ཐང་ཧྲུའུ་བར་གསེང་གི་ཤོག་འཁྱར།

ཐེ་བོ་སངས་རྒྱས།

 
ཁ་སང་ང་ལ་<ཐང་ཧྲུའུ་གླེགས་བམ་བདུན་བརྒྱ་དོན་བདུན་པའི>བར་གསེང་ན་ཤོག་འཁྱར་ཞིག་རྙེད་བྱུང་། དེར་ལེའུ་དང་ཤོག་གྲངས་གང་ཡང་མི་གསལ་མོད། རང་རེ་བོད་ཀྱི་སྐོར་ཡིན་ཞིང་དྲྭ་གྲོགས་འགའི་རེ་སྐུལ་ལྟར་ཡི་གེར་ཕབ་ཡོད།
“རྨ་འབྲིའི་མགོ་ཁུངས་དེར་ལྟ་ན་སྡུག་པའི་ཡུལ་གྲུ་མང་དུ་བདོག དབྱར་དུས་ལྗོངས་རྒྱུ་བ་བུང་བའི་ཚོགས་བཞིན་འཁོར་ཏེ། ཕྱི་རོལ་ཏུ་འགྱིག་ཤོག་དང་ཤེལ་དམ་ལ་སྩོགས་པ། ནང་རོལ་ཏུ་བག་ཆགས་ཀྱི་གད་དར་གང་བྱུང་འཕེན་གྱིན་མཆིས།

ཡུལ་ཁོར་མོ་ཡུག་ཏུ་དགོན་སྡེ་སྟོང་ཕྲག་མང་པོ་གདའ། ཁོང་ཚོས་ཧྭ་ཤང་ལ་གྲྭ་བ་ཞེས་འབོད། གྲྭ་འབོར་བཞི་ཆ་གཅིག་ཙམ་གྲོང་དང་གྲོང་འགྲིམས་ཤིང་ཆོས་བཏོན་ནས་ཡོན་ལེན་པར་བྱེད། ཡོན་གྱིས་མ་མགུ་དུས་གདོང་གཤིས་ལོག་འགྲོ་མཁན་ཡང་ཡོད། ཆོས་ཀྱང་བན་བོན་འདྲེས་མར་བྱེད། ཕི་གླིང་བ་སོགས་ཀྱིས་བླ་མའི་ཆོས་ལུགས་ཞེས་ཟུར་ཟ་ཡང་བྱས་མྱོང་། ཚེས་བཟང་ཞིག་ལ་སེར་མོ་བ་དག་གིས་མགོར་འབག་འཇིགས་སུ་རུང་བ་རེ་གོན། ལག་ཏུ་མཚོན་ཆ་སྣ་ཚོགས་ཐོགས་ནས་གར་འཁྲབ། མཐར་གར་དཔོན་དེས་སྣུམ་གདུ་བཞིན་པའི་ནང་ཆང་བླུགས་ཏེ་ཁོ་རང་སྲེག་ལ་ཁད་བྱེད།

ཡུལ་དེར་སྐབས་སྐབས་སུ་གནམ་ཡིག་འབབ་ལ། བརྡ་དག་ལ་རྨོངས་པ་ཞིག་གིས་བྲིས་པ་ལྟ་བུའམ། ལྷའི་ཡི་གེ་མ་ཤེས་ན་བཀླག་མི་བཏུབ་པའང་ཡོང་། དེ་ལྟ་ནའང་མི་རྣམས་འཇིགས་ཡེར་བའམ་འུར་ཟིང་ངེར་གཏོང་། རི་དང་དེའུའི་མགོར་ཤིང་ལས་བྱས་པའི་མདའ་མདུང་ཁལ་དང་ཁལ་བྱས་ནས་སྤུངས། མཚོ་དང་མཚེའུའི་ནང་འབྲུ་རིགས་ལ་གསེར་དངུལ་སོགས་ཕྲན་ཚེགས་རེ་སྦྱར་བ་སྒྱེ་དང་སྒྱེ་བྱས་ནས་འཕེན། བཟའ་འབྲུ་དང་དར་གོས་སོགས་མེར་བསྲེགས་ཏེ་ལྷ་མཆོད་པར་བྱེད།

ཕྲུ་གུ་སྐྱེས་ན་བླ་མ་དང་རྩིས་པར་མིང་སློང་། རུས་མིང་གདགས་པའི་སྲོལ་དེ་གནའ་ནས་ཉམས་པས། ཁོང་ཚོས་རང་ཉིད་རུས་གང་དུ་གཏོགས་པའང་མི་ཤེས། ལས་གང་བརྩམ་ཡང་སྔོན་ལ་མོ་བཏབ་ནས་ལེགས་ཉེས་བརྟག ཚོང་སོགས་ལ་ཆས་དུས་སྣོད་སྟོང་པ་ཅན་དང་ཐུག་ན་རྣམ་རྟོག་གིས་གདོང་ནག་རོག་གེར་འགྲོ།

ལོ་སར་གྱི་སྔ་ནུབ་བཟའ་བཅའ་སྣ་དགུ་འདུས་པའི་ཟས་ཤིག་སྣོད་ཅིག་ཏུ་གཡོ། བག་ཟན་ཁུགས་ལ་བལ་དང་སོལ་བ་སོགས་སྦས་ནས་མི་གཤིས་བརྟག རང་རང་ལ་བབས་པའི་བག་ཟན་གྱི་ཁ་འབྱེད་མི་ཕོད་པ་ཙམ་འོང་། གནའ་མྱི་ཚོས་མནའི་དམ་ཚིག་གཏོང་བ་བས་སྲོག་གཏོང་བར་ཐེ་མི་ཚོམ་མོད། ད་སྐབས་གཏམ་རྫུན་པོ་ཆེ་རེའི་མཐར་མནའ་ཐུ་མོ་ཆེ་རེ་འདོར། སྐད་ཆ་འདྲ་ཆགས་པོ་བཤད་མཁན་ནི་མང་ཡང་། ལག་ལེན་དུ་འདེབས་མཁན་ནི་ཉུང་།

ཁོ་བ་ཅག་གིས་ཅ་ལག་གི་རྒྱུ་སྤུས་དང་གསར་རྙིང་ལ་དང་དོད་ཆེན་པོ་མི་བྱེད་པས། ཁྲོམ་རར་དངོས་ཟོང་རྫུན་མས་ཁེངས་ཤིང་བྲེ་སྲང་ལ་སྒྱུ་བཤོམ་པ་སོགས་རྒྱུན་མར་འོང་།” xxxxxxx

འདིའི་མན་ཆད་ཤོག་བུ་ཆར་ཐིགས་ཀྱིས་བརྡུངས་ཤིང་། ཡིག་འབྲུ་དག་མི་གསལ་བས་ཅུང་ཕངས་སྣང་ཞིག་ཤར།