བྱ་མདོ་སྐལ་རྒྱམ།
༼མཚན་མོར་ཉན་པ༽
མཚན་མོའི་སྟོངས་འཇག་ལ་གཟབ་ནན་གྱིས་ཉན་ན
རང་ཉིད་ནི་དོང་ཞབས་མེད་ཅིག་ན་མེད་དམ་སྙམ
ཆེས་ཆེ་བའི་ལྷང་འཇག་དེ་ནི
སྐྱོ་སྨྲེང་སློང་བའི་མྱ་ངན་གྱི་རོལ་མོ་ཞིག་སྟེ
ཅི་ཙམ་གཟབ་ནན་གྱིས་ཉན་ན
དེ་ལྟར་ཤུགས་ཆེན་པོས་གྲགས་འོང
ལྷང་འཇག་གི་རོལ་མོ་འདིའི་ཁྲོད་ནས
མིག་ཟུང་བཙུམ་སྟེ་རང་ཉིད་ལ་བལྟ་དུས
ང་རང་ནི་ཐ་སྙད་མང་བོ་ཞིག་གི་བྲན་གཡོགས་ཏེ
བྲེལ་ཚུལ་གྱིས་འགྲོ་སྟངས་དེ་དང་ཨུ་ཚུགས་ཀྱིས་འདུག་སྟངས་དེ་ནི
གོམས་སྲོལ་གྱི་བྱ་བཞག་ཙམ་ལས་གཞན་ཅི་ཡང་མིན
ནམ་རྒྱུན རླུང་བུ་མི་ལྡིང་སའི་གད་སྐྱིབས་དེ་ནས
རང་ཉིད་བདེ་ཐང་ཡིན་པའི་འཕྲིན་ཡིག་མང་དུ་བྲིས་ཀྱང
དོན་དམ་པས་ཉེན་ཁ་ཅི་ཡང་འགྲིམ་མེད
༢༠༡༥-༡༡-༩ མཚན་མོ།
༼འཕྲིན་ལ་སྒུག་པ།༽
མུན་པ་རུབ་ལ་ཉེ
སྟོན་རླུང་གི་གཞུག་སྒྲའི་ཁྲོད་ནས
ངས་ཐག་རིང་གི་འཕྲིན་ཡིག་ཅིག་ལ་སྒུག་ཡོད
མདང་ནུབ་ཀྱི་རྨི་ལམ་ལ་བལྟས་ན
དེ་རིང་འཕྲིན་ཡིག་ཅིག་འབྱོར་རྒྱུ་ཡིན་པ་འདྲ
ཐག་རིང་ན་མི་ཞིག་ཡོད
སེམས་པའི་ཚིལ་ལུ་ལྟ་བུའི་མི་ཞིག་ཡོད
ཁོའི་སྐད་ཆ་ལྟ་བུའི་འཛུམ་མདངས་ཀྱིས
མེ་ཏོག་གི་ཞལ་ཁ་ཕྱེ་ནུས་ལ
ཁོའི་མིག་ཆུ་ལྟ་བུའི་འཕྲིན་ཡིག་གིས
ལམ་འགྲོ་བའི་གོམ་ཁ་གློད་མྱོང
ཉིན་འདི་གར
ངས་ཁོའི་འཕྲིན་ཞིག་ལ་རེ་སྒུག་བྱེད་ཀྱིན་ཡོད
རླུང་གིས་ཁུར་བའི་ལོ་མ་དམར་བོ་ཚོའི་ཁྲོད་ན
ཅིས་ཀྱང་ང་ལ་འཕྲིན་ཞིག་ཡོད་སྙམ
༢༠༡༥-༡༠-༢༧
༼འཕྲིན་ཡིག་འབྲི་བ།༽
སྲོད་ཁའི་ཞི་འཇམ་གྱི་ཉི་རྒས་དེས
ང་ལ་དྲན་ཤིང་ཞིག་བཞག་ནས་བུད་སོང
ཁང་ཀླད་འདིར་མཐོང་ཐུབ་པ་ནི
ནགས་ཚལ་བན་བུན་དང
ཁང་བརྩེཊ་འདྲེས་མའི་མུ་མེད་ཀྱི་ཡུལ་ལྗོངས་ཤིག་རེད
དག་སྣང་ལྟ་བུའི་བརྙན་རིས་འདིས
ཚོད་ཚོད་ལ་ལྡོག་འབྲས་ཀྱི་སེམས་འགྱུ་རེ་དྲང་འོང
མ་གཞི་ད་ལྟ་ནི་སྟོན་མཇུག་སྟེ
ཡལ་ལ་ཉེ་བའི་མཛེས་སྡུག་གི་དུས་ཚིགས་ཤིག་རེད
སྐྱོ་སྨྲེང་སློང་བའི་ས་སྲོད་ཀྱི་ནམ་ཟླ་འདིས
ངས་འཕྲིན་ཡིག་རིང་བོ་ཞིག་འབྲི་དགོས་བསམ་སྟེ
སྨྱུག་གུ་མཛུབ་མོས་བཙིར་ནས་ཡུན་རིང་འགོར་ཡང
ངས་འཕྲིན་པ་གཏོང་སའི་མིང་ཡིག་ཅིག་རྙེད་མ་བྱུང
དགུན་ཁ་དྲན་དུས
ང་ལ་རང་དབང་མེད་པར་ཁོག་འདར་རེ་བྱུང
2015-10-19
སྙན་ངག་ཡག་པོ་བྲིས་འདུག
བརྩེ་དུང་གིས་ཕྱུག་པའི་སྙན་ངག་ནི་རོལ་མྱོང་གི་ནུས་པ་ཆེ་སྟབས། བརྩེ་དུང་ལ་མངོན་ལྐོག་གི་འདུ་ཤེས་དང་རྒྱང་རིང་ཐུང་མེད་པ་ཇི་བཞིན་ཁྱོད་ཀྱི་སྙན་ངག་འགུག་སྟངས་ཀྱང་དེ་ལྟར་རོ།