—ས་དཀར་བཀྲ་ཤིས།
ཡོ་རོབ་གསར་གནས་ཁག་གིས་སྤེལ་བའི་གནས་ཚུལ་ལྟར་ན། ཉེ་ཆར་ཕྱི་ཟླ་༡ པའི་ཚེས་༤ཉིན་ཡོ་རོབ་སུད་ཊན་རྒྱལ་ཁབ་ཀྱི་མི་སེར་ཡིན་པའི་སྐུ་ཞབས་པིས་ཊར་རྡ་ལིན་(Peter Dahlin)ཞེས་བ་རྒྱ་ནག་གཞུང་གི་ཉེན་རྟོག་པས་པེ་ཅིན་གནམ་ཐང་ནས་འཛིན་བཟུང་བྱས་ཏེ་ཁྲིད་ཡོད་འདུག་ལ། ཁོ་རང་འཛིན་བཟུང་བྱས་དོན་ནི་ཉེ་ཆར་ཁོང་གིས་བཙུགས་པའི་ཚོགས་པ་སྟེ་རྒྱ་ནག་མྱུར་སྐྱོབ་ཛ་དྲག་ལས་འགུལ་ཚོགས་པ་Chinese Urgent Action Working Group ཞེས་བའི་ངོས་ནས་མཉམ་འབྲེལ་རྒྱལ་ཚོགས་ལ་རྒྱ་ནག་ནང་གི་འགྲོ་བ་མིའི་ཐོབ་ཐང་སྐོར་གྱི་སྙན་ཞུ་ཞིག་ཕུལ་ཡོད་པས་རྐྱེན་གྱིས་ཡིན་འདུག་ལ། སྙན་ཞུའི་ནང་རྒྱ་ནག་གཞུང་གིས་སྤྱི་དམངས་ཐོབ་ཐང་རྩོད་ལེན་མཁན་ཁྲིམས་རྩོད་པ་གཙོས་རང་གི་མི་སེར་ལ་འཇིགས་སྐུལ་དང་རྡུང་རྡེག་གཏོང་བ། དོན་མེད་འཛིན་བཟུང་དང་བཀག་ཉར་བཅས་རྒྱལ་སྤྱིའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་སྐོར་སོགས་བཀོད་ཡོད་འདུག
རྒྱ་ནག་མྱུར་སྐྱོབ་ཛ་དྲག་ལས་འགུལ་ཚོགས་པ་ནི་༢༠༠༩ ལོ་གསར་ཏུ་བཙུགས་པ་ཡིན་འདུག་ལ། ཚོགས་པ་དེས་རྒྱ་ནག་ནང་གི་མི་སེར་ཚོར་ཁྲིམས་ཀྱི་སྐོར་ལ་སྦྱོང་བརྡར་སྤྲོད་པ་དང་མི་སེར་ཉམ་ཆུང་ལ་རོགས་རམ། རྒྱ་ནག་གི་འགྲོ་བ་མིའི་ཐོབ་ཐང་སྐོར་ལ་ཞིབ་འཇུག་དང་སྤྱི་དམངས་ཐོབ་ཐང་ཁྲིམས་རྩོད་པ་ཚོ་ལ་མཐུན་སྦྱོར་རོགས་རམ་གནང་གི་ཡོད་འདུག
ཁ་སང་ཕྱི་ཚེས་༢༡ ཉིན་རྒྱ་ནག་དབུས་བརྙན་འཕྲིན་ཁང་གིས་སྐུ་ཞབས་པིས་ཊར་རྡ་ལིན་གྱིས་རྒྱ་ནག་གི་བདེ་འཇགས་ལ་ཉེན་ཁ་བཟོས་བའི་ཉེས་མིང་འོག་འཛིན་བཟུང་བྱས་ཡོད་ཚུལ་བརྗོད་ཡོད་ལ། སྐུ་ཞབས་པིས་ཊར་རྡ་ལིན་གྱིས་རང་སྐྱོན་ངོས་ལེན་དང་འགྱོད་བཤགས་བྱས་ཡོད་པའི་བརྙན་ཐུང་ཞིག་བསྟན་ཡོད་པའི་ནང་ངས་རྒྱ་ནག་གི་ཁྲིམས་དང་འགལ་བའི་ལས་འགུལ་སྤེལ་བ་དེས་རྒྱ་ནག་གཞུང་དང་མི་མང་གི་སེམས་ལ་ཕོག་ཐུག་བཏང་ཡོད་པས་དགོངས་དག་ཞུ་བ་ཡིན་ཅེས་བརྗོད་ཡོད་པ་རེད།
རྒྱ་ནག་ཞིན་ཧྭ་གསར་ཁང་གིས་རྒྱ་ནག་མྱུར་སྐྱོབ་ཛ་དྲག་ལས་འགུལ་ཚོགས་པ་ནི་ཁྲིམས་འགལ་གྱི་ཚོགས་པ་ཞིག་ཡིན་ལ་སྐུ་ཞབས་པིས་ཊར་རྡ་ལིན་གྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་ཚུལ་མཁོ་སྒྲུབ་བྱས་ཏེ་ཕྱི་ལོགས་སུ་བཏང་ནས་རྒྱལ་སྤྱིའི་སྟེང་རྒྱ་ནག་གི་སྣང་བརྙན་ནག་པོ་བཟོ་བཞིན་པ་རེད་ཅེས་བརྗོད་འདུག རང་ལོ་༣༥ ཡིན་པའི་པིས་ཊར་རྡ་ལིན་ཕྱི་ལོ་༢༠༠༧ ནས་བཟུང་རྒྱ་ནག་ནང་བསྡད་ཡོད་འདུག་ལ་ཁོ་ལ་ན་ཚ་ལྗིད་མོ་ཞིག་ཡོད་པ་དང་ཉིན་རྟག་པར་སྨན་ཟ་དགོས་ཀྱི་ཡོད་འདུག རྒྱ་ནག་ནང་གནས་སྡོད་སུད་ཊན་གཞུང་ཚབ་མི་སྣ་ཞིག་གཟའ་སྤེན་པའི་ཉིན་ཁོ་ལ་ལྟ་རུ་ཕྱིན་ཡོད་འདུག་ལ་གཞུང་ཚབ་ཁང་གིས་མུ་མཐུད་རྒྱ་ནག་གཞུང་དང་འབྲེལ་བ་བྱེད་ཀྱི་ཡོད་ཚུལ་བརྗོད་འདུག པེ་ཅིན་དུ་གནས་སྡོད་ཡོ་རོབ་མཉམ་འབྲེལ་མཐུན་ཚོགས་ཀྱི་གཞུང་ཚབ་ཆེན་མོ་ཞོལ་ཟེའི་གྷོ་SCHZEISGUTཡིས་གསར་འགོད་པ་ཚོ་ལ་རྒྱ་ནག་གཞུང་གིས་ཡོ་རོབ་གྱི་མི་སེར་ཁ་ཤས་འཛིན་བཟུང་བྱས་པར་དོ་སྣང་བྱེད་ཀྱི་ཡོད་ལ། པིས་ཊར་རྡ་ལིན་གྱི་གནད་དོན་ལ་སེམས་འཚབ་བྱེད་ཀྱི་ཡོད་ཅེས་བརྗོད་འདུག
སྐུ་ཞབས་པིར་ཊར་རྡ་ལིན་འཛིན་བཟུང་མ་བྱས་པའི་སྔོན་དེར་རྒྱ་ནག་གཞུང་གིས་ཡོ་རོབ་སུད་ཊན་དང་དབྱིན་ལན་གྱི་མི་སེར་ཡིན་པའི་ཧོང་ཀོང་དཔེ་ཚོང་ཁང་གི་སྦྱིན་བདག་གཉིས་འཛིན་བཟུང་བྱས་ཡོད་ལ། ཁོ་གཉིས་ཀྱིས་ཞིས་ཅིན་ཕིན་གྱི་དགའ་བོ་ཚོའི་སྐོར་ཀྱི་དེབ་ཞིག་འདོན་འཆར་ཡོད་པར་བརྟེན་འཛིན་བཟུང་བྱས་པ་ཡིན་འདུག ཡང་ཁ་སང་ཧྥ་རན་སིའི་ནང་རྟེན་གཞི་བྱས་ཡོད་པའི་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་རྒྱ་ནག་དབུས་བརྙན་འཕྲིན་ཁང་གིས་སྐུ་ཞབས་པིས་ཊར་རྡ་ལིན་གཙོས་མི་གཞན་ཁག་ཅིག་ལ་བཙན་གྱིས་རང་སྐྱོན་ངོས་ལེན་དང་འགྱོད་བཤགས་གནང་གི་ཡོད་པའི་བརྙན་ཐུང་བཟོས་ཏེ་ཕྱི་ལོགས་སུ་ཁྱབ་བསྒྲགས་བྱེད་ཀྱི་ཡོད་པས། ཡོ་རོབ་མཉམ་འབྲེལ་མཐུན་ཚོགས་ཀྱི་ངོས་ནས་རྒྱ་ནག་གི་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་ལ་རྡོག་རོལ་གཏོང་བཞིན་པའི་གཞུང་འབྲེལ་གསར་འགྱུར་བརྒྱུད་ལམ་དབུས་བརྙན་འཕྲིན་ཁང་དང་ཞིན་ཧྭ་གསར་ཁང་གཉིས་བཀག་སྡོམ་བྱ་དགོས་བའི་འབོད་སྐུལ་གནང་འདུག
ཡོ་རོབ་བོད་གནས་དྲ་བའི་གསར་འགོད་པ་ས་དཀར་བཀྲ་ཤིས་ཀྱིས་སྤེལ།