དུས་སུ་སྨིན་པའི་ཆར་བརྡ།

ཨེ་མ་ཧོ།

 
ན་མོ་གུ་རུ་བུདྡྷ་ཛྙྰ་ན་ཡེ།
དཔྱིད་ཀྱི་དཔལ་མོས་དྲི་བསུང་ངང་གིས་ཐུལ།།
རྐང་འཐུང་མངར་མོས་ནོར་འཛིན་སྲོག་རྩ་འཚོ།།
ནུབ་གླིང་གཡང་དཀར་འཕེལ་ཁ་རྒྱས་པའི་དུས།།
གངས་རིའི་ལྗོངས་སུ་ལུ་གུའི་མེ་ཏོག་བཞད།།
གངས་རིའི་སེངྒེས་རྒྱ་སྟག་གཞོང་རྩར་བལྡགས།།
དུད་ཆང་བདག་པོས་དཔོན་གྱི་གོ་ས་བཟུང་།།
བཙན་པོའི་བུ་རྒྱུད་གྲོགས་མེད་ཁེར་རྐྱང་ལྷག།
ཁ་བ་དབེན་པའི་ལོ་ནག་འབྱུང་བཞི་འཁྲུགས།།
གངས་དཀར་མཐོ་བརྗིད་པདྨའི་དགའ་ཚལ་ཉིད།།
ཀུན་མཁྱེན་ཉི་མས་གསོས་པའི་འབྲུ་དྲུག་རིགས།།
ལོ་ཡག་སྙེ་མ་དགུང་ལ་ཕྱུར་མཐོང་ཚེ།།
ཤེས་མེད་འབྱུང་བྱའི་ཚོགས་རྣམ་བག་ཡོད་ཀྱིས།།
མཁས་བཙུན་གྲུབ་པའི་དབང་ཕྱུག་མ་ཎི་ཀ།
རིགས་པའི་རྟུལ་ཞུགས་ཀུན་མཁྱེན་རྒྱལ་བའི་དཔལ།།
གངས་ཅན་སྡེ་བཞི་སྤེལ་བའི་བཀའ་དྲིན་མཆོག།
རྟེན་འབྲེལ་རྒྱལ་རྔས་སྣང་སྲིད་ཀུན་ཁྱབ་གདལ།།

ཅེས་པ་འདི་ཡང་རབ་གནས་ཤིང་ལུག་རྒྱལ་ཟླའི་དུས་ཚེས་དགེ་བར་ཤེས་རབ་རྒྱལ་པོས་ངོར་ཤྲྰི་ཨེ་མ་ཧོས་དབྱིན་ཡུལ་ཀུན་བཟང་ཆོས་གླིང་ནས་བགྱིས་པར་དགེའོ།། །།