ཚུལ་ཁྲིམས་བློ་གྲོས་ཀྱིས་བླ་རུང་སྒར་ལ་བསྡུས་གྲྭ་དགོས་མིན་གླེང་བ།

Comments (27) on “ཚུལ་ཁྲིམས་བློ་གྲོས་ཀྱིས་བླ་རུང་སྒར་ལ་བསྡུས་གྲྭ་དགོས་མིན་གླེང་བ།”

1. དེ་རིང་རྫ་ཚེ་ཡང་ཅུང་ཙམ་འཁྱོགས་འདུག

2. བསྡུས་གྲྭ་དགོས་ཀྱང་བསྡུས་ཚན་ཚང་མ་མི་དགོས། །
   རིགས་པའི་འགྲོ་སྟངས་ཆགས་ཙམ་སྦྱངས་ན་ལོས་ཆོག །
   གཞུང་ཆེན་རྟོག་གེའི་རིགས་པས་བསླད་པའི་སྐྱོན་འདིས། །
   ཆོས་བརྒྱུད་དག་ལ་སྐུ་ངལ་ཆེན་པོ་བཟོས་འདུག །

3. ད་བལྟས་ན་ཚུལ་བློ་འདི་ཡང་ཏོག་ཙམ་འཁྱོགས་འདུག་་་་ལྷག་བསམ་ཆེ་མདོག་ཕྱི་ཚུལ་ཙམ་ལས་ནང་ན་འཁོན་སེམས་ལྟ་བུ་ཞིག་ཡོད་པ་འདྲ། རྙིང་ཁོངས་ནས་རེ་བ་བྱེད་ས་གཅིག་པུ་དེ་ཡིན་ཟེར་མཁན་མང་ཐལ། བསྡུས་གྲྭས་ཅིག་བྱེད་ཀི་ཟེར་ན། ད་ཁོང་ཡང་ཚར་ཡོད་ཀི། ཁོང་གིས་བསྡུས་གྲྭ་མི་མཁྱེན་པ་འདྲ། འཇིག་རྟེན་བསྡུས་གྲྭ་ལ་ཕྱོགས་དུས། བླ་རུང་སྒར་གཅིག་པུ་ཁ་རོག་གེར་སྡོད། ཧཧཧཧཧ། དགོངས་པ་མ་ཚོམས།

4. ཚུལ་བློ་འཁྱོག་འདུག་ཟེར་ན་མི་མང་པོ་རྣ་བར་མི་འགྲོ་ཀི་་་་་ཆོས་ཉམས་སུ་ལེན་པར་ལེན་སྟངས་ཤེས་དགོས། དེ་ཡང་ཐོས་བསམ་སྒོམ་གསུམ་ཡ་མ་བྲལ་བ་བྱས་ཐུབ་ན་སྤུས་དག་པོ་ཡོང་གི་ཡོད་པ་ཤེས་ཀི་མོད། སྐད་ཅ་འདི་དེང་སང་རྣ་བར་མི་བཏགས་ཀི་་་་་་མི་ཚེ་ཧྲིལ་པོ་བསྡུས་གྲྭ་ལ་སྐྱེལ་མཁན་གང་ན་འདུག་གམ། ཅིག་སྟོན་དང་དག་ངས་ཕུད་ཆོག་གདའ། ད་དུང་བོད་ནང་དགེ་བཅུ་ཁྲིམས་དང་འབྲེལ་བའི་མ་འཚམས་པའི་ལས་མང་ཙམ་བྱས་ཟིན་ཡང་བདེན་གཏམ་བཤད་ན་ཕྱོགས་ཞེན་གྱི་དབང་དུ་སྦྱར་ཡོང་གི་་་་་་་དུས་ལ་བབ་ཚེ་གསལ་པོ་ཞུ་ཆོག་ཨ།

5. བསྡུས་གྲྭའི་གོ་དོན་ནི་བཅུ་ཕྲག་རིག་པའི་གནས་དང་ལྷག་དོན་དུ་གཞུང་ལུགས་རྒྱ་ཆེན་པོའི་རིགས་ལམ་གྱི་སྒོ་དང་ཤེས་བྱའི་རྣམ་གྲངས་སོགས་ཀྱི་མདོར་བསྡུས་ནས་བསྟན་པའི་རིག་པའི་ལམ་སྒོ་འབྱེད་བྱེད་ཅིག་ཡིན། དེ་ཡི་ནང་དུ་ཡིན་ལོག་མིན་ལོག་འགལ་མི་འགལ་རྐྱང་རྐྱང་བཤད་པ་ཞིག་མིན། དེའི་ནང་དུ་ཤེས་བྱའི་ཡིན་ལུགས་དང་དབྱེ་བ་དང་ཁྱབ་མཉམ། སེམས་དང་སེམས་འབྱུང་གི་ཡིན་ལུགས། རྟོག་པ་དང་རྟོག་མེད་ཀྱི་ཡིན་ལུགས། རྒྱུ་འབྲས་ཀྱི་གནས་ལུགས། དགེ་མི་དགེའི་གནས་ཚུལ་ལས་སོགས་བསྟན་པའི་གཞུང་ཅིག་རེད། དེ་དག་ནི་དབུ་མ་ཆེན་མོ་དང་ཕྱག་རྒྱ་ཆེན་མོ་དང། གཞན་སྟོང་དང་རྫོགས་ཆེན་སོགས་ཀྱི་གཞུང་ལུགས་རྣམ་གཞག་ཕྲ་བ་ནས་ཤེས་དགོས་ན་དེ་དག་མེད་ན་མི་རུང་བའི་གནད་དོན་ཅིག་རེད་བསམ།

6. ཚུལ་བློ་འདི་ཕྱོགས་ཞེན་ཆེ་ཙམ་འདུག

7. རིགས་ལམ་དགོས་བསྡུས་གྲྭ་མི་དགོས་ཟེར་ན་སྨྱོན་པའི་སྐད་དང་གཉིས་སུ་མ་མཆིས། བསྡུས་གྲྭའི་བསྡུས་ཚན་འགའ་རེ་དགོས་ཚང་མ་མི་དགོས་ཟེར་ན་གང་གང་མི་དགོས་པ་སྨོས་དང་། འདི་མི་དགོས་ཞེས་བཤད་མི་ཐུབ་པ་ངས་ཤེས་ཀི། གང་ལ་ཟེར་ན་ཚུལ་ཁྲིམས་བློ་གྲོས་གཙོས་ཁྱེད་ཅག་གིས་བསྡུས་གྲྭ་ཚད་མ་རིགས་པ་མ་ཡིན་པར་ཐག་བཅད་ཡོད་པ་དེ་ལས། འཇིག་རྟེན་གཏམ་དཔེར། ས་ཕྱར་ན་རྡོ་ལྷང་ལ་འབུད་ཟེར་བ་ལྟར་རེད། བསྡུས་གྲྭ་ཟེར་བ་ཚད་མ་རྣམ་འགྲེལ་གྱི་བརྗོད་བྱ་རྟོག་གེ་ཚིགས་དོན་བརྒྱད་པོ་གོ་བདེ་དང་འཆད་ཉན་གནང་སླ་བའི་ཕྱིར་དུ་བསྡུས་ནས་ཟུར་དུ་བཀོད་པས་ན་བསྡུས་གྲྭ་ཞེས་གནའ་ནས་ད་བར་དུ་མཚན་སྙན་ཧ་ཅང་ཆེ། མཁས་གྲུབ་ཐམས་ཅད་མཁྱེན་པའི་ཚད་མ་ཡིད་ཀྱི་མུན་སེལ་དུ་མདོ་ལུང་དང་སྦྱར་ནས་འབྲས་རང་མ་དམིགས་པའི་རྟགས་སོགས་དངོས་སུ་བསྟན་སྟངས་འདིར་བཀོད་ན་ཧ་ཅང་མང་བས་རེ་ཞིག་བཞག།
   མདོར་ན་རྙིང་མ་པ་ལ་བསྡུས་གྲྭ་མི་དགོས་ཟེར་ན་རྙིང་མའི་ཞབས་འདྲེན་དང་། རིགས་ལམ་མ་སྦྱངས་ན་རྙིང་མའི་བསྟན་པ་ལྟག་ཆུ་ཆད་པའི་རྫིང་བུ་ནང་བཞིན་ཆགས་ངེས་ཡིན་པ་མངོན་སུམ་དུ་རྟོགས་ཐུབ།
   གྲུབ་མཐའ་གཞན་གྱིས་འཇང་དགུན་ཆོས་ཆེན་མོ་འཚོགས་ནས་ཆོས་འཁོར་བར་ཐ་གསུམ་གྱི་བརྗོད་བྱ་རིགས་པས་གཏན་ལ་ཕབས་ན། བླ་རུང་སྒར་ན་སྐྱ་སེར་རྒྱ་གསུམ་འཚོགས་ནས་མགོན་པོ་འོད་མེད་ཀྱི་མཚན་སྔགས་མང་ཙམ་བཏོན་ན་བདེ་བ་ཅན་གྱི་ཞིང་ཁམས་སྐྱེ་རྒྱུར་ཐེ་ཚོམ་མེད་ཟེར་ནས་ཞིང་བསྒྲུབ་ཆེན་མོ་ཟེར་བ་ཞིག་འཚོགས་བཞིན་པ་ནི། དེང་སང་རྒྱ་ནག་ནང་མི་མང་མགོ་བསྐོར་གཏོན་མཁན་གྲྭ་རྫུན་དང་བླ་རྫུན་མང་པོས་ཀྱང་མ་ཎི་ཁྲི་གཉིས་བཏོན་ན་ངན་སོང་དུ་མི་འགྲོ་བ་ངས་ཁག་ཐེག་བྱེད་ཐུབ་ཟེར་བ་དང་། གཏེར་སོགས་ཕུལ་ན་ཕྱུག་པོ་ཆགས་པ་དང་། ཚེ་ཐར་བཏང་ན་ཚེ་རིང་བ། རྡོ་དྲིལ་དང་དཔེ་ཆ་ལག་ཏུ་འཆང་བ་ཙམ་གྱིས་གྲོལ་བ་སོགས་བཤད་ནས་མགོ་བསྐོར་གཏོང་བཞིན་པ་དང་གཞན་ཁྱད་པར་གང་ཡང་མེད། ད་དེ་ཙམ་བྱོས།

8. ་ཧ་ཧ་་་་་ཚུལ་བློའི་སྐད་ཆ་དེ་ལ་བལྟས་ན་ཤེས་ཡོན་མེད་པའི་རྟགས་མང་པོ་མཐོང་ཡ་འདུག བསྡུས་གྲྭ་ཟེར་ན་ཅི་ཡིན་ཅང་ཧ་གོ་བཞིན་ཡོད་ཟོལ་མི་འདུག་ག བསྡུས་གྲྭ་བལྟ་མཁན་དགེ་ལུགས་པ་ཚོ་ཤོག་བུའི་ངོས་སུ་བྲིས་པའི་སྟག་རེད་མདོག་མདོག་ཤུགས་བསྟན་བྱས་འདུག་ག་་་་ཧཧཧ

   གོང་གི་སྐད་ཆ་དེ་དག་ལ་དགག་པས་ཆར་པ་འབབ་འབབ་བྱེད་འོང་གི་རེད་འདོད། དགག་པ་བརྒྱབ་ཡ་ལས་སླ་མོ་དེ་འདྲ་རེད་ཤག་་་་་་ཧཧཧ

9. དགེ་ལུགས་པས་རྣམ་མཁྱེན་མི་རྟག་པ་རེད་ཅེས་བཤད་ཀྱི་ཡོད་པར་བདེན་་་་ཚུལ་བློའི་རང་ལུགས་བྱས་ན་རྣམ་མཁྱེན་རྟག་པ་རེད་དམ། ཧཧཧ་་་་་རྙིང་མ་བའི་རང་ལུགས་བྱས་ན་རྣམ་མཁྱེན་རྟག་པ་རེད་དམ་མི་རྟག་པ་རེད། ལན་རེ་ཡོད་ན་གསུང་རོགས་བྱོས།

10. རྫ་ཚེ་བཀྲ་ཡིས་ཕབ་སྒྱུར་བྱས་པ་འདི་ཅུང་ཡིད་ཆེས་བྱེད་དཀའ་མོ་འདྲ་ཞིག་རེད། སྔོན་མར་མཁན་པོ་བསོད་དར་གྱི་ཡེ་ཤུའི་འཁྲུངས་སྐར་ལ་དགག་པའི་རྒྱ་ཡིག་ཞིག་ཕབ་སྒྱུར་བྱས་པ་ཡིན་ཟེར་ནས་ཁ་བརྡའི་ཐོག་ཏུ་ལུང་རྟོགད་དང་རྫ་ཚེ་བཀྲ་གཉིས་ཀྱིས་བཀོད་སོང་། རྗེས་སུ་རྫུན་རེད་འདུག མཁན་པོ་བསོད་དར་ཀྱི་རྩོམ་ཡིག་རེད་མི་འདུག བྱས་ཙང་་་མཁན་པོ་ཚུལ་བློ་ཁོ་རང་གི་གསུངས་འདི་བཀོད་ན་ཡིད་ཆེས་ཆོག་པ་ལས་་་་གཞན་ཡིད་ཆེས་ཏོག་ཙམ་ཁག་པོ་རེད། ཁ་བརྡའི་ཐོག་གི་དྲ་པ་ཚོས་ཤེས་དགོས་པའི་གནད་དོན་རེད།

11. བོན་གྱི་བླ་མ་ཞིག་གིས་འདི་ལྟར་གསུངས་འདུག །

    རྩོད་པའི་རྒྱ་མཚོ་གཏིང་ཟབ་བརྒལ་མིན་ན།
    འཆད་པ་རིན་ཆེན་གླིང་དུ་མི་ཕྱིན་པས།
    རྩོམ་པ་ནོར་བུའི་མཛོད་ལ་སྤྱོད་བྱར་ཅི།
    དེའི་ཕྱིར་ཀུན་གྱིས་ཚུལ་འདིར་འཇུག་པར་རིགས། །

12. དོ་སྣང་གནང་རིན་མི་འདུག་ལོ

13. རྙིང་མ་པ་ལ་གནའ་སྔ་ནས་བསྡུས་གྲྭ་སྦྱང་བའི་ལམ་སྲོལ་མི་འདུག་ལ་དུས་ད་ཡང་མི་དགོས། བསྡུས་གྲྭ་འི་བདག་པོ་དགེ་ལུགས་པ་ཚོས་བསྡུས་གྲྭ་སྦྱང་ཤོག གཞན་ལ་ཇུས་གཏོག་བྱེད་ཀི་མ་འདུག

14. སྙིང་མ་པ་ཚོས་རྩོད་པ་མང་པོ་བརྒྱབ་ན་ཁོང་ཚོའི་སྔགས་རྫོགས་གཞུང་ལུགས་ཀྱི་ཉམས་ལེན་ལ་གནོད་སྐྱོན་ཡོང་གི་ཡོད་པ་སྔ་རབས་ནས་བླ་མ་མང་པོས་གསུངས་གནང་བ་དེ་ཧ་ཅང་ངོ་མཚར་ཆེན་པོ་རེད། བླ་མ་དེ་ཚོས་གསུངས་ཚུལ་ག་འདྲ་བྱས་ནས་གསུངས་འདུག་དེ་ཚོ་ཡག་པོ་ཤེས་དགོས་ཀྱི་ཡོད།
    ཡིན་ནའང་དེང་སང་གི་སྙིང་མ་འདི་ཚོས་ཕྱག་རྫོགས་དབུ་གསུམ་ལྟ་བ་གཅིག་ཡིན་པར་འདོད་ཀྱི་ཡོད་སྐད་རེད། དེ་ལྟར་དུ་འདོད་པ་ཡིན་ན། བསྡུས་གྲྭ་དང་རྟགས་རིགས་བློ་རིག་གི་རྣམ་བཞག་དེ་ཚོས་གནོད་སའི་གཞི་ལྟ་སྒོམ་དེ་ནི་གཅིག་པ་ཡིན་སོང་དུས། ད་གནོད་བྱེད་དེས་གནོད་རྒྱུ་ཟེར་ཆེན་པོ་རང་ཨ་ཡོད་ན།
    བསྡུས་གྲྭ་དང་རྟགས་རིགས་བློ་རིག་གི་རྣམ་བཞག་འདི་ཚོ་སྦྱང་ཐུབ་པ་ཡིན་ན་དགེ་མཚན་ལས་གནོད་སྐྱོན་ཡོད་པར་ཡེ་ནས་མི་འདོད། ཡིན་ནའང་དེ་སྔ་བསྒྲིགས་པའི་ཚད་མ་དང་བློ་རིག་གི་རྣམ་བཞག་འདི་ཚོས་སྔགས་རྫོགས་ཀྱི་གཞུང་ལུགས་སམ་ལྟ་བ་དངོས་དེ་གཏན་ལ་འབེབ་བྱེད་ལ་ནུས་པ་དེ་ཙམ་མེད་པ་ལྟ་བུར་སྣང། ཅིས་ན་གཞུང་ལུགས་ཀྱི་འདོད་ཚུལ་གང་ཞིག་འབད་དེ་ཐ་དད་དུ་གྱུར་བས་སོ། ལྟ་བ་གཏན་ལ་འབེབ་མ་ཐུབ་ན་ཉམས་ལེན་རྒྱུད་ལ་སྦྱོར་མི་ཐུབ། ཉམས་ལེན་རྒྱུད་ལ་སྦྱར་མ་ཐུབ་དུས་དགོས་པ་དེ་ཙམ་མེད་པ་ཞིག་ངང་གིས་མཐོང་གི་ཡོད་པ་རེད། བསྡུས་གྲྭ་མང་པོ་བརྩད་ནས་བསྡད་ན་དུས་ཚོད་འཕྲོག་བརླག་རེད་ཟེར་བ་ནི་སྐད་ཆ་ཧ་ཅང་ཆུང་ཆུང་རེད། དེ་སྐད་ཆ་དངོས་གནས་དེ་མ་རེད། ང་ཚོས་ཤེས་དགོས་པ་དེ་ནི་སྐད་ཆ་དངོས་གནས་ཐུག་ས་དེ་གང་ཡིན་པ་ཤེས་དགོས་ཀྱི་ཡོད། རྣམ་བཞག་འདི་ཚོ་ངེས་པར་དུ་མཁྱེན་དགོས། །

15. བོད་བཞུགས་མཁན་པོ་འཇིགས་མེད་ཕུན་ཚོགས་མཆོག་གིས། ༸གོང་ས་མཆོག་མཇལ་ཁ་དེ་ཆེན་པོ་གཟིགས་པ་རེད། མི་རབས་གཉིས་པའི་མཁན་པོས། དེ་གལ་ཆེན་པོ་མིན་པར་བརྩིས་པ་འདིས། ང་ལ་བློ་དྭོགས་ཅིག་ཤར་བཞིན་ཡོད། དེ་མིན་རང་ལུགས་རྙིང་ཆོས་ཉར་བ་ལ། བཀའ་བསྟན་ཡང་། མ་ལྟ་ཟེར་ན་ཡང་། འགན་འཁུར་ཁོ་རེའི་རང་དབང་རེད། ལགས་མ་རེད་པེ།

16. རྫ་ཚེས་ཚུལ་བློའི་ལམ་སྟོན་ཟབ་མོ་ཡིག་ཐོག་ཏུ་ཕབ་སྟེ་བཀྲམ་པ་ཤིན་ཏུ་དྲིན་ཆེ། དེ་མིན་འགའ་ཞིག་གིས་ཚུལ་བློས་དེ་ལྟ་བུ་ཞིག་གསུངས་མེད་ཟེར། ཁ་ཤས་ཀྱིས་ངན་རབས་བཤད། མགོ་རྨོངས་མཁན་ནི་མི་མང་རེད། ད་ནི་གསལ་པོ་ཆགས་སོང་། གསུངས་པར་མ་ཟད། ཅུང་ཙམ་་་་་་། འོན་ཀྱང་། ཚུལ་བློར་དགོངས་གཞི་ཟབ་མོ་ཞིག་གམ་དམིགས་ཡུལ་ངེས་ཅན་ཞིག་ཡོད་ངེས། གང་ལྟར་རྫ་ཚེ་ལ་བཀའ་དྲིན་ཆེ་སླར་ཡང་ཞུ།

17. བསྟན་པ་ཡང་དག་དང་སྟོན་པ་སྐྱོན་མེད་དུ་སྒྲུབ་པའི་རིགས་པ་ནི་ལེགས་ལྡན་དང་ཕྱོགས་ཀྱི་གླང་བོ་ཡབ་སྲས་ཀྱི་གཞུང་ལས་རྒྱས་པ་མི་སྣང་བས་ཕྱཱ་བའི་རིགས་ལམ་གྱི་ཆུ་མགོ་གང་ལ་ཐུག་ས་ནི་ཚད་མ་སྡེ་བདུན་མདོ་དང་བཅས་ལ་ལགས་ན།  རང་རེའི་ཤིང་རྟ་ཆེན་པོ་དེ་དག་གི་རྣམ་དཔྱོད་ནི་ཟླ་མེད་པ་མཐོང་ཐུབ་ལ། བཀའ་དྲིན་ཆེན་པོ་ཡིན་པའི་ཚུལ་དེ་ལ་བསམ་ན་ནི་མིག་ཆུ་རང་དབང་མེད་པར་འཆོར་བ་ཞིག་འོང་ངེས་ཡིན་པས་བླུན་པོ་དག་བག་ཡོད་པར་གྱིས་ཤིག་་་

18. སྔར་བཤད་པ་ལྟར། སྔ་འགྱུར་ལུགས་ལ་བསྡུས་གྲྭ་དང་ཚད་མ་སོ་སོར་བརྩི། ཕྱོགས་གླང་ཆོས་གྲགས་ཀྱི་ཚད་མ་རིགས་པ་ཤིན་ཏུ་གལ་ཆེན་བྱེད། བོད་དུ་ཚད་མ་རིགས་པ་ཐོག་མར་སྤེལ་མཁན་མཁན་ཆེན་ཞི་བ་འཚོ་རྙིང་མའི་བསྟན་པ་དབུ་འཛུག་མཁན་རེད། རོང་ཀློང་རྣམས་ཀྱི་བཞེད་པ་དབུ་ཚད་སེངྒེ་འཇིང་བསྣོལ་དགོས་པར་བཤད། ཀློང་ཆེན་པ་ལ་ཚད་མའི་དེ་ཁོ་ན་ཉིད་བསྡུས་པའི་གཞུང་ཡོད། མི་ཕམ་ལ་རིག་གཏེར་དང་། རྣམ་འགྲེལ་མཆན་། བསྡུས་ཚན་སོགས་བཞུགས། དེ་ལ་རྙིང་མའི་ཡང་སློབ་སྦྱོང་གནང་། །རྩོད་པ་བྱེད་ཚུལ་ཡང་ཡིན་ཡང་། རྩོད་པའི་ཤན་འབྱེད་ལས། རང་ཉིད་རྒྱལ་བར་འདོད་པའི་ཆགས་པ་དང་། གཞན་དག་ཕམ་པར་འདོད་པའི་ཞེ་སྡང་དང་། །རང་གཞན་གྲུབ་མཐའི་གཞུང་ལ་རྨོངས་པ་གསུམ། རྩོད་པའི་བསམ་པ་དུག་ཅན་ཡིན་པས་སྤོངས། །ཞེས་པ་ལྟར། གཞི་ཀུན་སློང་ཕན་སེམས་ཀྱིས་ཟིན་པ། སྦྱོར་བ་ལུས་ངག་གི་མ་གུས་པ་སྤང་བ། མཐར་འབྲས་ཐེ་ཚོམ་སེལ་བ་ཞིག་དགོས་ཞེས་འཇུ་མི་ཕམ་པ་སོགས་ཀྱི་ཞལ་རྒྱུན་དུ་བཞུགས། རྟོག་གེའི་ཚིག་འཁྲི་ཁོ་ནས་ཚར་གཅོད་ནུས་པ་རིགས་པ་ལ་མཁས་པ་ལས། དཔེ་ཆ་ལ་མཁས་པར་མི་བརྩི། རྙིང་མའི་བསྡུས་གྲྭའི་ངོས་འཛིན། བསྡུས་གྲྭའི་དྲུག་སྒྲ་སོགས་ཤེས་པས་འགྲིག་གཙོ་བོ་བྱས་ནས་རྩོད་མི་དགོས་ཟེར། རྩོད་གཞིའི་སྟེང་དུ་དྲུག་སྒྲའི་ནུས་པ་བརྒྱ་དང་གཅིག་བརྩི་བཞག་བྱེད་པ་སོགས་འདི་གལ་ཆེན་མི་བྱེད། མདོ་ཕྱོགས་ལ་བེད་སྤྱོད་ཆེར་མི་གནང་། སྔགས་ཕྱོགས་ལ་རིགས་པ་དང་གཏན་ཚིག་ཡང་དག་ལས། རྩོད་པ་ལྷུར་ལེན་པའི་བསྡུས་གྲྭའི་རིགས་པ་བཀོལ་མི་རུང་བར་སྨྲ། ཟབ་མོའི་གནས་ལ་རྟོག་གེའི་རིགས་པས་མཇལ་ན་རྩ་ལྷུང་བཅུ་གཅིག་པ་འབྱུང་བས། གསང་བ་སྔགས་ཉམས་སུ་ལེན་པའི་ཆོས་གྲྭ་དང་། སྒྲུབ་སྡེ། སྒོམས་གྲྭ། སྔགས་གྲྭ་སོགས་ལ་བཤད་པ་བྱེད་སྐབས། ཚིག་གསལ་བོ། དོན་མ་འདྲེས་པ། བླ་མ་བརྒྱུད་པའི་ཞལ་རྒྱུན་ཅི་བཞིན་པ། ཡི་གེ་གླེག་བམ། ཚིག་དོན་རེ་རེ་ནས་གུས་པ་དང་བཅས་པའི་སྒོ་ནས་འཆད་པ་ལས་དཔྱད་པ་ཐལ་མི་ཆེ་བར་བཤད། དེ་ཆོས་གྲྭ་སོ་སོའི་ཁྱད་ཆོས་འདོན་ཚུལ་ཡིན་པས་དེ་ག་རང་དུ་འཇོག་པ་ལས་གཅིག་སྡུད་བྱེད་དགོས་པ་ཀྱང་མི་འདུག་སྙམ།
    ༡༽མཁན་ཆེན་ཚུལ་ཁྲིམས་བློ་གྲོས་ཀྱིས་བཀའ་ལན་གང་གནང་ཕྱི་ནང་གཉིས་རེ་ཡོད་པའི་མགོ་བདེའི་གཏམ་མིན་པར་ལྷག་བསམ་གཙང་མས་ཐུགས་ལ་ཤར་ཚད་སྨྲ་བ་དང་། ཕན་ཐོགས་པ་གཙོ་བོ་ལས་རྩོད་པ་ལྷུར་ལེན་པ་མི་གནང་། དེ་བཞིན་རང་ཉིད་ལ་ཀུན་གྱིས་བཀུར་བའི་ཆེད་དུ་ཁ་བདེ་དང་གཞན་ངོ་འཛིན་པའི་གཏམ་སྙན། གྲགས་ཅན་རྣམས་ཀྱི་རྗེས་སུ་འབྲངས་ཏེ་རང་ཉིད་ཀྱི་སྟོབས་དང་དབང་ཐང་རྒྱ་བསྐྱེད་ཆེད་དུ་ཆེན་པོའི་་དཔུང་སྒྲིགས་མི་གནང་། ཀུན་ལ་འཇུག་པ་བདེ་བའི་ལམ་ཁ་གཉེར་མ་ཤེས་པ་དང་མ་ཐུབ་པ་མིན་ཀྱང་ཤ་ཚ་དང་སྙིང་ཉེ་བས་ཅི་མཛད་གཞན་ཕན་ཤ་སྟག་ཡིན་པར་བླ་རུང་གི་མཁན་པོ་གྲྭ་མང་རྣམས་ལ་ཡོངས་སུ་གྲགས། བྱ་བ་རེ་སྤེལ་ཚེ་རང་ཉིད་ལ་སྐུར་འདེབས། ཁ་སྨོད་ཡོང་བ། ཁེ་ཕན་མེད་པ་གསལ་བོ་དགོངས་བཞིན། ཉམས་ཆུང་མི་སེར། ཉམས་ཆུང་སློབ་གཉེར་པ། ཉམས་ཆུང་དུད་འགྲོ་རྣམས་ཀྱི་མགྲིན་ཚབ་བྱས་ཏེ་ཕྱག་ལས་གནང་བཞིན་ཡོད་པ་རྒྱུས་ཡོད་ཀུན་ལ་ཤིན་ཏུ་གསལ་བས་རྒྱུས་ཅི་ཙམ་ཡོད་པ་དེ་ཙམ་གྱིས་གུས་པ་འཕེལ་ཞེས་ཡོངས་སུ་གྲགས། ༢༽ཞལ་སློབ། བཀའ་བརྒྱུད། རྙིང་མ། ཇོ་ནང་། ས་སྐྱ། དགེ་ལུགས་སོགས་ཀྱི་སློབ་མ་མང་། བོད་མི་མང་ལོ་ཆུང་ཁྲོད་ཀུན་གྱིས་བཀུར་བའི་གྲྭ་བ་ལོ་གཞོན་ཨང་དང་པོ་དེ་རེད། ཁོང་ལ་ལྟོས་བཅས་ཀྱི་བཀའ་བརྒྱུད་དང་ཇོ་ནང་པའི་མཁན་པོ་རྣམས་ལ་བཀའ་སློབ་གནང་པར་འགལ་བ་མེད་སྙམ། བཀའ་བརྒྱུད་པའི་མཁན་པོའི་ཁྲོད་ཁོང་ལྟ་བུའི་བཀའ་བརྒྱུད་ཀྱི་སློབ་མ་གྲངས་མང་པོ། ལོ་ནས་ལོའི་བར་དཀའ་ལས་བརྒྱབ་ནས་སྐྱོང་མཁན་དཀོན་པོ་རེད། དེ་བཞིན་མཁན་པོ་ཞིག་ལ་བཀའ་བརྒྱུད་སློབ་མ་མང་ཤོས་རེད་ཅེས་བཤད་ཀྱང་སྐྱོན་དུ་མི་འགྱུར། ཆོས་བརྒྱུད་དང་རིགས་རུས་ཀྱི་འབྲེལ་བ་བྱས་ན་སོ་སོའི་དབུ་འཛིན་དེ་གཙོ་བོ་ཡིན་པ་སྨོས་མེད་ལ། ཆོས་ཀྱི་བཀའ་དྲིན་གྱིས་ངོས་ནས་བྱས་ན་རང་ཉིད་ལ་བླང་དོར་གྱི་མིག་འབྱེད་པའི་དཔེ་ཁྲིད་ཀྱི་བཤེས་ཉེན་གཙོ་བོར་བརྩི་བས། སློབ་དཔོན་གྱིས་རང་གི་སློབ་བུར་སྙིང་གཏམ་གནང་བར་གཞན་ལ་ཐེ་གཏོགས་ཅི་ཡོད། ༣༽ཁམས་ཕྱོགས་ཀྱི་རྙིང་མའི་བླ་སྤྲུལ་དགེ་འདུན་པ་བརྒྱ་ཆའི་80་ཙམ་ཁོང་ལ་ཆོས་འབྲེལ་ཡོད་ཅིང་། རྙིང་མའི་བསྟན་བདག་ཏུ་འཁོད་པ་ལ་དཀའ་བ་མེད་མོད། ཁོང་ལ་ཁྲི་བ་སོགས་ཀྱི་ཐུགས་བཞེད་མེད་པ་དང་། བོད་ནང་ཁུལ་དུ་ཕྱག་ལས་རྒྱ་ཆེ་བས་ཕེབས་མི་བདེ་བ། གང་འགྲོ་གཞན་དབང་དུ་གྱུར། སྣ་ཐག་གཞུང་ཆེན་པོས་འཛིན་པ་སོགས་ཀྱིས་གདན་འདྲེན་ཞུ་མཁན་ཤིན་ཏུ་མང་ཡང་རེ་ཞིག་བཞག་གནང་པ་རེད། གང་བཤད་པ་ཆགས་སྡང་འཔེལ་བའི་རྒྱུ་རུ་མ་གྱུར་ཅིག །

19. ནམ་རྒྱུན་རྫ་ཚེ་འདི་ཅུང་གཟུར་པོར་གནས་པ་ཅིག་ལ་ངོས་འཛིན་ཡོད། ད་རེས་ཁོས་་དགེ་ལུགས་པས་རྣམ་མཁྱེན་མི་རྟག་པ་རེད་ཟེར་གི་ཡོད་པ་རེད་ཟེར་ནས་ཡིག་ཐོག་ལ་ཕབ་སྟངས་ལ་བལྟས་ན་ཁོ་ལ་གླེན་རྟགས་ཅུང་ཞིག་མེད་དམ་སྙམ་པ་ཞིག་ཀྱང་འདུག གང་ལྟར་རྫ་ཚེས་མ་བསྒྱུར་ན་ཡང་མགོ་ལོག་གི་སྐད་ང་ཚོས་ཡང་གོ་གི་ཡོད། གང་ལྟར་འདི་ནི་སོ་སོས་ཨམ་ཆོག་གབ་ནས་དྲིལ་བུ་རྐུ་པའི་དཔེ་ལས་མ་འདས་པས་གད་མོ་ཤོར་ཡ་རང་རེད།

20. རྣམ་མཁྱེན་རྟག་མི་རྟག་གང་ཡིན་རྩོད་པ་ཞིག་བྱེད་ན་གང་འདྲ་འདུག་གམ། ཚིག་སྦམ་པོས་ས་ཆོད་ཁག་པོ་རེད། དེ་ནས་བསྡུས་གྲྭ་དགོས་དང་མི་དགོས་ཀྱི་གནད་དོན་ཐག་ཆོད་བྱེད་ཐུབ་ཀྱི་རེད་བསམ།།

21. ཁྱུང་སེ་ལགས། འདི་རྣམ་མཁྱེན་རྟག་དང་མི་རྟག་གི་རྩོད་པ་ཞིག་མ་རེད། རྫ་ཚེས་ཚུལ་བློའི་གཏམ་ཁ་བསྒྱུར་ཐབས་ཀྱི་གཡོ་བྱུས་ཞིག་རེད། གསལ་པོར་བཤད་ན་ཚུལ་བློས་དགེ་ལུགས་པས་ཇོ་ནང་པ་མི་སྟེགས་རེད་ཟེར་གི་ཡོད་ནི་རེད་ཟེར་བ་འདི། རྫ་ཚེས་ཁ་བསྒྱུར་དེ་དགེ་ལུགས་པས་རྣམ་མཁྱེན་མི་རྟག་པ་རེད་ཟེར་གི་ཡོད་ནི་རེད་ཞེས་ཡིག་ཐོག་ལ་ཕབ་པ་རེད། མདོར་ན་འདི་ནི་རྫ་ཚེས་གླེན་རྟགས་བསྟན་པ་ཞིག་རེད་མ་གཏོགས་འདི་ཡིས་ཚུལ་བློ་དག་འབུད་བྱེད་མི་ཐུབ་ལ་གནས་ཚུལ་ཚབས་ཆུང་དུ་ཡང་གཏོང་མི་ཐུབ།

22. འོ་ཡ་མ་ལགས་དེ་འདྲ་ད་ཨའི་ཡིན་ན། ཚུལ་བློས་དགེ་ལུགས་པས་ཇོ་ནང་པ་མུ་སྟེགས་རེད་ཅེས་བཤད་ཡོད་དམ

23. བསྡུས་གྲྭ་དགོས་མིན་སྐོར་གྱི་བགྲོ་གླེང་ལ་དཔྱད་པ།
    2016-01-23 དོ་སྣང་☞ 谢塘梅朵

    བསྡུས་གྲྭ་དགོས་མིན་སྐོར་གྱི་བགྲོ་གླེང་ལ་དཔྱད་པ།

    རྩོམ་པ་པོ།  ཐུབ་བསྟན་ཕུན་ཚོགས།

       ཡང་རྩེར་འཛེགས་པའི་སྐས་ཐེམ་བཞིན། །
       ཀླུ་ཐོགས་གཉིས་ཀྱི་དགོངས་ཀློང་དུ། །
       རིག་པའི་གཤོག་རྩལ་བརྐྱང་འདོད་ན། །
       རིགས་ལམ་རླུང་གི་རྟ་ལ་ཞོན། །
     
       བདེ་བླག་ཉིད་དུ་རིག་གཞུང་རྟོགས། །
       བརྡ་དག་ཚིག་གསལ་བོད་སྐད་གཙང་། །
       དུས་གསུམ་འཛོལ་མེད་འབྲི་འདོད་ན། །
       སུམ་རྟགས་གཉིས་ཀྱི་གཞུང་ལ་སྦྱོངས། །
     
       སྒེག་པའི་དབྱངས་ཀྱི་ཚིག་སྦྱོར་སྙན། །
       ཉམས་འགྱུར་འབུམ་གྱིས་བརྗོད་དོན་ཕྱུག །
       ལད་ཟློས་སྤང་པའི་རང་སྐད་ཀྱི། །
       རྩོམ་རིག་འདོད་ན་སྙན་གཞུང་ལྟོས། །
     
             ཉེ་ཆར་མཁན་པོ་ཚུལ་ཁྲིམས་བློ་གྲོས་ཀྱིས་བསྡུས་གྲྭ་སྦྱོང་པ་ལ་དགོས་པ་མེད་པའི་སྐོར་གསུངས་པ་རེད། ཅེས་དེ་ལ་འགྲིག་མིན་སྐོར་མང་པོ་ཞིག་འཕྲིན་ཕྲན་བརྒྱུད་ནས་སོ་སོའི་ལྟ་ཚུལ་རྣམས་བཤད་ཅིང་འདུག      དེ་ལ་བརྟེན་ནས་ཕྲན་གྱིས་ཀྱང་དེང་དུས་བོད་ཀྱི་རིག་གཞུང་གང་ཞིག་དགོས་པ་དང་། གང་ཞིག་མི་དགོས་པ་ཡིན་པ་བཤད་མཁན་དག་ལ་རང་གི་ལྟ་ཚུལ་ཅུང་ཟད་གླེང་བར།།
             གཅིག བསྡུས་གྲྭ་དགོས་མིན་གྱི་སྐོར།

          སྤྱིར་བཏང་མཁན་པོ་ཚུལ་ཁྲིམས་བློ་གྲོས་ལྟ་བུ་མཁས་པ་ཆེན་པོ་ཞིག་གིས་བསྡུས་གྲྭ་བསླབ་མི་དགོས་པ་གསུང་མི་སྲིད་པ་བསམ་བྱུང་། གཅིག་བྱས་ནས་ཁོང་གི་གསུང་ལ་མི་རྣམས་ཀྱིས་གོ་ནོར་ཐེབས་པའང་ཡིན་སྲིད། ཡང་ན་དགོངས་པ་དང་ལྡེམ་དགོངས་ཀྱི་གསུང་ཡིན་ན་དོན་དག་ཁ་ཁ་རེད། དཔེར་ན། ཚད་མ་རྣམ་འགྲེལ་དང་། རྣམ་ངེས་སོགས་ཀྱི་ལུང་བཏོན་པ་ལ་བསྡུས་གྲྭ་ཤེས་མི་དགོས་པ་དང་། ཡང་ན་དག་ཡིག་གི་ངོས་ནས་ཚད་མའི་རིག་གཞུང་ལ་ཚིག་འགྲེལ་བྱ་བ་ལ་བསྡུས་གྲྭ་ཤེས་མི་དགོས་པ་གསུངས་སྲིད་པ་རེད། དེ་ལྟར་མིན་ན་ཚད་མ་རིག་པ་ནི་གཞུང་ཆེན་རྣམས་ཀྱི་དགོངས་པ་གཏན་ལ་ཕབས་པའི་རིགས་ལམ་མེད་ཐབས་མེད་པ་ཞིག་ཡིན་ལ། རིགས་ལམ་དེ་བྱང་ཆུབ་པར་ཞིག་དགོས་ན་བསྡུས་གྲྭར་མ་སྦྱང་ན་རིགས་ལམ་བྱང་པ་ཞིག་ཡོང་མི་སྲིད་པ་ཞིག་རེད། དེས་ན་དབུ་ཕར་འདུལ་མཛོད་ཀྱི་གཞུང་རྣམས་མཐར་ཕྱིན་པ་ཞིག་གོ་དགོས་ན་ཚད་མའི་རིག་པ་བྱང་ཆུབ་པ་ཞིག་ཤེས་དགོས་ལ། ཚད་མའི་རིག་པ་བྱང་ཆུབ་པ་ཞིག་དགོས་ན་ངེས་པར་དུ་བསྡུས་གྲྭ་ནས་མགོ་བཙུགས་ཏེ་སྦྱང་དགོས། སྤྱིར་ཚད་མ་རིག་པ་ནི་མཚན་ཉིད་རིག་པ་ཡིན་ཞིང་། དེ་ནི་གནའ་བོའི་ཆོས་ཀྱི་རིག་གཞུང་དང་། དེང་རབས་ཚན་རིག་རིག་གཞུང་། སྲིད་འབྱོར་རིག་གསུམ་གྱི་རིག་པའི་གཞུང་ལུགས་ཐམས་ཅད་ཀྱི་སྒྲོམ་གཞི་ཞིག་ཡིན། ཚད་མ་རིག་པའི་སྒྲོམ་གཞིའི་ནང་དུ་ཐུན་མོང་དང་། ཐུན་མིན་གྱི་རིག་གནས་ཐམས་ཅད་ལ་སོ་སོའི་རིག་པའི་སྤྱི་འགྲོས་（公式） རེ་གཏན་འབེབ་བྱས་ཡོད་པ་རེད། དེས་ནས་ཚད་མ་རིག་པའི་གཞུང་ལུགས་ལ་མཁས་པ་མཐར་ཕྱིན་པ་ཞིག་བྱ་དགོས་ན། ཐོག་མར་བསྡུས་གྲྭ་བྱང་ཆུབ་པ་ཞིག་མ་བྱང་ན་ཚད་མ་མཁས་པ་ཡོང་ཐབས་མེད་དེ། ཚད་མ་རིག་པའི་བརྗོད་བྱ་གཙོ་བོ་གང་ཡིན་མདོར་བསྡུས་ནས་བཤད་ན། ཤེས་བྱའི་ཡུལ།（客观存在） ཤེས་བྱེད་བློ།（主观意识） བློ་དང་ཡུལ་གཉིས་འབྲེལ་བ་གྲུབ་ཚུལ་དང་གསུམ་གྱི་ནང་དུ་འདུས་ཡོད་པ་རེད། ང་ཚོ་སོ་སྐྱེའི་ས་ལ་གནས་པའི་གང་ཟག་རྣམས་ཀྱིས། དེ་དག་སོ་སོའི་རང་བཞིན་དང་ཆོས་ཉིད་གསལ་པོར་བཤད་དགོས་ན། དེ་དག་གི་མཚན་གཞི་དང་། མཚན་ཉིད་ཀྱི་མཚན་མཚོན་ཁྱབ་པ་སྒོ་བརྒྱད་ཀྱི་འབྲེལ་བ་ངེས་དགོས། གལ་སྲིད་བསྡུས་གྲྭའི་རིགས་ལམ་ཡང་དག་པ་མི་ཤེས་པ་ཞིག་གིས་ཚད་མ་རྣམ་འགྲེལ་དང་། རྣམ་ངེས་སོགས་ཚད་མའི་གཞུང་ལུགས་ཡང་དག་པ་དང་། མཐར་ཕྱིན་པ་ཞིག་བཤད་མི་ཐུབ་པ་ནི་ཤེས་སླ། འོན་ཀྱང་ཚད་མ་རྣམ་འགྲེལ་སོགས་ཀྱི་ལུང་བཏོན་པ་དང་། ཚིག་འགྲེལ་འདྲ་པོའི་ཐོག་ནས་འཆད་ཁྲིད་གནང་ན་བསྡུས་གྲྭ་མ་ཤེས་ནའང་འགྲིག་འགྲོ་བགྱི་རེད། །
           མདོར་བསྡུས་ན། ཚད་མའི་གཞུང་བསླབ་པ་ལ་ཐོག་མར་བསྡུས་གྲྭ་མི་དགོས་ཟེར་བ་ནི། སུམ་རྟགས་དག་གསུམ་སྦྱོང་པ་ལ་ཐོག་མར་ཀ་ཁའི་སྦྱོར་ཀློག་མཐར་ཕྱིན་པ་ཞིག་བསླབ་མི་དགོས་ཟེར་བ་དང་དོན་གཅིག    

         གཉིས། སུམ་རྟགས་དང་སྙན་ངག་མི་དགོས་ཟེར་བ།

        དེང་དུས་སློབ་གྲྭའི་ནང་དུ་སུམ་རྟགས་དང་སྙན་ངག་དགོས་མཁོ་མི་ཆེ་ཟེར་བའི་དགེ་རྒན་ཁག་གཅིག་བྱུང་དང་འབྱུང་བཞིན་པ་རེད། འཛམ་བུ་གླིང་གི་མི་རིགས་མི་འདྲ་བ་སུ་ཡིན་ཀྱང་སློབ་གྲྭའི་ནང་དུ་ཐོག་མར་སྦྱོང་རྒྱུ་ནི་སྐད་ཡིག་དང་། སུམ་རྟགས་དག་གསུམ་ཡིན་པར་སྨོས་མ་དགོས། དུས་རབས་གོང་མའི་ལོ་རབས་བརྒྱད་ཅུ་པའི་ནང་བོད་ཡིག་ཐོག་མར་སླར་གསོའི་སྐབས་སུ་བོད་ཁམས་ཡོངས་ལ་སུམ་རྟགས་དག་གསུམ་དར་རྒྱས་ཡག་པོ་བྱུང་བ་དེས་བོད་ཡིག་འཕེལ་རྒྱས་ལ་ཕན་ཐོག་ཆེན་པོ་བྱུང་ཡོད། དེང་དུས་སློབ་གྲྭ་ཆེན་མོའི་ནང་དུ་དགེ་རྒན་འགའ་ཞིག་གིས་རང་གིས་མི་ཤེས་པ་རྒྱུ་མཚན་དུ་བྱས་ཏེ། སུམ་རྟགས་དང་། སྙན་ངག་ལ་དགོས་པ་མེད་ཚུལ་བཤད་པས་སློབ་མ་ཚོས་ཀྱང་དེ་དག་ལ་དོ་སྣང་མ་བྱས་པའི་དབང་གིས། དེང་དུས་ཁམས་དང་ཨ་མདོའི་ཕྱོགས་ནས་ཡིག་ནོར་ཁ་བ་འབབ་འབབ་ཡོང་གི་འདུག སློབ་གྲྭ་ཆེན་མོ་བ་ལྟ་ཅི། རབ་འབྱམས་པ་དང་། འབུམ་རམས་པ་རྣམས་ཀྱི་དཔྱད་རྩོམ་ནང་དུ་ཡིག་ནོར་དང་། ལྷག་པར་དུ་བྱ་ཚིག་རྣམས་ནི་འདས་མ་འོངས་གོ་ལྡོག་སྟེ་འབྲི་མཁན་ཇེ་མང་དུ་འགྲོ་བ་འདི་ནི་དགེ་རྒན་ཁག་གཅིག་གིས་རང་གི་མི་ཤེས་པ་རྒྱུ་མཚན་ཏུ་བྱས་ཏེ།

24. སུམ་རྟགས་དང་། སྙན་ངག་ལ་དགོས་པ་མེད་ཚུལ་བཤད་པས་སློབ་མ་ཚོས་ཀྱང་དེ་དག་ལ་དོ་སྣང་མ་བྱས་པའི་དབང་གིས། དེང་དུས་ཁམས་དང་ཨ་མདོའི་ཕྱོགས་ནས་ཡིག་ནོར་ཁ་བ་འབབ་འབབ་ཡོང་གི་འདུག སློབ་གྲྭ་ཆེན་མོ་བ་ལྟ་ཅི། རབ་འབྱམས་པ་དང་། འབུམ་རམས་པ་རྣམས་ཀྱི་དཔྱད་རྩོམ་ནང་དུ་ཡིག་ནོར་དང་། ལྷག་པར་དུ་བྱ་ཚིག་རྣམས་ནི་འདས་མ་འོངས་གོ་ལྡོག་སྟེ་འབྲི་མཁན་ཇེ་མང་དུ་འགྲོ་བ་འདི་ནི་དགེ་རྒན་ཁག་གཅིག་གིས་རང་གི་མི་ཤེས་པ་རྒྱུ་མཚན་ཏུ་བྱས་ཏེ། སུམ་རྟགས་དག་གསུམ་གལ་ཆེན་མ་ཡིན་པར་བཤད་པས། གཞོན་ནུ་རྣམས་ཀྱིས་སུམ་རྟགས་དག་གསུམ་སྣང་མེད་དུ་བཏང་། ཁ་ནས་གང་བྱུང་གི་ཡུལ་སྐད་ཡིག་ཐོག་ཏུ་བྲིས་པ་འདི་ཡིས། མ་འོངས་པར་བོད་ཀྱི་སྤྱི་སྐད་ཕར་ཞོགས། སྤྱིར་ཡིག་ཀྱང་མེད་པར་འགྱུར་བའི་ཉེན་ཁ་ལ་སླེབས་འདུག་པས། ཀུན་ཀྱིས་བརྩི་བཀུར་བྱ་ཡུལ་བླ་སྤྲུལ་དང་། དགེ་རྒན་རྣམ་པས་ཐུགས་བསམ་ལེགས་པར་བཞེས་ནས་གསུང་བཤད་གནང་ན་ལེགས་པར་སེམས། །
      དེ་བཞིན་དུ་དེང་དུས་སློབ་གྲྭའི་དགེ་རྒན་གྱི་ཁྲོད་དུ་སྙན་ངག་མེ་ལོང་མའི་གཞུང་ལ་མ་སྦྱོང་ནའང་རྩོམ་རིག་གསར་གཏོད་དང་། སྙན་རྩོམ་འབྲི་བའི་ལས་ཀ་བྱེད་ཐུབ་པའི་བཤད་སྲོལ་ཞིག་དར་ཁྱབ་ཡོད་འདུག དེ་ནི་ས་སྐྱ་པཎྜི་ཏས། 
     
           སྣ་ཡི་ཚབ་དང་ཉོས་པའི་བུ། །
           གཡར་པོའི་རྒྱན་དང་བརྐུས་པའི་ནོར། །
           སློབ་དཔོན་མེད་པའི་རིག་པ་རྣམས། །
           ཡོད་ཀྱང་གཞན་གྱིས་བརྩི་བ་མེད། 

             ཅེས་གསུངས་པ་ལྟར། རིག་པའི་གཞུང་ལུགས་ལ་སློབ་གཉེར་བྱེད་མ་མྱོང་པའི་རྩོམ་པ་པོ་ཞིག་ཡོད་ན་དེ་ནི་གཞན་གྱིས་རྩོམ་ཆོས་སྙན་འཇེབས་ཅན་དག་ལ་དཔེ་བལྟས་ནས་ལད་ཟློས་ཀྱི་རྩོམ་ཡིག་ཡིན་པ་སྨོས་མ་དགོས་པ་རེད། གལ་སྲིད་རྒྱ་ཡིག་གི་རྩོམ་དེབ་ཁ་ཤས་བཀླགས། དེ་ལ་དཔེ་བལྟས་པའམ་དེའི་དོན་བོད་ཡིག་ཏུ་བསྒྱུར་ནས་རང་རྩོམ་ཡིན་ཟོལ་གྱིས་འགྲེམས་སྤེལ་བྱས་པ་ནི་རང་རྩོམ་དངོས་མིན་པས། དེ་ལ་རྩོམ་པ་པོའི་སྒྲ་དོན་ཡང་འཇུག་མི་སྲིད་དེ། ས་སྐྱ་པཎྜི་ཏས།  

           མ་དཔྱད་པ་ལས་དོན་གྲུབ་པ། །
           བྱུང་ཡང་མཛངས་པ་སུ་ཞིག་བརྩི། །
           སྲིན་འབུ་དག་གིས་ཟོས་པའི་རྗེས། །
           ཡི་གེ་བྱུང་ཡང་ཡིག་མཁན་མིན། 

            ཞེས་གསུངས་པ་ལྟར་རོ། དེས་ན་སྙན་ངག་མེ་ལོང་མ་ནི་སྙན་ངག་གི་དཔེ་བརྗོད་རྩོམ་ཚུལ་གཅིག་པུ་མ་ཡིན་པ། རྩོམ་རིག་གི་རིག་པའི་གཞུང་ལུགས་ཤིག་ཡིན་ཏེ། དེའི་ནང་དུ་རྩོམ་རིག་གི་ལུས་དང་། རྒྱན། སྐྱོན་སེལ་བཅས་སྙན་རྩོམ་གྱི་རིག་གཞུང་ཆ་ཚང་ཡོད་པའི་ཕྱིར་ན།   བོད་ཡིག་གི་རྩོམ་པ་པོ་གྲགས་ཆེན་ཞིག་ཏུ་འགྱུར་བར་འདོད་པའི་གང་ཟག་གང་ཞིག    ངེས་པར་དུ་སྙན་ངག་མེ་ལོང་མའི་གཞུང་མཐར་ཕྱིན་པ་ཞིག་བསླབ་དགོས།  །

            ཁོ་བོའི་བསམ་ཚུལ་ནི། གནའ་བོའི་སྲོལ་རྒྱུན་རིག་གནས་དང་། དེང་རབས་ཚན་རིག་གཞུང་ལུགས་གང་ཡིན་ཡང་ཚང་མ་རང་རང་གི་ཆེད་ལས་དང་བསྟུན་ནས་འབད་བརྩོན་གྱིས་སྦྱང་དགོས་པ་ནི་སྨོས་མ་དགོས་པ་རེད། དེ་ལས་བོད་ཀྱི་སྐད་ཡིག་ཐོག་ནས་ཆོས་དང་འཇིག་རྟེན་གང་ཞིག་གི་རིག་གཞུང་བསླབ་དགོས་ན། ཐོག་མར་སུམ་རྟགས་དག་གསུམ་དང་། སྙན་ངག ཚད་མའི་རིགས་ལམ་བཅས་ཕུལ་དུ་བྱུང་བ་ཞིག་མ་ཤེས་ཐབས་མེད། དེ་དག་མི་ཤེས་པ་དག་གིས་རིག་གཞུང་གསར་རྙིང་གང་ལ་བསླབ་དགོས་ཀྱང་དཀའ་ངལ་ཆེ་བ་མ་ཟད། བོད་ཡིག་ཐོག་ལས་ཀ་བསྒྲུབ་དགོས་ནའང་སྤུས་ཚད་ཅན་གྱི་ལས་ཀ་བསྒྲུབ་མི་ཐུབ་པ་ནི་བཤད་མ་དགོས་པ་རེད། །

           མ་ཤེས་པ་ནི་དགོས་མེད་མིན། །
            མ་མཐོང་པ་ནི་མེད་པ་མིན། །
            མ་བརྟག་པ་ནི་ཤེས་རབ་མིན། །
            མ་རིག་པ་ལ་དོགས་ཟོན་མཛོད། །

            ཅེས་པ་བོད་ཀྱི་རིག་གནས་ཀྱི་འབྱུང་ཁུངས་སློབ་གྲྭ་དང་དགོན་པའི་ནང་དུ་རིག་གནས་འཕེལ་རྒྱས་ལ་གནོད་པའི་ལབ་གླེང་གི་གཏམ་ཉོག་འགའ་ཞིག་ཐོས་པར་རྐྱེན་བྱས་ནས་བོད་ཀྱི་རིག་གནས་ཐམས་ཅད་ཀྱི་རྨང་གཞི་སུམ་རྟགས་དག་གསུམ། སྙན་ངག བསྡུས་གྲྭ་བཅས་ཀྱི་རིན་ཐང་མདོར་ཙམ་བརྗོད་པ་འདི་ནི་རྒྱལ་ཁམས་པ་ཐུབ་བསྟན་ཕུན་ཚོགས་དེས། སྤྱི་ལོ་༢༠༡༦ལོའི་ཟླ་བ་དང་པོའི་ཚེས་༢༣ཉིན་རྒྱལ་ནག་པེ་ཅིང་གྲོང་གི་ཀྲུང་དབྱང་མི་རིགས་སློབ་གྲྭ་ཆེན་མོའི་རང་ཤག་ནས་སྤྲིངས་སོ།།

25. ་་་་་་་་་་ ་བོད་ཀྱི་རིག་གནས་ཐམས་ཅད་ཀྱི་རྨང་གཞི་སུམ་རྟགས་དག་གསུམ། སྙན་ངག བསྡུས་གྲྭ་བཅས་ཀྱི་རིན་ཐང་མདོར་ཙམ་བརྗོད་པ་འདི་ནི་རྒྱལ་ཁམས་པ་ཐུབ་བསྟན་ཕུན་ཚོགས་དེས། སྤྱི་ལོ་༢༠༡༦ལོའི་ཟླ་བ་དང་པོའི་ཚེས་༢༣ཉིན་རྒྱལ་ནག་པེ་ཅིང་གྲོང་གི་ཀྲུང་དབྱང་མི་རིགས་སློབ་གྲྭ་ཆེན་མོའི་རང་ཤག་ནས་སྤྲིངས་སོ།། ་་་་་་་་་་

26. བོད་ཕྱི་ནང་གཉིས་ཀར་ལོ་རེ་ནས་ལོ་རེར་བོད་ཀྱི་རིག་གནས་རྩ་བ་ནས་སྦྱོང་བརྩོན་བྱེད་འདོད་མེད་མཁན་གྱི་གཞོན་སྐྱེས་ཇི་སྙེད་ཅིག་གྱུར་དང་འགྱུར་བཞིན་འདུག །ཁྱེད་རྣམ་པས་དེ་ཚོ་མཐོང་གི་འདུག་གམ། མཁན་པོ་ཚུལ་ཁྲིམས་བློ་གྲོས་མཆོག་གིས་ཁོང་ཚོའི་ཆོས་སྒར་དུ་བསྡུས་གྲྭ་འོས་འཚམས་ཤིག་ལས་སྦྱོང་མི་དགོས་ཚུལ་དང་སྦྱོང་སྟངས་དེའང་དོན་ལྡན་ཞིག་ལས་རང་རྒྱལ་གཞན་ཕམ་གྱི་ཆེད་དུ་བྱ་རྒྱུ་མེད་ཚུལ་གསུངས་པར་གཤེ་གཤེ་དགོས་དོན་གང་ཡང་མི་འདུག་པ། མ་གཞི་རྣམ་པ་ཚོ་ལ་རྒྱབ་ལྗོངས་དམིགས་བསལ་ཅན་མོ་འདྲ་ཡོད་ན་ནི་བདག་གིས་མི་ཤེས་སོ། ཧི་ཧི་ཧི་ཧི་ཧི་ཧི་ཧི་་་་

27. བསྡུས་གྲྭའི་ཕན་ཐོགས་ཡོད་མེད་ལ་བསམ་བློ་གཉིས་གཏོང་དགོས། རྩོད་རིག་གོང་དུ་འཕེལ་བ་ལ་ཕན་ཐོགས་ཡོད་ཀྱང་ནང་ཆོས་ཀྱི་ཉམས་ལེན་དང་འདུལ་བའི་ཀུན་སྤྱོད། དེ་བཞིན་དད་པ་དང་དག་སྣང་། ཐ་ན་བོད་ཀྱི་སུམ་རྟགས་དག་གསུམ་ཙམ་ཡར་རྒྱས་འགྲོ་བ་ལ་ཕན་ཐོགས་ཁག་པོ་རེད། བཙན་བྱོལ་ནང་སློབ་གྲྭ་ཁག་ལ་ལོ་ངོ་ལྔ་བཅུ་ལྷག་གི་རིང་བསྡུས་གྲྭ་བསླབ་པ་རེད། ད་ཆར་གྲུབ་འབྲས་གང་ཐོབ་འདུག་ལེགས་པ་གཟིགས་དང་ཤེས་འོང་། གདན་སའི་གྲྭ་པ་ལ་མི་མང་གི་མཐོང་དང་ཆབ་འཇོག་ག་ཚོད་འདུག རྒྱང་རིང་ལ་བལྟ་མི་དགོས། གདན་སའི་ཉེ་འཁོར་ན་ཡོད་པའི་བོད་པ་དང་རྒྱ་གར་བ་ལ་དྲིས་དང་ཤེས། ད་ལྟར་བཙན་བྱོལ་བ་ཚོས་ཕྱི་རྒྱལ་ཁག་ལ་འགྲོ་དགོས་སྐབས་དཀའ་ངལ་ག་ཚོད་མི་འདུག་གམ། སྤྱིར་བསྡུས་གྲྭ་ཤེས་ན་བཟང་མོད། ཡིན་ནའང་ད་ཆར་དགོས་ངེས་པ་དེ་ནང་ཆོས་ཀྱི་བསླབ་བྱ་བཟང་པོ་རྣམས་ལ་གོམ་བཅུག་རྒྱུ་དེ་གལ་ཆེན་པོར་ཆགས་ཡོད། བསྡུས་གྲྭ་ཤེས་ན་གདན་ལུགས་ལ་མཁས་ན་དོལ་རྒྱལ་བརྟེན་མཁན་ཚོས་དེ་འདྲ་རྨོངས་དོན་གང་ཡིན་ནམ། བསྡུས་གྲྭ་ལ་བྱངས་ན་ལས་འབྲས་ལ་ཡིད་ཆེས་འཕེར་བ་བདེན་ན་དགའ་ལྡན་ཁྲི་ཐོགས་བརྒྱ་དང་གཅིག་པ་ལུགས་རིགས་རྣམ་རྒྱལ་དོལ་ཚོགས་ནང་དུ་འཛུལ། རྒྱ་ནག་ལ་མགོ་འབུལ། དགའ་ལྡན་ཁྲི་པའི་གོ་གནད་ཆེད་དོལ་རྒྱལ་སྤངས་ཟིན་ཟེར་ན་ཡོད་ཚད་མགོ་བསྐོར་བཏང་དོན་གང་ཡིན་ནམ།