བློ་བཟང་ལུང་རྟོགས། ཨོ་སི་ཊི་ལི་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ཚོགས་གཙོ།
ཕ་རི་སིར་འཛོམས་འཆར་ཡོད་པའི་མཉམ་འབྲེལ་རྒྱལ་ཚོགས་གོ་ལའི་ཚ་དྲོད་ཀྱི་ལྷན་ཚོགས་སྔོན་དུ། ཕྱི་ཟླ་༡༡་པའི་ཚེས་༢༧་ནས་༢༩་བར་ཨོ་སི་ཀྲི་ལི་ཡའི་གྲོང་ཁྱེར་ཆེ་ཁག་རྣམས་སུ་ཡོད་པའི་བོད་རིགས་ཚོགས་པ་ཁག་དང་བོད་དོན་རྒྱབ་སྐྱོར་བ་རྣམས་ཐེངས་འདིའི་མི་མང་གོམ་བགྲོད་ཆེན་མོའི་མདུན་དུ་ཐོན་ཡོད་པ་རེད། དེ་ཡང་གྲོང་ཁྱེར་སིག་ནེ། མེལ་སྦོན། སྦི་རི་སི་སྦིན། ཁེན་སྦེ་ར། ཨེ་སྒྲི་ལེ་སྒྲི། ཧོ་སྦར་ཊི་བཅས་ནས་བོད་རིགས་ཚོགས་པ་ཁག་དང་བོད་དོན་ལྷན་ཁང་གིས་འཛམ་གླིང་ཡང་རྩེ་བོད་གངས་ཅན་ལྗོངས་ནི་འཛམ་གླིང་ཁོར་ཡུག་ལ་གནད་འགག་ཆེན་པོ་གྱུར་ཡོད་པ་དང་ཚ་དྲོད་འགྱུར་ལྡོག་གི་ལས་འགུལ་ལ་གདུང་སེམས་མཉམ་སྐྱེད་དགོས་པའི་འབོད་སྐུལ་གནང་།
རྒྱལ་ས་ཁེན་སྦེ་རར་བཙན་བྱོལ་བོད་མིའི་སྒྲིག་འཛུགས་ཀྱི་སྐུ་ཚབ་ལྷག་པ་མཚོ་སྒོ་མཆོག་ཐེངས་འདིའི་ལས་འགུལ་ནང་མཉམ་ཞུགས་གནང་ཡོད་དང་། ཁོང་གིས་ད་ཐེངས་ཨོ་སི་ཀྲི་ལི་ཡ་ཁྱོན་ཡོངས་སུ་བོད་རིགས་མཐུན་ཚོགས་ཁག་དང་། བོད་དོན་རྒྱབ་སྐྱོར་བ་རྣམས་ཀྱིས་གཞུང་འབྲེལ་མིན་པའི་ཚོགས་པ་བརྒྱ་ཕྲག་མང་པོར་མཉམ་འབྲེལ་བྱས་ནས་སྤྱིར་འཛམ་གླིང་གི་ཁོར་ཡུག་དང་ལྷག་པར་བོད་ཀྱི་ཁོར་ཡུག་གི་ཉེན་འཚབ་སྐོར་ལ་ལས་འགུལ་དོན་ཕན་ལྡན་པ་སྤེལ་སོང་ཅེས་གསུངས།
གྲོང་ཁྱེར་སིག་ནེའི་ནང་བོད་རིགས་གཞོན་སྐྱེས་བསྟན་འཛིན་ཆོས་རྒྱལ་ལགས་ནས་ཨོ་སི་ཀྲི་ཡའི་གཞོན་སྐྱེས་རྣམས་དང་མཉམ་ཞུགས་ཀྱིས་ཐེངས་འདིའི་ལས་འགུལ་གྱི་འཕྲེད་དར་གཙོ་བོ་ཁྱེར་ཡོད་པ་དང་། གྲོང་ཁྱེར་ཕིར་ཐི་ནས་ཡིན་པའི་བོད་རིགས་མཐུན་ཚོགས་ཀྱི་རྒྱུན་ལས་ཡིན་པ་བསྟན་འཛིན་ཆོས་སྐྱིད་ལགས་དང་། རྒྱལ་ས་ཁེན་སྦི་ར་ནས་བོད་དོན་ལས་འགུལ་བ་ཚེ་དབང་ཐུབ་བསྟན་ལགས་གཉིས་ཀྱིས་ས་གནས་སོ་སོར་གསུང་བཤད་གནང་མཁན་གཙོ་བོའི་གྲས་སུ་ཐོན་ཡོད་པ་རེད།
ཨོ་སི་ཀྲི་ལི་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ཚོགས་གཙོ་བློ་བཟང་ལུང་རྟོགས་ཀྱིས་གསུང་དོན། ད་ཐེངས་བོད་རིགས་རྣམས་འཛམ་གླིང་རང་བཞིན་ཅན་གྱི་ཁོར་ཡུག་སྲུང་སྐྱོབ་ཀྱི་ལས་འགུལ་འདི་འདྲ་ཞིག་གི་ནང་མཉམ་ཞུགས་གནང་ཐུབ་པ་འདི་ཨོ་སི་ཀྲི་ལི་ཡའི་ནང་ཡོད་པའི་བོད་རིགས་ཚོགས་པ་ཁག་ལ་མཚོན་ན་ལོ་རྒྱུས་ཀྱི་དོན་སྙིང་ཡོད་པའི་ལས་འགུལ་ཞིག་ཡིན་པས་སྤོབས་པ་སྐྱེས་འོས་པ་ཞིག་རེད་ཅེས་དང་།
བོད་ནང་གི་བོད་མི་རྣམས་ལ་གོ་ལའི་ཚ་དྲོད་ཀྱིས་ཐད་ཀར་ཤུགས་རྐྱེན་ཐེབས་བཞིན་ཡོད་ཀྱང་ཁོང་རྣམས་ཀྱི་འབོད་སྐད་འཛམ་གླིང་མི་མང་གི་གོ་ཐོས་བྱེད་མི་ཐུབ་བརྟེན། རང་དབང་ལུང་པར་ཡོད་པའི་ང་ཚོས་བོད་རིགས་སྤུན་ཟླ་རྣམས་ཀྱི་མགྲིན་ཚབ་པ་བྱེད་ཐུབ་པ་བྱུང་ཡོད། ལྷག་པར། བོད་ནང་གི་འབྲོག་པ་མང་ཚོགས་རྣམས་ཀྱི་ཆེད་གོམ་བགྲོད་བྱས་པ་ཡིན། ཁོང་རྣམས་མི་ལོ་སྟོང་ཕྲག་རིང་བོད་ཀྱི་མཐོ་སྒང་ས་ཁུལ་དུ་རྒྱུན་གནས་བྱེད་ཐུབ་བྱུང་ཡོད་ཀྱང་། རྒྱ་ནག་ནས་རང་ཉིད་ཀྱིས་བཟོས་པའི་ཁོར་ཡུག་ཀྱི་དཀའ་ངལ་སེལ་ཆེད་ཉམ་ཆུང་ཉེས་མེད་བོད་རིགས་འབྲོག་པ་རྣམས་རྩྭ་ཐང་ནས་བཙན་དབང་གི་གནས་སྤོ་བྱེད་བཅུག་ཡོད་པ་རེད་ཅེས་སོགས་གསུངས་སོང་།
མཉམ་འབྲེལ་རྒྱལ་ཚོགས་ཀྱི་གོ་ལའི་ལྷན་ཚོགས་ཀྱི་སྔོན་དུ་ཨོ་སི་ཀྲི་ལི་ཡའི་བོད་དོན་ལྷན་ཁང་གིས་སྙན་ཞུའི་དེབ་ཆུང་ཞིག་བཏོན་པ་དེའི་ནང་འཛམ་གླིང་ཁོར་ཡུག་གི་གནད་དོན་ཁྲོད་བོད་ཀྱི་ཁོར་ཡུག་དེ་བཞིན་གལ་གནད་ཆེན་པོ་ཡིན་པའི་སྐོར་གསལ་འདོན་བྱས་ཡོད།
བོད་དོན་ལྷན་ཁང་གི་ལས་འགུལ་འགན་འཛིན་སྐྱིད་འཛོམས་ཀྱིས་གསུང་དོན། བོད་དེ་བཞིན་ཨེ་ཤི་ཡའི་གཙང་བོ་ཆེ་ཁག་གི་འགོ་ཁུངས་ཡིན་པ་དང་། འཁྱག་རོམ་གྱི་བང་མཛོད་ཆེན་པོ་ཡིན་པའི་བོད་ཀྱི་མཐོ་སྒང་ནི་འཛམ་གླིང་བྱང་སྣེ་དང་འཛམ་གླིང་ལྷོ་སྣེ་ཕུད་དེ་གཙང་ཆུའི་འབྱུང་ཁུངས་ཆེ་ཤོས་དེ་ཆགས་ཡོད་པ་རེད། དུས་རབས་ཉེར་གཅིག་པར་བོད་ནི་གཙང་ཆུའི་བདག་དབང་དང་བཟའ་བཅའི་བདེ་སྲུང་ལ་མཚོན་ན་གལ་ཆེན་པོར་གྱུར་ཡོད། དེ་བས་མཉམ་འབྲེལ་རྒྱལ་ཚོགས་ཀྱི་གོ་ལའི་ཚ་དྲོད་ལྷན་ཚོགས་སུ་ཕེབས་པའི་དབུ་ཁྲིད་རྣམས་ཀྱིས་བོད་ཀྱི་ཁོར་ཡུག་གནད་དོན་འདི་འཛམ་གླིང་གི་ཁོར་ཡུག་ལ་ཐབས་ཇུས་ཀྱི་གནད་འགག་ཆེན་པོ་ཡིན་པ་དང་བོད་མཐོ་སྒང་གི་ཛ་དྲག་རང་བཞིན་ཅན་གྱི་ཁོར་ཡུག་ལ་ངེས་པར་དུ་དོ་སྣང་གནང་དགོས་ཅེས་གསུང་།
ཨོ་སི་ཀྲི་ལའི་རྒྱལ་ཡོངས་བོད་རིགས་སྤྱི་མཐུན་ཚོགས་པ་དང་བོད་དོན་ལྷན་ཁང་ནས།
ཕྱི་ལོ་༢༠༡༥་ལོའི་ཟླ་༡༡་པའི་ཚེས་༣༠་ཉིན།
་་་་་་་་ བོད་དེ་བཞིན་ཨེ་ཤི་ཡའི་གཙང་བོ་ཆེ་ཁག་གི་འགོ་ཁུངས་ཡིན་པ་དང་། འཁྱག་རོམ་གྱི་བང་མཛོད་ཆེན་པོ་ཡིན་པའི་བོད་ཀྱི་མཐོ་སྒང་ནི་འཛམ་གླིང་བྱང་སྣེ་དང་འཛམ་གླིང་ལྷོ་སྣེ་ཕུད་དེ་གཙང་ཆུའི་འབྱུང་ཁུངས་ཆེ་ཤོས་དེ་ཆགས་ཡོད་པ་རེད། དུས་རབས་ཉེར་གཅིག་པར་བོད་ནི་གཙང་ཆུའི་བདག་དབང་དང་བཟའ་བཅའི་བདེ་སྲུང་ལ་མཚོན་ན་གལ་ཆེན་པོར་གྱུར་ཡོད། ་་་་་་་་་
ཁོར་ཡུག་ནི།
ཁོར་ཡུག་ནི། སྐྱབས་དཀོན་མཆོག་འདྲ།
ཁོར་ཡུག་ནི། གྲོགས་ཕ་དང་འདྲ།
ཁོར་ཡུག་ནི། བྱམས་མ་དང་འདྲ། །
ཁོར་ཡུག་ནི། སྲོག་ཀུན་དང་འདྲ།