—-རྫ་ཚེ་རིང་བཀྲ་ཤིས།
དེ་རིང་ཉིན་གུང་གུས་པའི་སྐད་འཕྲིན་རྒྱབ་ལོགས་སུ་བོད་ཀྱི་རིག་གནས་ལ་བྱས་པ་ཅན་གྱི་སློབ་གསོ་བ་ར་རྒྱ་འཇིགས་མེད་རྒྱལ་མཚན་ལ་རེ་བའི་གསེར་གྱི་གཟེངས་རྟགས་ཐོབ་པར་འཚམས་འདྲི་ཞིག་ཞུས་པར། ངོ་མི་ཤེས་པའི་དྲ་གྲོགས་ཤིག་གིས། ༼གོ་ཚད་རིག་ཚད་དྲྭ་རྒྱབ་ལ་འཇོག་ན་གླེན་རྟགས་ཡིན།༽ཞེས་པའི་བསམ་ཚུལ་ཞིག་བྲིས་གནང་འདུག་པའི་ལན་དུ།
ང་ནི་མི་ཧ་ཅང་དཀྱུས་མ་ཞིག་ཡིན།
ངས་རང་ཉིད་ཀྱི་དཀྱུས་མའི་རྣམ་འགྱུར་འདི་རྒྱུན་སྐྱོང་ཐུབ་ན་ཡིད་ཚིམ་པ་ཡིན།
རང་གི་འཕྲིན་ཕྲན་གྱི་རྒྱབ་ལ་གང་འཇོག་དགོས་པ་དེ་ང་རང་གིས་ཧ་ཅང་གསལ་པོ་ཤེས་ཀྱི་ཡོད།
སྐབས་འགར། ངའི་བར་སྟོང་ནས་ཁྱེད་དང་གཏན་ནས་འབྲེལ་བ་མེད་པ་དང་། སྤྱི་ཚོགས་ལ་བཟང་ཕྱོགས་ཀྱི་ཤུགས་རྐྱེན་བྱེད་པའི་བརྗོད་བྱ་གང་ཡང་མེད་པའང་ཐོན་སྲིད།
སྐབས་འགར་ངས་རང་ཉིད་དང་རང་ཉིད་ཀྱི་ལས་དོན་ཁྱབ་སྒྲོགས་བྱེད་སྲིད།
སྐབས་དེ་དང་དེ་དག་ཏུ། ང་རེ་དོགས་ཀྱི་འཚོ་བ་ཉི་ཚེ་བའི་བག་ཆགས་ཀྱི་ཀློང་ན་ཡོད་པ་ཡིན།
སྐབས་མང་པོ་ཞིག་ཏུ། ཡིད་ཆེས་ཀྱི་ཁེངས་པའི་སྐད་ཆ་རྣལ་མ་རེ་ཁུར་ནས་སླེབས་པའང་སྲིད། དེ་ཡང་དངོས་འབྲེལ་དུ་གཟིགས་ན་ཆོག
གང་ལྟར། ངས་ནམ་ཡང་རང་ཉིད་སྒམ་ཚུགས་གཏོད་མཁན་ཞིག་ཏུ་མི་འགྱུར་བར་ཤོག་ཅེས་སྨོན་ལམ་འདེབས།
གལ་ཏེ་མི་ཞིག་གིས། ཁྱོད་རང་མ་འདྲ་བ་ཞིག་རེད་ཅེས་ལབ་པ་དེས་རང་ཉིད་ཀྱི་ངོ་ཏི་གང་ཡིན་པ་དེ་མ་བརྗེད་པ་ཞིག་ཏུ་སྨོན་ལམ་འདེབས།
ཕྱོགས་རིས་དང་ཆགས་སྡང་རགས་པ་དག་རྒྱལ་མཚམས་བརྒལ་ཏེ་ངའི་སྔུན་དུ་སླེབས་དུས། རང་ཉིད་ཀྱི་རྡོག་ས་སྔར་བཞིན་བརྟན་པའི་སྨོན་ལམ་འདེབས།
ངས་དྲང་བདེན་གྱི་མིག་གིས་འཇིག་རྟེན་ལ་ལྟ་བའི་སྨོན་ལམ་འདེབས།
འོན་ཀྱང་།
ཁྱོད་ཀྱིས་ངའི་དྲ་ངོས་ནས་མཐོང་མི་ཐུབ་པ་ནི་མི་ལ་གནོད་པ་དང་དམའ་འབེབས་བྱེད་པའི་རྒྱུ་ཆ་དེ་ཚོ་ཡིན་པར་སྨོན།
ཁྱོད་ཀྱིས་ངའི་དྲ་ངོས་ནས་མཐོང་མི་ཐུབ་པ་ནི་ཆགས་སྡང་དང་ཕྱོགས་རིས་རགས་པ་དག་ཡིན་པར་སྨོན།
ཁྱོད་ཀྱིས་ངའི་དྲ་ངོས་ནས་མཐོང་མི་ཐུབ་པ་ནི་རིག་གཞུང་གི་ཚེ་སྲོག་གཏན་ཏུ་ཤི་བའི་བེམ་པོ་དག་མིན་པར་སྨོན།
༼༢༠༡༦/༢/༢༽
ཁྱེད་རང་གིས་ཉེ་ཆར་བསྡུས་གྲྭ་དགོས་མིན་གྱི་གསུང་བཤད་སྐོར་དེ་སྒྲ་ཕབ་གྱིས་དྲྭ་གྲོགས་མང་པོའི་ཅལ་འདྲོགས་ཞི་བར་བྱས་པ་དེ་གས་ཁྱེད་རང་མི་གཤིས་དང་འགན་ཁུར་ཡག་ཙམ་ཡོད་པ་མཚོན་སོང་སྙམ་པས་ཡིད་རངས་ཞུ། འོན་ཀྱང་ངས་ནི་ཁ་གདངས་ཚད་ཚང་མ་ལ་ལན་འདེབས་དགོས་དོན་མེད་སྙམ།
ཡག་མོ་གདའ།