ཆབ་མདོ་ངག་ཕུན།
སྟོང་ལོ་གསར་པ་འདིའི་ནང་ལ།།
དམ་པའི་ལྷ་ཆོས་ཉི་འོད་བཞིན།།
རྒྱས་ཤིང་འགྲོ་ཀུན་ཞི་བདེའི་ལམ།།
གནས་པའི་སྨོན་ལམ་སྙིང་ནས་འདེབས།།
བློ་མཐུན་ཕོ་མོ་ལྷན་རྒྱས་རྣམས།།
བསམ་པ་ཐམས་ཅད་ལྷུན་འགྲུབ་ནས།།
ན་ཚ་མེད་ཅིང་ཚེ་རིང་གནས།།
བསམ་པ་ཆོས་བཞིན་འགྲུབ་པར་ཤོག །
རྩ་བའི་བླ་མའི་སྐུ་ཚེ་བརྟན།།
འགྲོ་ཀུན་བདེ་ལ་འཁོད་པ་དང་།།
ན་གཞོན་བློ་གྲོས་གོང་འཕེལ་ནས།།
ཤེས་རིག་བློ་གྲོས་རྒྱས་པར་ཤོག །
དྲིན་ཅན་ཕ་མ་རྣམ་གཉིས་གཙོས།།
འདས་གསོན་ཕོ་མོ་ཐམས་ཅད་དང་།།
བདག་ལ་བརྩེ་བའི་དྲིན་བསྐྱངས་རྣམས།།
རྟག་ཏུ་བདེ་འགྲོའི་ལམ་འཁོད་ཤོག །
ལྷག་པར་གངས་ལྗོངས་མི་རིགས་ལ།།
བཀའ་དྲིན་ཆེ་བའི་༸གོང་ས་མཆོག །
སྐུ་ཚེ་ཡུན་རིང་བརྟན་པ་དང་།།
རང་དབང་བདེ་སྐྱིད་མྱུར་ཐོབ་ཤོག །
རླུང་རྟ་ཡར་ངོའི་ཟླ་ལྟར་རྒྱས།།
ཚེ་བསོད་དབང་ཐང་གོང་དུ་འཕགས།།
འགྲོ་ཀུན་བདེ་སྐྱིད་ཡོངས་འཁོད་ནས།།
གཏན་དུ་བདེ་བ་འབྱུང་བར་ཤོག །
བདག་ལ་སྟོབས་ནུས་མེད་ན་ཡང་།།
རྣམ་པར་དག་པའི་སྨོན་ལམ་མཐུས།།
ཐམས་ཅད་ལྷུན་གྱིས་རིམ་འགྲུབ་ནས།།
བདེ་བའི་གནས་སུ་འཁོད་པར་ཤོག།
༢༠༡༦/༡/༡ ལ།
གཅིག་སྟོང་ཐལ་ནས་ཉི་སྟོང་བསླེབས། །
བཅོ་ལྔ་ཐལ་ནས་བཅུ་དྲུག་ཤར། །
དུས་ནི་སྐད་ཅིག་སྐད་ཅིག་རྒྱུགས། །
བསླེབ་ས་འཆི་སེམས་དུར་ཁུང་ཙམ། །
རྟག་ཏུ་འཆི་བ་དུས་སུ་སྒོམས། །
རྟག་ཏུ་དྲན་ཤེས་མཉམ་པོར་འགྲོགས། །
རྟག་ཏུ་ངོ་ཁྲེལ་ཉེན་རྟོག་སོམས། །
རྟག་ཏུ་ཁ་བརྡར་ལན་ཅིག་བྲིས། །
ལོ་གསར་བསུ་དུས་དམ་འཇོག་གྱིས། །
ལོ་གསར་ཚེས་དུས་འཆི་སྒོམ་གྱིས།
ལོ་གསར་གཏོང་དུས་བག་ཡོད་གྱིས། །
ལོ་གསར་རྫོགས་དུས་བསྔོ་སྨོན་གྱིས། །