གངས་དཀར་རྒྱལ་སྲས།
ང་ཚོས་མི་ལོ་ལྔ་བཅུ་ལྷག་གི་རིང་ལ་རང་དབང་དང་། འདྲ་མཉམ། དམངས་གཙོ། འཆམ་མཐུན་སོགས་དགོས་ཞེས་འཛམ་གླིང་ལ་སྐད་འབོད་དང་རང་རེའི་ཁ་ནས་ཀྱང་མ་ཎི་འདོན་འདོན་བྱས་དང་བྱེད་བཞིན་ཡོད་ལ། ༸གོང་ས་མཆོག་གི་བཀའ་སློབ་དང་གསུང་ཆོས་ཞེས་ཆོལ་གསུམ་དབྱེར་མེད་ཀྱིས་རྩ་ཆེན་དང་འགངས་ཆེན་དུ་བརྩི་བ་ལྟར་དུ་སྣང་མོད། གལ་ལ་ཐུག་དུས་དེ་ནི་སྟོང་བ་ཉག་ཅིག་ཡིན་ནོ། རྒྱུ་མཚན་ནི། ༸གོང་ས་མཆོག་གིས་མི་ལོ་ལྔ་བཅུའི་རིང་ལ་ཡ་རབས་སྤྱོད་བཟང་དང་ལྷག་བསམ་གཞན་ཕན། ཆིག་སྒྲིལ་དང་མཐུན་སྒྲིལ་སོགས་གསུང་གསུངས་པའི་བཀའ་སློབ་ནི་སྤྱི་འཐུས་གྲོགས་ཚོགས་སུ་ནུས་མེད་ནས་བེད་མེད་དུ་བསྒྱུར་དང་འགྱུར་བཞིན་ཡོད་ལ།
ལྷག་པར་དུ་ཁ་སང་གི་ཇོ་ནང་ཆོས་བརྒྱུད་ལ་ཆ་བཞག་ན་ཁོ་ཚོས་ཀྱང་རང་གི་ཆོས་བརྒྱུད་ཀྱི་རང་དབང་ལོངས་སྤྱོད། འདྲ་མཉམ་དང་ཁེ་དབང་ལ་ལོངས་སུ་སྤྱོད་འདོད་ཀྱིས་ཡང་དང་བསྐྱར་དུ་སྙན་ཞུ་དང་རེ་བ་ཞུས་ནའང་ཕན་འབྲས་མ་ཐོན་པས་ཨ་ཆད་འུ་ཐུག་གིས་གྲོས་ཚོགས་སྒོ་འགྲམ་དུ་ཞི་བའི་ལས་འགུལ་རྩོམ་སྐབས་ཆོལ་ཁ་དང་ཆོལ་ཁའི་བར་གྱི་རྣོ་ངར་ཅན་གྱི་ཕྱོགས་རིས་ཀྱི་བྱ་སྤྱོད་དག་མངོན་ལྐོག་གཉིས་ནས་ལྷང་ལ་བུད་ཡོང་བ་ལས་༸གོང་ས་མཆོག་གི་གསུང་ཆོས་དང་བཀའ་སློབ་སྣ་ཚོགས་ཀྱིས་དོན་དག་འདིའི་སྒང་ལ་ཕན་སོང་བསམ་པ་ཞིག་མཐོང་དུ་མེད་པས། བོད་པ་མང་པོ་ཞིག་གིས་ཇ་ཁ་ཆང་ཁ་ནས་ནམ་རྒྱུན་༸གོང་ས་མཆོག་གི་བཀའ་དྲིན་གྱིས་ཅིག་ཅིག་ཉིག་ཉིག་བྱུང་བ་རེད་དང་། ༸གོང་ས་མཆོག་གིས་ནམ་རྒྱུན་མཐུན་སྒྲིལ་དང་ལྷག་བསམ། གཞན་ཕན་སོགས་གསུངས་པའི་དྲིན་གྱིས་་སོགས་མང་བོ་གང་ས་གང་དུ་གོ་རྒྱུ་ཡོད་མོད།
དེ་རིང་གནད་འགག་ལྟ་བུའི་དོན་དག་འདིའི་སྒང་ལ་ཐོན་དུས་༸གོང་ས་མཆོག་གི་བཀའ་དྲིན་བསམ་མཁན་མེད་ལ་གསུང་ཚིག་བརྩི་མཁན་ཡང་མེད་པས་ང་ཚོ་སྟེ་བོད་པ་འདི་དག་ངོ་མ་དེང་སྐབས་ཀྱི་སྐད་ཆས་བཤད་ན་མི་གཞི་མེད་པའི་མི་རྐྱང་རྐྱང་རེད། ལྷག་པར་ཏུ་གྲོས་ཚོགས་ནང་གི་མི་དེ་དག་ལ་མཚོན་ན་དོན་དག་དང་ཉེན་ཁ་རང་ཁོ་ནའི་སྟེང་ལ་ཐོན་མེད་མོད་དེ་འདྲའི་རྔམས་སྐྲག་དང་ཚོར་ཤུགས་རྣོན་པོས་ཕྱོགས་སྲུང་བའི་ཇུས་སྣ་ཚོགས་བཤམས་པར་བྱེད་ན་གལ་ཏེ་རང་ཁོ་ནའི་སྟེང་ལ་ཐོན་པ་ཡིན་ན་དངོས་སུ་ལག་འགུལ་བ་ནི་སྨོས་མ་དགོས་ལ་༸གོང་ས་མཆོག་དང་ཁོང་གི་བཀའ་སློབ་དག་ནི་ཁོ་ཚོ་དག་ལ་མཚོན་ན་ཧ་ཅང་གི་བེད་མེད་དང་ནུས་མེད་ཤ་སྟག་ཡིན་ངེས།
གང་ལྟར་ཇོ་ནང་ཆོས་བརྒྱུད་ཀྱིས་རེ་བ་དང་འདོད་འདུན་གྱི་བྱ་འགུལ་དེ་ལ་ད་ཐེངས་དོན་རྐྱེན་མ་བྱུང་བ་ནི་ཚངས་དབྱངས་རྒྱ་མཚོའི་བཀའ་དྲིན་ཡིན་པ་འདྲ། ཁོས་སྟངས་འཛིན་བྱས་པ་བྱ་དམ་དྲག་པ་དང་ཁོ་ཚོས་ཀྱང་ཚངས་དབྱངས་རྒྱ་མཚོའི་ཁ་ལ་ཉན་པས་ཞི་རྒོལ་རབས་དང་རིམ་པ་བྱས་པའི་མཐའ་དོན་དུ་ཁོ་ཚོའི་རེ་བ་མ་འགྲུབ་ཀྱང་སྟོང་ལོག་བྱེད་མ་དགོས་པས་ཐེངས་འདིའི་བྱ་འགུལ་དེ་མི་ཆོག་རྒྱུ་མེད་གི གོ་ཐོས་ལ་དོན་དག་ཚབ་ཆེན་ཞིག་ཀྱང་བྱུང་གྲབས་བྱས་སོང་ཟེར་མོད། གང་ལྟར་མ་བྱུང་བ་ནི་ཚངས་དབྱངས་རྒྱ་མཚོའི་བཀའ་དྲིན་ཡིན་པ་འདྲ། ག་ལེར་བསམ་ན་བོད་ནང་ནས་རྒྱ་ནག་གིས་ཆོས་དད་རང་མོས་སོགས་འགྲོ་བ་མིའི་ཐོབ་ཐང་མང་བོ་ཞིག་འཕྲོག་པས་འཚོ་ཐབས་དཀའ་བ་སོགས་ལ་རྐྱེན་བྱས་ནས་རྒྱ་གར་ལ་བཙན་བྱོལ་དུ་ཡོང་བ་ཡིན་ཟེར། འདི་ནས་ཀྱང་རང་རིགས་ཀྱི་ཁྲོད་ནས་རང་དབང་དང་འདྲ་མཉམ་གྱི་ཐོབ་ཐང་དེ་མ་རེག་པ་ཡིན་ན་རྒྱ་ནག་ལ་དམིགས་བསལ་གྱིས་ངན་ཁག་དཀྲི་རྒྱུ་མི་འདུག་ག གཅིག་འདྲ་མ་རེད་དམ།
སྤྱིར་བཏང་བཤད་ན། ༸གོང་ས་ཐམས་ཅད་མཁྱེན་པ་ཁོང་གིས་ཀྱང་ཇོ་ནང་བ་ཚོར་ཁེ་དབང་དེ་ཐོབ་འོས་པར་གསུང་འདུག་པ་མ་ཟད། ས་སྐྱ་གོང་མས་ཀྱང་ཁོ་ཚོ་ལ་རྒྱབ་སྐྱོར་ཡིག་ཐོག་ནས་བྱུང་བས་འོག་གི་མི་དེ་ཚོས་ཅིའི་ཕྱིར་གོང་མ་དག་གི་ངག་ལ་མ་ཉན་པ་རེད། འདི་ནི་བསམ་བློ་རྗེས་ལུས་དང་ཕྱོགས་འཛིན་རང་ལུགས་པའི་བྱེད་སྟངས་ལས་ཅི་ཡང་མིན། གནས་ལུགས་ཀྱི་སྒང་ནས་བཤད་ན། ཕྱོགས་འཛིན་རིང་ལུགས་པའི་སྤྱི་ཚོགས་ལ་ནམ་ཡང་སྟོབས་ཤུགས་རྒྱས་མི་ཐུབ་པ་མ་ཟད། རྩོད་རྙོག་ལ་མཐའ་མེད་པས་འཐེན་འཁྱེར་དང་ཕྱོགས་རིས་ནི་སྒེར་གཞུང་གང་ཡིན་ཡང་མ་འོངས་པའི་བཀག་རྡོ་ལས་ཁེ་ཕན་ཅན་གྱི་བྱ་སྤྱོད་ཅིག་གཏན་ནས་མིན།
ད་བར་ཇོ་ནང་ཚང་གི་དགྲ་མ་དང་དགྲ་མའི་གཞུང་ཚབ་སྒོ་སར་འདི་ལྟ་བུ་ལས་འགུལ་ཞིག་བརྩམས་ཨེ་མྱོང་། ཇོ་བསྟན་འདིར་མི་ཉམས་གོང་འཕེལ་བྱེད་འདོད་ན་རྟག་བརྟན་ཕུན་ཚོགས་གླིང་གྱང་མགོ་འུག་པའི་བབ། གྱང་རྩ་ཤྭ་བའི་ལྡག་ཟེར་བ་ལྟར་བྱེད་ནས་ལྷག་འདུག་པས་དེ་དག་ལ་ཅིའི་ཕྱིར་ཉམས་གསོལ་མ་བྱས་པ་རེད། ཇོ་ནང་པ་ལ་སྙིང་སྟོབས་དང་སེམས་ཤུགས་ཡོད་ན་རྟ་ར་ན་མཐའི་གདན་ས་འཁྲུ་ན་མ་དག་པ་དེ་རྡོ་ཕུང་ཞིག་གི་རྗེས་ཤུལ་ཙམ་ལས་མེད་པ་ལྷག་འདུག་པའི་དེ་མ་མཐོང་པ་ཨེ་རེད། དེ་དག་གི་ཆེད་དུ་ད་བར་ཀྲུང་དབྱངས་སྲིད་གཞུང་ལ་སྙན་ཞུ་ག་ཚད་འབུལ་མྱོང་ངམ། མདོ་ན་ཇོ་ནང་ཚང་གི་མིང་འདི་འཁྱེར་ནས་གོ་སྐབས་མ་འཚོལ་ན་ཡག་ནི་རེད། བལ་ཡུལ་ལ་ཡོད་པའི་རྒྱ་ནག་གཞུང་ཚབ་ཁང་གི་ལས་བྱེད་ཚོ་མགྲོན་འབོད་བྱེད་ནས་ཁ་ལག་མཉམ་ཟ་མཉམ་མཐུང་བྱེད་མཁན་དེ་ཚོ་དྷ་ས་ཡོངས་ནས་གྲོས་ཚོགས་སྒོ་སར་གྱོད་གཏུགས་བྱེད་ཕོད་པའི་སྤོབས་པ་དེ་གང་ནས་རྙེད་པ་རེད་དམ།
ཁ་ཡར་འཁྱེར་མར་འཁྱེར་ཚང་མར་༸གོང་ས་མཆོག་གི་མཚན་སྨྲོས་བཞིན་པའི་ལུགས་འདི་ལེགས་མཚན་དུ་མ་མཐོང་། ༸གོང་ས་མཆོག་གི་མཚན་རྩེད་ཆས་མིན། སྡུག་ལ་ཐུག་སྐབས་ཁོང་གི་མཚན་གླེང་རྐྱང་དང་། རང་ཉིད་སྐྱིད་ས་བདེ་ས་ཞིག་ལ་ཐོན་དུས། སོ་སོས་དཀའ་བ་སྤྱད་ནས་ཡོང་རབས་བཤད་ཀྱིན་པ་སོགས་ཀྱང་མགོ་བདེ་དྲན་འཕྲུལ་གྱི་མི་གཤིས་སམ་དེང་ཡིག་འབྲི་བ་ལ་ལས་སྤྱོད་བཞིན་པའི་༼མི་གཞི་༽གཏན་ནས་མེད་པ་དག་ཡིན།
སྤྱིར་འདིར་བསམ་འཆར་མདོ་ཙམ་བཤད་ན། དཔལ་ཇོ་སྣང་བར་ཆོས་དོན་གྱི་མཛད་སྒོ་ཅི་ཡོད་ཆོས་བརྒྱུད་གཞན་དང་གཅིག་མཚུངས་འབུལ་རྒྱུའི་བཀའ་བཞེད་ཐོབ་ཀྱང་། ཡིན་ཅིག་སྤྱི་འཐུས་ལ་འཚང་དགོས་དོན། དཔལ་ཇོ་ནང་བའི་གསན་བསམ་སློབ་གཉེར་འཐུས་ཤོར་དུ་འགྲོ་བཞིན་ཡོད་དམ། ཡང་ན་མཚན་གནས་ཉམས་དམས་སུ་འགྲོ་བཞིན་ཡོད། ཕྱོགས་གཅིག་ནས་གཞོན་ལྷན་གྱིས་བོད་སྤྱི་དོན་དང་། དཔལ་ཇོ་ནང་བས་རང་ཉིད་ཆེད་དུས་གཅིག་ཏུ་ས་གནས་མི་འདྲ་ཞིང་། དགོས་འདུན་མི་གཅིག་པའི་ཟས་བཅད་ལས་འགུལ་སྤེལ་ཏེ། དགོས་འདུན་གྲུབ་མེད་ནའང་ གུང་བྲན་ཏང་ལ་དགོས་པ་དེ་བྱུང་སོང་ཨང་་བསམ་བཞིན་སྐྱོ་སྣང་དང་བློ་ཕམ་ཚད་མེད་བྱུང་།