གུང་ཐང་འབྲུག་བྷེ། (ཨོ་སི་ཁྲི་ལི་ཡ།)
___རང་ལས་གཞན་གཅེས་ཀྱི་ཆེད་དུ་གཤེགས་པའི་འདས་པོ་གང་དེར།
རྡ་ས་ལ་ཁ་བ་བབ་ཚུལ་དྲན་ན
གྲང་ངད་ཀྱིས་ཁོག་འདར་བརྒྱབ
རྡ་ས་ལ་ཆར་རླུང་གཡུག་ཚུལ་བསམ་ན
དངངས་སྐྲག་གིས་སེམས་འཚབ་བསླངས
འདི་ལྟར་དྲན་ན
རྡ་ས་ནས་ནམ་ཡང་ཁྱིམ་གཞིས་ཞིག་མི་རྙེད
ངས་ནམ་རྒྱུན་རྡ་ས་ལ་རེ་བའི་ལྟོས་ནས་ཡོད
གྲིབ་མ་བཞིན་འགྲོགས་པའི་དྲ་ངོས་ནས་ཀྱང་རྡ་སར་ཉན་གྱི་ཡོད
རྡ་ས་ན་གསོན་པོའི་རེ་བ་དང་གཤིན་པོའི་རྣམ་ཤེས་བསྡུས་ཡོད་པས
རྡ་ས་ནས་ཁུ་བྱུག་གི་གསུང་སྙན་ཞིག་བོད་ལ་གྲགས་པར་ཡང་སྒུག་ཡོད
2015.10.30ཉིན་གྱི་རྡ་སའི་མཚན་མོ་ལ་སྤྲིན་ནག་འཁྲིགས་ནས
རྡོ་ལ་རི་བོའི་མིག་ཆུ་རྡོག་ཅིག་བཀའ་ཤག་གི་ཐོག་ཁར་བཞུར
སེམས་དཔའ་ཚུལ་ཁྲིམས་མཆོག་ལྡན་གྱིས་རྡ་ས་ལ་གྱེས་ཕྱག་ཕུལ་ནས
སྙིང་ཉེ་བའི་བོད་མོ་ཞིག་གི་ཚེ་སྲོག་སྐྱོབ་ཕྱིར
རལ་གྲིའི་སོ་ཁ་ནས་གློ་བུར་ངང་ཁེར་རྐྱང་དུ་ལམ་ལ་ཆས
ལག་པས་མི་སྙོབས་པའི་རྡ་ས སེམས་ཀྱིས་མི་རིག་པའི་རྡ་ས
ང་ཚོ་ནམ་ཡང ཁྱེད་ཀྱི་དུད་ཁྲོད་མི་ཆགས་པར་སྨོན
གུང་ཐང་ཚང་གི་སྨྱུག་རྩེ་ལ་འཁྲུངས་པའི་ཧང་ངེ་ཚང་གི་དཔའ་རྒོད་ལ་མྱ་ངན་ཞུ། གཞན་ཕན་ནི་བཤད་ཀྱི་ཞིག་མ་ཡིན་པར་སྒྲུབ་རྒྱུ་ཞིག་ཡིན་པ་མི་བསད་དོན་རྐྱེན་འདི་ལས་ཀྱང་ར་འཕྲོད་ཡོད་ལ། དོན་རྐྱེན་འདི་བརྒྱུད་ནས་འབྱུང་འགྱུར་ངྷ་རམ་ས་ལ་དེ་བཞིན་དུས་མིན་འཆི་བས་གཙེས་ས་ཞིག་ཏུ་མི་འགྱུར་བར་འབད་འོས།
འདི་ལོ་བོད་ནང་གི་ཁ་བ་སྙིང་ལྕགས་ཀྱི་བླ་མེད་སྙིང་སྟོབས་དང་འདས་པོ་འདི་གཉིས་ཀྱི་བར་ལ་མཚུངས་ཆོས་ཁ་ཤས་ཡོད་པར་འདུག་སྙམ། གནད་འདི་ནི་ཡུལ་གྱར་བའི་ལས་དབང་དང་ཧ་ཅང་འབྲེལ་བ་ཡོད་རྐྱེན་གླེང་སློང་དགོས་པ་སྨྲོས་ཅི་དགོས།
ད་དུང་ང་ཚོས་མ་གཟབ་ན་བོད་མི་དཀྱུས་མ་དག་ལ་འདི་འདྲའི་ཆག་སྒོ་ཡོང་བའི་སྔོན་བརྡ་བཏང་བ་ཞིག་རེད་དོ།།