གཡུ་སྒང་དགེ་འདུན།
༡༽ ས་ཆེན་འཛམ་གླིང་སྤར་གང་བྱེད་པའི་སྨད་ཀྱི་ཉི་མ་གཞོན་ནུ་ཞིག །
མཐོ་སྒང་ཕོ་བྲང་དམར་པོའི་རྩེ་ནས་དྲོད་ཁོལ་ཁ་བའི་ལྗོངས་སུ་འཕྲོས།།
བརྒྱད་ཟུང་བགྲང་བྱ་བྱིས་པའི་དུས་སུ་རྒྱལ་སྲིད་ཁུར་པོ་ཕྲག་ཏུ་བཞེས།།
ཀླ་ཀློ་གླང་ཆེན་སྨྱོན་པའི་གཏུམ་དྲག་ཞུམ་མེད་ཐབས་ཀྱིས་དོང་ལ་གཡུགས།།
༢༽ དམར་ཕྱོགས་བདུད་སྡེས་མེ་སྒྱོགས་སོ་ཁ་དམར་པོ་རི་ཡི་རྩེ་རུ་གཏད།།
རྔམ་བརྗིད་འཇིགས་རུང་དྲག་ཆས་རིགས་ལ་ལྷ་ཡི་དམག་ཀྱང་བྲོས་ལ་དོགས།།
དེ་ལྟའི་གཤིན་རྗེའི་འཐབ་རའི་དཀྱིལ་ནས་ལྷ་སྲུང་དམར་ནག་ཞལ་ལུང་བཞིན།།
ཡིད་ཆེས་བརྟན་པོའི་ཀི་བསྭོ་གཅིག་གིས་ཕྱི་རུ་བསྐྱོད་པའི་དཔའ་རྩལ་ངོམ།།
༣༽ གོས་སྔོན་སྲིན་པོས་སྡིག་དམོད་ཁྲོ་ཆུ་རྒྱལ་སྤྱིའི་སྐྱེ་འགྲོའི་རྣར་བླུགས་ཀྱང་།།
འཕྱོན་མའི་གཏམ་ཚོགས་སྣང་མེད་བཞག་པས་རྒྱན་མེད་སྒྲེན་མོའི་ཚུལ་དུ་གྱུར།།
དྲང་བདེན་ནོར་བུ་རྒྱབ་ཏུ་ཁུར་བའི་མ་ཧ་གྷན་ངྷི་གཉིས་པ་ཞིག །
འཛམ་གླིང་ས་ཆེན་ཞབས་ཀྱིས་བཅགས་པས་དགའ་སྤྲོའི་ཐལ་སྒྲས་གནམ་ས་བཀང་།།
༤༽ འཛམ་གླིང་གོ་ལ་ཟླུམ་པོའི་སྒང་ལ་དམ་ཆོས་གསུང་གི་སྦྲང་ཆར་བསྙིལ།།
བྱམས་དང་སྙིང་རྗེའི་བརྩེ་སེམས་དྲོན་མོས་ས་གསུམ་སྐྱེ་དགུའི་དང་བ་འདྲེན།།
ཐུགས་བཞེད་ཞི་བདེའི་ལྷ་བྱ་དཀར་པོས་གླིང་བཞིའི་ཁྱོན་ལ་ལྡིང་སྐོར་གྱིས།།
ལྷིང་འཇགས་འཚོ་བའི་གནས་མལ་དགོས་པའི་གསུང་དབྱངས་སྒྲོག་པར་ཀུན་གྱིས་བཀུར།།
༥༽ འཚེ་ལས་དངོས་ཤུགས་བརྒྱུད་གསུམ་བྱེད་པའི་དགྲ་ཡི་དྭངས་མ་བཟོད་པས་འདུལ།།
རྨོངས་འཐོམ་མུན་པའི་ཀློང་ན་ཉུལ་རྣམས་ཟབ་གསུང་སྣང་བས་ལམ་ཆེན་སྟོན།།
གོ་ལ་ཧྲིལ་པོ་ཞི་བདེར་འགོད་པའི་ཐུགས་དགོངས་རྒྱ་མཚོའི་མཐའ་ལས་ཡངས།།
སྙིགས་དུས་འདི་ལ་མགོན་ཁྱེད་ཤཱཀྱ་ཐུབ་པ་ཉིད་ལས་ཁྱད་པར་ཅི།།
༦༽ མི་རིགས་ཤིག་གི་བདེ་སྡུག་ཆེད་དུ་ཡོད་ཚད་བསྐྱུར་བའི་གྲྭ་རྐྱང་ཞིག །
མི་ལོ་ང་གྲངས་མི་ཡུལ་ཞིག་ནས་དཀའ་སྡུག་འབུམ་ལ་གདོང་ལེན་བྱས།།
མི་ལོ་བརྒྱད་ཅུ་གདན་དུ་བཏིང་བའི་འཛམ་གླིང་ཞི་བདེའི་དེད་དཔོན་ལ།།
མི་བུ་བདག་གིས་དད་གསུམ་མེ་ཏོག་མཆོད་པའི་ཕྲེང་བ་རྒྱན་དུ་འབུལ།།
༢༠༠༡༥ ཟླ་ ༡༢ ཚེས་ ༩ ཉིན་བྲིས།
༸གོང་ས་མཆོག་ནི།
བརྒྱ་ཕྲག་ཉེར་གཅིག་སྲོང་བཙན། །
རྒྱལ་དབང་ལྔ་པའི་གདུང་ཚབ། །
བཅུ་གསུམ་པ་ཡི་ཡང་སྲིད། །
བཅུ་བཞི་ཐམས་ཅད་མཁྱེན་པ། །