྱེད་ཚོ་ལ་བདེན་ཁ་སྦྱིན།
ལར་ནས་བོད་མིའི་རྩ་དོན་འདི་བཞིན་ཆོས་ལུགས་དང་ཆབ་སྲིད་གཉིས་ཀ་ལ་འབྲེལ་བ་ཡོད་པ་ཡིན་སྟབས་ཕྱོགས་རིས་དང་ཕྲག་དོག་ལས་ཅི་ཡང་མི་ཤེས་མཁན་གྱི་མི་ལྡོམ་དང་། གྲྭ་ལྡོམ། གྲྭ་གཟུགས་དག་གི་བློ་ལ་འཐད་མིན་ཇི་ལྟར་ཡང་དུས་ནམ་ཡང་གླེང་དགོས་ངེས་རེད་ལ་ནམ་ཡང་མཚམས་འཇོག་མི་སྲིད།
དད་པ་ལོག་སྤྱོད་པ་ཟེར་བའི་སྐད་ངན་དེ་ལེགས་བཤད་དུ་རློམ་ནས་རི་བོང་ཅལ་རྗེས་སུ་རྒྱུག་བཞིན་པའི་སྐབས་འཚོལ་རིང་ལུགས་པ་ཉུང་ཤས་དང་། དོལ་ཚོགས་ཀྱིས་མཚོན་པའི་མི་ལྡོམ་ཉུང་ཤས་ལས། གཞིས་བྱེས་བོད་མིའི་བརྒྱ་ཆ་དགུ་བཅུ་གོ་དགུ་ལྷག་ཙམ་གྱིས་༸གོང་ས་མཆོག་ལ་ཡིད་ཆེས་དང་དད་པ་ཡོད་པ་ནི་ས་རིས་ཐང་གསལ་ཡིན་པ་ལྡོམ་པོ་ཁྱོད་ཚོས་ངོ་ཤེས་པའི་སྒོ་ནས་དད་ལྡན་མང་ཚོགས་ཀྱི་ཆོས་དད་རང་དབང་དང་། སྨྲ་བརྗོད་རང་དབང་། མང་གཙོའི་ཁེ་དབང་། བཀའ་དྲིན་ངོ་ཤེས་ཀྱི་བཟང་སྤྱོད་ལ་ཕོག་ཐུག་བཏང་དང་གཏོང་བཞིན་པ་དག་མཚམས་འཇོག་གྱིས་ཤིག
ཁྱེད་ཚོས་༸གོང་ས་མཆོག་ལ་ཟུར་ཟ་དང་། རྒྱལ་བཙོང་བ་འབོད་མཁན་ལ་མཐེ་བོང་བསྒྲེངས་ནས་༸གོང་ས་མཆོག་དང་། ཁོང་ཉིད་ཀྱི་རྗེས་འཇུག་པ་དག་ལ་རང་སྣང་གང་ཤར་གྱི་ཐལ་ཚིག་སྒྲོག་བཞིན་པ་དེ་དག་མང་གཙོའི་རང་དབང་དང་འགལ་ཟླ་ཆགས་ཀྱི་མེད་ན། ཅིའི་ཕྱིར་གཅིག་ཤོས་ལ་འགལ་ཟླ་ཆགས་ཀྱི་ཡོད་དམ།
གཞན་ཡང་ཉེ་ཆར་དགོན་སྡེ་དང་སློབ་གྲྭ་ཁག་མང་པོས་ཀླུ་བྱམས་ཀྱི་གཏམ་བཤད་ལ་མོས་མཐུན་མ་བྱས་པ་དེ་མང་གཙོ་དང་འགལ་བ་ཡིན་ཞེས་འུར་རྒྱག་གིན་འདུག་པས། ཡང་ན་བོད་མི་མང་སྤྱི་འཐུས་ལྷན་ཚོགས་དང་། རྒྱུན་ལས་ཀྱིས་ཐག་གཅོད་ཡོངས་རྫོགས་མང་གཙོ་དང་འགལ་བར་བརྗོད་དགོས། ཅིའི་ཕྱིར་ཞེན། ཁོང་ཚོས་གནད་དོན་མང་པོ་ཞིག་ལ་མང་མོས་ཀྱིས་ཐག་བཅད་པ་ལས་སྤྱི་མོས་ཡོང་གི་མེད་པས་སོ།།
དེ་བཞིན་འཛིན་སྐྱོང་བཀའ་ཤག་གི་ལྷན་ཁང་སོ་སོའི་བཀའ་བློན་ཚོས་ཀྱང་རང་ཉིད་ཀྱི་གོ་གནས་ལ་དཔག་པའི་དབང་ཚད་ཀྱི་ལམ་ནས་གནད་དོན་མང་པོ་ཞིག་ཐག་གཅོད་གནང་གི་ཡོད་པས་དེ་དག་ཐམས་ཅད་བོད་མི་ཡོངས་རྫོགས་ཀྱི་མངོན་འདོད་དང་མཐུན་པ་ཡིན་ནམ།
མ་གཞི་ནི་ཁྱེད་ཅག་གིས་མང་གཙོ་ཟེར་བ་དེ་གང་ཞིག་ལ་ངོས་འཛིན་གྱི་ཡོད་དམ། མི་མང་གིས་འོས་འདེམས་བྱས་པའི་མི་མང་གིས་འཐུས་མིས་ཐག་གཅོད་བྱེད་པའི་ལུགས་སྲོལ་དེ་དག་ཁྱེད་ཚོས་འདོད་པའི་མང་གཙོའི་ལམ་ལུགས་ནང་དུ་མེད་པ་ཡིན་ནམ།
ཡང་ན་འཛམ་གླིང་མང་གཙོའི་རྒྱལ་ཁབ་ཚད་ལྡན་གང་གི་མང་གཙོའི་ཁྲིམས་ལུགས་སམ་ཁེ་དབང་སོགས་དང་འགལ་གྱི་ཡོད། མང་གཙོ་ཟེར་བའི་ལམ་ལུགས་དེ་བཞིན་མང་ཉུང་གཉིས་དབྱེ་བའི་ནང་ནས་མང་ཤོས་ཀྱི་འདོད་མོས་དང་མཐུན་དགོས་པ་དེ་ཤེས་ཀྱི་ཡོད་དམ།
གལ་སྲིད་མང་གཙོའི་ཁེ་དབང་ལོངས་སུ་སྤྱོད་དགོས་ཚེ་ཆབ་འབངས་ཡོངས་རྫོགས་འདུ་འཛོམས་ཀྱིས་ཐག་གཅོད་དགོས་པ་ལས། སྐྱེ་བོ་སྒེར་དང་། སྒྲིག་འཛུགས། ལས་ཀྱི་སྣེ་མོ་བ། ཚོགས་སྡེ་བྱེ་བྲག་པ་གང་ལའང་ཐག་གཅོད་བྱ་རྒྱུའི་དབང་ཚད་མེད་པ་ཡིན་ནམ།
འདི་དག་ནི་དྲི་བའི་ཚུལ་དུ་བརྡ་ལན་རེ་ཡང་ཡིན་པས་ཁྱེད་ཅག་གི་ངོ་གདོང་ལྕགས་འབག་འདྲ་མིན་དེ་དག་མར་ཙམ་ཕུད་ནས་གཟུར་གནས་ཀྱི་བློ་གྲོས་ལ་འཇུག་པ་རེ་ཨེ་ནུས་བརྩོན་དང་དགེ་མཚན་ལོས་ཡོད། མ་གཞི་ནི་བོང་རྣ་དང་གསེར་གྱི་དཔེ་ལྟར་གྱུར་སོང་མོད་བདེན་གཏམ་ནི་ནམ་ཡང་བདེན་གཏམ་རང་ཡིན་ནོ།། །།