ཆབ་མདོ་ངག་ཕུན།
ངའི་སྤུན་མཆེད་བཀྲ་ཤིས་ཚེ་རིང་ལགས། དེ་རིང་ཁྱོད་ལ་ངས་མྱ་ངན་གྱི་ཚིག་ཁ་ཤས་འབྲི་བར་འདོད།
ངའི་སྤུན་མཆེད་བཀྲ་ཚེ་ལགས། ལོ་ཤས་སྔོན་ལ་གཞན་ཁ་བརྒྱུད་དེ་གཏམ་ངན་ཞིག་ཐོས་པ་ནི། ཁྱོད་ཉིད་བཀྲོངས་པ་རེད་ཟེར་བའི་གཏམ་དེ་ངའི་སེམས་ཁམས་ལ་ཇི་འདྲའི་གཟན་པ་ལ་ཨང་།
ངའི་སྤུན་མཆེད་བཀྲ་ཚེ་ལགས། གཏམ་ངན་དེ་ངའི་རྣ་བའི་བུ་གའི་ནང་བཙན་གྱིས་འཛུལ་འོང་དུས། དགུན་དུས་ལུས་སྟེང་ལ་འཁྱག་པ་བླུགས་པ་དང་ཅིས་མི་མཚུངས།
ངའི་སྤུན་མཆེད་བཀྲ་ཚེ་ལགས། དངོས་གནས་དེ་འདྲའི་གཏམ་ངན་ཞིག་ཐོས་འོང་བསམ་པ་བློར་འཁོར་མ་མྱོང་། སྐབས་དེར་སེམས་གཏིང་ལ་ན་ཟུག་གིས་དབུགས་རིང་ཞིག་ཀྱང་དབང་མེད་ཤོར་ཐལ།
ངའི་སྤུན་མཆེད་བཀྲ་ཚེ་ལགས། མཚམས་རེ་ཁྱོད་ཉིད་དྲན་ཐེངས་རེར་མིག་ནང་མིག་ཆུ་འཁོར་ཡོང་གིན། འོན་ཀྱང་རང་ཉིད་ཀྱིས་རང་ཉིད་ལ་སེམས་གསོ་བྱེད་པ་ལས་གཞན་ཐབས་ཤེས་ཅི།
ངའི་སྤུན་མཆེད་བཀྲ་ཚེ་ལགས། ངེད་གཉིས་ཕ་ཡུལ་གྱི་རྐང་ལམ་ཀྱག་ཀྱོག་དང་། ཕ་ཡུལ་གྱི་ཡུལ་ཆུ་སྔོན་མོ། གངས་རི་དང་རྫ་སྤང་། མདོར་ན། ཕ་ཡུལ་གྱི་རི་བོ་དང་རི་གཤོངས་ལ་མཉམ་དུ་ཕྱིན་པ་ནི་གྲངས་ཀྱིས་མི་ལང་།
ངའི་སྤུན་མཆེད་བཀྲ་ཚེ་ལགས། ཁྱེད་ནི་ཕ་མར་གུས་བཀུར་ཆེ་ལ། དགེ་སྡིག་གི་བླང་དོར་གཅེས་སུ་འཛིན། གྲོགས་ཕན་ཚུན་ལ་ཧ་ཅང་མཐུན་ལམ་ཟབ་ཅིང་། ཕ་མས་གང་གསུངས་རྡོ་ལ་རི་མོ་བྲིས་པ་ལྟར་སེམས་སུ་འཛིན་མཁན་ཞིག་ཡིན་པར་གྲོང་མི་ཚོས་ངོས་འཛིན་བྱེད།
ངའི་སྤུན་མཆེད་བཀྲ་ཚེ་ལགས། ཁྱེད་ནི་ལས་ལ་ཧུར་བརྩོན་ཆེ་ལ། གྲོང་པ་ཁྱིམ་མཚེས་བར་མཐུན་ལམ་དེ་ལས་ཀྱང་ཟབ། ཁྱོད་དེ་འདྲ་བྱས་ཏེ་གྲོངས་ཀྱི་རེད་སྙམ་པ་སེམས་ནང་དྲན་མ་མྱོང་། དངོས་གནས་གཏན་ནས་དྲན་མ་མྱོང་། འོན་ཀྱང་ད་ནི་སེམས་སྡུག་བྱས་ཀྱང་ཅི་ཞིག་ཕན། ཕ་ཡུལ་གྱི་ཕ་མ་དང་སྤུན་མཆེད་ཚོ། གཏན་ནས་མི་ཕན། ལས་དབང་ལ་གཟུར་ཐབས་ཞིག་ག་ལ་ཡོད།
ངའི་སྤུན་མཆེད་བཀྲ་ཚེ་ལགས། ཁྱེད་ནི་ངག་སྟབས་སྙན་ལ། དེ་ལས་ཀྱང་ཞབས་བྲོ་དང་ཁ་མཚར་ལ་སྤྲོ་སྣང་ལྡན། ཁྱོད་ནི་རྟག་ཏུ་འཛུམ་མདངས་ཀྱིས་ཁེངས་ཞིང་མི་རྣམས་ལའང་སྤྲོ་སྣང་སྟེར།
ངའི་སྤུན་མཆེད་བཀྲ་ཚེ་ལགས། ཁྱོད་ཀྱི་གདོང་དབྱིབས་ཡིད་ལ་འཁོར་ཐེངས་རེར་གཉིད་ཀྱང་ཡག་པོ་ཞིག་མི་ཁུག་གི ། ལོ་ཆུང་དར་མའི་སྐབས་གཞན་གྱི་ལག་འོག་ལ་གྲོངས་པ་ནི་ཇི་འདྲའི་བློ་ཕམ་པ་ལ་ཨང་།
འོན་ཀྱང་གོང་ཞུས་ལྟར་ལས་དབང་ལ་ཟློག་ཐབས་ཅི་ཞིག་ཡོད།
ངའི་སྤུན་མཆེད་བཀྲ་ཚེ་ལགས། ཁྱེད་མཉམ་དགུན་ཁའི་ལུང་པའི་ཕུར་ཐང་ཤིང་བཅད་དུ་ཕྱིན་པ་དུས་ད་ལྟའང་མ་བརྗེད་པར་ངའི་སེམས་སུ་གསོན་པོར་གནས།
ངའི་སྤུན་མཆེད་བཀྲ་ཚེ་ལགས། ཕ་ཡིས་བུ་ལ་རེ་བ་དང་གདེང་འཇོག་མི་བཞག་མཁན་སུ་ཞིག་ཡོད། འོན་ཀྱང་ཁྱེད་ཀྱི་ཨ་ཕས་ཁྱེད་ལ་གདེང་འཇོག་བཞག་སྟངས་གཞན་དང་གཏན་ནས་མི་འདྲ། གཏན་ནས་མི་འདྲ། དངོས་གནས་གཏན་ནས་མི་འདྲ།
ད་ནི་ནང་མི་སྤུན་མཆེད་རྣམ་པ་ཚོ། ཁྱེད་རྣམས་ཀྱིས་སེམས་ཁྲལ་དང་། སེམས་སྡུག་མ་བྱེད། ཁོང་ནི་ཚེ་ཕྱི་མའི་ལམ་དུ་གཤེགས་ཟིན་ན་ཕན་ཚུན་ལ་འཁོན་འཛིན་དང་། འཁོན་སེམས་མ་བཅངས་རོགས། ཕན་ཐོགས་གང་ཡང་མེད། དེ་ནི་མི་ཡུལ་ནས་བུ་ངས་ཁྱེད་ཅག་ལ་རེ་སྐུལ་ཡིན།
ངའི་སྤུན་མཆེད་བཀྲ་ཚེ་ལགས། ཁྱོད་ཀྱི་སྡིག་སྒྲིབ་གང་བསགས་ཐམས་ཅད་ཞི་ཞིང་དག་སྟེ། དལ་འབྱོར་གྱི་མི་ལུས་བཟང་པོ་ཞིག་ལེན་པའི་སྨོན་ལམ་འདེབས། འདི་ནི་ངས་སྤུན་མཆེད་དྲན་པའི་གདུང་འབོད་ཅིག་ཀྱང་ཡིན།