སོག་མདའ།
སྤྱི་ལོ་༡༩༨༩ ལོར་ང་རང་རྨ་ལྷོ་སོག་རྫོང་གི་མི་རིགས་སློབ་འབྲིང་གི་ལོ་རིམ་དང་པོའི་སློབ་མ་ཡིན་ཞིང་། ང་ཚོས་འཛིན་གྲྭའི་ནང་སློབ་བུ་ཉི་ཤུ་ལྷག་ཡོད། འཛིན་གྲྭའི་འགན་ཁུར་མཁན་གྱི་དགེ་རྒན་རྒན་འབྲུག་ལྷ་ཡིན། ང་ཚོའི་འཛིན་གྲྭ་དང་ལོ་རིམ་གཉིས་པའི་འཛིན་གྲྭ་གཉིས་ཀྱི་ཁང་ཤུར་གཅིག་ཡིན། དེ་དུས་མཐོང་མྱོང་བའི་ལོ་རིམ་གཉིས་པའི་སློབ་གྲོགས་རྣམས་ཀྱི་ནང་ཡོད་པ་གཅིག་ནི་ད་ལྟའི་འཛམ་གླིང་ཐོག་སྐད་གྲགས་ཡོད་པའི་དབྱིན་ལན་ཨོ་སི་ཧྥོ་ཏི་སློབ་གྲྭར་ཆེན་མོར་འབུམ་རམས་པའི་ཕྱག་འཁྱེར་ཐོབ་པའི་སྐུ་ཞབས་བླ་མ་སྐྱབས་རེད།
དེ་དུས་ཁོང་གི་རྣམ་དཔྱོད་དང་སློབ་སྦྱོང་གི་སྐོར་ལ་ང་ལ་གསལ་ཆ་མེད་ཡང་། ཕོ་གསར་ཧ་ཅང་གི་མཛེས་ཉམས་ལྡན་པ་ཞིག་ཡོད་པ་སློབ་གྲོགས་ཀུན་གྱི་བསྔགས་བརྗོད་བྱེད་ཡུལ་ཞིག་ཡིན། དེ་ནས་ལོ་གཅིག་གཉིས་ལྷག་གི་རྗེས་སུ་ཉིན་ཞིག་སློབ་གྲྭའི་ནང་གསར་འགྱུར་ཧ་ཅང་གི་ཆེན་པོ་བྱུང་བ་ནི། སློབ་བུ་བླ་མ་སྐྱབས་དང་དགེ་རྒན་ལྷ་ཅ་དགེ་རྒན་མགོན་པོ་ཚེ་རིང་གསུམ་རྒྱ་གར་ལ་བྲོས་སོང་བས། གསར་འགྱུར་སློབ་གྲྭ་ནས་རྫོང་མཁར་དང་། རྫོང་མཁར་ནས་རུ་འབྲོག་ཀུན་ལ་ཁྱབ་པར་གྱུར།
ང་ཚོའི་སློབ་གྲོགས་ཚོས་བཤད་ན་དགེ་རྒན་ལྷ་ཅ་དང་དགེ་རྒན་མགོན་པོ་ཚེ་རིང་གཉིས་གསང་བའི་སྒོ་ནས་རྒྱ་གར་ལ་འགྲོ་རྩིས་བྱེད་ཀྱི་ཡོད་པ་བླ་མ་སྐྱབས་ཀྱིས་ཤེས་ནས། ཁྱེད་གཉིས་ཀྱིས་ང་མཉམ་ཏུ་མི་འཁྲིད་ན་ངས་ཕ་མར་བཤད་རྒྱུ་ཡིན་ཞེས་བཤད་པས། ཁོང་གཉིས་ཀྱིས་བླ་མ་སྐྱབས་མི་ཁྲིད་ག་མེད་བྱུང་ནས་ཁྲིད་པ་རེད་ཟེར། འདི་ནི་ང་ཚོའི་སློབ་གྲོགས་རྣམས་ཀྱིས་ཕན་ཚུན་ལ་བཤད་པའི་་གསར་འགྱུར་རེད། དངོས་ཡོད་དེ་ལྟར་མིན་པ་ནི་དགེ་རྒན་ལྷ་ཅ་ལགས་ཀྱིས་བྲིས་པའི་”རྨི་ལམ་མངོན་གྱུར་པའི་སྐྱེས་བུ་ཞིག་”ཞེས་པར་གསལ།
འདི་ལྟར་ཕོ་ཉམས་ཡག་པའི་གསར་རུ་ཆུང་ཆུང་ཁོང་གིས་དམ་བཅའ་བརྟན་པོ་ཞིག་དང་རྨི་ལམ་དྲོན་པོ་ཞིག་རུམ་ལ་བཅུག་ནས་ལམ་ལ་ཆས། རིམ་གྱིས་རྒྱལ་ཁམས་རིག་པས་བསྐོར་ནས་དབྱིན་ལན་ཨོ་སི་ཧྥོ་ཏྲི་སློབ་གྲྭ་འབུམ་རམས་པའི་ཕྱག་འཁྱེར་ཐོབ་པ་དང་། འབུམ་རམས་པ་ཉི་ཤུ་ལྷག་གི་ཁྲོད་ནས་བདམས་ཐོན་གྱིས་སློབ་ཆེན་དེ་ཡི་ཆེད་མཁས་ཞིབ་འཇུག་པ་དང་དགེ་རྒན་གཅིག་ལྕོགས་ཀྱི་ཁྲི་སྟེགས་ན་འགྱིང་འདུག
དེ་རིང་སྟེ་སྤྱི་ལོ་༢༠༡༥ ལོའི་ཟླ་༡༢ ཚེས་༩ ཉིན་གྱི་ཕྱི་དྲོའི་ཆུ་ཚོད་༧ ནས་༩་༣༠ ཕྱེད་ཀ་བར་དུ་སྐུ་ཞབས་བླ་མ་སྐྱབས་ལགས་ཀྱིས་༼བོད་ཀྱི་དེང་རབས་རྩོམ་རིག་གི་ཡིག་ངག་གི་རྩོམ་རྒྱུན་ཏེ། གཡོལ་ཐབས་མེད་པའི་བོད་ཡུལ་༽ཞེས་པའི་དཔེ་དེབ་དཔར་སྐྲུན་ལེགས་འགྲུབ་ཀྱིས་དཔེ་སྟོན་མཛད་སྒོ་་Haldane Room Wolfson collgege oxford རུ་འཚོགས་འདུག་པ་ལ་སྤྲོ་སེམས་འཁོལ་བའི་འཚམས་འདྲི་དང་ལྷན། སྐུ་ཉིད་ཀྱི་བྱ་གཞག་ལྷུན་འགྲུབ་ཡོང་བའི་ཁ་གཡང་དང་བཅས། བཀྲ་ཤིས་ཤོག །
སྤྱི་ལོ་༢༠༡༥་༡༢་༩་ ཉིན་རང་ཤག་ནས་བྲིས།
འགོ་རྔ་གཉིས་མེད་པའི་ཁྱབ་བསྒྲགས་འདྲ་བོའམ་ཡང་ན།