གཞུང་པ་ཚེ་དབང་བསོད་ནམས།
ཟླ་འདིའི་ཚེས་བཅོ་བརྒྱད་ཉིན་སྲིད་སྐྱོང་དང་སྤྱི་འཐུས་ཀྱི་འོས་བསྡུའི་ཉིན་མོ་ལ་སོང་ཙང་། དེང་སྐབས་བཙན་བྱོལ་སྤྱི་ཚོགས་ནང་ཁུངས་གཏུག་ས་མེད་པའི་གཏམ་འཆལ་མང་པོ་དྲ་ལམ་དང་ངོ་དེབ། སྐད་འཕྲིན་སོགས་ནང་སྤེལ་དང་སྤེལ་བཞིན་པ་དེ་དག་ལ་ཞིབ་ཏུ་དཔྱོད་སྐབས། ལྷག་བསམ་གྱི་འགན་ཁུར་མེད་པ་ནི་མིང་རྫུན་སྤྱད་པ་ནས་ངོ་འཕྲོད་ཐུབ་པ་དང་བདེན་དཔང་ཁུངས་སྐྱེལ་ཡོད་ན་ཁྲིམས་ཁང་ལ་གཏུག་དགོས་པ་ལས། བཙན་བྱོལ་སྤྱི་ཚོགས་ཀྱི་གཏན་ལྷིང་ལ་གནོད་པའི་དཀྲོག་གཏམ་དཀྲུགས་ཤིང་སྤེལ་ཐུབ་པ་ཙམ་གྱིས་རང་གི་ཕྱོགས་གཏོགས་ལ་འོས་ཤོག་ཐོབ་རེ་གནང་མཁན་ཡོད་ན། ཆབ་སྲིད་ཀྱི་རྩིས་ལོག་ངོ་མ་དེ་ཡིན་པ་བཅས་རང་ལོ་བཅོ་བརྒྱད་ཡན་གྱི་བློ་ལྡན་རྣམས་ནས་ཆོལ་ཁ་དང་ལུང་ཚན་ཤོག་སྒྲིག་ཅན་གྱི་ཚོགས་སྐྱིད་ཁག་གི་ལམ་སྟོན་འོག་ཏུ། རང་གི་མང་གཙོའི་ཁེ་དབང་དུས་ནམ་ཡང་མ་ཤོར་བ་གནང་ནས་བཙན་བྱོལ་བོད་མིའི་བཅའ་ཁྲིམས་དང་འོས་བསྡུའི་སྒྲིག་གཞི་ལ་འགན་འཁུར་ནས་མང་གཙོ་དང་རང་དབང་ཁྲིམས་ཀྱི་དབང་བསྒྱུར་འོག་སྲིད་སྐྱོང་དང་སྤྱི་འཐུས་ཀྱི་འོས་བསྡུའི་ལས་རིམ་ནང་མཉམ་ཞུགས་ཐུབ་པའི་འགན་ཁུར་ཆེ་ཙམ་བཞེས་དགོས་པའི་འབོད་སྐུལ་ཞུ།
འབོད་སྐུལ་འདི་བཞིན་བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱི་ཡུལ་མིའི་ལས་འགན་སྒྲུབ་ནས་གང་ཟག་སྒེར་གྱི་བསམ་ཚུལ་གླེང་པ་འདིས་ཀྱང་བོད་ཀྱི་མང་གཙོའི་འཕེལ་རིམ་ནང་ཕྱོགས་གཏོགས་དྲི་ངན་གྱི་ཆབ་སྲིད་རྩ་སྟོང་འགྲོ་བའི་བསྔོ་བ་མང་ཙམ་བགྱིས་ཆོག