—སློབ་དཔོན་བསོད་ནམས་དབང་ཆེན།
སྔ་འགྱུར་བསྟན་ལ་རྒྱལ་བ་ཀློང་ཆེན་པ།།
སླར་ཡང་བྱོན་དང་རྣམ་དབྱེར་མ་མཆིས་པའི།།
དྲིན་གྱི་ཟླ་མེད་ཆོས་རྗེ་གྲུབ་པའི་གཙོ།།
ངག་དབང་བློ་གྲོས་མཚུངས་པ་མེད་དེར་འདུད།།
ཁྱེད་ཞལ་མིག་གི་དཔལ་དུ་མ་གྱུར་ཀྱང་།།
གསུང་བཟང་རྣ་བའི་བཅུད་དུ་སྔར་ནས་སིམ།།
མི་ཕམ་ཤེས་རབ་རལ་གྲི་འབར་བའི་འོག།
དམ་པ་ཁྱེད་ནི་གླེགས་བམ་སྒམ་པོ་ཞིག།
གངས་ལྗོངས་མུན་པའི་རུམ་དུ་ཉལ་གྱུར་ཅིང་།།
རྒྱལ་བསྟན་རྙོགས་མ་ཅན་དུ་གྱུར་པའི་སྐབས།།
ཞུམས་པ་མེད་པའི་སྙིང་སྟོབས་གོ་གྱོན་ནས།།
ལྔ་རིག་སྒོ་བརྒྱའི་ལྡེ་མིག་ལྷན་དུ་ཕྱེས།།
ཉམས་རྟོགས་བུད་མེད་རུམ་ནས་རྒྱས་སོ་ཞེས།།
ངག་ངན་བསྟན་པའི་གཤེད་དུ་ཆས་པ་ན།།
མཁན་ཆེན་ཡིད་བཞིན་ནོར་བུ་ཀེ་ཏ་ཀས།།
གསང་ཆེན་འོད་སྐུའི་ཆུ་མགོ་བགྲུང་བར་བྱས།།
དུས་དེར་ཁྱེད་ཐུགས་མཚོ་ཆེན་ཟབ་དྲགས་པས།།
མཁས་གྲུབ་ཀླུ་དབང་ཚོགས་ཀྱང་དགའ་བཞིན་འདུད།།
ཆོས་རིག་བསམ་འཕེལ་ནོར་བུའི་དགའ་སྟོན་གྱིས།།
ཤར་ནུབ་ཁྱོན་ཀུན་ཁྱབ་པར་གྱུར་ཅེས་གྲགས།།
འཇམ་དབྱངས་རལ་གྲི་ཅན་ཞིག་མ་ཡིན་ལ།།
དབྱངས་ཅན་པི་ཝང་སྒྲ་ལ་མ་མ་ཆགས་ཀྱང་།།
དམར་སེར་ངུར་སྨྲིག་འཆང་བའི་དགེ་སྦྱོང་ཆེ།།
གདམས་ཟབ་དབྱངས་སུ་འགུགས་མཁས་ཁྱེད་ཁོ་ན།།
བདག་གི་རྒྱལ་ཚབ་དམ་པ་འདི་འོ་ཞེས།།
སྙིང་གཏམ་སྤྲིན་གྱི་རོལ་མོ་མཁའ་ལ་ལྡིང་།།
དུས་དེར་རྫུན་དུ་ཞུགས་པའི་ཆོམ་པོ་ཀུན།།
སྨྲ་བ་མེད་པའི་བརྟུལ་ཞུགས་ལྷན་དུ་བཟུང་།།
མཁན་ཆེན་སེངྒེའི་རལ་པ་བོད་དུ་ཟིང་།།
གྲུབ་དབང་རྒྱ་སྟག་རི་མོ་འཕགས་ཡུལ་བཀྲ།།
སྐྱེས་ཆེན་སྟག་སེང་མཇིང་པ་བསྣོལ་དུས་དེར།།
སྔ་འགྱུར་བ་ཡི་མགོ་འཕང་དགུང་དང་མཉམ།།
ད་ནི་དམ་པའི་རྣམ་ཐར་སྨྲེང་བཞིན་གླེང་།།
དུས་མཆོད་མིག་ཆུས་བསུ་ཞིང་མིག་ཆུས་སྐྱེལ།།
མི་ངན་ན་སོ་གཞོན་པའི་ཉེར་ལེན་གྱིས།།
གྱང་ཁོག་སྟོང་པས་བཤུ་གླུ་ཀྱུར་རེར་ལུས།།
ཁྱེད་ལ་བསྟོད་པའི་སྙན་ངག་འབྲི་དགོས་ཚེ།།
སྡེ་གསུམ་ཚིག་མཛོད་བྱས་ཀྱང་མ་འདང་ཐལ།།
དེས་ན་སྔ་འགྱུར་བསྟན་པའི་སྒྲོན་མེ་ཞེས།།
བློ་བདེའི་ངང་ནས་བོས་ཏེ་འཐུས་པར་བྱས།།
དེང་འདིར་ཡིད་བཞིན་ནོར་བུ་ཞེས་གྲགས་པའི།།
གསུང་སྐྱེས་སློབ་མ་ཉི་ཟླ་ཟུང་གཅིག་གིས།།
འཛམ་གླིང་འོད་དང་ལྡན་པར་བྱས་པ་འདིས།།
བསྟན་པའི་སྐྱེད་ཚལ་མདངས་དང་ལྡན་ལགས་ན།།
དམ་པ་ཁྱེད་ཉིད་བདེ་ལྡན་དག་པའི་ཞིང་།།
རང་སྣང་འཁོར་ཚོགས་རྒྱས་པའི་ཆོས་གྲྭ་དེར།།
མགོན་པོ་འོད་དཔག་མེད་དང་དབྱེར་མེད་དུ།།
བཞུགས་ནས་འགྲོ་ཀུན་བདེ་བའི་སར་ཕྱིན་མཛོད།།
24/ 12/ 2015/
ཕ་རྒོད་པོ་ཤ་གཟན་ཞིག་ལ་བུ་ཁྭ་ཏ་སྐྱག་གཟན་ཞིག་ཟེར་བའི་དཔེ་བཞིན་མཚུངས་ཟླ་མེད་པའི་བླ་མ་བཀའ་དྲིན་འདིའི་ཤུལ་འཛིན་པ་ཚོ་ལ་ཡིད་ཆད་རབ་ཏུ་བྱུང་།