——གྲིབ་མ།
རྒྱུས་མེད་ཀྱང་སེམས་ཚོར་གཅིག་པའི་ཁྱོད་ནི།
གཙང་བོ་ཞིག་གི་ཕ་རོལ་ན་ཞི་བདེ་ལ་དགའ་བའི་ཕུག་རོན་དེ་ཡིན་ན།
གཙང་བོ་ནི་ཁྱེད་ཀྱི་མ་ཡུམ་ཡིན་པས་ཁྱོད་རང་སྐྱོ་མི་དགོས།
སྐྱོ་ངལ་རེས་ཀྱིས་འཁོར་བ་ནི་ཆོས་ཉིད་དུ་སྒོམས་དང་།
དཀོན་མཆོག་གིས་སྤྱན་ཟུང་ཕྱེས་ཡོད་པས།
འདས་དོན་གྱི་བདེན་ལུགས་མཐའ་དག་མེ་ལོང་གི་ངོས་སུ་ཤར་ཡོད།
གདུག་རྩུབ་ཀྱིས་དེད་པའི་མུན་ནག་གི་མཚན་མོ་དེར།
ལག་ལ་མེ་མདའ་ཐོགས་པའི་གཤེད་མ་ཞིག་གིས།
ཁྱེད་ཀྱི་སྙིང་རྩ་འདར་ཅིང་གོམ་སྟབས་འཁྱོར་དུ་བཅུག་ཡོད་པ་
ཁོ་བོས་ཚོར།
ནོར་འཁྲུལ་གང་དེས་བསྐྱེད་པའི་ནོར་འཁྲུལ་ནི་
མི་སེར་གྱི་གཤེད་མ་ཡིན་དགོས་པ་ཅི།
དཀོན་མཆོག་གིས་གཟིགས་དང་འདྲ་མཉམ་ཟེར་བ་ནི་
ཐ་སྙད་ཙམ་ཨེ་རེད།
དཀར་ནག་གོ་ལྡོག་གི་འཇིག་རྟེན་ནི་ཁྱོད་དང་ངའི་རྨི་ལམ་གྱི་
དག་ཞིང་དེ་མིན་པས།
དམར་པོ་ཁྲག་གི་གོ་ལ་ཞིག་ང་ཚོར་ཁྱོན་ནས་དགོས་མཁོ་མེད།
སང་ཉིན་གྱི་ཆེད་དུ་ཁྱོད་རང་གཏན་ནས་ངུ་མི་རུང་།
ཞི་བདེ་ལ་སྨོན་པའི་གྲོགས་པོ་ལགས།
སེམས་ཤུགས་སྐྱེད་དང་ འབོད་སྒྲ་ཞིག་དང་ལག་རྡང་ཞིག་གིས་
ཡིད་འོང་གི་སྐྱེད་ཚལ་ཞིག་སླར་ཡང་བསྐྲུན་ཆོག
རྨི་ལམ་གྱི་དར་སྐུད་རིང་མོ་ནམ་ཡང་ཆད་མི་སྲིད།
རྒྱང་རིང་གི་མི་ལགས།
ང་ནི་ཁྱོད་དང་བར་ཐག་ཆེས་རིང་བའི་མཐོ་སྒང་ཞིག་ཏུ་ཡོད་མོད།
ངས་ཡུལ་ལུང་ཆུང་ཆུང་འདིར་བརྡ་འཕྲིན་གྱི་མེ་ལོང་ལས།
ཉེས་མེད་ཀྱི་ཟུངས་ཁྲག་མཐོང་ཡོད་ལ་
ན་ཟུག་གི་འཁུན་སྒྲའང་ཐོས་ཡོད།
ངས་ནི་ཡིད་སེམས་རབ་ཏུ་གདུངས་ནས་ཁྱེད་ཅག་ལ་
མ་ཎི་ཡིག་དྲུག་ཙམ་ངག་ནས་བཟློ་བ་ལས།
ང་ཡིས་ཁྱེད་ཅག་ལ་ཅི་ཡང་བྱ་མི་ནུས་མོད།
ན་ཟུག་གི་འཕྲིན་པ་འདི་ནི་ལྷག་བསམ་གྱི་མེ་ཏོག་རྐང་གཅིག་
ཡིན་པས་ཁྱོད་ཀྱིས་བཞེས་རོགས་མཛོད།
སྙིང་ཉེ་བའི་མི་དག
མ་སྐྱོ་མ་སྡུག་རོགས།
དྲང་བདེན་གྱི་རྡོ་རིང་ཞིག་ཁྱེད་ཀྱི་གམ་དུ་ཡོད། ཕ་རེ་སི།
2015/11/15/ ཉིན་རེབ་གོང་རིག་པ་འབྱུང་བའི་གྲོང་ཁྱེར་ནས་གྲིབ་མར་འབོད་པས།