འཇམ་གཅེས།
སེང་ཕྲུག་ལགས། མི་ཚེར་ཁྱི་ལྟོ་ལ་རེ་བའི་སྤྲང་ཁྱི་དག་གི་མིག་སྔར་ཁྱེད་ཉིད་ཀྲོང་་ངེར་འགྲེང་བ་ནི་ཇི་འདྲའི་གཟི་བརྗིད་ཅིག་རེད། ད་ནི་ངོ་མཚར་དང་གཟི་བརྗིད་དེའི་འོག་ནས་ཁྱེད་ནི་མི་རིགས་ཀྱི་ཕྱིར་དུ་ནམ་ཡང་གསོན་དགོས་པ་ལས་འཆི་མི་རུང་། ངོ་མ་འཆི་མི་རུང་། ཁྱི་ལྡོམ་རྔ་ཟླུམ་པ་དང་དེའི་བཀོད་འདོམས་པ་དག་ལ་མཚོན་ན་ཁྱོད་ནི་འཆི་དགོས་པ་ལས་ནམ་ཡང་གསོན་མི་རུང་། དེ་བཞིན་གསེར་མདོག་གི་ཉི་མ་སེར་པོ་ཞིག་གི་སྤྱན་སྔ་རུ་ཁྱེད་རང་ནམ་ཡང་གསོན་དགོས་པ་ལས་འཆི་མི་རུང་།
མདོར་ན། ཁྱོད་འཆི་རྒྱུ་ནི་སྤྱང་ཀི་ལྟོགས་པའི་མངོན་འདོད་ཡིན་ལ། ཁྱོད་གསོན་དགོས་པ་ནི་བླ་མ་བཟང་པོའི་ཐུགས་རེ་ཡང་ཡིན། ད་དུང་ང་དང་ང་འདྲ་བའི་ཤ་ཁྲག་རུས་གསུམ་གཅིག་ལས་ཆད་ཅིང་འདས་མ་ད་གསུམ་གྱི་ལས་དབང་ཡོད་ཚད་སྤྱི་མཐུན་གྱི་བཀོད་ཇུས་གཅིག་གི་འོག་ཏུ་གནས་པའི་མགོ་ནག་ས་ཡ་དྲུག་གི་ངུ་ངག་གི་ལམ་ནས་རེ་འབོད་ཀྱང་ཡིན།
ཁྱོད་འཆི་ན་འདོད་མཁན་ནི་ལ་རྒྱའི་ཟས་དང་ངོ་ཚའི་གོས་ཀྱིས་དབུལ་ཞིང་ཕོངས་ནས་མུག་ཤི་ཐེབས་ལ་ཉེ་བའི་ཁྱི་སྤྱང་ཚོགས་ཁག་ཡིན་ལ། ཁྱེད་སོང་བའི་ཤུལ་དུ་སྐྱོ་བའི་མིག་ཆུས་ངོ་གདོང་བརླན་གཤེར་དང་གདུང་ཤུགས་དྲག་པོས་སྙིང་དམར་དུམ་བུར་གཤག་ཡུལ་ནི་རིགས་རུས་དང་གདུང་རྒྱུད་གཅིག་ལས་ཆད་པའི་ཉམ་ཆུང་སྤུན་ཟླ་དག་ཡིན། ཁྱོད་གསོན་པོར་གནས་པའི་རྐྱེན་གྱིས་སྙིང་ལ་ཟུག་གཟེར་རྒྱག་མཁན་ནི་ཁྱི་སྤྱང་དང་ཁྱི་སྤྱང་ཁྱུ་གཅིག་གི་བཀོད་འདོམས་པ་ཚོ་ཡིན་པས། ད་འོ་ན་ཁྱེད་ཉིད་གསོན་འདོད་དམ་འཆི་འདོད།
སེང་ཕྲུག་ལགས། ཁྱེད་ཀྱི་གཡུ་རལ་གངས་རིའི་ལྗོངས་སུ་གནས་པའི་སེང་ཕྲུག་ཚོའི་རྒྱན་དུ་མཁོ་བས་ནམ་ཡང་མཛེས་ཉམས་ལྡན་དགོས། སེང་ཕྲུག་ལགས། ཁྱེད་ཀྱིས་གཡུ་རལ་བསིགས་ཐེངས་གཅིག་དང་། ངར་སྐད་སྒྲོག་ཐེངས་གཅིག་གིས་འཇིག་རྟེན་འདི་ཡོམ་ཡོམ་བསྒུལ་སོང་ལ། དགྲ་སྙིང་དེ་ཉིལ་ཉིལ་དཀྲུགས་སོང་། ད་ནི་སུས་ཀྱང་བསུབ་མི་ནུས་པའི་གསེར་མདོག་གི་ཞབས་རྗེས་མངོན་པར་བཀྲ་བ་ཞིག་ས་སྟེང་དུ་བཞག་སོང་བས་ང་ཚོའི་གློ་བ་ཧ་ཅང་དགའ་ཡོད། ངོ་མ་དགའ་ཡོད།
ད་ནི་ང་ཚོས་རེ་བ་དང་ཡིད་ཆེས་ཉག་གཅིག་ནི་ཁྱེད་དང་ཁྱེད་ལྟ་བུ་སེང་ཕྲུག་དག་སྔར་ལྟར་གཡུ་རལ་རྒྱས་ཤིང་བཅུ་ཕྲག་རིག་པའི་གནས་ལྔའི་འོ་མཚོ་ཡི་ཕ་རོལ་དུ་བརྩོན་པ་དྲག་པོའི་རླུང་ཤུགས་ཀྱིས་དེད་པའི་མཁྱེན་དཔྱོད་ཀྱི་གྲུ་གཟིངས་ལ་བརྟེན་ནས་བགྲོད་དགོས་པ་ཁོ་ན་ཡིན་པ་ལས་ང་ཚོ་དང་འབྲལ་དགོས་པ་ནམ་ཡང་མིན། སྐུ་ཉིད་ནམ་ཡང་རྒྱལ་བར་སྨོན།།